11
Iyoni Tobabitaiso yana tonogalayavo giimilidi inau ada Yeisu itolidadanena.
Luk 7:18-23
1 Yeisu yana tonogalayavo adituwelo givewaledi giavaina, gitauya ginau Galili melala-dina wagaidiya ke givevewala ada Yaubada valeyana gilulumamalena. 2 Aku Iyoni Tobabitaiso deli wagaine gimiyamiya ani Mesaiya yana faisewa valeyana ginogalina, e ada yana tonogalayavo tufodi giimilidi Bana wagaine ina tolidadana. 3 Ada ielai Yeisu wagaine ivonaga, “Gavaiyamu, Oye kaliva-moe Tauni Mesaiya, Banae aveitabodebodena vaita ginaelai?**Tuwai-moena Yaubada givonadabadaba meIsileli wagaidiya ani adiTokibababala gina imilina wagaidiya Kini Deivida unumina wagaine-deya. Ada meIsileli kaliva-nai aimo gina yegemona ani ivewagana ‘Mesaiya’, faina Banae ani Yaubada yana Kaliva givenuwadadanena ke gitoyogivelena yana gugai faine. Taidei vewaga-nai vona Giliki wagaine ani ‘Keliso’. E ada malamala tausani ke tausani giavaidi aku aimo meIsileli moyaidi iitaitabodana gavatoveya yadi Mesaiya gina yegemona. E aku tova-nai Yeisu gitubuga, Banae moyaida yada Mesaiya-moena, ani meIsileli tufo-moedi iinanana ke ialamanena Banae Tauna, aku moyaidi ibavuyena. Keke ida itainanana, e ada badi meIsileli malinai aimo yadi Mesaiya faine iitaitabodabodana. O kai kaliva seyana aimo ana bodana?”
4 Ada Yeisu gilufata Iyoni yana tomatawa wagaidiya, givona, “Wana yewami Iyoni wagaine ke gavana gagugaiyedi waitadi kadu gaifufuyedi wanogalidi, ani faidiya wana ifufuyena. Taidei anafaiweya wanavona, 5 ‘Badi matadi koyo-moedi ani iita iwakana, tovefela inunudadana, badi gavega lefelo wagaidiya ani ibwaina ke yadi yegayegana ivaina, badi tagadi bwadana ani giafolena, toalika iyawa-vagila, ada kaduwe fanifanidiyavo ani Yaubada yana valeya iwakana inoganogalina.’ 6 Kaduwe Iyoni wana vonena, ‘Badi gavega keke ida nuwakila ke yadi vetumagana Iya wagaikuya keke idasege, ani Yaubada giawanuwakabubuyedi.’ ”
Yeisu giifufu Iyoni Tobabitaiso faine.
Luk 7:24-35, 16:16
7 Ada badi Iyoni yana tomatawa itauya inaunau, aku Yeisu givebutu yoo wagaidiya giifufu Iyoni faine, givonaga, “Tova-nai wayegemona wanau fafali kavovona wagaine Iyoni wana itana faina, imi gavaiyamu wanuwanuwa, vaita gavana wadaita? Vaita kaliva yana nuwanuwa tova moyaina gisevedavedama anafaiweya laimwagu lukuna mala giliuda gifilina? 8 Kai keke, aga wanau gavana wadaita? Kai kaliva giveigavu nuya adiita iwakadi wagaine? Keke, faina badi gavega wa adiveigavu kaikaiwabuna ada imiya kaikaiwabu ani kini yadi manuwa kaikaiwabudi wagaidiya imiyamiya. 9 E aku imi wanau evona gavana wadaita? Anaita Yaubada yana falofita seyana wada itana? Ika velemoena, au falofita waitana, aku bana Iyoni ani anayegana lakai-moena ke anaita lakaina ayo falofitayavo moyaidi wagaidiya.**Iyoni Tobabitaiso banae anayegana lakaina Yaubada matane faina banae ani giawamogatalena gaito Yeisu, ada banae ani veimeya anatutuya evaguna gialiyena. 10 Faina bana Iyoni faine Yaubada yana vona vetovetokilumina Buki Tabu wagaine givona,
‘Una itana, yaku tomatawa gana imilina ke wai gina nagona,
ada ya wai kaliva aseasediya gina kidewedewena.’ **Taidei vona-dina ani Yaubada givonayena Natuna wagaine, Banae Mesaiya. (Mal 3:1, Mak 1:2, Iyo 3:28)
11 Ada gavonemi velemoena, kaliva moyaidi vevine ivenatunedi wagaidiya, ani keke seyana gaito anayegana lakaina ani Iyoni Tobabitaiso anayegana gidasege. E aku Yaubada yana ebaveimeya wagaine, gaito anayegana kabiso-moena ani banae gitubusegena Iyoni. 12 Tova-nai Iyoni Tobabitaiso yana tova laumamala givevuvu wagaine ada gielai malinai, Yaubada yana ebaveimeya wa yana toyogina gilaka ginaunau, ada badi gavega yawaidi iawaegena Banae wagaine, ani ibalalava ke yana ebaveimeya wagaine inaluku. 13 Ada tova tuwaina gielai anaetowava Iyoni yana tova wagaine, ani Mosese yana Veimeya anabuki kadu falofita moyaidi ifalofisai Yaubada yana ebaveimeya yanaela faina. 14 Ada kai wana awaegau ada nuwami gina malina gavana Iya gavonavonayena Iyoni faina, banae ani au Ilaitiya anafaiweya,**Iyoni ani vaita anafaiweya Ilaitiya tova tuwai-moena gimiyamiya. Ada badi adiselu tova matatabuna adinuya ani keke kaikaiwabudi o iwakadi ida oseosedi. Badi adiselu Yaubada yana falofitamomo, e ada kai kaliva idewadewa koyona ani badi adiselu ina awamogatalena kaliva-dina wagaidiya. E au kai kini yana dewa koyona aga adiselu ina awamogatalena. Ada badi adiselu yadi matawa ani toyogina ke ilulumamala vaita kaliva ida nuwavilana ada Yaubada ida muliyena. (Luk 1:17, Mad 17:10-13) Aku Iyoni Tobabitaiso tauna ani keke banae Ilaitiya. (Iyo 1:21) ada banae faine falofitayavo ifalofisai vaita ginaelai. 15 Imi gavega wa tagami ani vona taidei wada nogalina.
