1 Aku Paulo ke Banabasi Ikoniyamu wagaine iyegemona ada yadi dewa anafaiweya, meIsileli yadi manuwa ebavewala wagaine iluku ke ilumamala. Yadi laumamala kaliva aseasedi gionana e ada meIsileli kaduwe badi keke meIsileli moyaidi ivetumagana Yeisu wagaine. 2 Aku meIsileli tufodi yadi laumamala keke ida vetumagane, ani badi keke meIsileli nuwadi isibaledi e ada inuwakoyo Paulo ke Banabasi wagaidiya. 3 Aku auwe wadedeku-deya adiselu imiyamiya maita tova manamanawena, ada wa yadi asevatu nodiku iifuifufu Kauveya faine. Ada Kauveya yana toyogineya gugai lakaidi ke ebameyasidobodobo igugaiyedi. Taidei anafaiweya gitoyogiveledi, e ada kaliva ina alamanena yadi laumamala yana nuwadoga faina ani velemoena.†Mak 16:20 4 Ada kaliva moyaidi melala-nai lakaina wagaine ani iluididi. Tufodi meIsileli imuliyedi aku tufodi afositolo adiselu imuliyedi. 5 Ada badi keke meIsileli ada badi meIsileli ke aditonagonayavo nodi iveimeya aigaigabu ada Paulo ke Banabasi ina kiveuloulolonidi ada kabaleya ina tutuvealikadi. 6 Aku yadi nuwanuwa valeyana adiselu ikaiyanogala, ada iota inau Likoniya anafafali wagaine, melala iluwei Lisita ke Debi wagaidiya iluku ada kaduwe melala tufodi lilivadiya. 7 Ada wadedeku kaduwe valeya iwakana Kauveya Yeisu faine ilumamalena.

8 Aku kaliva seyana Lisita wagaine agena memeluyadi gitubuga, ada keke maita gida nunudadana yawaina matatabuna wagaine. 9 Ada kaliva-nai givetogana aku Paulo yana laumamala givanevanenegena. E au Paulo tovefela-nai giitaitadonena ke gialamanena banae givetumagana vaita Yaubada anafaiweya gina kiveiwakanena. 10 E ada Paulo givona bonana lakaina tovefela-nai wagaine, givona, “Una mididi!” Ada kaliva-nai gimadumididi-mowa ada ginudadana.

11 Tova-nai yoo iitana gavana Paulo gigugaiyena, ada ikovakova taudiyavo meyadiya vona Likoniya wagaine, ivona, “Yada yaubada iluwei ivekaliva ada iobuelai ide wagaideya!” **Badi meGiliki ani yaubada fwayafwaya moyaina wagaidiya ioduodu. Yaubada-dina aditonagona ivewagana Seusi ada yadi tovona ivewagana Emesi. E ada badi meLisita inuwanuwa vaita Banabasi ani Seusi aku Paulo ani Emesi, faina Paulo banae tovona. 12 Ada Banabasi ivewagana Seusi, banae meGiliki yadi yaubada aditonagona, aku Paulo ivewagana Emesi, banae yadi yaubada yana tomatawa. Faina banae tovona. 13 Yadi yaubada-nai Seusi ani yana manuwa ebaoduodu gimiyamiya melala-nai anamatalaviseya, ada wadedeku kaliva ioduodu bana wagaine. Ada Seusi yana tovebolavoi ani bulumakau ke veiya uyauyadi kevakeva-dina giveiveigavudi gialiyedi melala anaedawana wagaine. Banae kaduwe yoo nodi nuwanuwadi kevakeva ina munudi ada ina vebolavoi Paulo ke Banabasi wagaidiya.

