9
Yeisu kaliva vovona memeluyana gikivebwainina.
Mak 2:1-12; Luk 5:17-26
1 Ada Yeisu giyage-vagila waka wagaine ada giyewana lavu fafaline tauna yana melala wagaine. 2 Aku wadedeku-deya kaliva seyana gimiyamiya, banae vovona memeluyana, e ada kaliva tufodi vaya wagaine iwai ialiyena Yeisu wagaine. Ada Yeisu kaliva-dina yadi vetumagana giitana ada kaliva-nai wagaine givona, “Natuku, una vemwamwala. Ya koyona bademowa gavenuwaegedi.”†Luk 7:48-49
3 Aku veimeya anatovewalayavo tufodi inogalina ada taudiyavo nuwainagediya ivona, “Kaliva taidei givona awadamana.”
4 Aku Yeisu yadi nuwanuwa gialamanena e ada givonedi, givona, “Gavaiyamu-yo aseasemiya wanuwanuwa koyona? 5 Faina gavavona meyameyagani-moena ganavona, ‘Ya koyona bademowa gavenuwaegedi’, o kai ganavona, ‘Una mididi ke una nudadana’? 6 Aku nuwanuwaku wana alamanena ani Banae Kaliva Natuna wa yana veimeya,†Iyo 17:2 e ada anafaiweya kaliva yadi koyona gina venuwaegedi babi taidei wagaine.” E ada au kaliva-nai vovona memeluyana ani Yeisu givonena, “Una mididi, avaya una waina ada unanau ya manuweya.” 7 Au kaliva gimididi ada anavaya giwai ginau manuweya. 8 Ada gugai taidei yoo iitana wagaine meyadi gisidobodobona velemoena ada Yaubada iawadavadavana, faina veimeya ke toyogina giveledi kaliva-mowa e ada adifaiweya ina gugai taidei anafaiweya.
Yeisu Madiu gidouwena ke gina vetomuliya wagaine.
Mak 2:13-17; Luk 5:27-32
9 Ada Yeisu fafali-nai gisegena aku gitauya ginaunau ani takesi anatoyaudi anayegana Madiu giitana takesi anavada wagaine givetovetoga. Ada Yeisu Madiu givonena, “Unaela una muliyeku.” Ada gimididi ke Yeisu gimuliyena.
10 Ada muliya Yeisu ginau Madiu yana manuwa wagaine ina vebailavi, aku badi takesi anatoyaudi moyaidi ke tokoyona kaduwe ielai,†Luk 15:1-2 ada Yeisu yana tonogalayavo nodi ienokekela**Melsileli yadi tova kani ani taidei anafaiweya adigiduwa, moyaidi ina enokekela teibeli lilivane aku ina kanikani. ikanikani. 11 Aku Falisiyavo tufodi ani iitadi, ada Yeisu yana tonogalayavo itolidadanedi, ivona, “Gavana faina yami tovewala takesi anatoyaudi**MeIsileli keke-mowa nuwanuwadi takesi anatoyaudi, faina takesi anatoyaudi tova moyaina mani iyauyaudi ani vetutamwata lakaina nodi, e ada tufona ikikiyabina taudiyavo faidiya. Ada kaduwe ivetogugai meLoma kabemali faidiya. Taidei faina meIsileli biyavo-dina iagougedi. ke tokoyona nodi ikanikani?”†Luk 15:2, 19:7
12 Aku Yeisu yadi tolidadana ginogali-yo gilufata wagaidiya, givona, “Badi gavega iwakadiyavo ani keke nuwanuwadi doketa, aku badi toveoga-gaga ani nuwanuwadi. 13 Aku imiyavo ani wananau Yaubada yana vona seyana ananuwanuwa wana lelena ke wana alamanena, givonaga, ‘Keke nuwanuwaku kevakeva wana vebolavoiye akuebaveyavo faina. Iya nuwanuwaku kaliva wana nuwakalikaliyedi.’ †Ose 6:6, Mad 12:7, 1Tim 1:15Faina Iya gaelai ani keke toyegayegana gana douwedi faina. Aiyada gaelai ke tokoyona gana douwedi.”
