16
Fafaꞌilala o Noꞌo Abiꞌabidi sa Fanuha
Matiu 16:1-4
(Maleko 8:11-13; Luka 12:54-56)
1 Falesiya yo Sadusi bena Yesu sa lauꞌita, yofede, sa laoma lisina, be sa fatiꞌoi bena fafaꞌilala laꞌi ya ginauli ai Galewa be sa ita. 2 Yofede, Yesu alinadi ya bui, iyen,
Yena maihala ya bulu, auwen,
<<Haba ya siuhwalo, paꞌana galewa ya antala sabisabi.>>
3 Na hwalahwalala auwen,
<<Haba ya usa, paꞌana galewa ya faduba yo ya balelem.>>
Gonowamiu haba galewa nenena yai ami anmasiyen. Inmoho, hige gonowamiu bena lahai te nenena doha somo au sibaidi! 4 Aho lahai te dodogamiu ami heyaya yo Yaubada hige au kawawananahaꞌen! Be fafaꞌilala bena laꞌi E ginauli? Hige gonowana! Fafaꞌilala esega haba E falibamiu mate, Diyona au nuwatuhui.
Habahim ya lau afuledi, na ya aulaha.
Falesiya yo Sadusi Palaboledi
Matiu 16:5-12
(Maleko 8:14-21)
5 Tau famuli watanina mate, sa dohe gabogabo tefana yai, na nuwadi ya fui, be fwalawa hige laꞌi ti abi. 6 Yesu ya libalau lisidi, iyebom,
Au ita komakomaꞌi! Falesiya yo Sadusi edi yisti tabu au tulufi.
7 Amainiya hola libana ibodi sa fadosi, tiyen,
Nuwana fwalawa hige laꞌi ta abi, be ya liba doha.
8 Yesu mate somo sa libalibaen haꞌa ya sibai, yofede, ya fatiꞌoidi,
Paꞌana somo ibomiu ami oiꞌoiliba doha? Paꞌana fwalawa hige laꞌi au abi? Emi kawawananaha haga ti kiu! 9 Haꞌa ami nuwatuhu lobahi, e higeꞌe? Hige au nuwatuhui fuyana fwalawa faligigi E ifidi, be dodoga 5,000 E feledi, sa an? Na noho fisa ami famohafudi? 10 Yo fwalawa faligigi-luwaga dodoga 4,000 sa an? Na noho fisa ami famohafudi? 11 Sidohana be hige au nuwatuhu lobahi, mate yau hige fwalawa libana ya fafalibamiu? Falesiya yo Sadusi edi fwalawa fafasesena tabu au fapaisowa mate libana E fafalibamiu!
12 Habahim tau famuli watanina sa nuwatuhu lobahi mate, in hige fwalawa fafasiuna i libalibaen. Fedebom Falesiya yo Sadusi edi lau faꞌata ya libalibaen.
Pita ya Liba mate Yesu Yaubada Natuna
Matiu 16:13-20
(Maleko 8:27-30; Luka 9:18-21)
13 Yesu ya lau nuꞌu hesana Sesaliya Filipi taon laꞌilaꞌina sadaina yai. Amainiya tau famuli watanina ya falibadi, iyen,
Haba dodoga tiyen, <<Doga Natuna mate sai?>>
Tau famuli watanina tiyen,
14 Haisa tiyen, <<Diyon Babasito,>> na haisa tiyen, <<Ilaidiya,>> na haisa tiyen, <<Delamaiya o peloweta haisa.>>
15 Alinadi ya bui, iyen,
Na umi haba auwen, <<Yau sai?>>
16 Saimon Pita Yesu alinana ya fafuyo, iyen,
<<Um mate Keliso, Yaubada Mwahumwahulina Natuna.*16:16 <<Keliso>> hige doga hesana moho, paꞌana Keliso aniyona mate <<Yaubada ena Tau Fasinabo>> o <<Mesaiya.>> >>
17 Yesu iyen,
Saimon, Diyona Natuna, Yaubada ena ita faloholoho lisim yai! Paꞌana hige doga laꞌi i fatalaham. Wananahana mate, Tamagu Galewa yai ya fataumahata lisim yai. 18 Lisina yai E falibam, Pita: Um mate <<umeꞌehu.>>†16:18 Alina Giliki yai <<Pita>> aniyona mate <<ume'ehu.>> Haba umeꞌehuna ai hewana egu dubu E faꞌobiyo, be Peꞌi Edaꞌeda Hafona hesana Hadesi,‡16:18 Giliki alinadi yai, <<Hadesi>> aniyona mate <<dodoga peipei, edi aba miya.>> Na eda nu'u yai te, nuwana doha <<Tanalai>> o <<Biula.>> ibege i sai tawatawan.