16 “Aku tova malinai anayooyavo, ani gavana wagaine gana itaveluveye? Badi anafaiweya biyabiyama ivetovetoga iveneganega maketi wagaidiya, ada yoo seyana ivedovedou kadu yoo seyana wagaidiya, ivonavona,
17 ‘Nagi anakweli aveneganegayedi
aku imi keke wada tavotavola.**Yoo-dina biyabiyama kweli iveneganegayedi adinuwanuwa ani Iyoni ke Yeisu badi kaliva inunuwabiyedi inaelai Yaubada yana ebaveimeya faina. Aku yoo seyana ivenikoi ani anaalamana badi meIsileli tonagonayavo adinuwaabi idibusoyogena.
Ada alika anaitavuna anakweli aveneganegayedi
aku imi keke wada tagitagiya.’
18 Taidei anafaiweya gavona, faina kaliva malinai ani badiyavo anafaiweya. Faina Iyoni gielai ada keke aa iwakana gida kanikani kaduwe keke waini gida yuyui, aku au kaliva iawavekoyoyena, ivonaga, ‘Banae aluwaluwa koyona nafone gimiyamiya.’ 19 Aku Banae Kaliva Natuna gielai ada aa iwakana gikanikani ke waini giyuyuga, ani kaduwe Banae iawavekoyoyena, ivona, ‘Wana itana, kaliva taidei awatabewa ada waini giyugayuga-faila. Kaduwe takesi anatoyaudi ke tokoyona givetubuiyanedi.’ †Luk 15:1-2 Aku badi gavega Yaubada yana nuwauya imulimuliyena, ani kaliva ina itanuwagana yadi gugai wagaidiya.”
Melala tufodi keke ida nuwavila.
Luk 10:13-16
20 Aku melala tufodi wagaidiya Yeisu yana gugai ebameyasidobodobo moyaina gigugaiyedi, aku kaliva yadi dewa koyona wagaine keke ida nuwavila. Taidei faina Yeisu givebutu giawavekoyoyedi, 21 givonediga, “Oiyoi meKolasini! Vita lakaina wana nuwagana! Oiyoi meBedasaida! Vita lakaina wana nuwagana! Faina gugai ebameyasidobodobo gafaisewadi amimwatuguya nonogana keke wada nuwavila. Aku kai gugai-dina gada faisewadi badi kaliva koyodiyavo meTaiya ke meSaidoni**Taiya ada Saidoni ani badi keke meIsileli yadi melala lakaidi aku imiyamiya leyaga lakaina Medeteleniya anataliya, tayuwe Isileli anafafali wamelaleya. Ada badi meTaiya ke meSaidoni ani tova moyaina yadi yaubada fwayafwaya anayegana Baali wagaine ioduodu. adimwatuguya, aga badi tuwai-moena ida nuwavilana ke wa adinuya koyodi ida vetovetoga avu wagaine. 22 Gana vonemi, aimo vonayavuga anayadayada wagaine, imi meKolasini ke meBedasaida ani amimatavuloga koyo-moena ayo muliya meTaiya ke meSaidoni. 23 Aku imi meKafaneumi, evona taumiyavo wana kilakaimi vaita wanalaka gabameya? Keke! Velemoena ina segeobuyemi eli wagaine. Faina taidei yaku gugai ebameyasidobodobo moyaina gagugaiyedi amimwatuguya nonogana keke wada nuwavila. Kai meSodoma adimwatuguya gugai-dina gada gugaiyedi, aga tuwai-vagaina ida nuwavilana ke tova malinai aimo ida miyamiya. 24 Gana vonemi, aimo vonayavuga anayadayada wagaine, imi meKafaneumi amimatavuloga koyo-moena ayo muliya meSodoma adimatavuloga.”
