1 Tubuiyakuweyavo, vona velemoena Yaubada yana nuwakalikali lakai-vagaina wagaideya! Taidei faina gavonavagadonemi ke taumiyavo wana sesemi Banae matane vaita vebolavoi aku wayawaimi. E, wana awaege-yabumi Banae wagaine e ada seseliyemi Banae faine wana miyamiya ke gina vemwamwala faimiya.†Lom 6:13 Taidei oduodu anawai-nai gilubodami. 2 Keke wana awaegemi babi ananuwanuwa wagaidiya, ada kaduwe kaliva iawaawaegedi nuwanuwa-dina wagaine ani keke wana gaveuveuledi. Aku aiyada taumiyavo wana awaegemi Yaubada wagaine ke yami nuwanuwa gina kiveevagudi.†Efes 4:22-24, 5:17 Taidei wagaine yami dewa gina sevedavedamadi ke ina veiwaka, e ada amifaiweya wana awavelemoenayena gavana Yaubada nuwanuwana wana gugaiye. Tainei, wana alamanena gavana iwakana ada gavaiyamu Yaubada wana kivemwamwali, ada kaduwe wana alamanena gavaiyamu wanadewa Banae yana nuwanuwa anafaiweya.

3 Yaubada wa yana nuwadoga givenuwadadaneku ke gaveafositolo faine, e ada imi seyana seyana wagaimiya gana ifuifufu. Keke gida luboda nuwainageniya tauni una kilakaini ke unavona, “Iya kaliva lakaiku,” aku wa ya nuwanuwa tunutunugina tauni fainiya una nuwanuwa. Aku ya vetumagana-nai Yaubada giveleni ani anatubuga anafaiweya una nuwenuwena. E, au taidei wagaine wa ya venuwadadana tunutunugina tauni una nuwenuweni. 4 Ide seyana seyana vovoda seyana aku anatalai moyaina, ada talai-dina yadi gugai tulina tulina. 5 E ada au ide moyaida ani Keliso nodi kaveseyana wagaine, ide Bana vovona seyana kamiyamiya. Ide nodi kaveyoo-tamwai e ada anafaiweya gabu seyana wagaine ina, tama, novu, natu ani seyana seyana adiivi wagaine imiyamiya ani keke meyameyaganina talai seyana miyamiyadakana gina miyamiya tubuiyanavo wagaidiya.†1Kol 12:12 6 Ide seyana seyana adafaiweya gugai tulina tulina kana gugaiyedi anafaiweya adavutuvutuga Yaubada yana nuwadogeya giveleda, e ada wa yada idibumwaiga kana vegugaiyedi. Kai badi gavega adivutuvutuga ina falofisai, aga gilubodadi Yaubada yana vona ina awamogatalena gavana Aluwaluwa Tabuna giawaveleveledi yadi vetumagana anaetowava anafaiweya. 7 Kai badi gavega adivutuvutuga toleme, badi gilubodadi ina lemeleme iwakana. Kai badi gavega adivutuvutuga tovewala, aga badi ida vevewala iwakana. 8 Kai badi gavega adivutuvutuga kaliva ina kikiveasevatudi, aga gilubodadi yadi vona wagaidiya ina kiveasevatudi. Kai badi gavega adivutuvutuga yadi lokoloko o kai mani ina veleveledi kaliva-dina ivemaufo giba wagaidiya, aga au gilubodadi wa yadi nuwadoga ina velavelau. Kai badi gavega adivutuvutuga ina vetonagona, aga gilubodadi wa yadi idibumwaiga kaliva ina nagonagoyedi. Ada badi gavega adivutuvutuga tonuwakalikali, aga gilubodadi keke wa yadi nuwakalikali gagana aku kaduwe wa yadi vemwamwala nodi badi nuwakalikalidiyavo ina lemelemedi.†1Kol 12:4-11, 1Pi 4:10-11

9 Kai kaliva wana vonena, “Ganuwakabubuyeni,” aga gilubodami wa aseasemi nodi wana nuwakabubuyena velemoena. Dewa koyona matatabuna wana dibusoyogedi aku gavana iwakana wana kidonena. 10 Tubuiyamiyavo badi wanuwakabubuyedi velemoena anafaiweya, moyaimi nodi wana venuwanuwakabubu.†1Pi 1:22 Ada wa yami vemoimoina tubuiyamiyavo adiyegana wana kikilakaidi. 11 Taumiyavo wana awaege matatabuyemi Kauveya yana gugai wagaine. Keke wana dibusoyoga aku aiyada wa yami idibudibumwaiga wana gugai.†Kol 3:23 12 Gavana tamo wanuwavetumaganena wana nuwagana Yaubada wagaine-deya ani wa yami vemwamwala wana bodaboda faine. Ada kai vita ina yegemona wagaimiya aga wana atuvefaila. Tova moyaina wa yami idibumwaiga wana veoveola.†1Tes 5:16-18 13 Kai badi gavega Yaubada yana yoo wagaidiya ivemaufo tamo gavana wagaine, aga yami giba wagaine wana lemedi. Wakawaka wana sivaivaidi yami manuweya ke wana itaveyabidi.

14 Kai badi gavega ina kiveuloulolonimi faina imiyavo Keliso yana kalivayavo, aga keke wana alatabutabuyedi aku aiyada wana awanuwakabubuyedi.†Mad 5:44, Luk 6:28, 23:34 15 Badi gavega imwamwala, nodi wana mwalavaisedi. Badi gavega itagitagiya, nodi wana tagiyavaisedi. 16 Matatabumi wana veyavo e ada nuwanuwa seyana wagaine wana miyamiya. Keke taumiyavo wana kikilakaimi evona kaliva ina itaitalaka wagaimiya aku aiyada wa yami nuwaobu wana sefaga ke kaliva-kavokavovo nodi wana luluveyau. Keke taumiyavo wa yami nuwalaka wana nuwenuwemi vaita alaalamanimiyavo.†Lom 14:19, Fip 2:2-3

17 Kaduwe, kai kaliva ginadewa koyona wagaimiya, aga gilubodami keke wanadewa laufata koyona wagaine. Aku wanamadu nuwanuwayena gavadewa iwakana analauboda e ada wanadewa tunutunugina moyaidi matadiya.†1Tes 5:15 18 Kai amifaiweya kaliva moyaidi nodi wanamiya kukuya wagaine, au tainei anafaiweya wanamiya. 19 Tubuiya aseasekuweyavo, kai kaliva inadewa koyona wagaimiya, keke wana miwayaudi o kai wana nuwanuwa laufata faina, aku aiyada wana atuegena Yaubada wagaine ke Banae wa yana nuwakoyo gina lufata wagaidiya. Faina yana vona Buki Tabu wagaine givona,