15
Vekwageya giyegemona melala Anitiyoki wagaine.
1 Imiyamiya aku tova seyana kaliva tufodi Yudiya wagaine-deya iobuelai Anitiyoki, ada ivebutu tovetumagana badi keke meIsileli ani ivewavewaledi, ivonavona, “Kai keke Yaubada yana iyaiyaya vovomi bubuna wana tomogoloi Mosese tuwaina giveimeya anafaiweya, keke amifaiweya kibababala wana nuwaga.”†Gal 5:2 2 Ada Paulo ke Banabasi kaliva-dina nodi ivevonavona toyogina yadi vewala faina. Taidei faina tovetumagana Anitiyoki wagaine Paulo ke Banabasi ada kaduwe kaliva tufodi ivenuwadadanedi ke inanau Yelusalema, e ada wadedeku-deya nuwanuwa taidei faine ina veimeya, afositolo ke tovetumagana aditonagonayavo nodi. 3 E ada tovetumagana adiyoo ivagatunedi, ada Fonisiya ke Sameliya adifafali wagaidiya igolota inaunau aku tovetumagana fafali-dina wagaine imatamatawedi vaita badi keke meIsileli ani bademowa Kauveya wagaine inuwavilana ke ivetumagana. Ada meFonisiya ke meSameliya tovetumagana taidei valeya-nai inogalina ada ivemwamwala lakaina. 4 Tova-nai iyegemona Yelusalema wagaine, tovetumagana adiyoo ada afositoloyavo ke aditonagonayavo nodi isivaivaidi, ada gavana Yaubada yadi gugai wagaine gigugaiyena ani matatabuna iawatalatalainena wagaidiya.
5 Aku tovetumagana tufodi, badiyavo Falisi adiyoo, ani imididi ivona, “Gilubodana badi keke meIsileli ani wana vonedi ke iyaiyaya vovodi bubuna ina tomogoloina, kaduwe wana veimeyedi ke Mosese yana veimeya matatabuna ina itaveyabina.”
6 E ada afositoloyavo ke tovetumagana aditonagonayavo imiyavagauta ke nuwanuwa taidei faine ina veifuifufuyena. 7 Ada nodi iveifuifufu tova manamanawena ani Pita gimididi givonedi, givona, “Tubuiyakuweyavo, imi waalamanena tuwaina Yaubada ide wagaideya-deya Iya givenuwadadaneku ke valeya iwakana gana lumamalena badi keke meIsileli wagaidiya, e ada ina nogalina ke Kauveya ina vetumaganena. 8 Ada Yaubada Banae gavana kaliva yada nuwanuwa aseasedeya gialamanena, ani Aluwaluwa Tabuna giveledi badi keke meIsileli anafaiweya ide giveleda,†Gug 2:4, 10:44 ada ida yana awaega wagaine Banae yana nuwanuwa iwakana badi keke meIsileli wagaidiya gikiveyegemonina. 9 Ideyavo ke badiyavo Yaubada matane ani keke tamo ludaka gida miyami faina, badi Yeisu ivetumaganena ke aseasedi gikiveyegayeganena.†Gug 10:1-43, 11:4-17 10 E ada gavaiyamu-yo Yaubada wagaluvaluva ke meyameyaganina gina nuwakoyo? Ani taidei anafaiweya, nuwanuwami Mosese yana veimeya matatabuna wana veledi tonogala badi keke meIsileli ina itaveyabina, aku veimeya-dina ani tamadeyavo nagona ke ide malinai keke adafata kada mulimuliyedi. Ina vaita ewa vita-moena wasesena badi avaladiya. 11 Keke anafaiweya! Faina taidei anafaiweya kavetumagana: Ida Kauveya Yeisu yana nuwadoga wagaine adakibababala kanuwagana. Ada badi mamauwe kaduwe, Kauveya Yeisu yana nuwadoga wagaine adikibababala inuwagana.” †Gal 2:16, Efes 2:5,8, 2Tim 1:9, Tai 2:11, 3:7
