14
Yeisu Banae yada wai-menai Tamada wagaine.
1 Yeisu yana tonogalayavo wagaidiya givona, “Keke wana aseuloulolo.†Iyo 14:27 Yaubada wavetumaganena, ada Iya kaduwe wana vetumaganeku. 2 Kamaku yana manuwa wagaine ani ebamiya moyaina imiyamiya. Kai keke ida miyami aga keke gada matawemi anafaiweya. Ada Iya ganaunau ke yami ebamiya gana kidewedewedi. 3 E, gananau yami ebamiya gana kidewedewedi ayo ganayewa-vagileku gana vagaulemi kananau, e ada gadedeku Iya gana miyamiya wagaine, kadu imi nodi kanamiya. 4 Ada fafali-nai wagaine ganaunau ani anawai waalamanena.”
5 Tomasi givonena, givona, “Kauveya, gadedeku unaunau ani ime keke ada alamane, e ada gavaiyamu anaga wai-nai ana alamane?”
6 Yeisu givonena, givonaga, “Iya Tauku wai-menai†Efes 2:18 ada Iyayeku vona velemoena vuvuna,†1Iyo 5:20 ada kaduwe yawai-vagata vuvuna.†Iyo 11:25 Keke seyana gaito mali wai wagaine ginana Tamada wagaine, taine-mowa Iyayeku akukaibe wagaikuya. 7 Kai wada alamaneku velemoena, kaduwe Kamaku wada alamanena. Ada tova malinai ke gina naunau, Banae waalamanena kadu bade waitana.”
8 Filipi givonaga, “Kauveya, Tama-moe uda vewalema e au amafaiweya.”
9 Yeisu givonena, givonaga, “Filipi, tova manamanawe-moena Iya amimwatuguya nodi kamiyamiya nonogana aimo keke uda alamaneku? Gavakaliva bade Iya giitaku ani tauna Tamada bademowa giitana.†Kol 1:15 Gavaiyamu-yo uvona, ‘Tama-moe uda vewalema’? 10 Gavaiyamu, kai keke wada vetumagana vaita Iya Kamaku wagaine gamiyamiya, ada Banae Kamaku ani Iya wagaikuya gimiyamiya? Vona-dina gavonayedi wagaimiya, ani keke Iya Tauku yaku nuwanuwa wagaine, aku ielai Banae Kamaku wagaine-deya,†Iyo 12:49 Banae gimiyamiya wagaikuya ke yana gugai gigugugaiyedi. 11 Wana vetumaganeku tova-nai gavona Iya gamiyamiya Kamaku wagaine ada Banae Kamaku gimiyamiya Iya wagaikuya. Aku kai keke amifaiweya yaku vona wana vetumagane aga au yaku gugai-dina ebameyasidobodobo gafaisewadi ani faidiya wana vetumaganeku.†Iyo 10:38 12 Vona velemoena, gavona wagaimiya, banae gaito gina vetuvetumagana wagaikuya ani gugai-dina Iya gagugugaiyedi anafaiweya, kadu bana ginagadi. Ada gugai ebameyasidobodobo gina gugaiyedi ani lakai-moedi ayo gugai-dina Iya gagugaiyedi, faina tova kabisona babi taidei gana segena aku gana yewaku Kamaku wagaine. 13 Ada gavana wana veola akuyeganeya ani Iya gana faisewana,†Mad 7:7, Iyo 15:7, 16:23-24 e ada Kamaku yana iwakana mamalina Iya Natuna gana ivemogatalina ke kaliva anayegana ina kilakaina. 14 E, kai gavagaitoma faina wana veola akuyeganeya, gana faisewana.
Yeisu givonadabadaba Aluwaluwa Tabuna faina.
