1 Ada yadayada iluwei gina avaidi muline, kanibutu gina yegemona anayegana Nugulina ke Beledi Keke wa Anayisti Anakanibutu.**Nugulina anakanibutu givevuvu yadayada ebavevuvu wagaine aku Beledi Keke wa Anakiveinala Anakanibutu ani givevuvu yadayada anavelu ke ginau yadayada seveni. Kanibutu-dina moyaidi ivewagadi ‘Nugulina’, vaita kanibutu seyana, aku velemoena iluwei. (Iyeg 12:1-27) Aku veyavo anatovegugai lakaidiyavo ke Mosese yana veimeya anatovewalayavo ani wai ilelelena ke Yeisu ina kiveyabina ada ina luvealikana,†Mak 10:33-34 aku ikavuya-deya, 2 faina ivona, “Keke Abutu anatova wagaine kana kiveyabi, faina kaliva ina nuwakoyoyeda ke gaviya ina silakaina.”

3 Ada Yeisu ginau Bedani melala wagaine gimiyamiya Saimoni yana manuweya. Banae tuwaina givelefelo aku giveiwaka, e aku aimo ivewagana Saimoni tolefelo. Ada ienokekela ikanikani ani vavine seyana bunama anayegana ‘nadi’ gialiyena, magana iwaka-moena kadu fatana lakaina. Bunama-nai tuwava kabala anayegana alabasita negenine gimiyamiya. Ada vavine-nai anatuwava odona giludobona ada Yeisu kuluwane giiwana.

4 Aku kaliva tufodi iitana ada inuwakoyo vavine wagaine ke taudiyavo gaga ivonavona, “Gavana faina bunama givenuwaegege? 5 Kada vekimoneyena, e ada anafaiweya kaliva fatana malamala seyana wagaine kada nuwagana ke tofanifani kada veledi.” Ada vavine iduweyena toyogina.

6 Aku Yeisu givona, “Wanase-moe ginamiya. Gavaiyamu-yo vita wavele vavine-nai? Gavana gigana wagaikuya ani iwakana velemoena. 7 Fanifani ani tova moyaina wagaimiya imiyamiya ada kai gavatova wagaine nuwanuwami wana lemedi, aga amifaiweya yami nuwakabubu wana veledi. Aku Iyayeku ani aimo keke tova moyaina nodi kana miyami. 8 Banae ani gavana anafaiweya, taine gigugaiyena. Vovoku gimadu bunamina akuibo didikuleya faina. 9 Gavonemi velemoena, gadedeku babi matatabuna wagaine valeya iwakana ina lumamalena, vavine taidei yana gugai iwaka-vagaina wagaikuya ina ifufuyena anaebanuwaududu faina.”

10 E ayo Yudasa Isakaliyota, banae adituwelo seyana, ginau veyavo anatovegugai lakaidiyavo wagaidiya ke Yeisu gina ivemogatalina wagaidiya faina. 11 Badi Yudasa yana vona inogalina wagaine ivemwamwala lakaina, ada ivonadabadaba bana wagaine vaita mani ina velena. E ada Yudasa givebutu wai gilele ke gavatova iwakana wagaine Yeisu gina atuegena wagaidiya.

12 Abutu-nai anayegana Beledi Keke wa Anayisti anayadayada nagona giyegemo.†Iyeg 12:14-20 Yadayada-nai wagaine meIsileli tova moyaina Nugulina analami ivevebolavoiyedi. E ada Yeisu yana tonogalayavo ielai wagaine ke itolidadana, ivona, “Gadedeku nuwanuwa anana ke aa ana kidewadewa Nugulina anakani faina?”

13 Ada Yeisu yana tonogalayavo adiselu giimilidi aku givonedi, “Wananau Yelusalema ada kaliva seyana gufa wa tuwavina giavalana, ani nodi wana venuwaga. Banae wana muliyena, 14 ada gavamanuwa wagaine ginaluku aga toni manuwa wana vonena, ‘Tovewala givona, Gadedeku wakawaka yadi tutulagolota ada wagaine yaku tonogalayavo nodi Nugulina aana anakani?’ 15 Ada banae gina vewalemi tutulagolota lakaina manuwa getane, bademowa giba matatabuna isedewedewena. Wadedeku-deya adaga wana kidewadewa.” 16 Ada tonogalayavo adiselu itauya inau melala lakaina wagaine, ada gavana Yeisu givonayedi ani inuwagana anafaiweya. E ada wadedeku Nugulina aana ikidewedewena.