12 Aku Pita yana vona wagaidiya yoo matatabudi amumu gikuluna, e ada Banabasi ke Paulo iifuifufu ani badi ivanenegedi. Iawatalatalainedi gavaiyamu Yaubada toyogina giveledi ke gugai lakaidi kadu ebameyasidobodobo igugaiyedi badi keke meIsileli adimwatuguya. 13 Badi iifufu giavaina, bana Iyemesa gimididi givona, “Tubuiyakuweyavo, yaku vona wana nogalina. 14 Banae Saimoni bademowa giifufu wagaideya gavaiyamu nagona Yaubada badi keke meIsileli giitanuwakalikaliyedi ada tufodi givenuwadadanedi Tauna faine. 15 Ada tainei anafaiweya tuwai-moena Buki Tabu wagaine falofita imaduawatalatalainena, ivona,
16 ‘Taidei gaitoma-dina muline Iya Yaubada gana yewaku, ada Deivida anamanuwa sinininila**Deivida yana manuwa sinininila ani vonaluvefosa Deivida yana ebaveimeya faine. bade gibeu ani ganayogo-vagilena. Manuwa-nai anagaitoma-dina iyawelidi ani ganayogo-vagiledi. 17 E ada yoo anatufo, tainei badi keke meIsileli wagaidiya gavega gavenuwadadanedi Tauku faikuya, ani kaduwe ina leleku. Taidei anafaiweya Iya KAUVEYA gavona, Iyaye-kuna taidei gaitoma-dina gana gugaiyedi. 18 Bademowa tova tuwai-moena gaitoma-dina gamaduvonayedi.’ ”†Emos 9:11-12
19 Kaduwe Iyemesa givona, “Taidei faina yaku nuwanuwa taidei anafaiweya. Badi keke meIsileli Yaubada wagaine imiyaviladi ani keke veimeya moyaidi vitadi kada veledi. 20 Aku au yadi leta kada vetokilumina, ada kada vonedi vaita kevakeva mali kaliva inauwedi ivebolavoiyedi yaubada fwayafwaya adikilumina wagaidiya ani keke inakani, tayuwe kevakeva-dina keke yegayegadi Yaubada matane. Kaduwe kaliva keke mali vavine nodi ina dauda, anafaiweya vevine keke mali kaliva nodi ina dauda. Au moganena ke vavinena nodi gaga inadau.†1Kol 6:18, 10:7-8, Ive 2:20 Kaduwe kevakeva agodi sisifuwadi, dayagidi keke gidamadu ani keke inakani, ada kaduwe dayaga keke inayui.†Vei 17:10-14 21 Taidei anafaiweya kana vonedi, faina Mosese yana veimeya kaliva moyaidi bademowa ialamanena. Faina tuwai-moena gielai malinai, melala moyaina wagaidiya kaliva moyaidi gavana Mosese yana veimeya anafaiweya iveyaveyawa Sabate seyana seyana manuwa ebavewala wagaidiya.” Taidei anafaiweya Iyemesa yana vona.
Afositolo ke kaliva lakaidiyavo leta iimilina tovetumagana badi keke meIsileli wagaidiya.
22 E au afositolo ada tovetumagana aditonagonayavo, kaduwe tovetumagana adiyoo matatabudi yadi veifuifufu giavaina, muline iveimeya aigaigabu ke kaliva tufodi yadi yoo wagaine-deya ina venuwadadanedi ke ina imilidi melala Anitiyoki Paulo ada Banabasi nodi. Ada kaliva adiselu ivenuwadadanedi, badiyavo Yudasa kadu anayegana Basabasi, ada Sailasi. Badi adiselu ani wa adivemoimoina tovetumagana adimwatuguya. 23 Ada leta iveledi ina nauwena. Leta-nai taidei anafaiweya ivetokilumina, ivona,
“Siule tubuiyameyavo. Ime tubuiyamiyavo afositolo ke tonagonayavo nodi yama vesiule wagaimiya, imi keke meIsileli wamiyamiya Anitiyoki, Siliya, ada Silisiya wagaidiya.
