8
Yeisu tolefelo gikivebwainina.
Mak 1:40-45; Luk 5:12-16
1 Tova-nai Yeisu giobuelai oya wagaine ada yoo lakaina imuliyena. 2 E aku kaliva seyana banae vovona lefelo gikivekoyona, ani gielai Yeisu wagaine ada tugana givetodonena aku givona, “Kauveya, gaalamanena O afaiweya una kiveyegayeganeku. E ada kai nuwanuwa aga uda gugaiyena.”
3 Ada Yeisu nimana gitunena ke gisena kaliva wagaine aku givonena, “Ika, nuwanuwaku. Una yegayegana.” Ada maduga-mowa analefelo giavaina. 4 Ada Yeisu kaliva givonena, “Una nogalina. Keke tamo gaito una awatalatalaine, aku unanau ada tauni una vewaleni Yaubada yana veyavo anatovegugai wagaine ke gina itani vovo ani gibwaina. Ada una vebolavoi Yaubada wagaine anafaiweya Mosese giveimeya badi gavega iveiwaka faidiya,**Kai kaliva wa analefelo aku lefelo-nai gina avaina, aga yadayada-nai wagaine gina veiwaka, nagona kaliva-nai ginanau ada tauna gina vewalena bana veyavo anatovegugai wagaine, muliya gina vebolavoi Yaubada wagaine Mosese yana veimeya anafaiweya. (Vei 14:1-32) e ada kaliva ina alamanena o velemoena bade uveiwaka.”
MeLoma tolugaviya aditonagona yana vetumagana.
Luk 7:1-10
5 Ada Yeisu ginau Kafaneumi, aku tova-nai gina giluku ani meLoma tolugaviya aditonagona**Tolugaviya aditonagona banae ivewagana giyomatana. Aku meLoma tolugaviya adiveimeya ani kai tolugaviya adiyoo wani analedi (100), aga aditogiyomatana seyana. Aku tova-nai wagaine meIsileli keke nuwanuwadi meLoma tolugaviya, faina yadi melala iveiveimeyedi. seyana gielai Yeisu wagaine ada lema faina giveola tagitagiya-mowa. 6 Givonaga, “Kauveya, yaku togugai au manuweya gidaudau. Banae vovona memeluyana ada talaina iuloulolo lakaina.”
7 Ada Yeisu givonena, “Ganaela gana kivebwainina.”
8 Aku tolugaviya aditonagona gilufata wagaine, givona, “Kauveya, Iya keke kaliva iwakaku e ada keke analauboda o unaela unaluku yaku manuweya. Aku udavona-mowa ada yaku togugai gina bwaina. 9 Faina Iya kaduwe akutoveimeya yana veimeya dibune gamiyamiya, ada yaku tolugaviyamomo yaku veimeya dibune imiyamiya. Yaku tolugaviya seyana gana vonena, ‘Unanau.’ Ada au ginanau. Kadu seyana gana vonena, ‘Unaelai.’ Ada au ginaelai. Anafaiweya kaduwe yaku togugai wagaine ganavona, ‘Taidei una faisewana.’ Ada gina faisewana.”
10 Ada Yeisu ginogalina tolugaviya aditonagona yana vona taidei ada meyana gisidobona, ada kaliva-dina imulimuliyena ani givonedi, “Gavonemi velemoena, Iya ganudadananau Isileli anafafali moyaidi wagaidiya, aku keke tamo gaito gada nuwaga yana vetumagana anatoyogina kaliva taide kwana Loma anafaiweya.†Mad 15:28 11 Ada gana vonemi, aimo badi keke meIsileli moyaidi inaelai kauwana ebalakavine ke kauwana ebaoluna wagaine, ada Yaubada yana ebaveimeya wagaine Ebelaamo, Aisake, ke Iyakobo nodi adiivi ina vaidi ke ina enokekela abutu kanina wagaine.†Luk 13:28-29 12 Aku badi meIsileli evona vaita Yaubada yana ebaveimeya anakalivayavo, ani ina batugedi ina yegemona wamelaleya yuyuvana bakibaki wagaine, ada wadedeku-deya ina tagitagiya ke ina kudaligoligota.” †Mad 22:13, 25:30, Luk 13:28
13 Ada Yeisu gimiyavilana tolugaviya aditonagona givonena, “Unanau ya manuweya ada gavaiyamu uvetumagana anafaiweya, au taidei anafaiweya gina yegemona fainiya.” Ada tayuwe tova-nai Yeisu givonavona tolugaviya aditonagona wagaine, au yana togugai gibwaina.
