1 E ada kai tamo gaito gida tolidadana, gidavona, “Gavaiyamu-yo meIsileli ani Yaubada Tauna yana kalivayavo nonogana gidibusoyogedi?”

Ada Iya gada lufata, gadavona, “Au, keke-mowa!” Iya gaalamanena Banae nuwanuwana yana kalivayavo, ada keke gida dibusoyogedi. Faina Iya kaduwe kwana Isileli seyana, Iya seyana Ebelaamo yana tubudelideli, ada gayegemona gaisena Beniyamina anaunuma wagaine-deya.†Fip 3:5 E ada waitana, Iya keke Yaubada gida dibusoyogeku. 2 Ada keke yana kalivayavo meIsileli gida vedomobubuse-vagaidi, badiyavo tova tuwaina givenuwadadane-vagaidi. Wana nuwaududuna gavana Buki Tabu wagaine ivetokilumina Ilaitiya faine. Banae MeIsileli yadi dewa koyo-moedi faidiya giawalavedi Yaubada wagaine, givona, 3 “KAUVEYA, ya falofitayavo moyaidi iluvealikadi, ada aebavebolavoi iluyawelidi. Akukaibe-mowa gavetumaganeni ani gamiyamiya wayawaiku, aku ileleleku ke ina luvealikaku.” †1Kin 19:10,14 4 Ada gavaiyamu Yaubada yana laufata? Givona, “Keke akaibe-mowa, aku yaku kalivayavo adiyoo seveni tausani (7,000) gaseliyedi imiyamiya Tauku faikuya. Badi keke tugadi ida vetodonedi ke ida oduodu yaubada fwayafwaya ivewagana Beli**Ilaitiya yana tova wagaine, kaliva wa yadi nuwanuwa balana ivetumagana vaita yaubada fwayafwaya anayegana Beli ani giveiveimeyedi kauwana ke wei ada gaitoma matatabuna babi wagaine yadi veguwa ada kevakeva matatabuna yadi tubuga faine. Ada tova-nai meIsileli Yaubada ina vedomobubusena, tova ke tova Beli anakilumina wagaine ina oduodu. Tayuwe tova-nai wagaine meIsileli aditoveimeya anayegana Eabi, ada vavinena Desibeli nodi meIsileli inuvuyoyedi ke ina oduodu kilumina-nai wagaine, bana Desibeli giwai gialiyena yana fafali wagaine-deya. (1Kin 16:29-33). wagaine.” †1Kin 19:18 5 E ada anafaiweya kaduwe tova malinai, badi meIsileli wagaidiya yoo seyana kabisona badi tovetumagana ani aimo gimiyamiya. Badi keke wa yadi iwakana e ada Yaubada gida venuwadadanedi aku au yana nuwadogeya givenuwadadanedi ke Banae yana kalivayavo. 6 Yaubada kaliva givevenuwadadanedi ani keke yadi dewa iwakana faina, aku aiyada yana nuwadoga wagaine givevenuwadadanedi. Kai yadi dewa gida itaitana ke yadi dewa iwakana faina gida venuwadadanedi, aga taidei yana nuwadoga-nai ani vaita yadi gugai iwakana fatana, e ada wada keke nuwadoga velemoena.

7 E ada Yaubada meIsileli tufodi gaga givenuwadadanedi ani gavaiyamu kana nuwenuwena? MeIsileli ivediwe evona ina yegayegana Yaubada matane, aku ivediwe-wayoga. Au tufodi gagana Yaubada givenuwadadanedi ani kaliva-dina inuwagana, aku meIsileli velugadiyavo ani idibusoyoga e ada Yaubada yadi asekuga gikivetubugi-moena. 8 Taidei yadi asekuga-nai faina ivetokilumina Buki Tabu wagaine, givona,

11 Kaduwe kai gaito tamo gida tolidadana, gidavona, “Aku badi meIsileli ani keke ida vetumagana Keliso wagaine faina, wada ikoyona, ada taudiyavo iludakadi Yaubada wagaine-deya. Aku velemoena ani iludaka-vagaidi?”

