2
Aluwaluwa Tabuna tovetumagana givemagadi.
1 Aku Abutu Penitikosi†Vei 23:15 anayadayada giyegemona wagaine, tovetumagana moyaidi bademowa imiyavagauta fafali seyana wagaine. 2 Ada au maduga-mowa wagabameya butuna inogalina vaita mala toyogina giveyuveyuve anafaiweya, ada manuwa-nai wagaine ivetovetoga ani butuna givemagana. 3 Ada iitana gaitoma seyana anaita vaita aiyabeyabela meyana giludakadakana ke kaliva seyana seyana kuluwana getane givetoga. 4 Ada matatabudi Aluwaluwa Tabuna givemagadi†Mad 3:11, Iyo 14:17, Gug 4:31, 10:44-46 ke ivebutu meya tulina tulina wagaidiya iifuifufu Aluwaluwa Tabuna gialaveleveledi mamauwe.
5 Aku wadedeku Yelusalema wagaine meIsileli tufona moyaidi imiyamiya, badi Yaubada wagaine ioduodu. Fafali tulina tulina moyaidi wagaidiya itauya ke ina Yelusalema imiyamiya. 6 Ada badi kaliva-dina kaliva yadi ifufu meya tulina tulina ani bonadi inogalina e ada moyaidi ivagauta. Ada nuwadi givoganina, faina kaliva seyana seyana ginogalina tauna meyane tovetumagana iifuifufu. 7 Ada moyaidi meyadi gisidobodobona ke taudiyavo wa yadi nuwavogana ivona, “Ida kaliva-dina iifuifufu ani badi moyaidi meGalili. 8 E ada gavaiyamu-yo moyaida kanogalidi taudeyavo meyada tulina tulina wagaidiya iifuifufu? 9 Ide yada fafali wagaidiya kaelai ani Patiya, Midiya, Elama, Mesopotemiya, Yudiya, Kafadosiya, Ponitasi, Eisiya. 10 Kadu Filidiya, Pamifiliya, Itipita ke Libiya anafafali Sailini lilivane. Ada kaduwe tufoda meLoma aku Yelusalema wagaine kawakawaka, 11 tufoda meIsileli velemoena aku tufoda keke meIsileli aku meIsileli yadi tafalolo wagaine kaawaegeda ke kadamana. E, kaduwe tufoda meKiliti ke Alebiya. Au yada fafali moyaina aku moyaida kanogalina taudeyavo meyada tulina tulina wagaidiya iifuifufu ada Yaubada yana gugai toyogina iawaawatalatalainedi!” 12 Ada moyaidi meyadi gisidobodobona ke nuwadi givoganina, ada taudiyavo gaga ivetolitoli, ivona, “Ida gavana?”
13 Aku tufodi ani tovetumagana iawaveleigedi, ivona, “Wada badi waini digadigagina iyuga ivekwavakwava.”
Pita gilumamala yoo lakaina wagaidiya.
14 Ada bana Pita badi afositolo adileveni nodi gimididi ke bonana lakaina wagaine givona yoo wagaidiya, givona, “Imi meIsileli ke imi Yelusalema wagaine wamiyamiya, wana nogalina gavana ganavona ada nuwami gina malina. 15 Taidei kaliva-dina keke gufa toyogina idayui ke ida vekwavakwava wanuwanuwa anafaiweya. Ida malabutuya kauwana naeni kiloki. Keke yuga anatova. 16 Aku ida falofita Iyoweli tuwaina gimadu awamogatalena ani giyegemona velemoena anafaiweya. Givona,
17 ‘Yaubada givona, Aimo tova anaebalauyabu anayadayada-dina wagaidiya ani Aluwaluwaku gana biwana tomiyababi moyaidi wagaidiya. E ada natumiyavo kaliva ke vevine ina falofisai, yami tubulakata vewala ina itadi, kaduwe kaliva lakaidiyavo ina avaita.
