2
Taumana Maihala ena Aba Kepa yai sa Laoma
Matiu 2:1-12
1 Yesu ena aba tubu mate taon hesa hesana Betelehem, Diudeya Nuꞌuna yai. Fuyanna doga hesa hesana Heloda mate edi kin, Kipwala Tau Fadosidi*2:1 <<Kipwala Tau Fadosidi>> mate <<Magoi>> Suau Bukana yai. haisa sa mahano leuma Yelusalem yai. 2 Be sa fatiꞌo, tiyen,
Wawaya ya tubu bena Diusi emi Kin, mate, in somo yai? Fafaꞌilalana kipwala ya sina ꞌe ita, tefa saisai yai, lebena yai ꞌe laoma, bena ꞌe fadebasae.
3 Fuyanna Kin Heloda wasa ya atahiyen, mate maidana Yelusalem dodogadi sa nuwadubu.
4 Yofede, Diusi edi tau antalasam baꞌibaꞌisadi ya yoga gogonidi yo laugagayo tanutanuwagadi, be ya fatiꞌoidi, iyen,
Ai somo haba Keliso,†2:4 <<Diusi edi tau liba fasunumadi>> o <<Mesaiya>> mate, doga hudoꞌi Yaubada haꞌa ya hineli. Haba ya fafuyo Isalaela edi baꞌisa laꞌilaꞌi yo edi tau laulau famwahuli. Na Isalaela sa bagi ya lofa. ya tubu?
5 Alinana sa bui, iten,
O, Betelehem, Diudeya Nuꞌuna ganahewana yai! Doha ite, peloweta hudoꞌi ya uli haꞌa iyen,
6 Betelehem dodogadi, Diudeya ganahewana yai,
emi nuꞌu hige i tubu gaibu,
Diudeya nuꞌudi ganahewadi yai,
paꞌana ganahewam yai,
Tau Uluweda haba ya tubu hasa.
Fuya matada yai, in haba Isalaela dodogadi Tau Uluwedi. (Maika 5:2)
7 Yofede, Heloda simosimo yai, Kipwala Tau Lau Fadosi ya faꞌoilibadi, na ya fatiꞌoidi, iyen,
Kipwala ami ita bwaꞌiyen, mate fuya som?
Yofede, sa faliba. 8 Habahim ya fatamalidi, be sa lau Betelehem na iyen,
Gwama te au yoꞌoi komakomaniꞌi. Yena ami lobahi au fuyoma be au falibagu. Haba yau hinaga E lau be E fadebasae.
9 Kin ya fatalahadi ya ofi, sa lau afulen. Na kipwala tefa saisai yai sa ita ya bwaꞌi yee–, somo yai gwama ena aba tubu nuꞌuna hewana yai ya todi. 10 Fuyana kipwala sa ita mate kwade ya famohafudi. 11 Na sa luhulau luma ganahewana yofede Gwama wa sa ita, ma tinana Maliya. Yofede, sa tulibono, be sa dulu, hesana yai. Yo ena ainauya maisadi laꞌilaꞌidi faihona sa lahafahidi: Gole, mulamula panepanena hesa, yo oyagi hesa lutuna panepanena sa felen.‡2:11 Ainauya te dimdim yai mate: gole, falankinsensi yo miula. Na ginauli te, maisadi sa laꞌi wananaha. 12 Mulina yai, habahim, Yaubada, eno suwai yai, ya liba fanuwatagudi be tabu ti fuyo Heloda lisina yai, yofede, edaꞌeda hesa sa lau watan, be sa fuyo sai edi nuꞌu.
Maliya Yo Diyosepa Gwama sa Gelaꞌen sa Lau Idipi
Matiu 2:13-23
13 Fuyana ha'a sa aulaha habahim, eno suwai yai Guyau ena Anelu ya taumahata Diyosepa lebena yai na iyen,
U obiyo. Gwama ma tinana u gelaꞌedi be au lau Idipi. Ainiya au miya ee–, ana siga E falibam, haba ami fuyoma. Heloda mate gwama te ya laulau yoꞌoi, bena haba ya wunui.
14 Diyosepa ya eno obiyoma, gwama ma tinana ya auledi, na iꞌipa yai sa lau Idipi. 15 Amainiya sa miya ee–, Heloda ya peꞌi.
Yaubada alina doha ite:
Natugu ai Idipi E yoga fahiyama. (Hoseya 11:1)
Haba liba te peloweta haꞌa ya libaen, ya fawananaha.
Heloda Wawaya Kikiꞌina ya Wunuidi
Matiu 2:16-18
16 Heloda ya nuwatuhu lobahi, mate taumana tefa saisai yai sa laoma §2:16 Uliꞌuli haisa tiyen <<Magi o <<Magoi>> na aniyona mate <<Kipwala Tau Laufadosi.>> mate sa bwalai, yofede, ya gafupou. Liba adiꞌadidili ya fatamali, be wawaya tatau mahudoꞌidi Betelehem yai edi bolima luwaga yo ubuna yai yo nuꞌu haisa sadaina yai, mate mahudoꞌidi sa wunuidi, paꞌana gwama ena fuya tubu Magi ena sa liba. 17 Somo ya tubu te mate Peloweta Delamaiya ya libaen ya fawananaha:
18 Alina sa atahi, Lama yai,
sa tan eloꞌelolosi.
Leisulu nanatuna haladi ya tantan.
Famakanona sa fakaukau,
Paꞌana nanatuna mahudoꞌidi sa peꞌi ofi.
Diyosepa yo Maliya ma Natudi Idipi yai sa Fuyoma
Matiu 2:19-23
19 Heloda ya peꞌi mulina yai, Idipi yai Yaubada ena Anelu eno suwai yai ya taumahata lau, Diyosepa lisina. 20 Be iyen,
U obiyo be gwama ma tinana u fafuyodi Isalaela Nuꞌuna, paꞌana gwama tau lau funuhina, haꞌa sa peꞌi.
21 Yofede, Diyosepa ya obiyo, gwama ma tinana ya auledi, na sa fuyo Isalaela. 22 Diyosepa ya atahiyen mate Akelausi tamana Heloda ya falau damahi, be Diudeya edi kin, be lau Diudeya, ya ꞌwasabu. Inmoho Yaubada eno suwai yai ya faliba, yofede ya lau Galili Nuꞌuna.
23 Be Nasaleta taonna yai ya gogo. Na doha peloweta ena liba ya fawananaha, iyen,
In haba ya famala Nasaleta dogana.
*2:1 2:1 <<Kipwala Tau Fadosidi>> mate <<Magoi>> Suau Bukana yai.
†2:4 2:4 <<Diusi edi tau liba fasunumadi>> o <<Mesaiya>> mate, doga hudoꞌi Yaubada haꞌa ya hineli. Haba ya fafuyo Isalaela edi baꞌisa laꞌilaꞌi yo edi tau laulau famwahuli. Na Isalaela sa bagi ya lofa.
‡2:11 2:11 Ainauya te dimdim yai mate: gole, falankinsensi yo miula. Na ginauli te, maisadi sa laꞌi wananaha.
§2:16 2:16 Uliꞌuli haisa tiyen <<Magi o <<Magoi>> na aniyona mate <<Kipwala Tau Laufadosi.>>