21
Yeisu giluku Yelusalema kini lakaina anafaiweya.
Mak 11:1-11; Luk 19:28-40; Iyo 12:12-19
1 Yeisu yana tonogalayavo nodi ilakalaka Yelusalema faina, aku nagona melala kabisona Bedipegi wagaine iyegemona, tainei Oya Olive dibune. Wadedeku-deya, aku yana tonogalayavo adiselu giimilidi ke wai ina nagona, 2 givonedi, “Imi wai wana nagona melala wadebaimiya wagaine, ada wana lukuluku ani wanamadu itadi doniki wa natudi isifodi. Wana yavudi ada wana aliyedi wagaikuya. 3 Ada kai tamo gaito gina tolidadanemi gavana wagugai, au wana vonena, ‘Kauveya gina vegugaiyedi tufona yana faisewa wagaine, ada tova kabisona gina imili-vagile inaelai.’ E ada kaliva-nai ginamadu awaegedi wana aliyedi.”
4 Taidei gaitoma-dina iyegemona e ada tuwaina gavana falofita givonayena, ani anafaiweya gina yegemona velemoena, givonaga,
5 “MeSaiyoni wana vonedi,
‘Wana itana, yami Kini gielaelai wagaimiya.
Banae tonuwaobu, ada doniki wagaine givetogana.
Doniki natudi wagaine givetoga gielaelai.’ ” **Badi meIsileli kadu adiyegana seyana ani ‘meSaiyoni’. (Sek 9:9)
6 Ada tonogalayavo adiselu inau ada gavaiyamu givonedi, anafaiweya igugai. 7 Doniki wa natudi ialiyedi ada adinuya badobadodi iyavelidi doniki tubulakaina domone ke Yeisu giyage. 8 Ada kaliva moyaidi yoo wagaidiya adinuya badobadodi iyavelidi waiya,†2Kin 9:13 aku tufodi ai lagadi wa lukudi ikuyadi ke wai wagaine isedi. 9 Ada yoo tufodi wai inagona Yeisu debaine kaduwe tufodi wai imulina, aku moyaidi ikovakova, ivonaga,
“Osana!**Taidei meIbeliu yadi vona ‘osana’ ani anakivila ‘una kibababalema’. Ada vona-nai ivonavonayena yadi ebavona awadavadava. Kaduwe wana itana 21:15. Kana davana Deivida yana tubudelideli!
Banae gielaelai KAUVEYA anayeganeya
ani wa anaawanuwakabubu!†Sam 118:26
Osana! Yaubada Togetanemwane kaawadavadavana!”
10 Taidei anafaiweya bonadi lakaina wagaine idavadavana aku Yeisu giluku Yelusalema ginaunau. E aku melala-nai anakaliva moyaidi giivenuwanuwadi toyogina ada ivonavona, “Ida gavakaliva?”
11 Ada yoo-dina Yeisu ikwayabuna ilufata ivona, “Ida falofita Yeisu, kwana Nasaledi, Galili anafafali gielai.”
Yeisu manuwa tabu gikiveyegayeganena.
Mak 11:15-19; Luk 19:45-48; Iyo 2:13-17
12 Ada Yeisu giluku manuwa tabu anafafali wagaine,**Yeisu keke gidaluku manuwa tabu negenine velemoena wagaine, aku anawaiyeda lilivana wagaine, fafali-nai isena badi keke meIsileli faidiya ke inanau wagaine ina veoveola ada Yaubada wagaine ina oduodu. E aku badi meIsileli ani taudiyavo isevedavedamena ada fafali-nai isena maketi. ada badi gavega ikimokimone ke ivevekimone ani giveyegemonidi. Ada mani anatosevedavedama yadi teibeli**MeIsileli yadi manuwa tabu wagaine meLoma yadi mani ani wa anaawata. E ada mani anatosevedavedama manuwa tabu wagaine ani kaliva yadi Loma mani ina veledi ani isesena meIsileli yadi mani. Taidei wagaine kaliva ina lufata yadi takesi manuwa tabu faina ada ina kimone vebolavoi anagibayavo yadi mani-moena tauna wagaine. ke kaduwe bunebune aditolufalifaliyavo yadi ebavetoga gibwataviladi. 13 Ada givonedi, “Yaubada bonana ivetokilumina Buki Tabu wagaine givonaga, ‘Yaku manuwa ani ina vewagana manuwa ebaveoveola.’ †Ais 56:7 Aku imiyavo wagana vaita tokiyafu yadi manuwa.”
