3
1 Kai tamo gaito taide gaitoma-nai faine ginavona, gina vonaga, “Kai badi meIsileli ani Yaubada keke gida awaveiwakanedi vovoda bubuna bwatana anatomogolota faina, aga gava iwakana wagaine meIsileli iveiwakasegedi badi keke meIsileli? Ada gavana anaiwakana tamo gida yegemo vovo bubuna anatomogolota wagaine?” 2 Iya gadavona, “Badiyavo ani meIsileli faina, wai moyaina wagaidiya yadi iwakana inuwanuwagadi. Nagona ani Yaubada Bana wa yana vetumagana Tauna bona-moena gisena badi meIsileli nimadiya ke ina itaveyabina.” **Gavana meIsileli yadi iwakana faina Paulo giifufuyedi ani kaduwe givonaye-vagiledi. (Lom 9:4-5) 3 Aku MeIsileli tufodi Yaubada yana vona keke wa yadi vetumagana ida vemoimoine yadi vonadabadaba anafaiweya. Ada kai tamo gaito gida tolidadana, gidavona, “Badi yadi vonadabadaba Yaubada wagaine ani keke ida itaveyabi faina, gavaiyamu? Ananuwanuwa vaita Yaubada kaduwe Tauna yana vonadabadaba keke gina itaveyabi?” †2Tim 2:13
4 Iya gada lufata, “Keke-bamowa! Au velemoena keke tainei ananuwanuwa anafaiweya. Kai kaliva matatabu-moedi ida vefwayafwaya aku au Yaubada keke maita gida vefwayafwaya. Yana vona matatabuna au tunutunugidi, ada gavaiyamu givona, tainei gigugaiyena. Anafaiweya yana Buki wagaine ivetokilumina givonaga,
‘Yaubada, Oye unavona ada kaliva moyaidi ina itanuwagana vaita ya vona-dina au velemoena. Kai kaliva ina awavekoyoyeni vaita keke udavona venuvenuwadadana tunutunugina yadi koyona faidiya, aga ya vona venuvenuwadadana una seyegemonena ke una veiwaka-tagodi.’ ” †Sam 51:4
5 Aku tamo gaito yana nuwanuwa anafaiweya kaliva-mowa ani ginavona vaita Yaubada yana dewa keke tunutunugina ada ginavona kwavakwava, ginavona, “Kai adewadewa koyona aga tainei iwakana, faina kaliva yama dewa ina itaitana aku Yaubada yana dewa yegayega-vagaina ina maduitana inavona, ‘Yaubada yana dewa ani yegayega-vagaina, keke anafaiweya badi yadi dewa.’ E aku gavaiyamu ada Banae ginuwakoyo wagaideya ada yada dewa koyona faina givematavulogeda? Yana dewa keke tunutunugina. E ada gavaiyamu kada nuwanuwa? Vaita Yaubada Banae kaliva yada dewa koyona faina givematavulogida ani yana dewa keke tunutunugina?”
6 Keke! Au keke-mowa. Keke kanavona vaita Yaubada gigugai tunutunugina. Kai Banae keke tunutunugina, aga keke anafata tomiyababi moyaida gina vevonayavugida ada matavuloga ginasena wagaideya yada dewa faina.
7 Kai tamo gaito gidavona sidamana, gidavona, “Iya yaku vefwayafwaya kaliva iitaitanuwagana aku kadu Yaubada yana vona ani au velemoena iitaitanuwagana. Ada tova-nai ina itaveluveyedi, Yaubada yana vona velemoena imadumaduitana ani mamalina velemoena wagaidiya. E ada Banae anayegana ikikilakaina. Aku gavaiyamu-yo yaku vefwayafwaya Yaubada yana kaiwabu gikivetubugina nonogana Iya aimo vaita tokoyona anafaiweya e ada akulauboda matavuloga gana nuwagana?”
8 Kai taide vona kwavakwava wanuwanuwayedi vaita vona velemoena, e aga au taidei wada vona gagana, “Ime ana koyokoyona e ada yama koyona wagaine kaliva ina itana vaita Yaubada ani iwaka-vagaina.” Taidei nuwanuwa-dina ani velemoena fwaya, aku kaliva tufodi nuwanuwadi akuyegana ina kivekoyona e ada iveveloiku evona vaita gadavona taidei anafaiweya. Badi kaliva-dina ani gilubodadi adimatavuloga ina nuwagana.
Keke seyana gaito toyegayegana Yaubada matane.
