22
Fafanahi Mataꞌasina Heyaheyasonna
Matiu 22:1-14
(Luka 14:15-24)
1 Yesu heyaheyason ya fapaisowa bodai be dodoga ya falibadi, iyebom,
2 Galewa Aba Baꞌisa Nuꞌuna itaꞌitana doha kin natuna ya nahi na anꞌangogo ya ginauli. 3 Ena tau paisowa ya duidi, be sa lau safaluma ya fanuhadi bena sa laoma fafanahi anꞌangogona yai sa falibadi. Inmoho, hige ti fanuha. 4 Yofede, fayofayo tau abidi haisa hinaga ya fatalahaidi, iyen,
<<Ami lau auwen <Baꞌisa ena anꞌangogo haꞌa ya nonoha; ana bulumakau tubutubudi yo gubugubufwaudi mate sa nigohidi,*22:4 Uliꞌulina sa lau hudoꞌi, tiyen, <<Bulumakau tatau, bulumakau tubutubudi yo bulumakau gubugubufwaudi.>> Na doha, sa ulidi. ginauli mahudoꞌina haꞌa ya nonoha, logena ya duimai ꞌe laoma ami halulu.>>>
5 Inmoho, ana taumana hige ti fanuha, be edi nuwatuhu sa lau watanidi. Hesa ya lau ena gabu, hesa ya lau ena moni paisowana ya ginauli, 6 na haisa mate ena tau paisowa sa tohaidi, be sa tala fafaheyayadi, habahim sa wunuidi. 7 Baꞌisa manana ya bala; yofede, ena hiyala dodogadi ya duidi, be tau tala sa wunuidi yo edi taon sa gabu golu.
8 Muli yai, habahim, ena tau paisowa ya yogaidi, be ya falibadi iyen,
<<Egu mataꞌasi haꞌa ya nonoha, agu taumana E fanuhadi mate hige edi dudulai bena faꞌatiti te sa abi.
9 Doꞌata ite au lau be ai edaꞌeda laꞌilaꞌidi dodoga boludi ami lobahidi au falibadi be ti laoma mataꞌasi yai te.>>
10 Yofede, ena tau paisowa ya duidi sa lau edaꞌeda yai be dodoga sa lobahidi, sa lau faliba napanapai, loholohodi yo heyaheyayadi, be sa laoma mataꞌasi baꞌuna yai be lumana sa lau fafamohafu.
11 Baꞌisa ya lau luma ganahewana, be ana taumana ya itadi mate, esega hige fafanahi lelina i luhufi.
12 Baꞌisa ya fatiꞌo lau doga wa lisina, iyen,
<<Hidagu paꞌana somo hige fafanahi lelina u liꞌo na wa laoma amaiteꞌi?>>
Taumohona hige somo i libaen.
13 Kin ena tau paisowa ya falibadi, be doga wa nimana yo ahena sa audi, na sa pei lawen kamumu yai, be amainiya sa tan yo gadigadidi sa nali didinidi.
14 Yesu ena liba ya falafusofa, iyen,
Boludi sa yogaidi. Inmoho, fisafisadi moho haba ya fasinabodi.
Takesi Famaisana Fatiꞌona
Matiu 22:15-21
(Maleko 12:13-17; Luka 20:20-26)
15 Falesiya sa lau, be sa oiliba, bena haba Yesu ena liba yai sa fasai buluhi. 16 Habahim Falesiya tau famuli watanina yo Heloda ena Pele sa duidi sa lau Yesu lebena be sa fatiꞌoi, tiyen,
Tanuwaga, ꞌe sibai mate wa liba dudulai yo Yaubada ena fanuha, dudulai yai wa lau faꞌataen dodoga lisidi yai. Dodoga haisa edi nuwanuwatuhu hige u modeꞌedi, paꞌana hige gonowana u ata'atahi lau sai hesa ai lisina.
17 Lisina yai, em nuwanuwatuhu haga u falibamai? Loma edi Baꞌisa Sisa ai lisina takesi ꞌe tole ye ya otawa?
18 Yesu mate edi nuwanuwatuhu heyaheyayadi haꞌa ya sibai, yofede ya falibadi iyebom,
Umi tau lau bwalabwala! Sidohana bena ami fasai buluhigu? 19 Moni ami fapaisowa be takesi ami famaisa haga laꞌi au leyama be ya ita?
Yofede sa leyama lisina.
20 Ya fatiꞌoidi iyen,
Sai nenena yo hesana moni yai te?
21 Alinana sa bui, tiyen,
Loma edi Baꞌisa, Sisa.
Yofede, Yesu ya falibadi, iyen,
Yena doha, somo Baꞌisa Sisa enehena, mate au felen, na somo Yaubada ena, mate Yaubada au felen.