17 Mala gibogi Yeisu gielai yana tonogalayavo adituwelo nodi. 18 Ada teibeli lilivane ienokekela ikanikani aku Yeisu givona, “Vona velemoena, gavona wagaimiya, kaliva seyana wagaimiya gina ivemogataliku nibaikuweyavo wagaidiya, banae Iya nodi akanikani.” †Sam 41:9

19 Ada nuwadi givita ke seyana seyana ivona Yeisu wagaine, “Kai Iyayeku?”

20 Ada gilufata wagaidiya, givona, “Banae amituwelo wagaimiya, banae-nai Iya nodi beledi autuvina nauwa wagaine. 21 Velemoena Banae Kaliva Natuna gina alika Yaubada yana vona vetovetokilumina givonayena anafaiweya, aku kaliva-nai gina ivemogatalina nibainavo wagaidiya ani aimo vita lakai-moena gina nuwagana! Kai keke gida tubuga, ina iwaka-moena.”

22 Ada ikanikani aku beledi givaina, Yaubada wagaine givona vesiule, ada gikiinena ke tonogalayavo giveledi aku givona, “Wana vaina. Taidei vovoku.”

23 Ada kaduwe waini wa veina givaina ke givona vesiule Yaubada wagaine, ada giveledi matatabudi wagaine iyuga. 24 Ada kaduwe givonedi, “Taidei ani dayagiku Yaubada yana veyavo anawai faina. Gimadumadu tomiyababi moyaidi faidiya.†Iyo 6:54-58, 1Kol 10:16 25 Gavonemi velemoena, keke kaduwe waini ganayu-vagile analaba yadayada-nai wagaine Yaubada yana ebaveimeya wagaine waini evaguna ganayuna.” 26 Ada kweli davadava ikweliyena. Ada ikweli giavaina, ina ilaka Oya Olive wagaine.

27 Ada Yeisu givonedi, givona, “Imi moyaimi yami vetumagana wagaikuya gina kabekabebena ke wanaota-yabuyabuku. Faina Yaubada yana vona seyana ivetokilumina givona,

29 Ada Pita gilufata, givonaga, “Kai badi moyaidi inaota-yabuyabuni aku Iya au keke-mowa!”

30 Ada Yeisu givona Pita wagaine, “Gavoneni velemoena, bogibogi taidei kamukamu keke gina kwage tova iluwei aku nagona unamadu veweyeku tova toiye vaita keke uda alamaneku.”

31 Ada Pita giawafatafata toyogina, givonaga, “Kai O ina luvealikani aga Iya nodi ina luvealikada. Keke-mowa gana veweyeni!” Ada tonogalayavo moyaidi ivona anafaiweya.

32 Ada Yeisu yana tonogalayavo nodi inau fafali seyana anayegana Gedesemani wagaine ada givonedi, givona, “Idedeku wana vetoga aku ganana gana veoveola.” 33 Ada Pita, Iyemesa, ke Iyoni givaidi nodi inau. Aku Yeisu givebutu giaseuloulolo lakaina 34 ada givonedi, givona, “Nuwaku givita lakaina, vaita yawaiku gida alagoloi. Idedeku wana miyamiya aku wana itaita.”

35 Aku ginau maita-moena ada wamagigine givetalatala babi wagaine ke giveola Tamana wagaine vaita uloulolo anatova gida vaiyavulena. 36 Givona, “Kamaku, Kamaku-yo, O wagainiya gaitoma matatabuna meyameyaganina. Uloulolo anavei taidei uda vaiyegena wagaikuya. Aku keke yaku nuwanuwa, au Oyeni ya nuwanuwa anafaiweya una gugaiyena.”†Iyo 6:38

37 Ada Yeisu giyewana giitadi aditoto idaudau, ada Pita wagaine givona, “Saimoni, udaudau. Gavaiyamu, keke afaiweya kauwana anabai seya-moena una atuvefaila ke una itaita? 38 Imi wana itaita ke wana veoveola e ada keke aladibidibi wagaine wanabe. Aluwaluwami nuwanuwana aku vovomi gikabekabebena.”