9 Kai tainei anafaiweya aga gavaiyamu kadavona? Gavaiyamu yami nuwanuwa, badi meIsileli ani iwaka-vagaidi ayo badi keke meIsileli? Keke tainei anafaiweya. Iya bademowa gamadu vonemi ide moyaida ani adaita seya-moena. Badi meIsileli ada badi keke meIsileli ani moyaida kakoyokoyona,†Lom 3:23 ada yada koyona-dina faidiya Yaubada yana matavuloga ani ide adalauboda. 10 Anafaiweya tova tuwaina ivetokilumina Yaubada yana Buki wagaine, givona,
“Keke seyana gaito yegayegana Yaubada
matane, au keke tamo gaito.
11 Keke seyana gaito nuwana gidamali
Yaubada yana vona velemoena faina.
Keke seyana gaito nuwanuwana Yaubada
gina alamane, keke.
12 Kaliva matatabudi Yaubada yana wai
idibusoyogena, ada taidei yadi dewa-nai wagaine
adiyegana taudiyavo ivegaitoma-kavokavovoyedi.
Keke seyana gaito gida gugai iwakana, au keke
tamo gaito.†Sam 14:1-3, 53:1-3, Tol 7:20
13 Yadi vona moyaina ani koyona e ada
adinogala ani vaita lada magana anafaiweya
giyegeyegemona didikula giamawana ada giafolena wagaine,
ada bonadi ani matatabuna fwaya gaga analoi.†Sam 5:9
Yadi vona moyaina ani vaita tuva golagolana anafaiweya.†Sam 140:3
14 Yadi nuwanuwa koyo-vagaidi faina,
vona koyokoyo wagaine awadi gimaga.†Sam 10:7
15 Badi imamadu manini-mowa ke kaliva
nodi ivemunumunuga evona ina luvealikadi.
16 Gadedeku inaunau ani iluluveyawaliyau
ke kaliva kokoyodiyavo inuwanuwavita-mowa.
17 Badi keke ida alamane gavaiyamu
kaliva nodi ina vetubuiyana ke ina miyaniwalova.†Ais 59:7-8
18 Ada nuwainagediya keke maita
Yaubada ida matause e ada ida vemoimoine.” †Sam 36:1
Ide kaliva yada dewa anafaiweya e ada Yaubada givona anafaiweya ada ivetokilumina yana Buki wagaine.
19 Aku keke wada nuwanuwa vaita vona taidei ani badi keke meIsileli gagana adilauboda. Keke-mowa. Ida badi meIsileli kaduwe adilauboda. Faina kaalamanena ani Yaubada yana veimeya matatabuna, badi veimeya-dina gisedi meIsileli wagaidiya ke ina muliyedi. E aku keke ida muliyedi. Taidei faine kaliva matatabuda gavega babi taide wagaine, veimeya gimiyamiya ke gina vewalayeda vaita wa yada koyona moyaida kana mididi Yaubada matane ada keke maita wa yada seba, au moyaida kana veyamata. 20 Faina Yaubada yana veimeya anamatawalewale wagaine keke tamo gaito ginami yegayegana Yaubada matane, au velemoena keke.†Gal 2:16 Veimeya-nai gimiyamiya ke gikivealamanida kakoyona.
Yada yegayegana Yaubada matane ani Yeisu anavetumagana wagaine.
