23
Yesu Laugagayo Tau Lau Faꞌataena yo Falesiya ya Liba Suꞌuidi
Matiu 23:1-12
(Maleko 12:38-39; Luka 11:43,46; 20:45-46)
1 Habahim Yesu ya libalau tau famuli watanina yo baiwa lisidi yai, iyen,
2 Laugagayo tau lau faꞌataena yo Falesiya mate iti Mose ena laugagayo tau libalibaena.*23:2 Uli'uli haisa tiyen <<Mose ena aba ta'ata'ai yai sa ta'ai,>> na aniyona mate, <<Iti mate Mose ena laugagayo tau libalibaena.>>
3 Lisina yai umi bena somo sa libaedi ami awaꞌabiyedi yo ami lau watanidi; inmoho, tabu edi abiꞌabi au lau watanidi, mata paꞌana mate somo sa lauguguyaꞌedi mate, hige ti famuli watanidi. 4 Dodoga mwahu sa feledi, be hige gonowana ti baheidi. Na iti hige somo ti ginaulidi be dodoga ti saguhidi haba laugagayo ti lau watanidi. 5 Ginauli mahudoꞌina sa ginauli bena sa noꞌonoꞌoꞌedi. Yo Uliꞌuli Tabudi lausoisoidi aba husaidi sa falaꞌidi, be nimadi yai yo debadi yai sa audi,†23:5 Bogesi kiukiu te, Alina Suau yai yo Alina Giliki yai hesadi mate <<pilateri.>> yo edi leli masalusaludi sa liꞌodi.‡23:5 Leli masamasaludi te mate edi fafaꞌilala. Sa ginauli doha, be haba Yaubada sa faꞌatitiyen. (Diutelonomi 6:8; Namba 15:37-41)
6 Ai mataꞌasi yo aba oigogo lumadi ganahewadi yai§23:6 Alina Suau yai, tiyen <<sunago.>> bena aba taꞌai loloho yai sa taꞌai. 7 Ai aba maketi nuꞌudi sa fanuha bena dodoga sa lautoꞌiyedi yo dodoga bena sa kawa tanuwagaꞌedi.*23:7 Alina Giliki yai tiyen, <<rabbi.>> 8 Umi tabu ti kawa tanuwagaꞌemiu, paꞌana umi boga esega, yo ami tanuwaga esega. 9 Yo tabu ai tanoꞌubu sai hesa au kawa tamaꞌen, paꞌana Tamamiu esega dumaduma galewa yai. 10 Tabu sai ti kawa tanuwagaꞌem, paꞌana ami tanuwaga, esega dumaduma Keliso.†23:10 Na aniyona mate <<Yaubada ena Fasinabo Dogana, Mesaiya.>> 11 Ganahewamiu yai sai ya laꞌi wananaha mate, emi tau lau fayofayo. 12 Na sai ya falaꞌi fuyoi, haba Yaubada ya fakiu, na sai ya fakiu fuyoi, haba Yaubada yo tole hitiꞌi.
Falesiya Yo Laugagayo Tau Lau Faꞌataina Yesu ya Kawa Bwalabwalaꞌedi
Matiu 23:13-28
(Maleko 12:40; Luka 11:39-42; 11:44; 11:52; 20:47)
13 Kapole, umi Laugagayo tau lau faꞌataena yo Falesiya! Umi tau lau bwalabwala! Dodoga edi Basileiya edaꞌedana ami gudu. Salumadi sa anpate bena sa luhu mate edi eda'eda ami fapilipili. Umi hinaga ibege au luhu.
14 Kapole, laugagayo tanuwagadi yo Falesiya, umi tau lau bwalabwala! Miya tupitupi haba ami fahoina! Paꞌana kaikaihwabu edi luma ginaulidi ami lau fayafaya gogoidi. Yo hinaga nuwamiu maitidi mate, emi lauꞌuꞌula ami falofadi. Lisina yai maisa mwahumwahuna haba Yaubada ya felemiu.‡23:14 Uliꞌuli haisa yai lausoisoi 14 sa tole, na uliꞌuli haisa yai, higeꞌe.