39 Kaduwe ginau giveoveola-vagila, ada vona-dina giinana-vagiledi. 40 Giveoveola giavaina, kaduwe giyewana ani giitadi idaudau, faina badi matadi gikoyo-mowa. Ada gilivagudi aku keke ida alamane gavana inavona Bana wagaine.

41 Ada au gisegedi aku kaduwe gina giveoveola, ada kaduwe tova anaveto giyewa-vagilena ke givona wagaidiya, givona, “Gavaiyamu, aimo wadaudau ada waveyaveyawai? Auwe! Bademowa tova giyegemona ke Banae Kaliva Natuna ina atuegena tokoyona nimadiya. 42 Wana mididi kananau. Waitana, kaliva-nai ginaseku nibaikuweyavo nimadiya ani giyegemona bademowa!”

43 Ada Yeisu aimo giifuifufu ani Yudasa giyegemona, banae tonogala seyana adituwelo wagaidiya. Ada kaduwe yoo lakaina nodi ielai ani wa yadi benisi ke feto, badi kaliva-dina ani veyavo anatovegugai lakaidiyavo ke veimeya anatovewalayavo ada kaliva lakaidiyavo yoo-dina iimilidi ielai. 44 Aku Yudasa bademowa yoo iyaiyaya seyana gimaduveledi, givona, “Banae gaito gana veyaugina ani kaliva-nai. Wana kiveyabina ada wana nauwena ke wana itaveyabi-dewedewena e ada keke meyameyaganina ginaota.” 45 E ada gielai tunutunugina ginau Yeisu wagaine ada givona, “Labai!” Ada giveyaugina. 46 Ada Yeisu ikiveyabina. 47 Aku kaliva seyana lilivadiya gimidimididi ani yana benisi gisiwakana ada kaliva seyana tagana gitalayoe gibeu. Bana kaliva-nai ani veyavo anatovegugai aditonagona yana togugai seyana.

48 Ada Yeisu givona wagaidiya, givona, “Gavaiyamu, Iya vaita tobaninivula anafaiweya e ada waelai wabenisimiyavo ke wafetomiyavo ada wana kiveyabiku? 49 Yadayada seyana seyana Iya imi nodi manuwa tabu wagaine gavevewala aku keke wada kiveyabiku.†Luk 19:47, 21:37, Iyo 18:20 Aku gavana Buki Tabu wagaine ivetokilumina ani analauboda gina yegemona velemoena.” 50 Taidei anafaiweya givona ada tonogalayavo moyaidi iota-yabuyabuna.†Mad 26:31, Iyo 16:32

51 Aku tubulakata seyana Yeisu gimulimuliyena, ananuya kwayakwayana seya-moena gisiwalina. Ada kaliva tufodi ikiveifana, 52 ada ananuya gimaduyabuyabuna aku wakonekonena giota.

53 Aku Yeisu inauwena veyavo anatovegugaiyavo aditonagona yana manuweya. Ada veyavo anatovegugai lakaidiyavo ke kaliva lakaidiyavo ada veimeya anatovewalayavo ivagauta manuwa-nai wagaine. 54 Aku Pita bana atuwadeya Yeisu gimuliye gielai veyavo anatovegugai aditonagona yana manuwa anaebaga wagaine giluku. Ada gina givetoga manuwa tabu anafilisimaniyavo nodi ke ai givevevala.

55 Aku veyavo anatovegugai lakaidiyavo ke meIsileli yadi Kanisela moyaidi†Luk 23:50 ke anaailabama adikivemala toveloi ileledi e ada wagaidiya vaita Yeisu ina veloina, ada yadi fwaya-nai wagaine vaita adifaiweya alika wagaine inasena. Aku keke ida nuwaga. 56 Toveloi moyaidi ilakaela iveloina, aku keke kaliva iluwei ida veaigaigabu yadi vona wagaidiya. 57 E aku kaliva tufodi imidiyegemona ke vona fwaya ivonayena Yeisu faine, ivona, 58 “Ime anogalina ani givonaga, ‘Manuwa tabu taidei kaliva nimadiya iyogona ani gana yawelina, ada yadayada toiye wagaine kadu seyana gana yogona.†Iyo 2:19-21 Ada manuwa tabu-nai taidei ani keke gina mididi babi taidei anakalivayavo nimadiya.’ ” 59 Aku kaduwe badiyavo yadi awatalatalaina keke ida veaigaigabu.

