15
Hitihalo Lau Faꞌatana
Matiu 15:1-9
(Maleko 7:1-13)
1 Falesiya yo laugagayo tau lau faꞌataina Yelusalem yai sa laoma be Yesu sa fatiꞌoi tiyen,
2 Sidohana be tau famuli watanim hiti baguna lau faꞌatadi sa utusi be nimadi hige ti kaisudi, habahim ti kalahe?
3 Yesu alinadi ya bui iyen,
Paꞌana somo Yaubada ena laugagayo ami ꞌwaiyoꞌoen, na iyabomiu emi lau faꞌata ami lau watan? 4 Yaubada alinana iyen,
<<Tinam yo tamam bena wa faꞌatitiyedi,>> yo <<sai tinam e tamam ya liba faheyayadi mate, bena ami tala funuhi.>> (Esedo 20:12; Esedo 21:17)
5 Inmoho, ami lau faꞌata mate, yena dodoga somo lisidi yai bena sa fapaisowadi be tamadi o tinadi sa saguhidi, na tiyen
<<Ite Yaubada enehena.>>
6 Na ami ulutubu edi laugagayo debana yai auwen,
<<Tabu tamamiu yo tinamiu au faꞌatitiyedi, be abiꞌabi te lisina yai, Yaubada ena laugagayo ami ꞌwaiyoꞌoen.>>
7 Umi dodoga bwalabwalamiu! Wananaha mate Isaiya haꞌa ya liba famahatamiu, iyebom:
8 <<Yaubada iyen,
<Dodoga te, moꞌadi yai sa fadebasaegu moho,
Na Yaluwadi mate, higeꞌe.
9 Edi fadebasae lisigu yai hige aniyona,
paꞌana dodoga edi laugagayo sa lau faꞌataedi,
na bena haga yau egu laugagayo!>>> (Isaiya 29:13)
Ginauli Haisa Dodoga sa Fabidadi
Matiu 15:10-20
(Maleko 7:14-23)
10 Habahim Yesu baiwa ya yoga gogonidi na sa laoma lisina be ya falibadi, iyen,
Egu liba au ataꞌatahi, yo ai nuwamiu ti ota!
11 Doga moꞌana yai somo ya luhulau mate, hige i faheyaya. Inmoho, somo moꞌana yai ya libaen mate, doga ya faheyaya.
12 Yofede, tau famuli watanina sa laoma lisina be tiyen,
Wa sibai mate um em liba yai, be Falesiya nuwadi hige ti loholoho?
13 Yesu alinadi ya bui, iyen,
Umaꞌuma somo, hige Tamagu Galewa yai i umahi mate, haba ya laꞌa fahi. 14 Tabu au mode lisidi yai! Iti tau matatoutou tau foyahidi. Be yena matatoutou laꞌi hidana ya foyahi, tataudi luwaga haba ai gali sa dobi.
15 Pita ya libalau Yesu lisina iyen,
Liba te aniyona haga u falibamai.
16 Yesu iyen,
Hola ma nuwa ponoponomiu? 17 Ami siba, e higeꞌe? Somo moꞌa yai ya lidi boga ganahewana yai be ya kalamahano. 18 Inmoho somo moꞌa yai ya kalamahano mate, nuwanuwana yai ya laoma, be ginaulina doga ya fabidahe. 19 Nuwanuwana yai nuwanuwatuhu heyaheyayadi sa laoma, be sa foyahi lawen: ya aiyunu, kelele, laulau heyaheyayadi haisa, yo angafu, lau bwalabwala, yo bwalabwala yai dodoga sa falau fatala.
20 Iti ginaulidi te, doga sa fabida. Na nimamiu hige au kaisudi na ami kalahe mate doga yaluwana hige i fabida.
Waihin ena Kawawananaha
Matiu 15:21-28
(Maleko 7:24-30)
21 Nuꞌuna ni Yesu ya lau afulen, na ya lau Taiya yo Sidon nuꞌudi tefadi yai. 22 Kanana waihinina nuꞌuna yai ni ya gogogo, ya laoma Yesu lebena be ya anꞌeta gadogadola lau lisina yai iyen,
Deiwidi Natuna! U nuwatohatohaegu! Natugu mate, yaluwa heyaheyayadi ganahewana yai sa gogo, be amnana ya heyaya wananaha.