14 Ada badi matadi koyo-moena ke tovefela ielai Yeisu wagaine manuwa tabu anafafaliya, ada gikiveiwakanedi. 15 Aku veyavo anatovegugai lakaidiyavo ke veimeya anatovewalayavo, ani iitana gugai ebameyasidobodobo Yeisu gigugaiyedi, kaduwe biyabiyama iluku manuwa tabu anafafali wagaine ivekovakova, ivonavona, “Osana! Deivida yana tubudelideli kana davana!” E ada gaitoma-dina taidei faidiya inuwakoyo Yeisu wagaine. 16 Ada itolidadanena ivona, “Maita unogalina gavana biyabiyama taidei ivonavona?”
Yeisu givonaga, “Ika ganogalina. Aku maita waveyawana Buki Tabu wagaine givona, ‘Biyabiyama ada bebeta uvewaledi ke awadiya iawadavadava velemoena’?” †Sam 8:2 17 Ada Yeisu gisegedi aku giyegemona Yelusalema-deya ada ginau melala Bedani wagaine gidau.
Ai seyana anaita vaita alaa keke wa guwana.
Mak 11:12-14,20-24
18 Malabutuya-mwaeya Yeisu giyewayewa-vagila Yelusalema aku mafa gilavuna. 19 Ada ai guwaguwa seyana anafaiweya alaa**MeIsileli yadi ai guwaguwa anafaiweya ani ivewagana ‘figi’. giitana wai lilivane. E ada ginau wagaine aku luku gagana ginuwagana, keke tamo guwana. Ada givona ai wagaine, givonaga, “Keke tamo tova kaduwe una veguwa.” Ada maduga-mowa ai-nai gimayewana.
20 Yana tonogalayavo iitana ayo meyadi gisidobodobona, ivona, “Gavaiyamu ada ai gimadumayewa-moe?”
21 Yeisu givonaga, “Gavonemi velemoena, kai wa yami vetumagana aku keke wana nuwakila, aga amifata ai taidei wagaine wanadewa anafaiweya Iya gadewa. Ada keke taidei gagana, aku kaduwe kai oya taidei wagaine wanavona, ‘Unaobu leyageya,’ aga gina yegemona.†Mad 17:20, Luk 17:6, 1Kol 13:2 22 Kai wa yami vetumagana Yaubada wagaine, aga gavana wana veoveola faine ani wana nuwagana.”†Mad 7:7, Iyo 14:13-14
Yeisu yana veimeya vuvuna faina tonagonayavo itoliluveluvena.
Mak 11:27-33; Luk 20:1-8
23 Yeisu giyewa giluku manuwa tabu anafafali wagaine, ada givewavewala aku veyavo anatovegugai lakaidiyavo ke meIsileli yadi kaliva lakaidiyavo ielai Bana wagaine. Ada itolidadanena, ivonaga, “Ida gava veimeya wagaine gaitoma-dina taidei ugugaiyedi? Ada gaito veimeya taidei giveleni?”
24 Yeisu givonedi, “Iya kadu tolidadana seyana gana tolidadanemi gaitoma seyana faine. Ada kai wana lufata wagaikuya, aga Iya kaduwe gana vonemi gava veimeya wagaine gugai taidei gagugaiyedi. 25 Iyoni Tobabitaiso ani gaito veimeya givele ke kaliva gikivebabitaisodi? Yaubada o kaliva?”
Ada taudiyavo iveifuifufuyena, ivona, “Gavaiyamu kanavona? Kai kanavona, ‘Yaubada veimeya givelena,’ aga gina voneda, ‘E ada gavana faina Iyoni yana vona keke wada vetumagane?’ 26 Aku kai kanavona, ‘Kaliva veimeya ivelena,’ aga yoo kamatausedi, kai ina manini wagaideya, faina kaliva moyaidi ivetumagana vaita Iyoni banae Yaubada yana falofita seyana.” †Mad 21:46 27 E ada ilufata Yeisu wagaine ivona, “Keke ada alamane.”
Bana givona, “E ada Iya kadu keke gana vonemi gaito yana veimeya wagaine ida gaitoma-dina gagugaiyedi.”
Kaliva natunavo adiselu adivona matalivulivuna.
28 Ada kadu givonedi, “Gavaiyamu yami nuwanuwa? Kaliva seyana natunavo adiselu. Ada ginau tomoinagona givonena, ‘Natuku, malinai unanau yaku bakula wagaine una faisewa.’
