3
Yeisu lakai-moena muliya-yo Mosese.
1 E ada tubuiyakuweyavo tabutabumi, imiyavo kaduwe Iya nodi Yaubada gidouweda yana yoo ke aimo nodi gabameya kana miyamiya, ani Yeisu wana nuwanuwayena, Banae kaawamogatalena yada afositolo ke kaduwe veyavo anatovegugai aditonagona.†Ibel 4:14, 12:2-3 2 Banae tainei faisewa-nai faina Yaubada givenuwadadanena ani tova moyaina gimatawalewaleyena. Tuwai-moena Mosese tova moyaina Yaubada yana nuwanuwa giidibumwaigena ke gifaisewa yana yoo adimwatuguya anafaiweya,†Naba 12:7 Yeisu tova moyaina Yaubada yana nuwanuwa giidibumwaigena. 3-4 Manuwa seyana seyana wa anatoiyogona, aku Banae-menai gaitoma matatabuna giyogodi ani Yaubada. Ada manuwa anatoiyogona kaawadavadavana aku manuwa-moena tauna anaawadavadava ani tufona gagana. E ada anafaiweya Yaubada ani Yeisu anayegana gikilakai-moena, e ayo Mosese faine ani tufona gagana. 5 Banae Mosese ani tova moyaina gimatawalewale velemoena Yaubada yana manuwa matatabuna wagaine, tainei yana yoo,†Naba 12:7 aku banae au togugai. Yana gugai-nai ani seyana ebaita Yaubada yana nuwanuwa velemoena aimo gina ivemogatalina faina. 6 Aku Keliso ani Banae keke Yaubada yana togugai aku au Natuna, ada tova moyaina wa yana idibudibumwaiga Yaubada yana manuwa giveiveimeyena. Ada ide tovetumagana ani yana manuwa-nai. Aku gilubodada yada asevatu kana kidone-vagaina,†Ibel 3:14, 10:23 ada kaduwe gaitoma-dina Yaubada givonadabadabayedi faideya ani wa yada vetumagana kana bodabodadi. Kai taidei anafaiweya kana dewadewa, aga ide Banae yana manuwa.
Veyawai-nai ide Yaubada yana yoo faideya.
7 Yada asevatu kada kidone-vagaina, faina Buki Tabu wagaine Aluwaluwa Tabuna givona,
“Malinai kai Iya Yaubada bonaku wana nogalina,
8 aga keke aseasemi wana kivekugadi
ke tagami wana ivekuludi, aku bonaku wana venogalena.
Keke wanadewa anafaiweya tamamiyavo nagona,
badi tuwai-moena adigaluvaluva inuwagadi fafali kavovona wagaine
ada Iya yadi Yaubada idibusoyogeku.†Iyeg 17:7, Naba 20:2-8
9 Wadedeku malamala foti (40) wagaidiya
badi matadiya gugai ebameyasidobodobo gagugaiyedi e ada
ina matawalewaleyeku,†Gug 7:36 aku wa yadi dibusoyoga idewa koyona
ke yaku atuvefaila igaluvaluvana.
10 Taidei faina ganuwakoyo tayuwe tova-nai anayoo wagaidiya ada gavonaga,
‘Tova moyaina yadi nuwanuwa imadu-kavokavovo ke wai
tunutunugina inuvuyoyena. Keke nuwadi gidamali yaku dewa wagaidiya.’
11 E ada wa yaku nuwakoyo gavonadabadaba toyogina,
gavonaga, ‘Biyavo-dina keke-bamowa gana awaegedi inaluku yaku ebaveyawai wagaine.’ ”†Sam 95:7-11, Naba 14:21-23
12 Tubuiyakuweyavo, tuwai-moena tamamiyavo nagona tagadi ivekuludi faina, keke adifaiweya inaluku Yaubada yana ebaveyawai wagaine. E ada taumiyavo wana itaveyabimi aenanai tamo gaito wagaimiya-deya nuwanuwa koyona aseasene gimiyamiya. Kai taidei anafaiweya, aga meyameyagani-moena yana vetumagana gina segena ke Yaubada miyamiyani-vagaina gina vedomobubusena. 13 Yaubada tova giawaegena ide wagaideya ke wagaine bonana kana venogalena. Taidei faina mwatugu-nai wagaine giawaegena wagaideya ani yadayada seyana seyana taudeyavo kanavona asevatuda, aenanai koyona yana fwaya nuwada gina vaina ke aseaseda gina kivekugana. 14 Faina kai malinai Keliso kana vetumaganena anafaiweya nagona, ada yada vetumagana kana abidonena ke atuvefaileya kana nunauwena yawaida anamatatabuna wagaine,†Ibel 3:6, 10:23, 1Kol 15:2 aga ide Keliso anaalamana anaiwakana kanavai-vagaina ada kibababala-nai givaina faideya ani kana nuwaga-vagaina. 15 Vona-nai ani wana nuwenuwena, givona,
“Malinai kai Iya Yaubada bonaku wana nogalina,
aga keke aseasemi wana kivekugadi ke tagami wana ivekuludi,
aku bonaku wana venogalena.
Keke wanadewa anafaiweya tamamiyavo nagona,
badi tuwai-moena Iya yadi Yaubada idibusoyogeku.” †Sam 95:7-8
16 Faina gavega Yaubada bonana inogalina nonogana idebaitoyoga?†Naba 14:1-38, 2Vei 1:34-35 Badi moyaidi ani Mosese ginagoyedi iyegemona Itipita wagaine. 17 Ada kaduwe, gavega wagaidiya Yaubada ginuwanuwakoyo malamala foti (40) wagaidiya? Badi biyavo-dina ani ikoyokoyona fafali kavovona wagaine e ada analaufata moyaidi ivealialika wadedeku-deya. 18 Ada gavega faidiya Yaubada givonadabadaba, givona, “Biyavo-dina keke-bamowa gana awaegedi inaluku yaku ebaveyawai wagaine”? Au anafaiweya, biyavo-dina yana veimeya iawaegegena ani wagaidiya. 19 E ada taidei kaitanuwagana ani biyavo-dina keke adiawaega inaluku, faina keke Yaubada ida vetumagane.