23 Yesu hige waihin somo i faliba. Tau famuli watanina sa laoma, be tiyen,
U dui be i lau! Ya laulau watanida be ya fadineida!
24 Habahim Yesu alinadi ya bui, iyen,
Yaubada ya fatamaliguma Isalaela edi sipi asiꞌasina debadi yai.
25 Yofede, waihin wa ya laoma be ahena yai ya hobalidi, na iyen,
Guyau, u saguhigu!
26 Alinana ya bui, iyen,
Wawaya adi kalahe ibege ta abidi, be ꞌwayowa ta feledi ti anidi.
27 Yesu alinana, waihin ya bui, iyen,
Guyau, somo wa libaen mate, wananaha. Inmoho ꞌwayowa mate edi baꞌisa ana mapula sa beꞌulidi ena hatahata gabulana yai sa anidi.
28 Yofede, Yesu ya libalau waihin lisina iyen,
Waihin, em kawawananaha ya laꞌi wananaha! Somo wa fanuha haba wa abi.
Yofede, maihalana yai natuna ya loholoho.
Yesu Dodoga Boludi ya Faloholohodi
Matiu 15:29-31
29 Yesu ya aulaha boda, be ya lau Galili Hoꞌowana bwaibwaiꞌuꞌuna laꞌilaꞌina yai.*15:29 <<Galili Gabogabona>> hige alita, ho'owa moho, na hesana hesa gonowana te tole <<Galili Hoꞌowana>> bwaibwaiꞌuꞌuna laꞌilaꞌina. Tuꞌa hesa ya finahe, be amainiya ya taꞌai. 30 Baiwa laꞌilaꞌi sa laoma lisina, yo ahe dabidabi, matatoutou, libaliba gesa yo lepalepa haisa tau abidi sa ledima Yesu lisina, be ya faloholohodi.
31 Dodoga sa noꞌo paꞌana:
libaliba gesadi sa liba,
ahe dabidabi ya faloholohodi,
be sa laulau,
yo matatoutou matadi sa falaladi.
Yofede, Isalaela edi Yaubada sa fadebasae.
4,000 Yesu ya Fakalahedi
Matiu 15:32-39
(Maleko 8:1-10)
32 Yesu ena tau famuli wata ya yoga gogonidi, na iyen,
Dodoga te E fanuwatohatohaedi, paꞌana sa laulau watanigu ee–, lahai faihona, be aho te hige adi kalahe. Hige ya fanuha bena ya dui fafuyodi ma guliyamdi, paꞌana ai edaꞌeda ibe ti guli.
33 Tau famuli watanina Yesu sa fatiꞌoi, tiyen,
Ai nuꞌu pitapitalina te, ai somo haba kalahe te abi be doga boluna te fakalahe?
34 Yesu alinadi ya fafuyo, iyen,
Fwalawa fisa lisimiu yai?
Alinana sa bui, tiyen,
Faligigi luwaga moho, yo hama kikiluka fisa.
35 Yofede, Yesu dodoga wa ya falibadi be sa taꞌai bigabiga. 36 Habahim, fwalawa faligigi-luwaga yo hama fisa wa ya abidi, na Yaubada ya lautoꞌiyen. Habahim ya ifidi, be tau famuli watanina ya feledi be dodoga adi sa feledi. 37 Mahudoꞌidi sa kalahe, be bogadi sa yahayaha, habahim, Yesu tau famuli watanina kalahe antoledi sa tano bee–, noho faligigi-luwaga sa famohafudi. 38 Tatau tau kalahe mate oulina 4,000, na wawahin yo wawaya hige ti fatilidi.
39 Habahim dodoga wa Yesu ya duidi be sa fuyo, na waga yai ya awa be sa lau Magadan Nuꞌudi.
*15:29 15:29 <<Galili Gabogabona>> hige alita, ho'owa moho, na hesana hesa gonowana te tole <<Galili Hoꞌowana>> bwaibwaiꞌuꞌuna laꞌilaꞌina.