29 “Aku gilufata givona, ‘Iya auwe.’ Aku muliya yana nuwanuwa gisevedavedama ada ginau gifaisewa.
30 “Ada kaliva-nai ginau kaduwe kwamaneya givonena anafaiweya. Ada gilufata givona, ‘Iwakana. Gananau.’ Aku keke gidana. 31 E ada adiselu wagaidiya, gavakaliva tamana yana vona gimuliye?”
Badi veyavo anatovegugai lakaidiyavo ke meIsileli aditonagonayavo ivona, ivonaga, “Tomoinagona.”
Yeisu givona wagaidiya, “Gavonemi velemoena, badi takesi anatoyaudiyavo ke wai dobona anavevineyavo, biyavo-dina kavewagadi tokoyona, ani badi ina maduluku Yaubada yana ebaveimeya wagaine, aku imiyavo ani gavaiyamu? 32 Faina Iyoni Tobabitaiso gielai wagaimiya ada dewa yegayegana anawai givewalemi, aku imi keke yana laumamala wada vetumagane. Aku badi takesi anatoyaudiyavo†Luk 3:12, 7:29-30 ke wai dobona anavevineyavo ani ivetumaganena ada yadi dewa koyodi wagaidiya inuwavilana. Aku imi matamiya waitana inuwavilana, nonogana keke Iyoni wada vetumagane e ada wada nuwavila.”
Bakula anatoitaveyabina koyodiyavo adivona matalivulivuna.
Mak 12:1-12; Luk 20:9-19
33 Kaduwe Yeisu givona, “Kadu vona matalivulivuna seyana wana nogalina. Toni babi seyana, yana babi wagaine gileifi bulavadi analoi gibakulina. Bakula-nai gikalififina ada olu giyala giobu kabisona gileifi anaebavagafuwafuwa faina.**Guwa seyana meIsileli yadi gaitoma lakaina ani anayegana ‘gileifi’, faina bana wagaine waini ifaifaisewana, wada yadi ebayuga velemoena. Gileifi itabotabo bulava wagaidiya ada wa walona, ada anaailike wagaine gileifi bulavina analoi ibakubakulina. Ada ina kolukoludi muline, adiibibi faina ani anaebavagafuwafuwa anafafali ibubuna wagaine ina vagafuwafuwana. Taidei anafaiweya guwa-dina ina bibibidi, vutona ina vaivaina, ada ina sesei gina walawala, e ada gina sevedavedama gina vevewaini. Ada vada tulatulana giyogona e ada tofaisewa getane ina miyamiya aku matadi inasege ina nudadana bakula-nai anayavaga faina. Ada toni bakula gaitoma moyaina gibubudi giavaina, muliya kaliva tufodi nodi iveimeya ke bakula ina kidewedewena ada ina itaveyabina, aku ikolu anatoveya toni bakula-nai anavutuvutuga guwa ina velevelena. Aku tauna ani yana melala gisege ginau mali fafaliya gimiya. 34 Ada imiyamiya aku gileifi anaikolu anatova giyegemona, ada tonibakula-nai yana togugaiyavo giimilidi inanau bakula anatoitaveyabina wagaidiya vaita anavutuvutuga gileifi guwana ina vaina, anafaiweya gavaiyamu yadi awaegena tova-nai veimeya ibubuna wagaine. 35 Ada yana togugaiyavo inau wagaidiya aku toitaveyabina ikiveyabidi ada seyana ilumalimaliwavuna, seyana iluvealikana, aku seyana kabala wagaidiya itutuvealikana. 36 Ada kadu togugai velugadiyavo tufona moyaidi giimilidi, aku toitaveyabina kadu anafaiweya idewedi. 37 Ebalauyabu wagaine natuna kaliva giimilina wagaidiya. Ada givonaga, ‘Ida natuku, ada ina vemoimoinena.’
38 “Aku natuna ani tova-nai giyegemona ada toitaveyabina-dina iitana, taudiyavo iveifuifufu, ivona, ‘Ida tau-moena toni laova. Ada aimo bakula taidei ginavai gina veimeyena. E ada wanaela kana luvealikana ada yana bakula kana vaina.’ 39 Ada au ikiveyabina ke itai iyegemonena gileifi anabakula wagaine ada iluvealikana.” †Ibel 13:12 40 Yeisu yana vona matalivulivuna giluyabuna aku gitolidadanedi, givona, “E ada tonibakula tova-nai gina yewana yana bakula wagaine, gavaiyamu badi toitaveyabina gina dewedi?”
