4
Pita ke Iyoni meIsileli yadi Kaniselayavo wagaidiya ivevonayavugidi.
1 Ada Pita ke Iyoni aimo kaliva wagaidiya iifuifufu aku yoo tufona ielai wagaidiya, badiyavo Yaubada yana veyavo anatovegugaiyavo, ke manuwa tabu anatoyavagayavo aditonagona ada kaduwe Sadusiyavo.**Sadusiyavo yadi vewala taidei anafaiweya. Keke ida vetumagana vaita aneloseyavo kai aluwaluwa imiyami, kadu keke ida vetumagana vaita yawa-vagila aimo gina yegemona. 2 Badiyavo inuwakoyo faina badi adiselu kaliva ivewavewaledi vaita Yaubada Yeisu alikeya gisiveyawana anafaiweya, kaduwe toalika Yaubada gina siveyawadi alikeya. 3 E ada ikiveyabidi aku mala bademowa givelavilavi faina, deli wagaine isedi aku mala ginalavu-yo ina vevonayavugidi.†Luk 21:12 4 Aku kaliva moyaidi Pita ke Iyoni yadi laumamala inogalina ke ivetumaganena, ada tovetumagana adiyoo gitubuga faifi tausani (5,000) anafaiweya.**Naba-nai faifi tausani (5,000) ani kaliva gaga iveyawadi. Aku kaduwe kaliva-dina ani wa vavinediyavo ke wa natudiyavo nodi imiyamiya yoo-nai wagaine, e ada badi Yeisu ivetumaganena ani keke faifi tausani (5,000) gagana aku moyai-moedi.
5 Mala gilavuna meIsileli aditoveimeyayavo ke kaliva lakaidiyavo kaduwe Mosese yana veimeya anatovewalayavo Yelusalema wagaine ivagauta. 6 Ada veyavo anatovegugai aditonagona Anasi ke kaduwe Kaiyafasi, Iyoni ke Alekisanida nodi wadedeku-deya, ada kaduwe veyavo anatovegugai aditonagona yana gabu kaliva-dina nodi ivagauta. 7 Ada Pita ke Iyoni matadiya ivemidididi aku itolidadanedi, ivona, “Gaito yana toyogineya o kai gaito anayeganeya gugai taidei anafaiweya wagugaiye?”
8 Aku Pita Aluwaluwa Tabuna wagaine magamagana,†Mad 10:19-20 ada givonedi, givona, “Imi toveimeyayavo ada kaliva lakaimiyavo, 9 malinai wavagaulema vonayavuga taidei wagaine ada watolidadanema gugai iwakana agugaiyena tovefela wagaine faina. Ada kaduwe watolidadanema gavaiyamu giveiwaka. 10 E ada imiyavo kaduwe meIsileli moyaimi, gana kivemalimi ke wana alamanena. Banae Yeisu Keliso kwana Nasaledi anayeganeya ada yana toyogineya ani tovefela taidei giveiwaka, e ada matamiya gimidimididi. Yeisu Banae imi wakivebolagalagana aku Yaubada alikeya gisiveyawa-vagilena. 11 Banae-nai faine vona matalivulivuna seyana Buki Tabu wagaine givona,
‘Ogola-nai imi manuwa anatoiyogona wadibusoyogena,
ani Banae gimidinagona ogola moyaidi.’ †Sam 118:22, 1Pi 2:7
12 Yeisu Banae anakaibe wagaine kibababala kana nuwagana. Faina keke tamo gaito babiya gida miyami ani Yaubada gida venuwadadane ke banae anayeganeya ide kaliva kibababala adafaiweya kana nuwaga.” †Iyo 14:6 Taidei anafaiweya Pita givonedi.