21 E aku tova malinai yada yegayegana Yaubada matane faine ani wai tulina givemogatalina wagaideya, wai-nai keke Mosese yana veimeya anamatawalewale wagaine gida vevuvu. Taidei wai-nai ani tova tuwaina Mosese givetokiluma faine veimeya-dina Yaubada givelena wagaidiya, ada kaduwe falofitayavo ivetokiluma faine. 22 E, wai-nai vuvuna ani Yeisu anavetumagana. Tova-nai ideyavo Yeisu Keliso kavetumaganena, Yaubada yana yegayegana kavaina, e ada ide faideya givona, “Badi yaku kaliva yegayegadiyavo, keke tamo wa yadi koyona.” Ide matatabuda Keliso kavetumaganena ani wagaideya taidei yegayegana-nai Yaubada giveleveleda,†Lom 1:17 faina Banae wagaine ani keke anatulina kai meIsileli o keke meIsileli.†Lom 3:9 23 Faina ide matatabuda koyona kagugaiyena ada adaita bamubamuida Yaubada yana iwakana mamalina wagaine. Yaubada wa yana iwakana mamalina gimiyamiya, ada ide gilubodada kaduwe yana iwakana mamalina wagaine kada miyamiya, aku ide yada koyona faina, kabamuina. 24 Ide moyaida yada koyona wagaidiya ani vaita yogoyogodeyavo kamiyamiya, ada keke maita yada dewa tunutunugina o kai yada gugai iwakana ayo wagaidiya nuwakalikali kada nuwaga. E aku Yeisu Keliso nodi kaveseyana faina, gitutuveobuda,**Vona-nai ‘gitutuveobuda’ ananuwanuwa ani kaliva moyaidi yadi koyona faina yogoyogodiyavo imiyamiya, e aku Yeisu yawaina giawaegena e ada gina etoyavudi. e ada Yaubada yana nuwadogeya giseda yegayegadeyavo Banae matane.†Efes 2:8 25 Yaubada Yeisu Keliso giseyegemonena kaliva wagaideya ke gina alika e ada yana alika-nai wagaine yada koyona anamatavuloga giwaina. Taidei wagaine Yaubada nuwana gina bubuna ke yana nuwakoyo yada koyona faidiya ani gina avaina.†1Iyo 4:10 E ada kai kana vetumaganena Keliso dayagina yana madu wagaine yada koyona adilaufata giwaina, aga yada koyona-dina adivenuwaega kana nuwagadi. Taidei anafaiweya gigugai e ada gina seyegemonena vaita Tamana yana dewa kaliva wagaidiya ani tunutunugina. Faina tova tuwaina kaliva yadi dewa ani koyona aku auwe Banae giatuvefailedi ada keke gida madulufata, faina Banae gialamanena aimo koyona-dina Keliso gina fatadi taidei yana alika wagaine. 26 E, Yaubada Natuna Yeisu giawaegena alika wagaine kaliva faideya e ada tova malinai yana dewa yegayegana givewaleda ke kana alamanena ani Yaubada yana dewa velemoena yegayegana. Kaduwe, givewaleda vaita Banae analauboda-mowa badi gavega ivetumagana Yeisu wagaine ani yadi koyona gina venuwaegedi ke ginasedi yegayegadiyavo Bana matane.
27 E ada gavaiyamu, adafaiweya taudeyavo kana kilakaida vaita ide yegayegadeyavo Yaubada matane? Keke. Keke-mowa gida lubodada taudeyavo kana davadavada, faina yada yegayegana Yaubada matane ani keke yana veimeya kamatawalewaleyena faina aku velemoena Yeisu anavetumagana wagaine. 28 E ada taidei ifufu-nai ananuwanuwa taidei anafaiweya. Yaubada giseda yegayegadeyavo Banae matane, ani keke veimeya kamatawalewaleyedi wagaine aku aiyada Yeisu kavetumaganena wagaine.†Gal 2:16 29 Kaduwe imi gavaiyamu yami nuwanuwa? Vaita badi meIsileli gaga ani adiloi Yaubada faidiya gimiyamiya ke badiyavo gaga gina kibababaledi, aiyo? Keke-mowa. Banae kaduwe gimiyamiya badi keke meIsileli faidiya.†Lom 10:12 30 Faina Yaubada ani seya-moena,†Gal 3:20 ada wai seya-moena gisena ide kaliva moyaida yada yegayegana faina, badi meIsileli vovodi bubuna bwatana itomogoloina ada kadu badi keke meIsileli badi tomogolota anagiduwa keke ida muliye. Ada taide wai-nai ani taidei anafaiweya. Badi gavega ina vetumagana Yeisu wagaine ani Yaubada Tauna gina awaveiwakanedi ke ginasedi yegayegadiyavo Bana matane. 31 E ada taidei vewala-nai vetumagana gaga faina ani gavaiyamu, vaita Yaubada yana veimeya anamatawalewale kavegaitoma-kavokavovoyena? Keke, keke-mowa. Aku aiyada yana veimeya-dina kaawavelemoenayedi.
**3:2 Gavana meIsileli yadi iwakana faina Paulo giifufuyedi ani kaduwe givonaye-vagiledi. (Lom 9:4-5)
†3:4 Sam 51:4
†3:12 Sam 14:1-3, 53:1-3, Tol 7:20
†3:13 Sam 5:9
†3:13 Sam 140:3
†3:14 Sam 10:7
†3:17 Ais 59:7-8
†3:18 Sam 36:1
**3:24 Vona-nai ‘gitutuveobuda’ ananuwanuwa ani kaliva moyaidi yadi koyona faina yogoyogodiyavo imiyamiya, e aku Yeisu yawaina giawaegena e ada gina etoyavudi.