15 “Kai wanuwakabubuyeku, aga yaku veimeya wana matawalewaleyedi.†1Iyo 5:3 16 Ada Kamaku gana veolena, ada Banae gina velemi amiTolema†Iyo 14:26, 15:26 anavelu ke Banae gina kwayabumi ada nodi wanamiya-vagata. 17 Taidei Toleme-nai ani Aluwaluwa Tabuna, Banae nuwanuwa velemoena vuvuna.†Iyo 16:13 Aku babi anakalivayavo keke Yaubada ida alamane, ani kadu keke adifaiweya Aluwaluwa Tabuna-nai ina alamane. Keke ida itainana ada keke ida alamane, ada taidei faina keke adifaiweya ina nuwaga. Aku imiyavo ani Banae waalamanena, faina wagaimiya gimiyamiya, ada aimo negenimiya gina miyamiya. 18 Tova-nai gana segemi, keke vaita imi natuwaeda anafaiweya wana miyami ke amitoitaveyabina keke, aku ganaelai wagaimiya. 19 Keke tova manamanawena ada babi anakalivayavo kaduwe keke ina itaku, aku imiyavo ani wana itaitaku. Iyayeku wayawaiku gamiyamiya faina, imiyavo kaduwe wayawaimi wanamiya. 20 Yadayada-nai ganayawa-vagila wagaine, ani wana alamanena Iya gamiyamiya Kamaku wagaine, ada imiyavo kaduwe wamiyamiya wagaikuya, ada Iya kaduwe gamiyamiya wagaimiya.†Iyo 17:21 21 Banae gaito yaku veimeya givai giidibumwaigedi ani banae-nai velemoena ginuwakabubuyeku.†Iyo 15:10 Ada banae ginuwakabubuyeku ani Kamaku gina nuwakabubuyena, ada kaduwe Iya gana nuwakabubuyena ke Iya Tauku gana ivemogataliku tauna kaliva-nai wagaine ke gina alamane-dewedeweku.”
22 Yeisu taidei anafaiweya giifuifufu aku tonogala seyana anayegana Yudasa, banae keke Yudasa Isakaliyota aku wagakoyona, ani givona Yeisu wagaine, givonaga, “Kauveya, gavaiyamu-yo imeyavo gaga wagaimeya Tauni una ivemogatalini aku keke babi anakalivayavo moyaidi wagaidiya?”
23 Yeisu givona, givonaga, “Kai gavakaliva ginuwakabubuyeku, aga bonaku gina abina. Ada Kamaku gina nuwakabubuyena, ada Kamaku ke Iyayeku nodi anaelai ana miyamiya banae wagaine ke nodi anave ebaga.†Ive 3:20 24 Aku gavakaliva keke gida nuwakabubuyeku ani bonaku keke gida abiabi. Taidei vona-dina wanoganogalidi ani Iya keke Tauku yaku vona, aku Kamaku giimiliku ani Banae yana vona.
25 “Iya imi aimo nodi kamiyamiya aku gaitoma taidei gavonayedi wagaimiya. 26 Aku Tolema, Banae Aluwaluwa Tabuna†Iyo 15:26, 16:7 ani Kamaku gina imilina ke yaku kabu gina vaina. Ada gaitoma moyaina gina vewalemi ke nuwami gina talafolena gavana anafaiweya gavonayena wagaimiya.
27 “Iya tova moyaina nuwaniwalova wagaine gamiyamiya, ada yaku nuwaniwalova-nai taidei gana velemi. Ika, Iya gana segemi, aku yaku nuwaniwalova gina miyamiya wagaimiya.†Iyo 16:33, Fip 4:7 Kai babi anakalivayavo adifaiweya nuwaniwalova ina velemi aga nuwaniwalova-nai ani tova maufona wagaine gina avaina. Aku yaku nuwaniwalova gana velemi ani keke ginaavai. E ada taidei faina keke wana aseuloulolo, ada keke wana matauta. 28 Yaku vona wagaimiya bademowa wanogalina, gavona, ‘Iya gana segemi gananau, aku aimo ganayewa-vagileku wagaimiya.’ Ada kai Iya wanuwakabubuyeku aga yakuna Kamaku wagaine faina wada vemwamwala, faina Banae lakai-moena ayo Iyayeku. 29 Ada yaku tauya faina malinai gavonevone-vagaimi muliya-yo gaitoma-moena gina yegemona, e ada tova-nai gina yegemona, wana vetumagana.
30 “Keke aimo nodi kana ifuifufu tova manamanawena, faina babi anakalivayavo aditoveimeya gielaelai, bana Seitani. Banae yana toyogina ani keke maita anafata gina toyogisegeku, 31 aku gavaiyamu Kamaku giveimeyeku anafaiweya ani gagugaiyena tunutunugina, e ada babi anakalivayavo ina alamanena Kamaku ganuwakabubuyena. Wanaelai, fafali taidei kana segena aku kananau.”