13 Aku meIsileli yadi Kaniselayavo**Kanisela-dina ani meIsileli yadi Kaniselayavo lakaidi, ke anayoo seveniti (70) anafaiweya. ani Pita ke Iyoni yadi asevatu iitana wagaine, meyadi gibovu. Faina ialamanena taidei kaliva-dina keke ida sikulu, badi kaliva-kavovodi. Aku nuwadi giamutuna tuwaina badi Yeisu nodi. 14 Aku iitana tovefela-nai bademowa giveiwaka ani adiselu lilivadiya gimidimididi, e ada keke adifaiweya kaduwe gavana tamo inavone. 15 Au iveimeyedi ke ebavevonayavuga anafafali wagaine ina midiyegemona. Badi kaliva imidiyegemona ada Kaniselayavo ivebutu ke taudiyavo iveifuifufu, ivona, 16 “Gavana kanagai kaliva taidei wagaidiya? Faina kaliva moyaidi Yelusalema wagaine bademowa ialamanena gugai ebameyasidobodobo igugaiyena, ada ide keke adafaiweya kana veweye. 17 Aku kada vonediga, ‘Keke tamo kaduwe gaito seyana wagaine wana ifuifufu Yeisu anayeganeya.’ Taidei anafaiweya kada awatadi e ada valeyana-nai keke gina mutula kaliva moyai-moedi wagaidiya.”
18 Ada iveifuifufu giavaina, Pita ke Iyoni idouwe-vagiledi iluku ke iveimeyedi, ivona, “Keke-mowa maita kaduwe Yeisu anayeganeya wana ifuifufu o wana vewala.”
19 Taidei anafaiweya iveimeyedi aku badi Pita ke Iyoni ilufata, ivona, “Gavana iwakana Yaubada matane, kai imi ana matawalewaleyemi o kai Yaubada ana matawalewaleyena? Imi taumiyavo wana venuwadadanena, 20 faina ime keke amafaiweya ana ilova. Au gavana Yeisu yana gugai aitana ke yana vona anogalina ani ana ifuifufuyena.”
21 Idamamauwe adiselu ivona e ada Kaniselayavo kaduwe iawavematausidi aku au iawaegedi inau. Gavaiyamu ina vematavulogidi ani faine inuwanuwa-wayoga. Yoo imatausedi e ada keke adifaiweya, faina gaitoma-nai giyegemona ani kaliva iitana e ada moyai-moedi Yaubada iawadavadavana. 22 Faina tovefela-nai gugai ebameyasidobodobo wagaine giveiwaka ani banae keke tubulakaina, anamalamala foti (40) wa tufona.
Tovetumagana iveoveola asevatu faina.
23 Tova-nai Pita ke Iyoni Kaniselayavo isegedi aku yadi yoo wagaidiya iyewadi, ada veyavo anatovegugai lakaidiyavo ke kaliva lakaidiyavo gavaiyamu ivonedi ani mamauwe iifufuyedi. 24 Ada badi tovetumagana inogalina ke moyaidi Yaubada wagaine iveoveola aigaigabu, ivona, “Oye Toveimeya. Gabama, babi, ke leyaga, ada kaduwe gaitoma moyaidi wagaidiya imiyamiya ani O ububudi. 25 Tuwai-moena Aluwaluwa Tabuna ya vona giseyegemonina ya togugai tamama Deivida awane, givona,
‘Gavana faina badi keke meIsileli inuwakoyo-mowa?
Gavana faina yadi veimeya koyona ibubu-wayogedi?