14 Aku tova-nai afositolo adiselu ikaiyanogala gavana inagai ada adinuya ikelilidi**Dewa-nai ‘adinuya ikelilidi’ ani meIsileli yadi ebaita nuwavita lakaina faina. aku imadu iluku yoo adimwatuguya aku ikovakova ivona, 15 “Kaliva, gavana faina tainei wagugai anafaiweya? Ime kaduwe tomiyababi, kaliva-mowa anafaiweya imiyavo! Ime aelai valeya iwakana aaliyena wagaimiya, e ada yami awadavadava gaitoma-kavokavovo wagaidiya wana segedi aku wana miyavilami Yaubada miyamiyani-vagaina wagaine. Au Banae Yaubada-nai gabama, babi ke leyaga ada kaduwe gaitoma moyaidi wagaidiya imiyamiya ani gibubudi. 16 Tova tuwaina-deya babi anayooyavo moyaidi ani Yaubada giawaegedi ke taudiyavo gaga yadi nuwanuwa ina gugaiyedi. 17 Aku yana iyaiyaya wagaideya imiyamiya. Yana nuwakabubu tova moyaina giavetavetala e ada kana alamanena Yaubada velemoena gimiyamiya. Banae wei giveimeyena ke giobuobu gabameya-deya, kaduwe aa giveimeyedi ke itubutubuga. Adaga giveleveleda adafaiweya, ada nuwada gikiveiwakanena ke kavemwamwala lakaina.” 18 Taidei anafaiweya Paulo ke Banabasi ivona, aku vaita yoo-dina ida atuvefaila ida vebolavoi wagaidiya.

19 Aku meIsileli tufodi Anitiyoki ke Ikoniyamu wagaidiya-deya ielai ada yoo nuwadi ikanina vaita Paulo yana ifufu ani keke vona velemoena.†Gug 17:13 E ada badi inuwakoyo Paulo wagaine ada kabaleya ifiyafiyana vaita ida tutuvealikana. Moyaidi inuwanuwa vaita gialika, e ada melala negenine itai iyegemone isena. 20 Aku muliya tonogalayavo iela imidififina ani Paulo gimididi ada giyewa-vagilena melala wagaine. Mala gilavuna banae ke Banabasi itauya inau Debi melala wagaine.

21 Debi-deya valeya iwakana ilumamalena, ada kaliva moyaidi valeya-nai ivetumaganena ke ivetonogala. Ada Paulo ke Banabasi imiyamiya aku kadu iyewa-vagiledi Lisita. Wadedeku-deya inau Ikoniyamu, ada inau Anitiyoki, tainei Pisidiya wagaine. 22 Ada yadi balawalilivuga-nai wagaine tonogalayavo ikivetoyogidi melala seyana seyana wagaidiya ke yadi vetumagana keke gina kabekabebe, ada ivona asevatudi ke tova moyaina Yeisu ina vetumaganena. Ada kaduwe ivonedi, ivona, “Kai nuwanuwada tova mulina kanaluku Yaubada yana ebaveimeya wagaine, nagona vita moyaina kana nuwagana.” †2Tim 3:12 23 Ada badi tovetumagana adiyoo melala seyana seyana wagaidiya Paulo ke Banabasi inau, ani aditonagonayavo ivenuwadadanedi. Ada kani iilovau aku iveoveola, ivona, “Kauveya, taidei kaliva ke vevine Oye wagainiya bademowa ivetumagana, e ada aatuegedi Oye nimaniya ke una itaitaveyabidi.” 24 Taidei anafaiweya Paulo ke Banabasi iveola aku itauya. Ada igolota inaunau Pisidiya anafafali wagaine aku iyegemona Pamifiliya anafafali wagaine. 25 Ada melala Pega wagaine valeya iwakana ilumamalena ke muliya iobu melala Ataliya. 26 Ada wadedeku-deya waka wagaine iyage ada kaduwe iyewadi Anitiyoki, melala-nai wagaine yadi gugai ivevuvuna. Wadedeku tovetumagana nagona Yaubada iveolena ke wa yana nuwadoga gina itaveyabidi Bana yana gugai ina faifaisewa wagaine.†Gug 13:1-3 Ada au Paulo ke Banabasi bademowa gugai-nai iluyabuna. 27 Tova-nai Anitiyoki wagaine bademowa iyegemona ada tovetumagana adiyoo idouwevagauwidi ke gaitoma moyaina Yaubada gigugaiyena badi nodi yadi balawalilivuga-nai wagaine ani iifufuyena. Kaduwe vetumagana anawai Yaubada giyavuna badi keke meIsileli faidiya ani iawatalatalainena.†Gug 15:12 28 Ada wadedeku-deya Anitiyoki wagaine tonogalayavo nodi imiyamiya tova manamanawena.