Efeso Tovetumagana Yadi Leta Paulo Givetokilumina
Kivemala
Efeso ani melala kaikaiwabuna Eisiya anafafali wagaine, ada anakalivayavo moyaidi iawaege-moedi lukimokimone wagaine. Badi yadi yaubada fwayafwaya vavine anayegana Atemisi, ada yadi manuwa ebaoduodu lakaina gimiyamiya Efeso wagaine.
MeEfeso badi keke meIsileli aku kaduwe meIsileli tufodi wadedeku imiyamiya. Ada taidei leta-nai ananuwanuwa lakaina ani Keliso meIsileli kaduwe badi keke meIsileli giiveseyanidi. Kaduwe, Paulo ekalesiya gaitoma toiye wagaidiya giluvefosedi, tainei ide Keliso vovona aku Banae debaida, kaduwe ide yana manuwa aku Bana manuwa-nai anaunututu, kaduwe ide vaita vavinena anafaiweya aku Banae moganeda.
Vona vesiule. (1:1-2)
Yaubada yana nuwadoga ada yada veseyana Keliso nodi ani faidiya. (1:3 - 3:21)
Veseyana wagaine nodi kana miyamiya. (4:1-16)
Dewa yuyuvana kana dibusoyogena aku kanamiya malina wagaine. (4:17 - 5:20)
Nagi anaveimeya. (5:21-33)
Biyabiyama ada ina ke tama adiveimeya. (6:1-4)
Toveimeyayavo ke togugai yogoyogodiyavo adiveimeya. (6:5-9)
Yaubada yana lokoloko gaviya faina, ada vetalakafoi. (6:10-24)
1
1 Iya Paulo. Yaubada yana nuwanuwa wagaine gidouweku ke gaveafositolo Yeisu Keliso faine. Yaku vesiule imi moyaimi Efeso wagaine,†Gug 18:19-21, 19:1-40, 20:17-38 imiyavo Yaubada yana yoo tabutabumiyavo kadu bademowa Yeisu Keliso nodi waveseyana ke wamiyaveyalata-vagata Banae wagaine. 2 Yaubada Tamada ke yada Kauveya Yeisu Keliso yadi nuwadogeya ina lemelememi ada kaduwe aseasemi ina kikiveniwalovidi.
Yaubada yana nuwadoga ada yada veseyana Keliso nodi ani faidiya.
3 Yaubada kana awadavadavana, Banae yada Kauveya Yeisu Keliso yana Yaubada, kaduwe Tamana. Kana awadavadavana faina giawanuwakabubuyeda, ada wagabameya-deya gaitoma seyana seyana iwakadi giawaegedi aluwaluwada yadi miya iwakana faina, ide Keliso nodi kaveseyana. 4 Muliya-yo Yaubada babi matatabuna gibubuna aku ide gimadu venuwadadaneda e ada ide yegayegadeyavo ke vetavetabuda kana miyamiya, kaduwe keke tamo yada koyona Banae matane.†Efes 5:27, Kol 1:22 Yaubada wa yana nuwakabubu nodi 5 gimadu venuwadadana ke ide gina awavenatuneda Yeisu Keliso wagaine. Taidei anafaiweya gidewa wagaideya faina Banae Tauna yana nuwanuwa, ada gikivemwamwalina. 6 Banae wa yana nuwadoga lakai-vagaina giawanuwakabubuyeda Natu aseasena wagaine. E ada kana awadavadavana kanavona, “O Yaubada, wa ya nuwadoga ulemelemema, ani ina keke wa fatana. Taidei lakai-vagaina ime wagaimeya!” 7-8 Aku ide Keliso nodi kaveseyana wagaine, adaetoyavuga kanuwagana. Yada dewa koyodi faidiya yogoyogodeyavo kamiyamiya aku Keliso dayagine gitutuveobuda, tainei yada koyona analaufata Banae gisena e ada yada koyona-dina Yaubada givenuwaegedi.†Kol 1:14, Lom 3:25 Yana nuwadoga ide wagaideya giavetavetala ani lakai-vagaina! E ada gikivemeyameyaganida ke kana nuwauya gaitoma moyaina wagaidiya ke yana vona velemoena faina nuwada gina malina. 9 Tuwai-moena Tauna nuwainagene ginuwanuwa ke giveimeya, ada tainei yana nuwainage tuwaina-deya sewasewavuyena ani ide wagaideya gikiveyegemonina. Tauna nuwainagene giveimeya vaita yana nuwanuwa-nai gina ivemogatalina Keliso yana gugai wagaine, ada yana nuwanuwa-nai gikivemwamwalina. 10 Ada yana veimeya taidei anafaiweya. Gavatova givenuwadadanena wagaine gilubodana yana ibuibubuna matatabuna gabameya ke babiya ani gina vagauwi-tamwaidi adaToveimeya Keliso wagaine. Taidei anafaiweya yana veimeya-nai gisena, faina Keliso anakaibe-mowa debaida. 