18 E, tova-nai wagaine Aluwaluwaku kaduwe gana biwana yaku togugaiyavo kaliva ke vevine wagaidiya, ada ina falofisai. 19-20 Ada gugai ebameyasidobodobo aimo gana vewala gabameya, kauwana gina yuyuvana ke vaikoi gina yabelina anafaiweya dayaga. Kaduwe iyaiyaya lakaidi babiya gana seyegemonena, dayaga ke ai alalata kaduwe siyo badobadona. Aku muliya KAUVEYA yana yadayada lakaina gina yegemona, ani vevonayavuga anatova matamatausina. 21 Aku badi moyaidi gavega KAUVEYA ina veolena adikibababala faina ani gina kibababaledi.’ ” †Iyol 2:28-32
Ida Yaubada yana vona bana Iyoweli givetokilumina ani bana Pita giifufuyena.
22 Kaduwe Pita givona, “Imi meIsileli, yaku vona taidei wana nogalina. Yeisu kwana Nasaledi ani Yaubada Banae toyogina givelena ke gugai toyogina ada iyaiyaya lakaina gigugaiyedi amimwatuguya.†Iyo 3:2 Taidei gaitoma-dina imi taumiyavo waitadi ke waalamanedi, ada taidei wagaine Yaubada givewale-dewedewemi vaita Yeisu giimilina. 23 Taine Yeisu-nai Banae ani tuwai-moena Yaubada Tauna giveimeya ke imi nimamiya gina awaegena, e ada gialamane-vagaina. Taidei kaliva-nai waluvealikana, faina badi tokoyona waveledi ke nimadiya itutuvefosena kelose wagaine.†Mad 27:35, Mak 15:24, Luk 23:33, Iyo 19:18 24 Imi Yeisu waluvealikana, aku Yaubada alika anauloulolo giluyavuledi ke alikeya gisiveyawana, faina keke meyameyaganina alika yana toyogina Yeisu gina kiveyabi-vagai.†Mad 28:5-6, Mak 16:6, Luk 24:5 25 Anafaiweya tuwai-moena Deivida Yeisu faine givonaye-vagaina, givona,
‘Iya gaalamanena tova moyaina KAUVEYA wagaikuya gimiyamiya.
Banae lilivakuya gimiyamiya faina,
aseaseku keke gina akolukolu. 26 Taidei faina nuwaku giveiwaka,
kaduwe wa yaku vemwamwala gaifuifufu.
Aimo vovoku didikuleya gina daudau
aku wa yaku nuwavetumagana gana miyamiya,
27 faina bademowa gaalamanena Iya keke toalika yadi fafaliya unasege-vagai.
Kaduwe Iya ya Kaliva Tabutabuku ani keke
vovoku una awaege ayo gina abudali.
28 Yawai-vagata anawai bademowa uvewaleku, ada
Oye Iya nodi kana miyami faina, gana vemwamwala lakaina.’ ”†Sam 16:8-11
29 Ada kaduwe Pita givona, “Tubuiyakuweyavo, gana vonemi velemoena, tamada nagona Kini Deivida tuwaina gialika ada vovona isena didikula luwa wagaine,†1Kin 2:10, Gug 13:36 ada anadidikula-nai ani malinai wagaideya aimo gimiyamiya. 30 Aku bana Deivida ani falofita, ada gialamanena Yaubada bademowa bana wagaine givonadabadaba toyogina vaita aimo Deivida tauna yana tubudelideli seyana, ani Yaubada ginasena gina vekini ke gina vetoga Deivida yana veimeya anaebavetoga kaikaiwabuna wagaine.†Sam 132:11 31 Deivida gimadu alamanena Keliso yana yawa-vagila alikeya, taidei faina gimaduvonayena, givona, ‘Yaubada keke Banae toalika yadi fafali wagaine ginasege-vagai, ada vovona keke gina abudali.’†Sam 16:10 32 Taine Yeisu-nai Yaubada bademowa alikeya gisiveyawana, ada ime moyaima taumeyavo matameya aitana ke aawatalatalainena. 33 Yaubada gisiveyawana ke aiyatagine giveiotona.†Gug 7:55-56, 1Pi 3:22 Ada Tamana Aluwaluwa Tabuna givelena tuwaina givonadabadabayena anafaiweya. E ada malinai Yeisu Aluwaluwa Tabuna gibiwana†Gug 1:4,8, 7:55-56 e ada ida gaitoma-dina waitaitana ke wanoganogalina. 34 Deivida yana vona ani keke tauna faine gidavona, faina banae keke gidalaka gabameya Yeisu anafaiweya. Aku givona,
‘Banae KAUVEYA Yaubada givona yaku Kauveya wagaine,
“Aiyatagikuya**Kini aiyatagine ani ebavetoga wa anavemoimoina. una vetoga analaba
35 nibaimomo gana seobuyedi
ada yadi toyogina gina avaina velemoena.”; †Sam 110:1
36 Taidei faina imi meIsileli moyaimi ani wana alamane-dewedewena, Banae Yeisu-nai wakivebolagalagana ani Yaubada gisena Kauveya, ada kaduwe Banae Keliso.” Taidei anafaiweya Pita gilumamala.