41 Ada badi veyavo anatovegugaiyavo ke tonagonayavo ilufata, ivonaga, “Ginaelai kaliva-dina koyodi gina munudi velemoena ke ina alika. Aku toitaveyabina evagudi nodi ina veimeya yana bakula faine ke ina itaveyabina, ada badi anavutuvutuga ina velevelena guwa ikolu anatova wagaidiya.”
42 Ada Yeisu givona wagaidiya, “Kai vona seyana Buki Tabu wagaine keke wada veyawa, givonaga,
‘Ogola-nai manuwa toiyogona idibusoyogena ani
banae gimidinagona ogola velugadiyavo wagaidiya.
Ida KAUVEYA yana gugai, ada
43 “Tainei faina gana vonemi, Yaubada yana ebaveimeya gina vaiyavulena imi wagaimiya aku badi keke meIsileli gina veledi, ada biyavo-dina guwa iwakana ina veguwayena anafaiweya Yaubada yana ebaveimeya analauboda. 44 Ada moyaidi gavega inabeu ogola-nai wagaine ani ina bidobodobodi kabiso kabiso, aku badi gavega wagaidiya ogola-nai ginabeu gina lutagodi ani gina lufuwafuwadi vaita avu anafaiweya.” Taidei anafaiweya Yeisu givona.
45 Aku badi veyavo anatovegugai lakaidiyavo ke Falisiyavo ani Yeisu yana vona matalivulivuna inogalina wagaine, nuwadi gimalina vaita badi faidiya givonavona. 46 Tainei faina wai ilelena vaita ina kiveyabina aku yoo imatausedi, faina kaliva moyaidi inuwanuwayena vaita Banae Yaubada yana falofita seyana.
**21:5 Badi meIsileli kadu adiyegana seyana ani ‘meSaiyoni’. (Sek 9:9)
†21:8 2Kin 9:13
**21:9 Taidei meIbeliu yadi vona ‘osana’ ani anakivila ‘una kibababalema’. Ada vona-nai ivonavonayena yadi ebavona awadavadava. Kaduwe wana itana 21:15.
†21:9 Sam 118:26
**21:12 Yeisu keke gidaluku manuwa tabu negenine velemoena wagaine, aku anawaiyeda lilivana wagaine, fafali-nai isena badi keke meIsileli faidiya ke inanau wagaine ina veoveola ada Yaubada wagaine ina oduodu. E aku badi meIsileli ani taudiyavo isevedavedamena ada fafali-nai isena maketi.
**21:12 MeIsileli yadi manuwa tabu wagaine meLoma yadi mani ani wa anaawata. E ada mani anatosevedavedama manuwa tabu wagaine ani kaliva yadi Loma mani ina veledi ani isesena meIsileli yadi mani. Taidei wagaine kaliva ina lufata yadi takesi manuwa tabu faina ada ina kimone vebolavoi anagibayavo yadi mani-moena tauna wagaine.
†21:13 Ais 56:7
†21:16 Sam 8:2
**21:19 MeIsileli yadi ai guwaguwa anafaiweya ani ivewagana ‘figi’.
†21:21 Mad 17:20, Luk 17:6, 1Kol 13:2
**21:33 Guwa seyana meIsileli yadi gaitoma lakaina ani anayegana ‘gileifi’, faina bana wagaine waini ifaifaisewana, wada yadi ebayuga velemoena. Gileifi itabotabo bulava wagaidiya ada wa walona, ada anaailike wagaine gileifi bulavina analoi ibakubakulina. Ada ina kolukoludi muline, adiibibi faina ani anaebavagafuwafuwa anafafali ibubuna wagaine ina vagafuwafuwana. Taidei anafaiweya guwa-dina ina bibibidi, vutona ina vaivaina, ada ina sesei gina walawala, e ada gina sevedavedama gina vevewaini.
**21:42 Falofisai taidei giyegemona Same 118:22-23 wagaine, ani nago-moena vona giluvefosena badi Isileli anakalivamomo wagaidiya, badi adiyoo ani mali yoo imiyamiya lilivadiya idibusoyogedi. Ada tayuwe anaebalauyabu velemoena ani giyegemona Yeisu wagaine, tova-nai kaliva idibusoyogena. (1Pi 2:6-8)