Kani anailova faina Yeisu itolidadanena.
Mak 2:18-20; Luk 5:33-35
14 Aku aimo-yo seyana tova Iyoni Tobabitaiso yana tonogalayavo ielai Yeisu wagaine ada itolidadanena, ivona, “Gavana vuvuna ayo imeyavo ada Falisiyavo ani tova ke tova kani ailoilovau aku O ya tonogalayavo ani keke?”
15 Ada Yeisu givona matalivulivuna wagaidiya, givona, “Nagi anakani vemwamwala wagaine ani gavaiyamu, tonagi kaliva tubuiyanavo nodi ina miyamiya aku tubuiyanavo ina nuwavita e ada kani ina ilovau? Keke, faina tonagi-nai nodi imiyamiya. Aku tova gielaelai wagaine kaliva tufodi inaela tonagi kaliva ina vaina tubuiyanavo wagaidiya-deya ke ina nauwena, e ada yadayada-dina wagaidiya kani ina iloilovau.”
Yeisu yana vewala evaguna ani keke kaliva yadi nuwanuwa tuwaina nodi kana vetutamwata.
Mak 2:21-22; Luk 5:36-39
16 Ada kaduwe givona matalivulivuna-vagila, givona, “Keke nuya tuwaina kana bwadi nuya diyana evaguna wagaine. Faina aimo nuya diyana evaguna ginabuta wagaine gina siyauta, e ada nuya tuwaina gina agigina lakai-moena. 17 Kaduwe anafaiweya, keke waini evaguna ina iwavedama tuwava kevakeva bubuna tuwaina wagaidiya. Faina waini evaguna yana lutuga wagaine tuwava bubu-dina gina fuwadi ada waini gina maduyabu ke tuwava bubu inakoyo. Aku analauboda waini evaguna ina iwana tuwava evaguna wagaidiya, e ada waini ke tuwava yadi miya iwakana.” **Yeisu givewaledi taidei yana vona matalivulivuna iluwei wagaidiya e ada anaalamana ani yadi vewala tuwaidi ke Banae yana vewala evaguna ani keke nodi ina lomwanidi. Aku adilauboda ina sevedavedama gavana tuwaina imaduvetumagana wagaine.
Kwamana vavine alialikana ada kaduwe vavine seyana veoveogina ifufudi.
Mak 5:21-43; Luk 8:40-56
18 Yeisu taidei anafaiweya aimo giifuifufu ani manuwa ebavewala anatonagona seyana gielai, ada tugana givetodonena Yeisu magigine ke givona, “Malinai-mowa natuku vavine yawaina giavaina. Aku udaela nima udasena bana wagaine ke yawaina gida nuwaga-vagilena.” 19 Au Yeisu gimididi gimuliyena, ada kaduwe yana tonogalayavo nodi inau.
20 Aku yoo-dina wagaidiya vavine seyana banae anaveoga ani malamala tuwelo dayagina gimadumadu. Ada vavine-nai Yeisu wamuline gielai, ke ananuya bwatana wagaine nimadidina gisedi. 21 Faina nuwainagene-deya givona, “Kai ananuya gagana wagaine nimadidiku ganasedi, aga gana veiwaka.”†Mad 14:36 22 Ada Yeisu gimiyavila giitana ada givona, “Natuku, una vemwamwala. Ya vetumagana gikivebwainini.” Ada tayuwe tova-nai wagaine vavine gibwaina.†Mak 10:52, Luk 17:19
23 Ada Yeisu gina giluku tonagona yana manuweya, ada giitana ani kulele anatoveneganega yadi kulele iyuveyuvedi alika faina, ke kaduwe totagiya yoo ani itagilukuikui ada ivevetalageyo, 24 ada givonedi, “Wana yegemona wananau. Kwamana keke gida alika aku gidaudau.” †Iyo 11:11 Aku badi iveleigena. 25 E au yoo giveyegemonidi wamelaleya aku Bana giluku, ada kwamana nimane gikiveyabina ada au gimididi. 26 Ada valeya taidei gimutula ginau tayuwe fafali-nai matatabuna wagaine.
Yeisu gikivebwainidi kaliva adiselu matadi koyo-moedi ada kaliva seyana gaugauna.