Yeisu kaliva moyaidi gikivebwainidi.
Mak 1:29-34; Luk 4:38-41
14 Ada tolugaviya aditonagona ginau, aku muliya Yeisu gina giluku Pita yana manuwa wagaine, ani giitana Pita lawana vavine iveoga, vovodi gilukalalava lakaina ada iviya idaudau. 15 Ada ginau nimadi giabina ani veoga-nai giavaina aku vovodi gituluna. Ada imididi ke ivebutu Yeisu anaga ikidewadewa.
16 Aku mala givelavilavi wagaine, kaliva moyaidi gavega nafodiya aluwaluwa koyodi imiyamiya ani tubuiyadiyavo ialiyedi Yeisu wagaine. Ada aluwaluwa-dina giveyegemonidi yana vona wagaine, ada badi gavega iveoga ani matatabudi gikivebwainidi. 17 Taidei gaitoma-dina gifaisewadi ani gavana falofita Aiseya gifalofisai au giyegemo velemoena, givona, “Tauna Banae ani adaveoga givaiyavuledi ada gikivebwainida.” †Ais 53:4
Kaliva nuwanuwadi vaita Yeisu ina muliyena.
Luk 9:57-62
18 Aku tova-nai wagaine Yeisu giitadi yoo lakaina imidififina faina, yana tonogalayavo giveimeyedi ke Banae nodi ina damana lavu fafaline. 19 Aku Mosese yana veimeya anatovewala seyana gielai Banae wagaine ada givona, “Tovewala, gadedeku O una naunau aga Iya nodi.”
20 Ada Yeisu gilufata wagaine, givonaga, “Galuweta walawala wa adiluwa, ada kaduwe manuga wa adiuba, aku Banae Kaliva Natuna keke tamo yana ebamiya ke gina venobali gina veyawai.” †2Kol 8:9
21 Ada kadu kaliva seyana, banae yana tonogala seyana, gielai ada givonena, givona, “Kauveya, uda awaegeku nagona gadanau ada kamaku gada tavuna ayo gadaela gada muliyeni.” **Kaliva taidei anaalamana ani tamana aimo keke gida alika. Aku tamana givekaliva faina, kaliva-nai nuwanuwana nodi inamiya, ada aimo tamana gina alika e ada gina tavuna. Aku kaliva yana muliya anatova Yeisu faina ani gina vekwalu.
22 Aku Yeisu givonena, givona, “Badi gavega aluwaluwadi alialikana ani unasei taudiyavo yadi toalika ina tavuna. Aku oyeni ani unaela una muliyeku.”
Yeisu mala lakaina giawatana ke giniwalova.
Mak 4:35-41; Luk 8:22-25
23 Ada Yeisu giifufu giavaina, yana tonogalayavo nodi iyage waka wagaine. 24 Ada keke tova manamanawena aku mala gifuwana ada lavu gimaduna, ada buli lakaidi waka iiwatavutavuna. Aku Yeisu ani waka muline givenobali gidaudau. 25 E ada yana tonogalayavo ina ilivaguna, ivonena, “Kauveya, uda kibababaleda! Kabiso-moena kana yababa!”
