2
Keliso ani adakibababala anaKauveya.
1 E ada ide kaalamanena Yaubada Natuna anayegana lakai-moena faina, giluboda-moeda Yaubada yana nuwanuwa velemoena bademowa kanogalidi ani kana nuwaveyalai-vagaidi. Keke kana venuwavuluyedi aenanai waka mainuwana mainuwana mala gialugena anafaiweya, ide yada vetumagana mainuwana mainuwana gina kabekabebena wai tunutunugina wagaine-deya. 2 Tova tuwaina Yaubada yana veimeya anelose awadiya-deya Mosese givelena. Anelose awadiya giyegemona ada wada vona velemoena ani kaalamanena. Ada kai tamo gaito gina yawelina o kai gina dibusoyogena, aga analaufata matavuloga gina nuwagana koyona seyana seyana faine analauboda anafaiweya. 3 Aku malinai kibababala lakai-vagaina gielai wagaideya, keke anelose awadiya-deya aku yada Kauveya Yeisu wagaine. E ada kai kana vegaitoma-kavokavovoyena, aga keke maita adafaiweya adamatavuloga kanaose.†Ibel 12:25 Taidei kibababala-nai ani nagona Kauveya gimadu awatalatalainena, ada badi gavega inogalina ani iluvetoyogi-moena ide wagaideya. 4 Ada keke badi tomadunogala gaga ida luvetoyogi aku kadu Yaubada Tauna nodi giluvetoyogina, faina Banae yana toyogina anaiyaiyaya ke ebanuwavogana giseyegemonedi ada gugai ebameyasidobodobo tulina tulina gifaisewadi. Kaduwe adanuwakabubu Aluwaluwa Tabuna wagaine-deya giavetavetalena wagaideya Tauna yana nuwanuwa anafaiweya. Taidei gaitoma-dina wagaidiya Yaubada yana kibababala giawavelemoenayena, e ada moyaida kana alamanena yana kibababala ani au velemoena.
Keliso kaliva gitubusegedi, Banae lakai-moena.
5 E, ada Yaubada keke aneloseyavo adiveimeya gidasei vaita tova gielaelai wagaine ide kaliva ani yadi veimeya dibune kanamiya. Taidei ide yada miya tova gielaelai faine gaifufuyena. 6 Aku tuwai-vagaina seyana kaliva yana vona givetokilumina Yaubada wagaine, givona,
“Ime kaliva-mowa amayegana kabisona,
e aku gavaiyamu-yo unuwanuwa faimeya?
Imeyavo keke wa yama iwakana aku uitaitaveyabima.
7 Uveimeya ada ime amiyaobu anelose dibudiya tova maufona wagaine.
Velemoena ime keke amayegana lakaidi nonogana
amayegana ukilakaina ada wa yama iwakana amiyamiya.
8 Kaduwe gaitoma matatabuna usena age ayavavama dibune.” †Sam 8:4-6, 1Kol 15:24-26
Taidei anafaiweya vona-nai ivetokilumina. E ada Yaubada ide tomiyababi giawaegeda kana vetoveimeya gaitoma moyaina wagaidiya, ada keke tamo gavagaitoma gida silove ke kana veimeye. Aku tova malinai kaitaitana vaita gaitoma matatabuna aimo keke kaliva ida veiveimeyedi. 9 E aku Yeisu kaitaitana, Banae Yaubada giveimeye ke tova maufona wagaine gimiyaobu anelose dibudiya. Yaubada yana veimeya wagaine Yeisu giobuelai wagaideya ke gialika yada koyona faidiya, e ada tova maufona wagaine gabama anaaneloseyavo ikaiwabusegena. Yaubada yana nuwanuwa ani yana nuwadogeya Yeisu alika gida nuwagana ide seyana seyana faideya. Ada Yeisu alika anauloulolo golagolana lakaina faideya ginuwagana faina, Yaubada anayegana gikilakaina.†Fip 2:8-9 E, anafaiweya kini kuluwadiya adikedukedu kaikaiwabuna isesena, ani kadu anafaiweya Yaubada kedukedu kaikaiwabuna gisena Yeisu kuluwane, aku kedukedu-nai anavewaga ani ‘yegana lakaina’ ada kaduwe ‘iwakana mamalina’.
10 Gaitoma moyaina vuvuna ani Banae Yaubada, ada Tauna faine gibubudi. Banae nuwanuwana ide kaliva gina vagauleda yana ebaveimeya wagaine, ke ide moyaida natunavo yana iwakana mamalina kana nuwagana. Taidei faina analauboda Natuna Yeisu giawaegena uloulolo wagaine, ada taide wagaine gikivelaubodana ke adakibababala anawai givunana.†Ibel 5:8-9 11 Faina Yeisu Banae gikikivetabuda ada ide tabutabudeyavo ani moyaida Tamada au seya-moena, Banae Yaubada. Taidei vuvuna-nai Yeisu keke ide gida vovomumuyeda aku giawavetaineda,†Mak 3:35 12 e ada ide faideya givona Tamana wagaine, givona,
“Oye ayegana gana ifuifufuyena kaikuweyavo wagaidiya.
Tova-nai ina miyavagauta aoduodu wagaine,
adimwatuguya gana kwelidavadavani.” †Sam 22:22
13 Ada kaduwe givona,
“Iya yaku vetumagana ganasena Yaubada wagaine.” †Ais 8:17
Kaduwe givonaga,
“Iyayeku ada kadu biyabiyama-dina Yaubada giveleku
ani nodi idauwe amiyamiya.” †Ais 8:18
14 Ada taidei biyabiyama-dina giifufuyedi ani ideyavo kaliva ke vevine, wa vovoda ke wa dayagida katubuga. Ada ide vovo ke dayaga wagaine katubuga faina, kaduwe Yeisu Banae adanuya giosena ada givekaliva ide anafaiweya wa vovona ke wa dayagina. E ada Yeisu yana alika wagaine Seitani, banae alika anatoveimeya ani yana toyogina gina luyavulena.†1Iyo 3:8 15 Ide yawaida matatabuna wagaidiya alika kamatamatausena, e ada vaita ide yogoyogodeyavo alika anamatauta wagaine. E aku Yeisu yana alika wagaine gietoyavuda. 16 Keke aneloseyavo faidiya gidaela gina lemedi faina, aku velemoena ide Ebelaamo yana tubudelideli faideya giela gina lemeda faina. 17 Ada ide kaliva gina lemeda faina, analauboda kaliva vovoda gida osena e ada ide babiya kamiyamiya anafaiweya, Banae kaduwe gida miyamiya.†Fip 2:7 Ada ide adalutovona moyaina gilutovonidi faina, tova moyaina Bana wa yana nuwakalikali ke wa yana idibumwaiga Yaubada yana veyavo anatovegugai aditonagona anafaisewa ginaabi-dewedewena. Ada kaduwe taidei wagaine Yeisu anafaiweya Tauna gina vebolavoiyena kaliva yada koyona faidiya, e ada Yaubada yana nuwakoyo yada koyona faidiya ani nuwana gina bubuna. 18 Yeisu yana miyami babi wagaine anatoveya, aladibidibi anavita moyaina gilutovonidi anafaiweya ide kaliva.†Mad 4:1-11 E ada aladibidibi anavita moyaina gilutovonidi faina, Banae anafata ide aladibidibi kanuwanuwagana ani gina lemeda.†Ibel 4:15-16