Yaubada Yana Veyavo Anawai Evaguna Iyemesa 1

Iyemesa Yana Vetokiluma

Kivemala

Leta taidei Iyemesa banae Yeisu taina ani givetokilumina. Tauna yana yoo badiyavo meIsileli unuma tuwelo anakalivayavo wagaidiya, badi gavega taudiyavo iawaegedi Yeisu wagaine ani biyavo-dina yadi leta givetokilumina. Keke melala seyana gagana wagaine aku fafali tulina tulina wagaidiya ivemelala imiyamiya ani wagaidiya. Aku Yemesa-nai tovetumagana imiyamiya Yelusalema wagaine, banae aditonagona lakaina. (Gugai 15:13, 21:18)

Leta ananuwanuwa ani gavadewa tovetumagana gilubodada, tainei faina giluwageyeda, ada kaduwe gavaiyamu yada vetumagana kana seyegemonena yada dewa wagaidiya ani faine givonavagadonau. Vetumagana ananuwanuwa ani keke vona gaga aku kaduwe wa anagugai nodi.

Wayada vemwamwala kana atuvefaila yada vetumagana adigaluvaluva wagaidiya. (1:1-8)

Tofanifani ke tokaikaiwabu faidiya. (1:9-18)

Yaubada yana vona kana nogalina ada kana gugaiyena. (1:19-27)

Keke kaliva adiita wagaine kana luidi. (2:1-13)

Vetumagana wa anagugai. (2:14-26)

Meya anaitaveyabina. (3:1-12)

Nuwauya velemoena Yaubada wagaine-deya. (3:13-18)

Yaubada yana veimeya dibune kana miyamiya. (4:1-17)

Tokaikaiwabu adimatawa. (5:1-6)

Wa yada atuvefaila Kauveya yana ela kana bodabodana. (5:7-12)

Veoveola wa anavetumagana. (5:13-20)

1 Iya Iyemesa,† Yaubada ke yada Kauveya Yeisu Keliso yadi togugai seyana. Yaku vesiule tubuiyakuweyavo wagaimiya, imi tovetumagana Isileli unuma tuwelo anakalivayavo waawalanau fafali seyana seyana wagaidiya wamiyamiya.

Wayada vemwamwala kana atuvefaila yada vetumagana adigaluvaluva wagaidiya.

2 Tubuiyakuweyavo, gavatoveya ebagaluvaluva tulina tulina wana nuwagadi, aga wana nuwanuwayedi vaita ebavemwamwala, keke ebanuwavita. 3 Faina waalamanena vaita wada uloulolo-dina ani yami vetumagana adigaluvaluva e ada gikikivetoyogidi. Ada tova-nai bademowa gina toyogina, amifaiweya wana atuvefaila uloulolo tulina tulina wagaidiya.† 4 Keke wana galuvaluva ke amivita wagaidiya-deya wanaota, aku au wana awaegemi ke yami atuvefaila gina tubutubuga e ada wana asekumaga yami nuwanuwa wagaidiya, ada keke tamo gavana wagaine wana vemaufo.† 5 E aku kai tamo gaito wagaimiya ginuwanuwa vaita yana nuwauya keke anafata, aga gida veola Yaubada wagaine, Banae wa yana nuwadoga givelavelau moyaida wagaideya. Ada Banae keke gina duweye aku au nuwauya gina velena.† 6 Aku tova-nai gina veoveola aga wa yana vetumagana nodi, aku keke wa yana nuwalugaluga gina nuwakila vaita Yaubada keke ginaleme. Faina badi gavega inuwalugaluga ani vaita buli mala gitafi alualugena anafaiweya. 7-8 Badi yadi nuwanuwa imadu-kavokavovo ada keke adifata wai seyana wagaine inamiya-mowa, faina yadi nuwanuwa nagona wai seyana wagaine, muliya wai tulina wagaine. Biyavo-dina ani keke adilauboda ida nuwanuwa vaita tamo gavana ida nuwaga KAUVEYA wagaine-deya.

Tofanifani ke tokaikaiwabu faidiya.

9 Kai tovetumagana aku moyamoyakana, banae anayegana lakaina Yaubada matane faina, gilubodana gina vemwamwala.† 10 Ada banae gaito kaikaiwabuna, aimo Yaubada gina kiobuyena faina, gilubodana gina vemwamwala. Faina ai veiyana gikokomidi anafaiweya, banae gina avovolina.† 11 Waitana, kauwana gilakalaka wa yana ginaginana ke gudana gina kuvemayewadi, ada veiyadi ina mavudi ada adiita iwakana ani gina avaina. Ada kadu anafaiweya tokaikaiwabu. Ina vevelauvila yadi kaikaiwabu-dina wagaidiya, aku alika gina yegemonidi ada au gina avaidi.

Ebagaluvaluva kana atuvefailidi.

12 Kai ebagaluvaluva ina yegemo gaito seyana wagaine aku gina atuvefailina, aga Yaubada giawanuwakabubuyena.† Faina tova-nai gina vetoyogina ebagaluvaluva-dina wagaidiya, aga banae fatana yawai-vagata gina nuwagana anafaiweya Yaubada givonadabadabayena badi gavega inuwakabubuyena wagaidiya.

