Galetiya Tovetumagana Yadi Leta Paulo Givetokilumina
Kivemala
Kaliva-dina badi Yeisu imadu vetumaganena ani meIsileli gagana, badi tova tuwai-moena Yaubada giveledi yana veimeya-dina Mosese wagaine. Ada tovetumagana-dina nagona mulidiya, badi keke meIsileli kaduwe ivetumagana Yeisu wagaine, aku keke ida muliye Mosese yana veimeya. Aku meIsileli tovetumagana tufodi ani ivetumagana vaita Mosese yana veimeya ani kadu badi keke meIsileli ida muliyedi, e ada badi inunudadananau aku badi keke meIsileli tovetumagana ilulumodovedi ke Mosese yana veimeya ina muliyedi. Aku Paulo ani keke gida nuwanuwa anafaiweya, ada yana laumamala wagaine givonavona meGaletiya wagaidiya, givona, “Wai seya-moena wagaine Yaubada ginasemi yegayegamiyavo Tauna matane, taine yami vetumagana gagana Yeisu wagaine.”
E aku aimo Paulo gimiyamiya atuwada aku gikaiyanogala vaita tovewala fwayafwaya iyegemona Galetiya anafafaliya ada igaluvaluva tovetumagana ina nuvuyoyedi. Kaduwe badi tovewala-dina ivonavona vaita Paulo keke afositolo velemoena e ada kaliva keke bonana ida nogali. E ada leta taidei giimilina wagaidiya ke tovetumagana gina kivetunudi, ada giluwageyedi ke taide vewala fwayafwaya-nai ani ina segena. Ada leta anaebalauyabu wagaine Paulo givona kivetoyogidi ke yadi dewa ina itaveyabidi.
Vona vesiule. (1:1-5)
Valeya iwakana seya-moena, keke tamo anavelu. (1:6-10)
Paulo anavedo Yaubada wagaine. (1:11 - 2:10)
Paulo Pita yana koyona faina givona tunutunugina wagaine. (2:11-21)
Mosese yana veimeya anamuliya o kai Keliso anavetumagana? (3:1 - 4:31)
Keliso gietoyavuda Mosese yana veimeya yana iyogona wagaine. (5:1-26)
Imi seyana seyana wana velemalema amivita wagaidiya. (6:1-10)
Paulo yana matawa anaebalauyabu ke vetalakafoi. (6:11-18)
1
1 Iya Paulo, Yeisu Keliso yana afositolo seyana. Keke kaliva-mowa ida venuwadadaneku ke gada veafositolo, keke-mowa. Aku Yeisu Keliso Tauna ke Yaubada Tamada Banae Yeisu gisiveyawana alikeya ani adiselu gaga ivenuwadadaneku ke gaveafositolo. 2 Imi Yaubada yana yoo wamiyamiya yana ekalesiya seyana seyana Galetiya anafafali wagaine ani Iyayeku ada tubuiyadeyavo idedeku nodi yama vesiule wagaimiya. 3 Yaubada Tamada ada yada Kauveya Yeisu Keliso yadi nuwadogeya ina lemelememi, ada kaduwe aseasemi ina kikiveniwalovidi. 4 Keliso Tauna givele-kavovoyena yada koyona faina, e ada gina etoyavuda malinai tova-dina adidewa koyodi wagaidiya.†Tai 2:14 Taidei, yada Yaubada Banae Tamada yana nuwanuwa gimuliyena anafaiweya. 5 E ada Yaubada Banae anayegana kana kikilakaina tova moyaina keke anaebalauyabu. Ika anafaiweya.
Valeya iwakana seya-moena, keke tamo anavelu.