15 Kapole! Laugagayo tau lau faꞌatadi yo Falesiya, umi tau lau bwalabwala! Heyaheyaya haba ami fahoina! Paꞌana, fote yo gabogabo ami laufidi, be bena doga hesa ami nuwa liui, yena nuwana ami abi, be kamkamna laꞌilaꞌi Gehena yai ya fahoina, habahim umi.§23:15 Uliꞌuli haisa yai ti uli, <<Gehena natuna.>>
16 Tau ita wata dodogamiu matamiu sa tou, kapole, heyaya haba ami fahoina! Auwen,
<<Yena Dubu Tabuna hesana yai ami angwala, mate angwalana hige aniyona. Inmoho, yena sai Dubu Tabuna ana gole lisina yai ya angwala, mate angwala wananahana.>>
17 Umi yauyaule yo matamiu sa tou! Ginauli somo ya loholoho wananaha? Gole, ye Dubu Tabuna?! Dubu Tabuna sidohana be gole ya fatabu mate, paꞌana gole ni Dubu Tabuna ganahewana yai.
18 Ami liba hinaga, auwen,
<<Yena sai aba antalasam hesana yai ya angwala mate hige aniyona. Inmoho, yena ainauya somo aba antalasam hewana yai, na hesana yai ya angwala mate, angwala wananahana.>>
19 Tau matatoutou, tausomo ya laꞌi wananaha? Ainauya e aba antalasam? Ainauya! Paꞌana ainauya aba gabuna hewana yai ya otaꞌota, logena ainauyana ya fatabu.
20 Logena be, yena aba antalasam hesana yai doga ya angwala, aba antalasam yo ainauya mahudoꞌidi hewana yai ni lisidi yai ena angwala ya ginauli.
21 Yo sai Dubu Tabuna hesana yai ya angwala mate, Dubu Tabuna ganahewana tau miya Yaubadana hesana yai ya angwala hinaga. 22 Yo sai Galewa hesana yai ya angwala mate, Yaubada ena aba taꞌai yo hewana yai tau taꞌai ya angwalaedi.
23 Laugagayo tau lau faꞌataendi yo Falesiya, heyaheyaya laꞌilaꞌi haba ami fahoina, Umi tau lau bwalabwala! Emi ainauya mula panepanedi haisa: minti, anise, yo kumino, ami antole nagoꞌedi Yaubada enehena.*23:23 Ginauli hesa-hesa te, peidi 10 ganahewadi yai, peina esega haba Yaubada umi felen. Inmoho laugagayo laꞌilaꞌidi doha: dudulai, nuwatohatoha yo kawawananaha famuli watanidi mate, ami lau paleidi. Egoba, laugagayo fwaufwaudi yo beyabeyadi ami lau watanidi.
24 Umi tau ita wata matatoutoudi! Digudigu haba ami fagoi lisi, na kamela†23:24 Yosiyosi la'ila'idi palapa mate kamela, habahim bulumakau. haba ami dom!
25 Laugagayo tau lau faꞌataena yo Falesiya, heyaheyaya laꞌilaꞌi haba ami fahoina, umi tau lau bwalabwala! Kaputi yo disi ganamulidi moho ami kaisudi, na ganahewadi mate anduma yo nuwa lau wata sa mohafu. 26 Falesiya matatoutoudi! Bwaꞌibwaꞌina bena kaputi yo disi ganahewadi ami faꞌaꞌadi, haba ganamulidi hinaga sa aꞌa.
27 Kapole! Heyaheyaya laꞌilaꞌi haba Falesiya yo laugagayo tau lau faꞌataena ami fahoinadi, umi tau lau bwalabwala! Itaꞌitamiu doha boꞌusa poipoi kafudi, itaꞌitadi sa famata anꞌan. Inmoho, ganahewadi mate tau peꞌipeꞌi siyadadi yo ginauli bidabidadi haisa hinaga. 28 Gonogonowana doha, ganamulimiu ami fataumahatadi, dodoga lisidi yai bena haga umi ami dudulai. Inmoho, ganahewamiu mate bidahe ya mohafu.
