1 Tubuiyakuweyavo, tamadeyavo nagona yadi dewa kana nuwanuwayedi. Tova tuwai-moena Itipita wagaine-deya iyegemona, ada iwaliwali fafali kavovona wagaine aku Yaubada yana buibui dibune inaunau e ada wai givewaledi,†Iyeg 13:21-22 ada kaduwe Leyaga Yabeyabelina idamanina.**Tova-nai meItipita meIsileli ivenevenegadi ani Yaubada gigai Leyaga Yabeyabelina giawaina ada meIsileli matatabu-moedi idamana babi ayayana wagaine. (Iyeg 14:22-29) 2 Ada ivebutu ivetomuliya vaguvagu Mosese wagaine, e ada yadina buibui-nai dibune ada Leyaga-nai nefanine ani anafaiweya vaita ibabitaiso Mosese wagaine. 3 Ada fafali kavovona-nai wagaine iwaliwali aku aa anayegana ‘mana’ Yaubada giveleveledi, ada matatabudi aa-nai wagaine ikani.†Iyeg 16:4-35 4 Ada matatabudi ani gufa Yaubada giveledi iyuyuga, ani gufa-nai Kabala lakaina wagaine gikiveyegemoni giyegesousoulena.**Tova iluwei anafaiweya ivona vaita Yaubada gufa gigai gimadu kabala wagaine-deya meIsileli inayuga faina. (Iyeg 17:1-7, Naba 20:1-3) Kabala-nai ani Keliso Tauna, Banae gikwayakwayabudi.**Kabala-nai wagaine gufa giyegemona ada aa-nai Yaubada giveleveledi ani iveebaita yana avetavetala gufa ada aa Keliso wagaine-deya, Bana beledi-nai yawai givelavelau ada gufa-nai yawai givelavelau. (Iyo 4:4, 6:30-35) 5 E, Yaubada giitaveyabidi ke ginagoyedi nonogana tufona moyaidi yadi dewa koyodi faidiya Yaubada keke gida vemwamwala wagaidiya. Taidei faina giawaegena ke ivealialika, ada vovodi iyavulenauwedi fafali kavovona wagaine.†Naba 14:20-35, Ibel 3:17 6 E ada tubuiyakuweyavo, taidei yadi dewa-dina koyodi faidiya adimatavuloga inuwagana, ani wada yada ebaita e ada alamana kana vaina vaita gavadi gavadi dewa koyodi, ani keke kada italuvadigedi e ada biyavo-dina anafaiweya kadadewa. 7 Ideyavo ani keke gida lubodada yaubada fwayafwaya wagaidiya kana oduodu anafaiweya tufodi idewa. Taidei yadi dewa-dina faidiya ani Buki Tabu givona, “MeIsileli ivetoga ikani ke iyuga, ada imididi yadi yaubada fwayafwaya itavoli balawalilivugina ada veneganega koyo-moena iveneganegayena.” †Iyeg 32:1-6 8 Keke gida luboda vovo anaawaega-kavokavovo anadewa kana dewadewaye anafaiweya badi tufodi tuwaina idewayena. Yadi dewa-nai faina, Yaubada givematavulogidi ke yadayada seya-moena wagaine kaliva ke vevine moyai-vagaidi ialika, adiyoo tuweniti teli tausani (23,000). †Naba 25:1-5 9 Kaduwe keke gida luboda Keliso yana atuvefaila kana galuvaluva anafaiweya badi tufodi tuwaina idewa. Yadi dewa-nai faina, mota koyo-moedi iyegemona ada iyovadi ke ialika.†Naba 21:4-9 10 Kaduwe keke kada gavoluvoluye anafaiweya badi Yaubada igavoluvoluyena. Tufona moyaidi idewa anafaiweya, e ada Yaubada yana anelose bana toluyavula giimilina ke giluyavuledi.†Naba 14:28-37 11 Tayuwe gaitoma-dina tova tuwai-moena wagaine iyegemona tamadeyavo nagona wagaidiya, ani iveebaita kaliva faidiya. Ada valeyadi taidei ivetokilumina Buki Tabu wagaine ani ide adakivetunu faine,†Lom 15:4 ide kaliva-dana kamiyamiya tutuya matatabuna adiebalauyabu wagaine. 12 Taidei faina kai seyana gaito gina vonaga, “Iya wa yaku vetumagana gamidimididi toyogina,” aga tainei kaliva-nai yana dewa gida itaveyabina aenanai ginabeu koyona wagaine. 13 Aladibidibi tulina tulina wanuwanuwagadi, ani anafaiweya aladibidibi-dina kaliva ke vevine moyai-moedi wagaidiya iyegeyegemona, keke anatulina. Aku Yaubada wa anavetumagana, e ada adafaiweya kana tunuvala wagaine. E ada gava aladibidibi gina yegemona wagaimiya, aga keke Yaubada gida awaege-yo gina toyogitagonemi, keke. Aku aiyada tova-nai gina yegemona wagaimiya, aga kaduwe Yaubada ota anawai gina vewalemi ke aladibidibi-nai wanaota-yabuyabuna, e ada amifaiweya wana atuvefailena.