27 Ada Yeisu wadedeku-deya giyegemona ginaunau ani kaliva adiselu matadi koyo-moedi imulitagoiye inau aku ivedoudou, ivonavona, “Oye Deivida yana tubudelideli,†Mad 1:1 uda nuwakalikaliyema!”
28 Ada Yeisu gina giluku manuwa wagaine aku badi adiselu-dina matadi koyo-moedi ani ielai Bana wagaine, ada gitolidadanedi, “Gavaiyamu, wavetumagana vaita taidei Iya akufata gana gugai?”
Badi ilufata ivonaga, “Ika Kauveya.”
29 Ada nimana gisena matadiya aku givona, “Yami vetumagana faina ada anafaiweya gina yegemona wagaimiya.”†Mad 8:13, 15:28 30 Ada au matadi giyegayegana. Ada Yeisu veimeya toyogina giveledi, givona, “Wana itaveyabina keke seyana gaito gina alamane gaitoma taidei.” 31 Aku badi adiselu iyegemona inau, ada valeyana iveinalina tayuwe fafali-nai matatabuna wagaine.
32 Ada kaliva-dina adiselu inaunau aku kaliva seyana tubuiyanavo ialiyena Yeisu wagaine. Kaliva-nai aluwaluwa koyona nafone gimiyamiya ke giveiveimeyena faina, banae gaugauna. 33 E ada Yeisu aluwaluwa koyona giveyegemonina ada kaliva-nai gaugauna au giifufu. Ada yoo meyadi gisidobodobona ke ivona, “Keke tamo anafaiweya adaita Isileli wagaine.” †Mad 12:22
34 Aku Falisiyavo ivonaga, “Ina aluwaluwa koyodi aditonagona Seitani, ani banae yana toyogina wagaine e ada Yeisu aluwaluwa koyodi giveveyegemonidi.” †Mad 10:25, 12:24, Mak 3:22, Luk 11:15
Tofaisewa keke moyaidi.
35 Ada Yeisu gibalawalilivuga melala moyaidi lakaidi ke kabikabisodi wagaidiya, ada meIsileli yadi manuwa ebavewala wagaidiya givevewala, kaduwe valeya iwakana gilumamalena Yaubada yana ebaveimeya faina. Ada kaliva ke vevine wa adiveoga tulina tulina ani matatabudi gikivebwainidi.†Mad 4:23, Mak 1:39, Luk 4:44 36 Ada yoo lakaina giitadi wagaine ginuwakalikaliyedi, faina adivita lakaina wagaidiya ivenuwana lakaina ada kabekabebediyavo, vaita sifi keke aditoitaveyabina anafaiweya.†Mak 6:34 37 Ada yana tonogalayavo givonedi, givona, “Bavagu lakai-moena aku tofaisewa keke moyaidi. 38 Taidei faina bavagu anaKauveya wana veolena ke tofaisewa gina imilidi ina yegemona inanau yana bakula giboyalina bavagu faina.” †Luk 10:2
**9:10 Melsileli yadi tova kani ani taidei anafaiweya adigiduwa, moyaidi ina enokekela teibeli lilivane aku ina kanikani.
**9:11 MeIsileli keke-mowa nuwanuwadi takesi anatoyaudi, faina takesi anatoyaudi tova moyaina mani iyauyaudi ani vetutamwata lakaina nodi, e ada tufona ikikiyabina taudiyavo faidiya. Ada kaduwe ivetogugai meLoma kabemali faidiya. Taidei faina meIsileli biyavo-dina iagougedi.
†9:13 Ose 6:6, Mad 12:7, 1Tim 1:15
**9:17 Yeisu givewaledi taidei yana vona matalivulivuna iluwei wagaidiya e ada anaalamana ani yadi vewala tuwaidi ke Banae yana vewala evaguna ani keke nodi ina lomwanidi. Aku adilauboda ina sevedavedama gavana tuwaina imaduvetumagana wagaine.
†9:34 Mad 10:25, 12:24, Mak 3:22, Luk 11:15
†9:35 Mad 4:23, Mak 1:39, Luk 4:44