24 Ime akaiyanogala vaita kaliva tufodi yama yoo wagaimeya-deya iela wagaimiya ke yadi vona wagaidiya ikiveaseuloulolomi ada nuwami ikivevitana. Aku keke yama veimeya wagaine idaela. 25 Taidei faina moyaima yama nuwanuwa seyana wagaine aveimeya ke yama kaliva tufodi avenuwadadanedi ada wagaimiya aimilidi. Badi tubuiya aseasemeyavo Banabasi ke Paulo ani nodi inaelai. 26 Badi adiselu bademowa ialamanena vaita yada Kauveya Yeisu Keliso anayegana faina meyameyaganina gilagi ina nuwagana, aku au taudiyavo iawaegedi yana gugai wagaine. 27 Tainei faina yama kalivayavo adiselu Yudasa ke Sailasi aimilidi e ada awadiya ina talakakila anafaiweya gavana leta taidei wagaine avetokilumina. 28 Au Aluwaluwa Tabuna matane ada kaduwe ime matameya gilubodana ani keke veimeya moyaina wagaimiya anasei, aku taidei veimeya lakainaga anasena. 29 Veimeya-dina ani taidei anafaiweya. Kevakeva kaliva inauwedi ivebolavoiyedi yaubada fwayafwaya adikilumina wagaidiya ani keke wana kanikani. Kaduwe keke dayaga wana yuyui, ada kevakeva agodi sisifuwadi dayagidi keke gidamadu ani keke wana kanikani. Kaduwe keke vovomi wana awaawaege-kavokavovodi. Kai taidei awata-dina wana itaveyabi-dewedewedi, aga wanamiya iwakana.
Taidei yama nuwanuwa-nai anatubuga.
Kafoi.”
30 Ada kaliva iimilidi Yelusalema-deya ke inau Anitiyoki, wadedeku tovetumagana adiyoo moyaidi idouwevagauwidi ada leta-nai iveledi. 31 Tova-nai leta iveyawana ada ivemwamwala lakaina, faina adimatawa iwakana gikiveasevatudi. 32 Ada Yudasa ke Sailasi badiyavo falofita ani vona moyaina wagaidiya tovetumagana ikiveasevatudi ke ikivetoyogidi. 33 Ada wadedeku-deya imiyamiya maita tova manamanawena, ada ikidewadewa inayewa-vagiledi. Ada badi tovetumaganayavo ivonedi, “Nuwaniwalova wagaine wananau,” ke iimilidi iyewadi badi aditoimila wagaidiya. [ 34 Aku bana Sailasi nuwanuwana ginamiya wadedeku faina keke gidana.]**Kaliva tufodi Buki Tabu tuwai-moena ivetokilumi-vedamana ani maita teti fowa (34) ivetutamwaina. 35 Aku Paulo ke Banabasi nodi imiya tova manamanawena Anitiyoki wagaine, ada badiyavo ke kaduwe kaliva tufodi nodi ivewavewala ada Kauveya yana vona ilulumamalena.
Paulo ke Banabasi ivetutudaka.
36 Imiyamiya aku yadayada tufona giavaidi, Paulo Banabasi givonena, givona, “Kanayewa-vagileda melala moyaina wagaidiya taine gadedeku Kauveya yana vona kalumamalena. Kanana tubuiyadeyavo tovetumagana kana madubodadi, ke kana itadi gavaiyamu imiyamiya yadi vetumagana evaguna wagaine.” 37 Banae Banabasi ani nuwanuwana Iyoni Malika gina vagaule nodi kaduwe inanau. 38 Aku Banabasi yana nuwanuwa Paulo matane ani keke iwakana, faina nagona Pamifiliya wagaine Iyoni Malika ginuyabuyabudi ke giyewana. Keke gida atuvefaila nodi yadi faisewa wagaine.†Gug 12:25, 13:13, Kol 4:10 39 Ada Paulo ke Banabasi nodi igavekwavekwageya, e ada ivetutudaka. Banabasi Iyoni Malika givagaule ginauwe waka wagaine iyage ke inau Saifilasi imula wagaine. 40 Aku bana Paulo ani Sailasi givenuwadadanena ke givagaulena nodi inanau. Ada badi tovetumagana iveoveola adiselu faidiya, ada Kauveya nimane isedi ke yana nuwadogeya gina lemedi. E ada Paulo ke Sailasi nodi itauya, 41 ada ibalawalilivuga Siliya ke Silisiya adifafaliya ke tovetumagana adiyoo ikikivetoyogidi.
†15:11 Gal 2:16, Efes 2:5,8, 2Tim 1:9, Tai 2:11, 3:7
**15:16 Deivida yana manuwa sinininila ani vonaluvefosa Deivida yana ebaveimeya faine.
†15:18 Emos 9:11-12
†15:20 1Kol 6:18, 10:7-8, Ive 2:20
†15:20 Vei 17:10-14
**15:34 Kaliva tufodi Buki Tabu tuwai-moena ivetokilumi-vedamana ani maita teti fowa (34) ivetutamwaina.
†15:38 Gug 12:25, 13:13, Kol 4:10