37 Ada tova-nai kaliva vona taidei inogalina, aseasedi gionana, e ada itolidadana Pita ke afositolo velugadiyavo wagaidiya ivona, “Tubuiyameyavo, gavana anagai?”
38 Ada Pita givonedi, “Imi seyana seyana yami gugai koyodi wana segedi ke wana nuwavilana, ada Yeisu Keliso anayeganeya wana babitaiso ke Yaubada yami koyona gina venuwaegedi.†Gug 16:30-33 Ada Aluwaluwa Tabuna wana nuwagana, Bana adanuwakabubu. 39 Faina Yaubada givonadabadaba Aluwaluwa Tabuna gina awaegena imi faimiya ke natumiyavo faidiya, ada kaduwe badi gavega atuwadeya imiyamiya faidiya. Ada gavega moyaidi Yaubada gina douwedi ke Bana wagaine inaelai, tainei badi wagaidiya gina awaegena.”†Efes 2:12-13,17 40 Ada Pita vona moyaina wagaine giawatalatalainedi ke kaduwe giveoledi toyogina, givonaga, “Imiyavo ani tova malinai anayoo koyodiyavo adimwatuguya wamiyamiya, e ada wana itaveyabimi. Yaubada wana veoveolena ke gina kibababalemi badi wagaidiya-deya.” 41 E ada badi gavega Pita yana vona ivetumaganena ani ibabitaiso ke tovetumagana adiyoo wagaine iluku. Ada taine yadayada-nai wagaine biyavo-dina ibabitaiso ani adiyoo teli tausani (3,000) anafaiweya.
Tovetumagana yadi miyami kaduwe yadi dewa faina.
42 Ada tova moyaina tovetumagana iawaawaegedi afositoloyavo yadi vewala wagaine ada ivetubuiyana velemoena, kaduwe ivagavagauta ke nodi ikanikani, ada iveoveola aigaigabu Yaubada wagaine. 43 Ada afositoloyavo gugai ebameyasidobodobo ke iyaiyaya lakaidi igugugaiyedi, e ada moyaidi Yaubada yana toyogina iitana wagaine wa yadi matauta ivemoimoinena. 44 Kaduwe tovetumagana moyaidi imiyamiyavagauta ke yadi nuwanuwa seya-moena wagaine yadi giba ivutuvutuga taudiyavo wagaidiya. 45 Anafaiweya tova ke tova yadi babi ke yadi giba ina vekimoneyedi aku mani ina vaina ada ina vutugedi badi gavega ivemaufo wagaidiya.†Gug 4:32-35 46 Ada yadayada seyana seyana nodi imiyamiyavagauta manuwa tabu wagaine. Kaduwe taudiyavo yadi manuweya aa ikiineinena Yeisu anaebanuwaududu faina ke wa yadi vemwamwala ikanikani aigaigabu. 47 Ada tova moyaina Yaubada iawadavadavana, kaduwe kaliva moyaidi tovetumagana iawaveiwakanedi. Ada yadayada seyana seyana adiyoo giveiveinala, faina gavega Kauveya gikibababaledi ani giseselukuwedi adiyoo wagaine.
†2:1 Vei 23:15
†2:4 Mad 3:11, Iyo 14:17, Gug 4:31, 10:44-46
†2:21 Iyol 2:28-32
†2:23 Mad 27:35, Mak 15:24, Luk 23:33, Iyo 19:18
†2:24 Mad 28:5-6, Mak 16:6, Luk 24:5
†2:28 Sam 16:8-11
†2:30 Sam 132:11
†2:31 Sam 16:10
**2:34 Kini aiyatagine ani ebavetoga wa anavemoimoina.
†2:35 Sam 110:1