11 E, Yaubada Banae gaitoma moyaina gifaifaisewadi yana nuwanuwa anafaiweya, ani nago-moena givenuwadadane-vagaida Banae yana vutuvutuga. Ide Keliso nodi kaveseyana faina, tuwai-moena yana veimeya anafaiweya, ide yana vutuga iwaka-vagaina faina giveimeya-vagata. 12 E ada ime amaduvetumagana Keliso wagaine ani yama dewa wagaidiya Yaubada yana iwakana mamalina ana kiveyegemonina ke moyaidi Banae ina awadavadavana. 13 Ada imi kaduwe anafaiweya. Yana vona velemoena, tainei amikibababala anavaleya iwakana wanogalina ke wavetumagana Keliso wagaine, e ani imi Keliso nodi waveseyana ada Yaubada Aluwaluwa Tabuna-nai givonadabadabayena, ani givelemi ina gitalakilimi imi Banae yana kalivayavo.†2Kol 1:22, Gug 19:2-6 14 Taidei ide adaiyaiyaya vaita aimo adavutuga iwaka-vagaina givonadabadabayena ani kana nuwagana Banae wagaine-deya, ada Aluwaluwa-nai gina miyamiya yana yoo wagaideya analaba aimo yana yoo gikimoneda, ani gina tutuveobu-yabuda koyona wagaine-deya. E ada matatabu-moeda Yaubada yana iwakana mamalina kana awadavadavana.
Paulo giveoveola meEfeso tovetumagana faidiya.
15 Nagona yami vetumagana wasevelavelalaina yada Kauveya Yeisu wagaine, ada kaduwe Yaubada yana kalivayavo wanuwanuwakabubuyedi ani Iya gakaiyanogala. Ada taidei vuvuna-nai 16 gavebutu imi faimiya gavesivesiule kadu keke gada ilova, ada yaku veoveola wagaidiya tova moyaina amiyegana gainainana. 17 Gaveoveola ke yada Kauveya Yeisu Keliso yana Yaubada, Banae iwakana mamali-vagaina vuvuna, ani Aluwaluwana gina velemi e ada nuwami gina kivemalidi ke gina ivemogatalina Yaubada yana nuwanuwa wagaimiya, e ada Banae wana alamanena velemoena. 18 Kaduwe gaveoveola ke nuwami gina kivemalina, e ada Yaubada yana nuwanuwa imi faimiya ani wana alamane-dewedewena. Yana nuwanuwa taidei anafaiweya. Seyana, wana alamanena ani Yaubada givenuwadadanemi ke aimo gavana ginagana iwaka-vagaina faimiya, ani wa yami nuwavetumagana waveitabodebodena. Kaduwe seyana ani ide gavega Yaubada yana kaliva tabutabudeyavo, taine wagaideya adavutuvutuga faina givonadabadabayena, ani vutuvutuga-nai anakaikaiwabu lakai-vagaina! 19 Kaduwe nuwanuwaku wana alamanena vaita Yaubada yana toyogina lakai-vagaina wagaine tova moyaina gifaifaisewa ide anatovetumagana wagaideya. Keke tamo gavana wagaine kana awaluveluveye! Tainei yana toyogina lakai-vagaina wagaine, 20 Yeisu Keliso gisiveyawana alikeya ke aiyatagine giveiyotona gabameya, ivi-nai wa anavemoimoina wagaine.†Ibel 1:3,13 21 Banae gabama getane-mwane givetoga ke gikaiwabu-mowa, e ada tokaiwabu, kaduwe toveimeya, kaduwe totoyogina, kaduwe kauveya tulina tulina ani gikaiwabusege-moedi.†Fip 2:9-10 Kaduwe Banae anayegana lakai-moena, ada gavega adiyegana kaliva ikikilakaidi, badi Keliso gikaiwabusegedi, ada keke vaita taidei tova-nai gagana wagaine aku kaduwe tova mulina nodi.†Kol 2:15 22 Yaubada ani gaitoma matatabuna gisedi Keliso age yavavane, ada Banae givenuwadadanena ke gaitoma matatabuna gina veimeyedi. E ada ide gavega Keliso anatovetumaganayavo ani Banae adaToitaveyabina anakaibe-mowa. 23 E ada ideyavo yana ekalesiya ani vaita Keliso vovona anafaiweya aku Banae ani debaida.†1Kol 11:3, Kol 1:18 Ada ide vovona ani debaida Keliso kaluyabuna, aku Banae Tauna gaitoma moyaina givemagadi fafali matatabuna wagaidiya, ke ide nodi givemaga-moeda ke giluyabuda.