60 Ada banae veyavo anatovegugai aditonagona moyaidi nefanidiya gimidiyegemona aku Yeisu gitolidadanena, givona, “Gavaiyamu, keke afaiweya una lufata? Gavana faina kaliva taidei yadi awavekoyo fainiya keke udafata?” 61 Aku Yeisu keke tamo laufata gida vonaye, au giveyamata-mowa.†Ais 53:7, Mak 15:5 Ada kaduwe bana veyavo anatovegugai aditonagona gitolidadane-vagilena, givona, “Gavaiyamu, vona velemoena Oyeni Mesaiya, Banae kadavadavana Natuna?”

62 Ada Yeisu givona, “IYA TAUKU GAMIYAMIYA.**Buki-nai Iyegemona 3:13-14 wagaine Mosese Yaubada gitolidadanena gavaiyamu anayegana meIsileli wagaidiya gida inanana, ada Yaubada givonena, “MeIsileli una vonediga, ‘Banae anayegana IYA TAUKU GAMIYAMIYA ani giimiliku wagaimiya.’ ” Ada kaduwe Iyoni 8:24,28,58, ada 13:19 wagaidiya Yeisu yegana-nai giinanana Tauna faine. Ada aimo wana itana Banae Kaliva Natuna ani Yaubada Totoyogi-vagaina aiyatagine gina vetoga gina miyamiya, ada gabama anabuibui tabodiya gina elaelai.”†Mak 13:26

63 Yeisu taidei anafaiweya givona ada veyavo anatovegugai aditonagona-nai ginuwakoyo lakaina ke tauna ananuya gikelilina aku givona, “Aaa! Gavana faina toitavedama kaduwe aimo kana lelele? 64 Bademowa yana vona awadamana wanogalina. Gavaiyamu wana veimeya?”

Ada moyaidi iawavekoyoyena ke iveimeya, yana vona awadamana faina analauboda gina alika.†Vei 24:16 65 Ada tufodi ivebutu Yeisu ikiwalina aku magigina ikiwafina ada itafivilavilana aku ivonavonaga, “Una falofisai!” Ada manuwa tabu anafilisimaniyavo ivaina ke ilavulavuna.†Ais 53:5

66 Aku Pita gimiyamiya dibune ebaga-nai wagaine aku veyavo anatovegugai aditonagona yana togugai vavine seyana gielai. 67 Ada giitana Pita ai givevevala ani giitadonedonena ke givona, “Oyeni kaduwe Yeisu kwana Nasaledi nodi.”

68 Aku givewa, givona, “Iya keke gada alamane ada keke nuwaku gidamali gavana uvonevone!”

69 E, ada ginau tabae wana wagaine ada kamukamu gikwage. Ada vavine-nai wadedeku giitana ke givona-vagila tomididi wagaidiya, givonaga, “Tayuwe kaliva-nai ani Yeisu yana kaliva seyana.” 70 Aku kaduwe givewa.

Ada tova kabisona tomididi-dina lilivane ivona Pita wagaine, ivona, “Velemoena, oyeni yana yoo seyana, faina oyeni kwana Galili.”

71 Aku Pita givona, “Kai keke ganavona velemoena, aga gilubodana Yaubada gina vematavulogiku. Aku ganavona velemoena, Bana Kaliva-nai wavonayena ani keke gada alamane!” 72 Ada maduga-mowa kamukamu gikwage anavelu ke Pita giduna vona-nai Yeisu givonayena wagaine, givona, “Muliya-yo kamukamu gina kwage tova iluwei aku nagona unavewa tova toiye vaita keke uda alamaneku.” †Mak 14:30 Ada Pita yana vewa-nai nuwana giafolena, au gitagilumaibulu.