22 Liba ni sa atahiyen mate sa noꞌo. Yofede sa lau afulen, be sa lau nuꞌu hesa.
Obiyo Fuyo Fatiꞌona
Matiu 22:23-33
(Maleko 12:18-27; Luka 20:27-40)
23 Sadusi edi nuwatuhu mate dodoga sa peꞌi ibege ti mwahuli fuyo. Yofede lahaina eseꞌesegana yai sa laoma Yesu lisina, be sa fatiꞌoi. 24 Tiyen,
Tanuwaga, Mose ya libaen mate, yena taumoho hige natuna na ya peꞌi, hidana bena ena hwabu ya fai, be haba nanatuna mate sa famala tau peꞌi nanatuna.†22:24 Diusi edi laulau te, Luta Dedena 2:20 au ita: <<Paꞌana Bowasi mate hwayahwayasa hesa, gonowana bena Luta haba ya fai.>>(Diutelonomi 25:5; Luta 2:20)
25 Waihin hesa natu faligigi-luwaga. Ganahewadi yai, tau tuwaha ya nahi, be hige natuna, na ya peꞌi. Yofede hidadi hesa edi hwabu ya fai. 26 Inmoho, hige natuna. Laulauna gonogonowana fafafaihonana ya lau bee–, adi huhumau, mate edi hwabu sa fai, na hige nanatudi. 27 Ofiꞌofina waihin ya peꞌi.
28 Tau peꞌipeꞌi edi fuya obiyo fuyo lahaina yai, waihin ni haba sai lahuna? Paꞌana mahudoꞌidi haꞌa sa fai.
29 Alinadi Yesu ya bui, iyebom,
Emi nuwatuhu hige ti dudulai! Paꞌana Buka Tabuna yo Yaubada ena gigibwali hige au sibaidi. 30 Yena tau peꞌipeꞌi sa obiyo fuyo, iti haba doha galewa aneludi be ibege ti nahi. 31 Mwahuli fuyo pe'i yai libana Yaubada haꞌa ya falibamiu, nuwana hige au fatili?!
Iyen,
32 <<Yau mate Abelaham, Isako yo Iyakobo edi Yaubada.>>
In mate hige tau peꞌi edi Yaubada. Inmoho tau mwahumwahuli edi Yaubada. (Esedo 3:6)
33 Yofede, dodoga boludi sa atahiyen, na ena lau faꞌata, sa noꞌoen.
Laugagayo Laꞌilaꞌi Wananahana
Matiu 22:34-40
(Maleko 12:28-34; Luka 10:27)
34 Maihalana yai Yesu ya lau faꞌata sa atahi be Sadusi hige alinadi. Yofede Falesiya sa faꞌoigogo. 35 Ganahewadi yai, hidadi hesa, in laugagayo tau sibaina ya laoma be fatiꞌo yai te, bena Yesu ya lauꞌita, iyen.
36 Tanuwaga, laugagayo tausomo ya laꞌi wananaha?
37 Ena fatiꞌo Yesu ya bui iyen,
<<Em Yaubada bena wa gadosisiyen, ma nuwa ofifahim, yaluwam mahudoꞌina yo em nuwatuhu mahudoꞌina.>> (Diutelonomi 6:5; Loma 12:1)
38 Itete Laugagayo bwaꞌibwaꞌina yo laꞌilaꞌi wananaha: 39 Fafaluwagana doha ite:
<<Falem tau miya bena wa gadosisiyen gonogonowana doha um wa gadosisi fuyoim.>> (Lewitikusi 19:18; Diyemsi 2:8)
40 Mose ena laugagayo mahudoꞌina yo Peloweta edi lau faꞌata mate, laugagayo luwaga te ya laba gogonidi.
Keliso Mate Sai Natuna?
Matiu 22:41-46
41 Falesiya sa faꞌoigogo esega habahim, Yesu ya fatiꞌoidi, iyen,
42 <<Emi nuwatuhu mate, Fasinabo Dogana Keliso in sai? Yo in sai natuna?>>
Alinana sa bui tiyen,
In Deiwidi laulauwewena. (Matiu 1:1-16; Luka 3:23-38)
43 Ya falibadi iyen,
Sidohana be, Yaluwa Tabuna Deiwidi ya luhufi be ya kawa Guyauwen? Paꞌana iyen,
44 <<GUYAU ya libama egu Guyau lisina: iyen,
<Ai sibagu u taꞌai.
Ana sigana am waiyunu
E toledi ai ahem ubuna.>>>‡22:44 Lausoisoi te, tefa hesa - tefa hesa yai sa fatili boda. Au italau Matiu 22:44; Maleko 12:36; Luka 20:42-43; Paisowa 2:34-35; Hebelu 1:3) (Samsi 110:1)
45 Yena bena Deiwidi ya kawa guyauwen, sidohana be ya kawa natuwen?§22:45 <<Deiwidi Natuna>> aniyona mate, <<Keliso ana Ulutubu wananahana>> mate Deiwidi.
46 Lahaina yai, na ya lawen mate hige sai laꞌi Yesu ena fatiꞌo i bui, yo hige sai hesa i fatiꞌo bodai.
*22:4 22:4 Uliꞌulina sa lau hudoꞌi, tiyen, <<Bulumakau tatau, bulumakau tubutubudi yo bulumakau gubugubufwaudi.>> Na doha, sa ulidi.
†22:24 22:24 Diusi edi laulau te, Luta Dedena 2:20 au ita: <<Paꞌana Bowasi mate hwayahwayasa hesa, gonowana bena Luta haba ya fai.>>
‡22:44 22:44 Lausoisoi te, tefa hesa - tefa hesa yai sa fatili boda. Au italau Matiu 22:44; Maleko 12:36; Luka 20:42-43; Paisowa 2:34-35; Hebelu 1:3)
§22:45 22:45 <<Deiwidi Natuna>> aniyona mate, <<Keliso ana Ulutubu wananahana>> mate Deiwidi.