26 Babi anakiniyavo ikidewadewa ada toveimeyayavo
nodi ivagauta ke Yaubada ada Banae yana
Mesaiya**Vewaga-nai Mesaiya ani vona Ibeliu, ada anakivila ani Venuvenuwadadanina. Tuwai-moena tova-nai Yaubada meIsileli yadi kini ginasena, nagona yana falofita seyana anaveimeya gina velena, e ada banae gina mididi ginanau banae-nai Yaubada givenuwadadanena ada bunama gina iwavekelolona kuluwane. Taidei wagaine banae gina alamanena Yaubada givenuwadadanena ada kaduwe, Yaubada Aluwaluwana yana toyogina wagaine gina lemelemena. (1Sam 9:15 ke ginau 10:1) ina lugaviyadi.’†Sam 2:1-2
27 Ada toveimeya yadi nuwakoyo malinai giyegemona velemoena anafaiweya givonayena. Faina Kini Elodi ke Ponitiyo Pailato ani meIsileli ada badi keke meIsileli nodi ivagauta Yelusalema wagaine ada iveimeya aigaigabu ke Yeisu ina luvealikana, Banae ya togugai tabutabuna uvenuwadadanena ke utoyogivelena ya faisewa faine.†Mad 27:1-2, Mak 15:1, Luk 23:1-11, Iyo 18:28-30 28 Ada igugaiyena anafaiweya tuwai-moena uvenuwadadanena,†Gug 2:23 Oye ya toyogina ke ya veimeya wagaine ada giyegemona anafaiweya. 29 E ada Kauveya, badi Kaniselayavo iawavematauta wagaimeya ani O unogalina. E ada ime ya togugaiyavo una kivetoyogima ke wa yama asevatu ya vona ana lumamalena. 30 Ime ana lulumamala aku Oye nima una tunena toveoga wagaidiya ke ina veiwaka, ada iyaiyaya lakaidi ke gugai ebameyasidobodobo una gugaiyedi ya togugai tabutabuna Yeisu anayeganeya.” 31 Ada iveoveola giavaina, manuwa-nai wagaine ivagauta ani gialiuliuna. Kaduwe Aluwaluwa Tabuna moyaidi givemagadi†Gug 2:4 ada Yaubada yana vona wa yadi asevatu ilumamalenauwena.
Tovetumagana yadi lokoloko taudiyavo wagaidiya ivutuvutugena.
32 Aku tovetumagana moyaidi yadi nuwanuwa seya-moena. Keke tamo gaito seyana gidavona, “Yaku lokoloko akukaibe faikuya.” Au yadi lokoloko ivutuvutugedi taudiyavo wagaidiya.†Gug 2:44-45 33 Badi afositolo wa yadi toyogina Kauveya Yeisu yana yawa-vagila alikeya faina iawatalatalaina, ada Yaubada yana nuwadoga lakaina moyaidi wagaidiya. 34 Ada tovetumagana moyaidi wagaidiya ani keke tamo gaito fanifanina gida miyami, faina tova ke tova badi gavega wa yadi babi o wa yadi manuwa ani ivekivekimoneyedi, ada manidi ivaivaina ani 35 ialialiyedi afositoloyavo iveleveledi. Ada afositolo ivutuvutugena badiyavo gavega adiga o kai yadi lokoloko keke wagaidiya.†Gug 2:45
36 Ada Iyosefa, banae Livai unumina anakaliva, taidei anafaiweya gidewa. Bana yana melala ani imula anayegana Saifilasi wagaine. Badi afositolo kaliva-nai ivewagana Banabasi,†Gug 11:22-26, 13:2-3 anayegana anakivila ‘tokiveasevatu’. 37 Ani Banabasi-nai yana babi seyana givekimoneyena, ada babi manina givaina ani gialiyena afositoloyavo giveledi.
**4:1 Sadusiyavo yadi vewala taidei anafaiweya. Keke ida vetumagana vaita aneloseyavo kai aluwaluwa imiyami, kadu keke ida vetumagana vaita yawa-vagila aimo gina yegemona.
**4:4 Naba-nai faifi tausani (5,000) ani kaliva gaga iveyawadi. Aku kaduwe kaliva-dina ani wa vavinediyavo ke wa natudiyavo nodi imiyamiya yoo-nai wagaine, e ada badi Yeisu ivetumaganena ani keke faifi tausani (5,000) gagana aku moyai-moedi.
**4:13 Kanisela-dina ani meIsileli yadi Kaniselayavo lakaidi, ke anayoo seveniti (70) anafaiweya.
**4:26 Vewaga-nai Mesaiya ani vona Ibeliu, ada anakivila ani Venuvenuwadadanina. Tuwai-moena tova-nai Yaubada meIsileli yadi kini ginasena, nagona yana falofita seyana anaveimeya gina velena, e ada banae gina mididi ginanau banae-nai Yaubada givenuwadadanena ada bunama gina iwavekelolona kuluwane. Taidei wagaine banae gina alamanena Yaubada givenuwadadanena ada kaduwe, Yaubada Aluwaluwana yana toyogina wagaine gina lemelemena. (1Sam 9:15 ke ginau 10:1)
†4:26 Sam 2:1-2
†4:27 Mad 27:1-2, Mak 15:1, Luk 23:1-11, Iyo 18:28-30