Iya gada lufata gadavona, “Au keke-mowa! Badi yadi ludaka Yaubada wagaine-deya ani keke ludaka-vagata. Aku ikoyona faina, Yaubada badi keke meIsileli faidiya ginuwanuwa ke gina kibababaledi, e ada meIsileli ina itana adikibababala ke ina luvadigena. Ada yadi luvadiga faine ina nuwavilana ke ina vetumagana Yeisu wagaine. 12 Ada meIsileli ikoyona ke Yeisu Keliso idibusoyogena faina, badi keke meIsileli moyaidi babi wagaine ani Yaubada wana giyavuna faidiya e ada ina vetumagana Keliso wagaine ke Banae wa yana nuwadoga gina lemelemedi lakaina, e ada yadi vemwamwala gina tubuga-mowa. Badi meIsileli ani keke nuwanuwadi, e ada Yaubada givelena badi keke meIsileli. Aku aimo kai meIsileli ina nuwavilana ke Yeisu ina vetumaganena, aga guwana ani moyaida kana vemwamwala lakai-vagaina Yaubada wagaine ke kana gakaikai yana nuwakabubu lakai-moena faina.”

13 Aku imi gavega wamiyamiya Loma wagaine ani tufomi keke meIsileli, ada tova taidei ganavona wagaimiya. Yaubada givenuwadadaneku ke gaveafositolo imi keke meIsileli wagaimiya, ada taidei faina yaku gugai-nai gakikilakaina 14 e ada kai tamo wai wagaine badi yaku yoo meIsileli imi amikibababala-nai wanuwagana ani badi ina luvadigena. Nuwanuwaku gana ivenuwanuwadi ke badi kaduwe ina nuwagana, ada taide wagaine meyameyaganina tufodi gana kibababaledi. 15 Wana nuwanuwayena. MeIsileli moyai-moedi keke ida vetumagana Yeisu wagaine faina, Yaubada givedomobubusedi, e ada vilena ani babi matatabuna anatomiyayavo badi keke meIsileli ani moyaidi Yaubada nodi iveseyana. Kai meIsileli yadi dibusoyoga taidei anafaiweya, aga gavaiyamu kai meIsileli moyaidi ina nuwavilana ada ina vetumagana Yeisu wagaine? Tainei ani ebavemwamwala lakai-moena, au velemoena ani anafaiweya seyana gaito unuwakabubuyena gida alika aku gidayawa-vagila alikeya.

16 Ebaita seyana ani taidei anafaiweya. Kai wana bavagu ke guwa nagona Yaubada wana velena, aga vaita anafaiweya bademowa yami aa matatabu-moena seseliyena Yaubada wagaine. Anafaiweya kai ai olive walamina faina wanavona, “Taidei ai vuvuna ani Yaubada toinavuvuna,” aga kaduwe lagana bademowa awaawaegedi Banae wagaine.**Tova tuwaina meIsileli tamadiyavo nagona iawaegedi Yaubada wagaine ani faidiya givona, “Badi yaku kalivayavo.” E ada meIsileli malinai imiyamiya ani aimo badiyavo Yaubada yana kalivayavo. E ada taide vonaluvefosau-nai wagaine, ai olive walamina ani meIsileli tamadi nagona aku lagana ani badi tubudelideli meIsileli Ebelaamo wagaine-deya. 17 Badi meIsileli ani vaita anafaiweya ai olive melamelala bakula wagaine, aku imi keke meIsileli ani anafaiweya ai olive walawala walaiya gitabotabo. Ada malinai vaita ai-nai olive melamelala wagaine Yaubada lagana tufona giludobo-yavuledi ke gisegedi, aku imi keke meIsileli givai giyogovefovefosemi ai melamelala wagaine. E ada imiyavo ai-nai lagana itufo nodi yami toyogina wavaivaina ai walamina wagaine ke watabotabo iwakana. 18 E aku keke gida luboda wana nuwalaka. Badi meIsileli-dina vaita ai lagana Yaubada giludobo-yavuledi ani imi keke wada kaiwabusegedi. Ai lagana keke walamina ida vekavekani aku walamina ani lagana ivekavekanidi. Imi ai walawala lagana au kikivefosemi wadedeku-deya ani meIsileli walamidi wagaine-deya yami toyogina wavaivaina, e ada keke-mowa gida lubodami ke taumiyavo wana davalakalakaimi.

19 Aku kai seyana gaito imi keke meIsileli amimwatuguya ginavona, “Vona velemoena badi wagaidiya-deya ide katoyotoyogina, afamomoku meIsileli Yaubada giludobodi aku ide yada mwatugu gisiwaina.” 20 Tayuwe anafaiweya wavona ani wada velemoena, e aku meIsileli keke Keliso ida vetumagane faina, Yaubada giludobodi. Aku imiyavo ani wavetumaganena Keliso, ada taidei vuvuna-nai wagaine wamidimididi iwakamiyavo Yaubada matane. E ada wana itaveyabimi. Keke wana nuwanuwalaka aku gilubodami wana matauta. 21 Faina meIsileli badi vaita Yaubada yana ai melamelala lagana velemoedi aku ikoyona faina, au giludobo-yavuledi. E ada imi anafaiweya ai walawala lagana giavimi ani wana itaveyabimi. Kai yami vetumagana Keliso wagaine wana segena, aga imi kaduwe keke gina nuwakalikaliyemi aku gina ludobo-yavulemi.