14 E ada tubuiya aseasekuweyavo, yaubada fwayafwaya adioduodu ani wanaota wagaine-deya. Keke maita wana vemoimoinedi. 15 Imi wanuwanuwa dewadewa, e ada wana nuwanuwa yaku ifufu faine ke taumiyavo faimiya wana venuwadadanena kai vona velemoena o keke. 16 Waitana, sakalameni anayaudi wagaine gufa wa veina faina kavona vesiule, ada kayuga wagaine au ina kaveseyana Keliso dayagina wagaine. Ada beledi-nai kakiineinena ke kakanina, au ina kaveseyana Keliso vovona wagaine. 17 Beledi ani seya-moena, ada ide yoo tulina tulina nonogana moyaida kakanikani beledi-nai seya-moena wagaine, e ada ida giveebaita ani moyaida nodi ani vovoda seya-moena.†Mad 26:26-28, Mak 14:22-24, Luk 22:19-20, Lom 12:5 18 Kaduwe, meIsileli kana nuwanuwayedi. Yadi kevakeva o kai aa ivevebolavoiyedi Yaubada yana vebolavoi anadidiga wagaine, e ani aditufo ikanikanina, ada taidei wagaine ikani aigaigabu ke iveseyana Yaubada nodi.†Vei 10:12-15, 2Vei 18:1-4 19 Gavaiyamu wanuwanuwa yaku vona taidei faina? Kai gavona vaita yaubada fwayafwaya ada kevakeva ivevebolavoiyedi wagaidiya ani gaitoma lakaina? Keke-mowa. 20 E aku gaitoma-dina ivevebolavoiyedi, ani wada keke Yaubada wagaine aku aiyada aluwaluwa koyodi wagaidiya. E ada badiyavo idewadewa anafaiweya, ani keke nuwanuwaku badi nodi wana luluveya. Keke maita iwakana wana vevetubuiyana aluwaluwa koyodiyavo nodi ada wana veseyana. 21 Keke maita amiawaega Kauveya yana vei wanayuge ayo wanana aluwaluwa koyodi yadi vei wanayuge. Keke maita amiawaega aa-nai seseliyena Kauveya wagaine wanakani yana teibeli wagaine ayo wanana wanakani aa-nai seseliyena aluwaluwa koyodi wagaidiya yadi teibeli wagaine.†2Kol 6:15-16 22 Wana nogalina, keke Kauveya anavetumagana ke aluwaluwa koyodi adivetumagana ani nodi wana lomwalomwani, aenanai Kauveya nuwana wana kivekoyona. Evona wanuwanuwa vaita imi totoyogina ayo Banae?