13 Tova-nai aladibidibi ina yegemo wagaideya, aga keke gida luboda kanavona, “Ida Yaubada gialadibidibiyeku.” Faina Yaubada yana nuwanuwa ani matatabuna iwakana, e ada keke anafata aladibidibi gina nuwaga koyona wagaine-deya, ada kaduwe Banae keke seyana gaito gina aladibidibiye ayo koyona gina gugaiye.† 14 Aladibidibi ani taidei anafaiweya. Kai ide taudeyavo yada nuwanuwa luluvadigadi gina nunuwainageyeda e ada nuwanuwa-dina koyodi isitaitainauweda, tainei anayegana aladibidibi. 15 Ada nuwanuwa-dina koyodi gina veifugena ke muliya dewa koyona gina venatunena, ada tova-nai dewa koyona gina veinala-mowa, ide tova moyaina koyona-nai kana gugaiyena-deya au gina nauweda alika wagaine.†

16 Tubuiya aseasekuweyavo, keke nuwanuwa tunutunugina wana nuwavuyoye e ada wanavona, “Ida Yaubada gialadibidibiyeku.” 17 Gaitoma iwakana seyana seyana adaleme faina kanuwanuwagadi ani matatabuna iobuobuelai wagabameya Yaubada wagaine-deya, ada gaitoma-dina yana nuwakabubu ide wagaideya. Gabama anamalina, anafaiweya kauwana ke vaikoi ada ailabama, ani Banae adiToibubuna. Malabutuya ai aiwauna lakaina aku yadayada kabisona, aku Yaubada ani keke-mowa gida sivedavedama aiwau anafaiweya, au gimiyamiya. 18 Yaubada Tauna yana nuwenuweya ke yana vona velemoena wagaine katubuga-vagila,† e ada ide vaita bavagu nago-moena yana ibubuna matatabuna wagaidiya.**

Yaubada yana vona kana nogalina ada kana gugaiyena.

19 Tubuiyakuweyavo, vona taidei nuwamiya gida miyamiya. Ide seyana seyana gilubodada kanamadu nogala aku vona keke kanamadu vevilage,† ada keke kanamadu nuwakoyo, 20 faina kai kana nuwakoyo aga keke-mowa maita adafaiweya Yaubada yana nuwanuwa yegayegana kana kiveyegemoni.† 21 Tainei faina nuwanuwa bwanebwanenedi ke dewa koyona tulina tulina ibwatavumi ani au wanasege-moedi, aku wa yami nuwaobu† Yaubada yana vona aseasemiya gibakulina** ani wana vaina velemoena, vona-nai anafata gina kibababalemi.†

22 E aku vona taidei ani kana gugaiyena, keke nogala gagana.† Ide gavega kanoganogala-mowa aku keke kada gugaiye gavana givonavona, aga ina taudeyavo kafwayafwayada. 23 Faina kai Yaubada yana vona kanogalina aku keke kada gugaiye, ideyavo vaita kaliva magigina giitaitana kelasi wagaine anafaiweya. 24 Tauna anununa giita-yo ginau ada anununa gavaiyamu anaitaita ani nuwana givulu-mowa. 25 Aku badi gavega Yaubada yana veimeya iitadone-vagaina ada keke ida venuwavuluye aku tova moyaina ina gugaiyena, aga badi yadi yauvivila moyaina wagaidiya Yaubada gina awanuwakabubuyedi.† Tainei Yaubada yana veimeya-nai ani iwaka-moena, ada bana wagaine gietoyavuda ke wa yada vemwamwala tova moyaina kaidibudibumwaigena.

26 Kai gaito seyana ginuwanuwa vaita banae totafalolo aku meyana keke gida itaveyabi,† aga tauna gifwayanegenegena ada yana tafalolo ani gaitoma-kavokavovo. 27 Kai gavakaliva yana tafalolo yegayegana ada keke wa yana koyona Yaubada Tamada matane, aga ginadewa taidei anafaiweya. Boyoboyova ke sikwasikwa miya vitana inuwanuwagadi ani gina madubodadi ke gina itaitaveyabidi,† aku kaduwe tauna gina itaveyabina babi anadewa koyodi wagaidiya-deya† e ada keke ina ivekoyo.

†1:1 Mad 13:55, Mak 6:3, Gug 15:13, Gal 1:19

†1:3 Lom 5:3-5, 1Pi 4:13-14

†1:4 Mad 5:48

†1:5 1Kin 3:7-12, Mad 7:7

†1:9 Iyem 2:5, 2Kol 6:10

†1:10 Iyel 9:23-24, 1Tim 6:17, Luk 12:16-21

†1:12 Mad 10:22, 1Pi 3:14

†1:13 1Kol 10:13

†1:15 Lom 6:23

†1:18 1Pi 1:23, Iyo 1:12-13

**1:18 MeIsileli adigiduwa seyana, ani gava kevakeva nagona gina tubuga ani ina vebolavoiyena Yaubada wagaine. Ada kaduwe, gava aa nagona ina yalana, inavele-kavovoyedi Yaubada wagaine. (Vei 23:9-14, Iyel 2:3, Ive 14:4)

†1:19 Vona 10:19

†1:20 Mad 5:22

†1:21 Iyem 3:13

**1:21 Vona-nai ‘gibakulina’ ananuwanuwa taidei anafaiweya. Babi waifei ginuwanuwagana anafaiweya, ide kaduwe Yaubada yana vona kana nuwagana. Kai nuwanuwada yana vona anawaifei ginatabo, aga gilubodada kana miyavilada yada dewa koyona wagaidiya ada Yaubada yana nuwanuwa velemoena kana muliyena. Taidei wagaine aseaseda anababi ani vaita babi guyaguyana anafaiweya.

†1:21 1Kol 15:1-2, Efes 1:13

†1:22 Lom 2:13

†1:25 Sam 1:1-3, Luk 11:28

†1:26 Sam 34:13, 141:3

†1:27 Iyob 31:16-18, Ais 1:17,23, Mad 25:36

†1:27 1Tim 5:22, 2Pi 3:14