17
Yesu Nenena ya Sedi
Matiu 17:1-13
(Maleko 9:2-13; Luka 9:28-36)
1 Lahai faligigi-esega mulina yai, Yesu maꞌena Pita, Diyemsi yo hidana Diyon ya auledi, be iyabodi sa lau tuꞌa lofalofana sa finahei. 2 Amainiya Yesu nenena ya sedi nuwanuwadi yai. Itaꞌitana doha maihala, yo ena leli sa kafukafu doha mala.
3 Yofede tau famuli watanina faihona wa Mose yo Ilaidiya sa itadi maꞌedi Yesu sa libaliba. 4 Amainiya Pita ya libalau lisina, iyen,
Baꞌisa, agu a moꞌisa na ai amaiteꞌi! Ibe wa fanuha, haba gwaꞌu faihona aiteꞌi ꞌe faꞌobiyodi, um em esega, Mose ena esega, yo Ilaidiya hinaga ena.
5 Ma libalibana, yofede, yada namanamalina ya laoma be ya fakou buluhidi, na yada ganahewana yai alina hudoꞌi ya libama lisidi, iyebom,
Itete Natu Eseꞌesegagu, nuwagu tau faꞌamnana. Alinana au lau watan!
6 Maihalana yai tau famuli watanina alina wa sa atahiyen, ꞌwasabu ya famohafudi. Yofede sa guli lidi tanohi yai. 7 Yesu ya fuyoma lisidi be ya abiꞌinadi, na iyen,
Au mwaito! Tabu au ꞌwasabu!
8 Sa tamahiti mate hige sai hesa ti ita, Yesu ibona moho sa ita.
9 Tuꞌa yai sa leta fuyo lidi, na Yesu ya lau biliyedi, iyen,
Somo aho ami itadi tabu au fatala libalibaedi ana sigana Doga Natuna peꞌi yai ya mwahuli fuyo.
10 Habahim, tau famuli watanina Yesu sa fatiꞌoi,
Sidohana be laugagayo tau lau faꞌataena sa libaen mate, bena Ilaidiya haba ya bwaꞌima?
11 Yesu alinadi ya bui, iyen,
Mate, wananaha, Ilaidiya haba ya bwaꞌima, be ginauli mahudoꞌina ya nonohai.
12 Inmoho, E falibamiu mate, Ilaidiya haꞌa ya laoma, na dodoga hige ti ita lobahi, be edi fanufanuha mahudoꞌina haꞌa lisina yai sa ginaulidi. Laulauna eseꞌesegana yai haba ai nimadi Doga Natuna sa fakamkamna.
13 Yofede, tau famuli watanina nuwadi yai ya taumahata mate, Diyon Babasito fede, ya libalibaen.
Gwama Demoni Ganahewana yai Yesu ya Liba Dui
Matiu 17:14-23
(Maleko 9:14-29; Luka 9:37-43a)
14 Sa fuyoma dodoga boludi lisidi yai, na taumoho hesa ya laoma Yesu lisina, be ya tulibono nuwanuwana yai, 15 na iyen,
Guyau, natugu u nuwatohatohaen! In mate ya peꞌipeꞌi bubu, yo ana asiyebona ya laꞌilaꞌi, be fuya ouꞌouli ai oyagi alaꞌaladi ya guli lidi, o ai hoꞌowa ganahewadi. 16 E lawen, tau famuli watanim lisidi, inmoho, hige gonowadi ti faloholoho. (Matiu 4:24)
17 Yesu alinana ya bui, iyen,
Dodogamiu te hige au kawawananaha yo haga au nuwa poꞌi! Lofana somo bena haba ai lisimiu E gogo?! Yo haba E faꞌadidilimiu, ma fisa?! Gwamana au leyama lisigu!
18 Yesu, yaluwa heyaheyayana ya liba suꞌui, yofede, gwama ya kalamahano afulen. Lahaina yai ya loholoho.
19 Muli yai, tau famuli watanina sa laoma Yesu lebena, be sa fatiꞌo simosimo, tiyen,
Paꞌana somo be ai hige gonowamai yaluwa heyaheyayana ni ai liba afulen?
20 Yesu alinadi ya bui, iyen,
Paꞌana emi kawawananaha hige ti laꞌi. E falibamiu mate, ibe emi kawawananaha laꞌina doha saihala dimdim tumana, gonowana tuꞌa te ami faliba, auwen,
<<Aiteꞌi u auꞌaulaha be u lau neꞌi!>>
Haba ya lau. Gonowana abiꞌabi hudoꞌi-hudoꞌi ami ginaulidi! (1 Kolinto 13:2)
21 (Ginauli doha ite, uꞌula yo anhudi yai moho te dui afuledi.)*17:21 Uliꞌuli haisa lausoi te sa tole, na haisa higeꞌe.(Maleko 9:29)
Fafaluwagana Yesu ena Peꞌi ya Libaen
Matiu 17:22-23
(Maleko 9:30-32; Luka 9:43b-45)
22 Tau famuli watanina mahudoꞌidi sa faꞌoigogo esega, Galili yai, na Yesu ya falibadi, iyen,
Doga Natuna haba sa liba afulen ana waiyunu lisidi yai, 23 be haba sa wunui; na lahai faihona ai mulidi, haba ya mwahuli fuyo.
Yofede, tau famuli watanina nuwadi sa heyaya.
Dubu Tabuna Ainauya
Matiu 17:24-27
24 Fuyana Yesu yo tau famuli watanina sa mahanoma Kapanayum nuꞌuna yai, Dubu Tabuna ainauyana tau tanoina sa laoma Pita lisina be sa fatiꞌoi, tiyen,
Emi Baꞌisa Dubu ainauyana ya tole?
25 Alinadi Pita ya bui, iyen,
Ii, ainauya ya toletolei.
Pita ya luhulau luma ganahewana yai. Yesu ya liba bwaꞌibwaꞌi, iyen,
Saimon, em nuwatuhu somo? Nu'u baba'isadi haba salumadi ai lisidi takesi sa tano? Edi dodoga ai lisidi e taꞌowawa?
26 Alinana Pita ya bui, iyen,
Taꞌowawa.
Yesu iyebom,
Ya loholoho, inmoho itaꞌitana mate, nuꞌu ni, tau miyaina, ibege ti tole.
27 Inmoho, tabu dodoga ta famwahudi. U lau ai hoꞌowa be em kauli u pei. Hama bwaꞌibwaꞌina wa solu, moꞌana u kam hafa haba moni hesana dinali-fati†17:27Alina Giliki yai moni ni hesana 4-dinali. Na ite dinali te siluba yai sa ginaulidi. wa ita. U lawen be u feledi. Um yo yau eda takesi.