19 Galewa Nuꞌuna soꞌesoꞌena haba E felem. Tanohi yai somo wa gudu mate, Galewa yai haba sa gudu hinaga, yo somo wa soꞌe tanohi yai, haba ai Galewa sa soꞌe hinaga.
20 Habahim, Yesu tau famuli watanina ya laugagayoꞌedi, tabu sai ena ti liba, mate in Keliso.
Yesu ena Kamkamna yo ena Peꞌi ya Dedeidi
Matiu 16:21-28
(Maleko 8:31-38; Maleko 9:1; Luka 9:22-27)
21 Lahaina yai na ya lawen, Yesu ya fatubu tau famuli watanina enehedi ya liba, iyen,
Haba E lau Yelusalem, be babada, antalasam baꞌibaꞌisadi, yo laugagayo tau lau faꞌataina haba fakamkamna hesa-hesa sa ginauli ai lisigu. Yo haba sa wunuigu. Inmoho, lahai faihona yai ai mulidi haba E mwahuli fuyo.
22 Pita, Yesu ya foya hudoꞌiyen, na ya libasuꞌui, iyen,
Guyau, hige gonowana! Ibege somo ti ginauli ai lebem!
23 Yesu ya timuli bui, be Pita ya faliba, iyen,
U lau hudoꞌi, um Diyabolo!§16:23 <<Diyabolo>> aniyona gonogonowana doha <<Satani.>> Egu aba faꞌalu betibeti wa tole te, paꞌana em nuwatuhu, dodoga lisidi yai ya laoma, hige Yaubada.
24 Habahim, Yesu ya libalau, tau famuli watanina lebedi iyen,
Yena sai ya fanuha, be ya famuli watanigu, mate ena mode ti otawa. Em kolosi u bahei na u lau watanigu. 25 Paꞌana sai ena mwahuli ya modemode'en ibege i abi fuyoi. Na sai ena mwahuli ya pei debagu yai, haba ya abi fafuyo.
26 Ibe doga sai tanohi mahudoꞌina ya abi fahudoꞌi, na ena mwahuli ya pei, haba somo ya lobahi? Higeꞌe, be higeꞌe wananaha! Hige gonowana haba somo i ginauli, be haba ena mwahuli i fafuyo. 27 Doga Natuna haba ya laoma Tamana ena faꞌatiti laꞌilaꞌi wananahana yai yo ena anelu maꞌedi. Habahim, doga hesa-hesa ena paisowa gonogonowana yai ya famaisa watan. 28 E falibamiu mate, haisa maꞌeda amaiteꞌi ibege hola ti peꞌi yee–, Doga Natuna ena Basileiya yai ya laolaoma sa ita.
*16:16 16:16 <<Keliso>> hige doga hesana moho, paꞌana Keliso aniyona mate <<Yaubada ena Tau Fasinabo>> o <<Mesaiya.>>
†16:18 16:18 Alina Giliki yai <<Pita>> aniyona mate <<ume'ehu.>>
‡16:18 16:18 Giliki alinadi yai, <<Hadesi>> aniyona mate <<dodoga peipei, edi aba miya.>> Na eda nu'u yai te, nuwana doha <<Tanalai>> o <<Biula.>>
§16:23 16:23 <<Diyabolo>> aniyona gonogonowana doha <<Satani.>>