Tesalonaika Tovetumagana Yadi Leta Anavelu Paulo Givetokilumina
Kivemala
Paulo Kolinita gimiyamiya aku meTesalonaika tovetumagana yadi leta nagona givetokilumina. Ada anaita kai vaikoi sikisi giavaidi, aimo Kolinita wagaine aku kaduwe yadi leta anavelu givetokilumi-vagilena, faina gikaiyanogala vaita meTesalonaika tufodi inuwanuwa vaita Kauveya Yeisu bademowa gidayewa-vagila e ada nuwadi givoganina ke ivebutu au imiya-kavokavovo. Leta taidei wagaine Paulo gikivetunudi vaita nagona Seitani yana kaliva koyo-moena gina toyogina ke kaliva tufona moyaidi gina sibaledi e ada dewa koyona gina veinala-mowa, aku muliya Kauveya Yeisu ginayewa-vagilena ke tokoyona adimatavuloga ina nuwagana. Kaduwe tovetumagana uloulolo inuwanuwagadi ani Paulo gikiveasevatudi ke givonavagadonedi vaita miya-kavokavovo inasena aku aiyada ina vevilaga ke ina faisewa iwakana e ada taudiyavo yadi miya ina itaveyabina.
Vona vesiule. (1:1-2)
MeTesalonaika yadi atuvefaila faina ivesiuleyedi. (1:3-12)
Kaliva koyo-moena yana yegemona faina iawamogatala. (2:1-12)
Wana mididi toyogina yami vetumagana wagaine. (2:13-17)
Wana veoveola faimeya. (3:1-5)
Keke wanamiya-kavokavovo aku aiyada wana faifaisewa. (3:6-15)
Vona anaebalauyabu. (3:16-18)
1
1 Iya Paulo, Sailasi ke Timoti. Imiyavo Yaubada yana yoo wamiyamiya yana ekalesiya Tesalonaika wagaine ani yama vesiule wagaimiya, imi Yaubada Tamada ada yada Kauveya Yeisu Keliso nodi waveseyana. 2 Yaubada Tamada ada yada Kauveya Yeisu Keliso wa yadi nuwadoga ina lemelememi, ada kaduwe yadi nuwaniwalova wagaine wanamiya.
MeTesalonaika yadi atuvefaila faina ivesiuleyedi.
3 Keke gavana faina gada vetokiluma wagaimiya aku nuwanuwaku gana kiveasevatumi yami awaega Yeisu Keliso wagaine faina. Ime gilubodama tova moyaina Yaubada wagaine ana vesivesiule imi faimiya. Amalauboda ana vesivesiuleyena faina yami vetumagana giveinala-mowa, ada kaduwe moyaimi wavenuwanuwakabubu seyana seyana wagaimiya ke yami nuwakabubu-nai gitubuga-mowa. 4 E ada Yaubada yana ekalesiya fafali tulina tulina wagaidiya ani imi faimiya agakaikai,†1Tes 2:19-20 avona, “Badi tovetumagana Tesalonaika wagaine, ani Yeisu anatogadibudibusoyoga ikiveuloulolonidi e ada vita lakaina inuwanuwagadi, nonogana yadi vetumagana toyogina velemoena ada vita-dina wagaidiya iatuvefailedi.”
5 Velemoena, tova malinai kaliva nimadiya wauloulolo lakaina ke vita moyaina wanuwanuwagadi aku waatuvefailedi,†Fip 1:29 aku taidei giseyegemonena wagaideya vaita Yaubada yana vevonayavuga ani tunutunugina. Faina Banae givonemi givona, “Imi biyavo-mina ani yaku kalivayavo faina, uloulolo wanuwagadi kaliva nimadiya aku waatuvefailedi faina, imi amilauboda-mowa yaku ebaveimeya wagaine wanamiya-vagata.” 6 Yaubada yana veimeya tunutunugina faina, badi gavega ikiveuloulolonimi ani ginadewa laufata wagaidiya,†Lom 12:19 7 aku imiyavo ani amiuloulolo gina vaiyegedi e ada wana veyawai, ada kaduwe ime anafaiweya. Taidei gaitoma-dina ina yegemona tova-nai yada Kauveya Yeisu gina obuelai wagabameya wa yana anelose totoyogi-moedi nodi.†Mad 25:31 8 Aiyabeyabela meyana gina nunugafifidi aku ina obuelai, e ada badi gavega keke nuwanuwadi Yaubada ina alamane ada yada Kauveya Yeisu Keliso anavaleya iwakana keke ida venogale†Lom 2:8 ani gina vematavulogidi. 9 Adilaufata ani gina vematavulogidi, tainei ina uloulolo-vagata ke inamiya atuwada Kauveya wagaine-deya, ada keke-mowa maita Kauveya magigine ina yegemona, ada kaduwe keke maita yana toyogina anakaikaiwabu inaita.†Mad 25:46, 2Pi 3:7 10 Adimatavuloga-nai taidei anafaiweya ina nuwagana gavatoveya Kauveya Yeisu ginayewa-vagilena. Tainei tova-nai wagaine ginaelai ke yana yoo tabutabudiyavo ivetumagana Banae wagaine ani meyadi gina sidobodobona, ada ina awavekaikaiwabuyena ke inadava vemoimoinena.†Kol 3:4 Ada imi aimo biyavo-dina adimwatuguya ke nodi wana awadavadavana, faina Yeisu valeyana aawamogatalena wagaimiya ani wavetumaganena.
11 Imi valeyana-nai wavetumaganena faina, ime tova moyaina aveoveola faimiya. Yaubada gidouwemi ke yawai tabutabuna wagaine wana miyamiya, e ada aveoveola ke yana leme wagaine wanadewa iwakana yawai-nai analauboda anafaiweya. Ada toyogina gina velemi ke dewa iwakana tulina tulina yami yauvivila wagaidiya wana seseyegemonedi, ke gavadewa gavadewa yami vetumagana wagaine givevuvu ani yana toyogina wagaine wana luyabuna.†Kol 1:10 12 Taidei anafaiweya aveoveola e ada kaliva yami dewa ina itadi ke yada Kauveya Yeisu Keliso anayegana ina kilakaina,†1Kol 10:31 ada yada Yaubada ke Kauveya Yeisu yadi nuwadogeya ina lemelememi ke imi amiyegana ina kilakaina.