6 Iya gatataweyana yami dewa wagaine. Faina Yaubada givenuwadadanemi Keliso yana nuwadoga wagaine, aku bademowa wanuyabuyabuna ada wanau mali vewala wagaine. 7 Ada velemoena taidei keke valeya iwakana. Keke-mowa. Aku kaliva tufodi ani nuwami ikikivevoganina ke igaluvaluva Keliso anavaleya iwakana ina vetoviviyena.†Gug 15:1,24 8 Aku keke bonadi wana nogalidi. Wana itana, kai gaito gina ifuifufu wagaimiya Yeisu faine aku yana ifufu-nai gina vetoviviyena valeya iwakana tuwaina avelemi, aga analauboda gina alika-vagata eli wagaine. Ime idedeku ada gabama anaaneloseyavo kaduwe. Kai ime anafaiweya adadewa, aga amalauboda ada alika-vagata eli wagaine. 9 Bademowa avona anafaiweya ada kaduwe ganavona-vagila, imiyavo bademowa valeya iwakana wavaina, e aku kai gaito seyana mali valeya tulina gilulumamalena wagaimiya, aga banae analauboda gina alika-vagata eli wagaine.
10 Gavaiyamu, taidei gavonavona, e ani ananogala vaita gagaluvaluva ke kaliva Iya ina awaveiwakaneku? Keke. Iya nuwanuwaku ani Yaubada yana awaveiwakana. O kai gagaluvaluva kaliva gakikivemwamwalidi?†1Tes 2:4 Kai aimo gagaluvaluva kaliva nuwadi gana vaina ke nuwanuwadi Iyayeku, aga Iya keke Keliso yana togugai.
Paulo anavedo Yaubada wagaine.
11 Tubuiyakuweyavo, nuwanuwaku imi wana alamanena, valeya iwakana galumamalena ani keke kaliva-mowa yadi nuwanuwa wagaine gidaela.†Mad 16:17 12 Faina Iya keke gadavai kaliva-mowa wagaidiya o kai seyana gaito gida vewala wagaikuya, aku Yeisu Keliso Banae giivemogatalina wagaikuya.
13 Faina bademowa wanogalina tuwaina yawaiku anaifuifufu, tova-nai ime meIsileli yama vetumagana anagiduwa gamuliyedi. Ada Yaubada yana kalivayavo gakiveuloulolonidi ke gagaluvaluva evona yana ekalesiya gana luyavulena.†Gug 8:3, 22:4-5, 26:9-11 14 Ime meIsileli yama vetumagana anagiduwa wagaine, gaawaegeku velemoena ada wai ganago-moena gugai wagaine ayo muliya tubuiyakuweyavo, ada tamameyavo nagona adigiduwa faina ganuwanuwa toyogi-moena.†Gug 22:3 15 Aku yaku tubuga wagaine-deya†Ais 49:1,5, Iyel 1:5, Luk 1:15 Yaubada givenuwadadane-vagaiku. Yana nuwadoga wagaine givenuwadadaneku yana togugai,†Gug 9:3-6 ada wa yana vemwamwala 16 Natuna giivemogatalina wagaikuya†Gug 9:3-6 e ada Banae gada lumamalena badi keke meIsileli wagaidiya. Tova-nai wagaine, keke seyana gaito gadavone ke gida voneku gavana gana gugai Banae faine, 17 o kai gadalaka Yelusalema gada itadi badi imaduveafositolo biyavo-dina. Aku ganau tunutunugina Alebiya anafafali wagaine, e ada muliya gayewaku Damasiko.
18 Malamala toiye muline, galaka Yelusalema ke Pita gana madubodana, ada nodi amiya yadayada fifitini.†Gug 9:26-30 19 Wadedeku keke tamo gava afositolo gadaita aku Iyemesa anakaibe, banae yada Kauveya taina.†Mad 13:55 20 Yaubada gialamanena gavana gavetokilumina ani vona velemoena, keke gada vefwayafwaya. 21 Ada muliya ganau Siliya ke Silisiya. 22 Tova-nai wagaine Keliso anatovetumagana adiyoo tulina tulina Yudiya anafafali wagaine ani keke ida alamaneku. 23 Tainei-mowa ikaiyanogala taidei anafaiweya, “Kaliva-nai tuwaina ide gikiveuloulolonida, ani malinai gilulumamalena vetumagana-nai tuwaina gibalalava gida luveyawaliyena.” 24 E ada wagaikuya-deya Yaubada idavana.