26 Ada Yeisu givonedi, “Imi yami vetumagana kabiso-moena. Gavana faina wamatauta?” Ada au gimididi mala ke buli giawatadi, ada maduga-mowa lavu matatabuna giniwalova.†Mad 14:31, Mak 4:39,40, Luk 8:24 27 Ada tonogalayavo meyadi gisidobodobona, ivona, “Ida gavakaliva ayo mala ke buli ani bonana imatawalewaleyena!”
Kaliva adiselu aluwaluwa koyodi nafodiya imiyamiya ani Yeisu gikiveiwakanedi.
Mak 5:1-20; Luk 8:26-39
28 Aku Yeisu gidamana ke giyalili lavu fafaline meGadala**Badi meGadala ani kaduwe ivewagadi meGelasa. (Mak 51, Luk 8:26) adifafali wagaine, ani kaliva adiselu iyegemona didikula adifafaliya ke ielai Bana wagaine. Kaliva-dina ani aluwaluwa koyodi nafodiya imiyamiya ke imanimanini koyo-moena. Taidei faina keke seyana gaito anafata wai-nai wagaine ginana. 29 E aku Yeisu iitana wagaine ada ivekovakova bonadi lakaina, ivonaga, “O Yaubada Natuna, gavana unagai wagaimeya? Gavaiyamu, uelai ke una kiveuloulolonima? Aku matavuloga anatova-moena ani aimo-yo ginaelai.”†Luk 4:34,41, Kol 2:15
30 E aku gadedeku iyalalakata wagaine aku maita-moena ginauwena, ani bawe moyaidi iduwaduwala. 31 Au aluwaluwa koyodi Yeisu ialamamaiyena, ivonaga, “Kai una veyegemonema kaliva taidei wagaidiya, aga uda imilima adanau tayuwe bawe moyaidi wagaidiya adaluku.”
32 Ada Yeisu givonedi, “Wananau.” E ada iyegemona kaliva-dina wagaidiya aku inau ada iluku bawe wagaidiya. Ada au bawe matatabudi iluyabayabanunuga oya wagaine iobu ke ikamomola lavu wagaine. 33 Aku kaliva bawe itaitaveyabidi, ani iveotaota inau melala lakaina wagaine ada bawe faidiya iawatalatalaina ke kaduwe kaliva adiselu aluwaluwa koyodi nafodiya imiyamiya ani gavaiyamu iveiwaka faina valeyadi iawamogatalena. 34 E ada kaliva moyaidi melala lakaina wagaine iyegemona inau Yeisu ina itana. Ada inuwagana wagaine, ivonena ke ialamamaiyena vaita yadi fafali gina madusegeku ginanau.
**8:4 Kai kaliva wa analefelo aku lefelo-nai gina avaina, aga yadayada-nai wagaine gina veiwaka, nagona kaliva-nai ginanau ada tauna gina vewalena bana veyavo anatovegugai wagaine, muliya gina vebolavoi Yaubada wagaine Mosese yana veimeya anafaiweya. (Vei 14:1-32)
**8:5 Tolugaviya aditonagona banae ivewagana giyomatana. Aku meLoma tolugaviya adiveimeya ani kai tolugaviya adiyoo wani analedi (100), aga aditogiyomatana seyana. Aku tova-nai wagaine meIsileli keke nuwanuwadi meLoma tolugaviya, faina yadi melala iveiveimeyedi.
†8:12 Mad 22:13, 25:30, Luk 13:28
†8:17 Ais 53:4
**8:21 Kaliva taidei anaalamana ani tamana aimo keke gida alika. Aku tamana givekaliva faina, kaliva-nai nuwanuwana nodi inamiya, ada aimo tamana gina alika e ada gina tavuna. Aku kaliva yana muliya anatova Yeisu faina ani gina vekwalu.
†8:26 Mad 14:31, Mak 4:39,40, Luk 8:24
**8:28 Badi meGadala ani kaduwe ivewagadi meGelasa. (Mak 51, Luk 8:26)