Yeisu wagaine veyawai kana nuwagana.
Luk 10:21-22
25 Tayuwe tova-nai wagaine Yeisu givona, “Kamaku, Oyeni gabama ke babi adiKaiwabu ke adiKauveya, ada gavesiule wagainiya faina gaitoma-dina adialamana usewavuyena badi tonuwanuwa velemoena ke toalamana wagaidiya e ada keke ina alamane, aku badi anafaiweya biyabiyama ani wagaidiya uivemogatalina.†1Kol 1:26-29 26 Ika Kamaku, taidei ya vemwamwala faina, anafaiweya ugugaiyena.”
27 Kaduwe Yeisu yoo wagaidiya givona, “Gaitoma moyaina bademowa Kamaku gisedi nimakuya.†Mad 28:18, Iyo 3:35 Keke tamo gaito Banae Yaubada Natuna gida alamanena, au Tamana anakaibe gialamanena. Ada kaduwe anafaiweya Tamana, keke tamo gaito gida alamane. Au Natuna anakaibe gialamanena Tamana, ada kaduwe biyavo-dina givenuwadadanedi, ani badi wagaidiya Tamana gina ivemogatalina ke ina alamanena.”†Iyo 1:18, 10:14
28 “Imi gavega wakabekabebena faina yami veinuwana vitana wawaiwaina, ani Iya wagaikuya wanaelai ada veyawai gana velemi. 29 Yaku ewa**Taidei vona-nai ‘ewa’ ani Yeisu givonaluvefosau yana veimeya anamuliya anavita faina. wana vaina ada Iya wagaikuya alamana wana vaina, faina Iya tonuwaobu ada kaduwe yaku dewa bikana. Taidei wagaine yami veyawai velemoena wana nuwagana. 30 Faina yaku ewa ke yaku veinuwana ani keke vitana aku meyameyaganina.”†1Iyo 5:3-4
**11:3 Tuwai-moena Yaubada givonadabadaba meIsileli wagaidiya ani adiTokibababala gina imilina wagaidiya Kini Deivida unumina wagaine-deya. Ada meIsileli kaliva-nai aimo gina yegemona ani ivewagana ‘Mesaiya’, faina Banae ani Yaubada yana Kaliva givenuwadadanena ke gitoyogivelena yana gugai faine. Taidei vewaga-nai vona Giliki wagaine ani ‘Keliso’. E ada malamala tausani ke tausani giavaidi aku aimo meIsileli moyaidi iitaitabodana gavatoveya yadi Mesaiya gina yegemona. E aku tova-nai Yeisu gitubuga, Banae moyaida yada Mesaiya-moena, ani meIsileli tufo-moedi iinanana ke ialamanena Banae Tauna, aku moyaidi ibavuyena. Keke ida itainanana, e ada badi meIsileli malinai aimo yadi Mesaiya faine iitaitabodabodana.
**11:9 Iyoni Tobabitaiso banae anayegana lakaina Yaubada matane faina banae ani giawamogatalena gaito Yeisu, ada banae ani veimeya anatutuya evaguna gialiyena.
**11:10 Taidei vona-dina ani Yaubada givonayena Natuna wagaine, Banae Mesaiya. (Mal 3:1, Mak 1:2, Iyo 3:28)
**11:14 Iyoni ani vaita anafaiweya Ilaitiya tova tuwai-moena gimiyamiya. Ada badi adiselu tova matatabuna adinuya ani keke kaikaiwabudi o iwakadi ida oseosedi. Badi adiselu Yaubada yana falofitamomo, e ada kai kaliva idewadewa koyona ani badi adiselu ina awamogatalena kaliva-dina wagaidiya. E au kai kini yana dewa koyona aga adiselu ina awamogatalena. Ada badi adiselu yadi matawa ani toyogina ke ilulumamala vaita kaliva ida nuwavilana ada Yaubada ida muliyena. (Luk 1:17, Mad 17:10-13) Aku Iyoni Tobabitaiso tauna ani keke banae Ilaitiya. (Iyo 1:21)
**11:17 Yoo-dina biyabiyama kweli iveneganegayedi adinuwanuwa ani Iyoni ke Yeisu badi kaliva inunuwabiyedi inaelai Yaubada yana ebaveimeya faina. Aku yoo seyana ivenikoi ani anaalamana badi meIsileli tonagonayavo adinuwaabi idibusoyogena.
**11:21 Taiya ada Saidoni ani badi keke meIsileli yadi melala lakaidi aku imiyamiya leyaga lakaina Medeteleniya anataliya, tayuwe Isileli anafafali wamelaleya. Ada badi meTaiya ke meSaidoni ani tova moyaina yadi yaubada fwayafwaya anayegana Baali wagaine ioduodu.
**11:29 Taidei vona-nai ‘ewa’ ani Yeisu givonaluvefosau yana veimeya anamuliya anavita faina.