Iyoni Yana Leta Anavelu Givetokilumina
Kivemala
Keliso giyewa gabameya muline, malamala sikisiti (60) giavaidi ada Iyoni leta taidei givetokilumina. Tayuwe tova-nai wagaine Yaubada yana yoo fafali tulina tulina wagaidiya ani kabemali ikiveuloulolonidi lakaina. Ada taidei faina badi toalamana Buki Tabu faine ani tufona moyaidi ivetumagana vaita Iyoni yana leta wagaine keke gida ifuifufu vavine wa natudiyavo velemoena faidiya, aku givonaluvefosau Yaubada yana yoo seyana faidiya, badi imiyamiya yana ekalesiya fafali seyana wagaine. E ada inuwanuwa vaita velemoena Iyoni yana leta giimiimilina ekalesiya-nai wagaine.
Tova-nai Iyoni leta taidei givetokilumina wagaine, valeya iwakana anatoawatalatalaina tova moyaina ibalabala walilivuga melala ke melala wagaidiya ivevewala ada valeya iwakana ilulumamalena. E ada tovetumaganayavo ivagavagauledi ke inaunauwedi yadi manuweya iitaitaveyabidi, ada tova-nai ina tauya ilemelemedi aa wagaine yadina faidiya. E aku kadu kaliva tufodi keke taudiyavo ida awaegedi velemoena Keliso yana vewala-dina wagaidiya, ani badi kaduwe ibalabala walilivuga ada yadi vewala balana ivevewala. Ada tovetumagana tufodi inoganogala taide tovewala fwayafwaya-dina bonadi e ada keke ida mulimuliye Iyoni yana vewala. Taidei faina Iyoni leta taidei wagaine gikivetunudi.
Vona vesiule. (1:1-3)
Kana miyamiya vona velemoena wagaine, ada kana venuwanuwakabubu seyana seyana. (1:4-6)
Tovewala fwayafwaya kana velovogedi. (1:7-11)
Vona anaebalauyabu. (1:12-13)
1
1 Siule malama venuvenuwadadanimi, kadu natumiyavo nodi siule. Iya ivewagaku tovetumagana yadi kaliva lakaina ani leta taide gavetokilumi gielai wagaimiya, imi ganuwakabubuyemi velemoena. Ada keke Iya akukaibe gagana, aku gavega moyaidi Yaubada yana vona velemoena ialamanena ani moyaima anuwakabubuyemi. 2 Yaubada yana vona velemoena aseasedeya gimiyamiya, ada wagaideya ginamiya-vagata. Taidei faina anuwakabubuyemi. 3 Yaubada Tamada ada kadu Yeisu Keliso Bana Tamada Natuna ani wa yadi nuwadoga ina lemelemeda, ina nuwakalikaliyeda, ada wa yadi nuwaniwalova kana miyamiya. Ada ide yadi vona velemoena wagaine kana miyamiya ke nodi kana venuwanuwakabubu.
Kana miyamiya vona velemoena wagaine, ada kana venuwanuwakabubu seyana seyana.
4 Keke gavana faina aku Iya gavemwamwala lakaina, faina natumiyavo tufodi valeyadi ganogalina vaita yawaidi iawaege-moedi vona velemoena wagaine, au anafaiweya Tamada Yaubada giveimeyeda kanadewa. 5 E ada malama, gaveolemi ke ide moyaida kana venuwanuwakabubu.†Iyo 13:34, 15:12,17 Keke vaita veimeya evaguna faine gada vetokiluma wagaimiya, keke, aku veimeya-nai kanogalina tova-nai kavevuvu Keliso kamulimuliyena wagaine ada gielai malinai. 6 Ada nuwakabubu-nai anawai taide anafaiweya. Yaubada yana veimeya moyaina anaitaveyabina wagaine kana miyamiya. Ada yana veimeya lakaina wanogalina ebavevuvu wagaine ada gielai, ani imi moyaimi wana venuwanuwakabubu.
Tovewala fwayafwaya kana velovogedi.
7 Taidei anafaiweya Iya gaifuifufu faina tovefwayafwaya moyaidi bademowa iyegemona babi anafafali tulina tulina wagaidiya. Velemoena Yeisu giobuelai babiya ada givekaliva-mowa, aku biyavo-dina ani keke ida vetumagane ada keke inavona ida velemoena. Kaliva-dina idewa anafaiweya ani badi tovefwayafwaya, adivewaga ‘Keliso nibainavo’. 8 Taidei faina taumiyavo wana itaveyabimi aenanai taide kaliva-dina ina fwayami ke yada gugai guwana ina vaiyavulena. Au wana vediwe e ada wana nuwagana yami gugai analaufata iwakana magamagana Yaubada gikidewedewena faimiya. 9 Gavega keke ida miyamiya Keliso yana vewala wagaine aku isegena ke taudiyavo iawaegedi mali vewala wagaine ani keke Yaubada nodi ida veseyana. Aku gavega imiyamiya Keliso yana vewala wagaine, badiyavo ani Tamada Yaubada ke Natuna nodi iveseyana. 10 E ada kai seyana gaito ginaelai wagaimiya ke nuwanuwana gina vevewalemi aku velemoena yana vewala-nai ani tulina Keliso yana vewala wagaine, aga keke wana vagaule ginaluku yami manuwa wagaidiya, kadu keke wana venimasibutuye ke nodi wana ifufu vaita imi tubuiyanavo.†Lom 16:17, Gal 1:8,9, 2Tes 3:6,14, Tai 3:10 11 Keke-mowa wana vetubuiyana bana wagaine, faina gavega idewena anafaiweya ani vaita ilemelemena yana gugai-dina koyodi wagaidiya.
Vona anaebalauyabu.
12 Nuwanuwa moyai-moedi ganuwanuwayedi gada ifufuyedi wagaimiya, aku keke nuwanuwaku gana vetokilumidi fefe ada iniki wagaidiya. Aku ganuwavetumagana vaita ganaelai ke kana vemagigiitaita ke nodi kana ifufu, e ada kana vemwamwala velemoena.†3Iyo 1:13-14
13 Tubuiyami idedeku, badi Yaubada givenuwadadanedi ani natudiyavo nodi yadi vesiule wagaimiya.
Iyayeku Iyoni