23 Aku tufomi wavonavona, “Idadi bademowa yaku koyona Yeisu givenuwaegena e ada yavuyavuku. Ada gavana nuwanuwaku gana gugaiyena, au akufaiweya gana gugaiyena.” Aku gana vonemi, “Dewa moyaina ani keke iwakana matatabuna, ada kaduwe yada vetumagana keke gina kivetubugi.” 24 Keke taudeyavo gagana yada iwakana faina kanalele, aku aiyada badi imiyamiya lilivadeya yadi iwakana faina kana lelele. 25 E ada kai gava kevakeva maketi wagaine nuwanuwami wana kimonena, aga keke wana tolidadana wanavona, “Gavaiyamu, ida kevakeva ivebolavoiyena yaubada fwayafwaya wagaidiya o kai keke?” Keke taidei anafaiweya wana tolidadana e ada nuwafoumi wana kiveuloloni. Aku au wana kimone wanakani. 26 Faina “babi matatabuna ada kaduwe gaitoma matatabuna babiya imiyamiya ani Yaubada Bana toinavuvuna.” †Sam 24:1 27 Aku kai seyana kaliva banae keke Yeisu anatovetumagana, ani gina nuwabiyemi nodi wanakani ada nuwanuwami nodi wananau, aga au nodi wananau. Wananau ke gava aa o kai gava kevakeva matamiya inasena, wada wanakani. Keke wana tolidadana kai ivebolavoiyena yaubada fwayafwaya wagaine o kai keke. Keke taidei anafaiweya wana tolidadana e ada nuwafoumi wana kiveuloloni. 28 Aku kai tamo gaito gina matawemi ginavona, “Taide kevakeva-nai ani ivebolavoiyena yaubada fwayafwaya wagaidiya,” aga keke wanakani. Kai wana kanina aga keke iwakana, faina kaliva-nai givonemi ani kai ginuwanuwa vaita kevakeva-nai ivebolavoiyena ani awaawatana, e ada imi yami kani wagaine banae ginuwanuwa vaita wakoyona Yaubada matane. E ada banae nuwafouna wana kiveulolonina. 29 Imi keke wada nuwanuwa vaita kevakeva-nai anakani Yaubada matane ani koyona, aku tubuiyami ginuwanuwa ani wada koyona Yaubada matane. E ada tubuiyami faine wada nuwanuwa. Keke iwakana bana nuwafoune gina nuwanuwa vaita imi wakoyona e ada gina aseuloulolo imi faimiya. Tubuiyamiyavo yadi iwakana faina taide anafaiweya yaku ifufu. Aku bademowa gavonemi anafaiweya, kai ide taudeyavo gaga, au adafaiweya kevakeva-nai kana kanina. Waitana, Iya kaliva yavuyavuku ada wa yaku awaega kani faine, e ada gavaiyamu-yo seyana gaito nuwafouna analutovona faina yana nuwanuwa gina veimeyeku ada gina kivetunuku dewa iwakana ada dewa koyona faidiya, aiyo? 30 Kai akuga o akukevakeva faina ganavona vesiule Yaubada wagaine ke gana kanina, gavaiyona-yo tamo gaito taine aa o kevakeva gakanina faina gina awavekoyoyeku vaita gaitoma awaawatana gakanina? Aa-dina faidiya gavona vesiule Yaubada wagaine.

31 E ada kai kanakani o kai kanayuga o kai gavadewa kana faisewana, aga yada dewa matatabuna wagaidiya Yaubada anayegana kana kikilakaina. 32 Yada dewa kana itaveyabidi ada kana nuwanuwa kaliva faidiya, kai meIsileli o badi keke meIsileli o kai badi tovetumagana Yaubada yana ekalesiya wagaine. Keke iwakana tamo dewa kana gugaiye keke yadi nuwanuwa anafaiweya, e ada vaita kabala kasena yadi vetumagana anawai wagaine ke gina kivebeudi. 33 Iya kaduwe yaku dewa matatabuna gaitaveyabidi, ada gagaluvaluva ke kaliva moyaidi gana kivemwamwalidi. Keke Iya tauku yaku iwakana faina gada gugugai, aku kaliva moyaidi yadi iwakana faina gagugugai e ada moyaidi adikibababala ina nuwagana Yaubada wagaine.