22 Wana itana, Yaubada yana dewa ani nuwakalikali Tauna, aku kaduwe yana dewa seyana ani wa yana toyogina giveiveimeya. Badi meIsileli ibeu koyona wagaine ani giveimeya toyogina ke giludobodi. Aku imi keke meIsileli ani, kai wa yami atuvefaila taumiyavo wana awaawaegemi Banae wagaine aga Banae yana nuwakalikali wagaine wana miyamiya. Aku kai yami vetumagana wana segena, aga au kadu imi gina ludobomi. 23 Aku meIsileli faidiya ani kai ina nuwavilana ada ina vetumagana Keliso wagaine, aga Yaubada kaduwe gina vagaule-vagiledi ke Banae wagaine nodi ina veyoo-tamwai-vagila, anafaiweya ai-nai olive lagana iyogovefose-vagilena ai melamelala wagaine ke nodi itaboluga. Faina Yaubada anafata gina yogovefose-vagiledi. 24 Faina ai olive melamelala ani badi meIsileli yadi ai ada badi laga-moena, e ada badi adifaiweya ina maduavi tova-nai gina yogovefose-vagiledi. Aku imi keke meIsileli yami ai ani olive walawala, ada ai-nai wagaine-deya giludobomi aku giavimi ai-nai melamelala wagaine, e ada maita vitana wana avi ke wanatabo-tamwai.

25 Tubuiyakuweyavo, nuwanuwaku Yaubada yana nuwanuwa tuwaina gisewavuyena aku tova malinai giivemogatalina ani wana alamanena. Taidei wagaine keke wa yami nuwalaka badi meIsileli wana itatagodi vaita imi wakaiwabusegedi. Yana nuwanuwa-nai ani taide anafaiweya. Badi meIsileli-dina Yaubada giawaegedi ke taudiyavo yadi debai toyoga ina muliyedi ani keke gina awaegedi inamiya-vagata anafaiweya. Badiyavo yadi asekuga-nai gina miyamiya anafaiweya analaba badi keke meIsileli ani adigavaiyei Yaubada givenuwadadanedi yana yoo wagaidiya inaluku-yabu. 26 E ada meIsileli matatabudi Yaubada gina kibababaledi. Anafaiweya Yaubada yana vona Buki Tabu wagaine ivetokilumina ani gina yegemona velemoena, givona,

28 E ada malinai meIsileli Yeisu Keliso anavaleya iwakana idibusoyogena ani badi Yaubada nibainavo. Aku wada yadi dibusoyoga ani imi keke meIsileli yami iwakana, faina amikibababala anawai giyavuna ke Yaubada yana nuwakabubu givelemi. Aku tuwai-moena Yaubada givonadabadaba meIsileli tamadiyavo nagona**MeIsileli tamadiyavo nagona ani Ebelaamo, Aisake ke Iyakobo. wagaidiya faina, badi meIsileli malinai imiyamiya ani aimo ginuwakabubuyedi. 29 Faina kai Yaubada kaliva gina venuwadadanedi ke yana nuwakabubu gina veledi yana gugai faina, ani keke gina nuwavila aku yana venuwadadana ke yana nuwakabubu ani au inamiya-vagata. Keke gina nuwavila ada yana venuwadadana gina yaweli o kai yana nuwakabubu gina vaiyewe. 30 Tuwaina imi keke meIsileli ani Yaubada yana nuwanuwa wadibusoyogena, aku malinai imi Yaubada yana nuwakalikali wanuwagana badi meIsileli yadi dibusoyoga faina. 31 E ada kaduwe anafaiweya, badi meIsileli malinai Yaubada idibusoyogena e ada imi aminuwakalikali wanuwagana wagaine, badiyavo kaduwe adinuwakalikali ina nuwagana.†Lom 10:19, 11:11,14 32 E, kaliva moyaida Yaubada yana veimeya kagadibudibusoyogena faina, Banae giseda ke vaita yada gadibudibusoyoga gikali-balawalilivugida e ada yogoyogodeyavo kamiyamiya. E ada ime meIsileli ke imi keke meIsileli ani moyaida nuwada gina malina vaita ideyavo ani tokoyona, e ada anafaiweya gina nuwakalikaliyeda.