Falesiya yo Laugagayo Tau Lau Faꞌataena haba sa Ankamkamna
Matiu 23:29-36
(Luka 11:47-51)
29 Kapole, Falesiya yo laugagayo tau lau faꞌataina, umi tau lau bwalabwala, haba ami ankamkamna! Peloweta boꞌusadi ami ginauli bodaidi yo tau dudulai boꞌusadi ami fapasadi.
30 Habahim, auwen,
<<Ibe afa wahamai edi fuya yai ai amainiya, mate ibege ai segeyahi be peloweta ai antalaidi.>>
31 Logena, ami fataumahata fuyo'imiu, mate salumadi peloweta tau wunuidi laulauwewedi umi. 32 Doha i laulaui, be–, afa wahamiu somo sa fatubu mate au faꞌofi.
33 Umi weso yo weso nanatuna! Gehena oyagi alaꞌalana haba sidohana emi gebagebaina?
34 Debana yai peloweta haisa, dodoga sonosonogadi yo tau lau faꞌata E duidima. Haisa haba ami wunuidi be ami tutu fapatudi; na haisa haba emi aba oigogo lumadi yai ami talaidi, yo ami weꞌaidi sa lau, duhu laꞌi hesa, na doha. 35 Logena, laulau loloho dodogadi ꞌwasinadi tanoꞌubu yai ami fatabuliwadi maisadi mate giludi ami baheidi. Dudulai dogana Abela ꞌwasinana, na ya laoma be Belakaiya natuna Sekalaiya ꞌwasinana, in mate Dubu Tabuna yai yo aba antalasam atiꞌatipudi yai haꞌa ami wunui.
36 Matamiu yai E liba dudulai mate, gilu mahudoꞌina te haba hiti itete sa bahei.
Yesu ena Gadosisi Yelusalem Lisina yai
Matiu 23:37-39
(Luka 13:34-35)
37 Isi Yelusalem! Yelusalem isi! Um logem wasa tau lawenidi wa wunuidi yo salumadi Yaubada ya duidiwa lisim mate wa lau umeꞌehuidi. Fuya ouꞌouli egu fanuha bena nanatum E dalidali gogo, doha kamkam tinabawana nanatuna ya hoba tawanidi, inmoho hige u fanuha! 38 Em Dubu Tabuna afaꞌafana hola u ita. 39 E falibam, Hige gonowana u ita bodaigu ana sigana wa liba, uwen,
Sai, Yaubada hesana yai ya laoma,
Yaubada, bena ya faloholoho!‡23:39 Au italau, Matiu 21:9 hinaga.(Samsi 118:26)
*23:2 23:2 Uli'uli haisa tiyen <<Mose ena aba ta'ata'ai yai sa ta'ai,>> na aniyona mate, <<Iti mate Mose ena laugagayo tau libalibaena.>>
†23:5 23:5 Bogesi kiukiu te, Alina Suau yai yo Alina Giliki yai hesadi mate <<pilateri.>>
‡23:5 23:5 Leli masamasaludi te mate edi fafaꞌilala. Sa ginauli doha, be haba Yaubada sa faꞌatitiyen.
§23:6 23:6 Alina Suau yai, tiyen <<sunago.>>
*23:7 23:7 Alina Giliki yai tiyen, <<rabbi.>>
†23:10 23:10 Na aniyona mate <<Yaubada ena Fasinabo Dogana, Mesaiya.>>
‡23:14 23:14 Uliꞌuli haisa yai lausoisoi 14 sa tole, na uliꞌuli haisa yai, higeꞌe.
§23:15 23:15 Uliꞌuli haisa yai ti uli, <<Gehena natuna.>>
*23:23 23:23 Ginauli hesa-hesa te, peidi 10 ganahewadi yai, peina esega haba Yaubada umi felen.
†23:24 23:24 Yosiyosi la'ila'idi palapa mate kamela, habahim bulumakau.
‡23:39 23:39 Au italau, Matiu 21:9 hinaga.