28
Yesu ya Mwahuli Fuyo
Matiu 28:1-10
(Maleko 16:1-10; Luka 24:1-12; Diyon 20:1-10)
1 Sabati mulina yai, wiki lahai bwaꞌibwaꞌina yai, ya ifi tatatali, Maliya Magadala yo ena falihesa sa lau boꞌusa sa kepai. 2 Maꞌesega na, mwanuꞌunuꞌu laꞌilaꞌi nuꞌu ya fadihodiho, paꞌana Yaubada ena anelu galewa yai ya lidima, be ya lau boꞌusa umeꞌehuna ya fatapipili, na hewana yai ya taꞌai. 3 Nenena ya namanamali, na ena leli sa kafu doha goula. 4 Tau gati sa ꞌwasabuwen, be sa tabutabubu. Hige ti mwahimwahiu. Sa famala doha tau peꞌipeꞌi.
5 Anelu ya libalau wawahin luwaga lisidi iyen,
Tabu au ꞌwasabu! E sibai mate, Yesu sa wunui, ami yoꞌoyoꞌoi. 6 In hige amaiteꞌi. Haꞌa ya mwahuli fuyo, gonogonowana doha haꞌa ya libaen. Ena aba eno hola au laoma, au ita. 7 Haba feula ami fuyo, be ana hewali edi, ami liba, auwen,
<<In haꞌa ya mwahuli fuyo, be ya bwaꞌi ya lau Galili. Ainiya haba ami ita. Logena, E falibamiu te.>>
8 Yofede, wawahin wa, boꞌusa sa lau afulen, na sa fabelele sa lau. Sa ꞌwasabu, inmoho, sa kwade. Sa lautafo sa lau, be tau famuli watanina haba sa falibadi.
9 Hola sa laulau tafo, na maꞌesega, Yesu ya mwaito afulen, nuwanuwadi yai, na iyen,
Yauwedo.
Sa laoma nuwanuwana yai. Ahena yai sa abilau, na sa fadebasae.
10 Habahim Yesu ya falibadi, iyen,
Tabu au ꞌwasabu. Au lau, be afa haidagu au falibadi be ti lau Galili. Ainiya haba sa itagu.
Tau Gati Alinadi
Matiu 28:11-15
11 Wawahin wa hola edaꞌeda yai ma laudi, na gati haisa sa lau Yelusalem taonna yai, be ginauli mahudoꞌidi sa tubu mate, sa wasa duwaiyedi, tau antalasam babaꞌisadi yo babada lisidi yai. 12 Tau antalasam babaꞌisadi sa faꞌoigogoma maidadi babada, be sa oiliba. Habahim, hiyala tataudi moni laꞌilaꞌi sa feledi, 13 na sa falibadi, tiyen,
Haba ami liba, auwen,
<<Ai ꞌe eno, na iꞌipana ana hewali sa lau samosamonene, be silanina sa angafuhi.>>
14 Yena wasa te, Gawana ya atahiyen, haba emi ꞌe oilele. Tabu gilu au bahei.
15 Yofede, tau hiyala moni wa sa abi, na somo sa fatalahadi mate, sa lau watan. Wasa te mate, Diusi dodogadi mahudoꞌidi sa fatadada ya laoma bee–, ahoꞌite hinaga.
Yesu ya Taumahata ana Hewali Lisidi yai
Matiu 28:16-20
(Maleko 16:14-18; Luka 24:36-49; Diyon 20:19-23; Paisowa 1:6-8)
16 Tau famuli watanina 11 sa lau Galili tuꞌana hesa yai, somo yai Yesu ya fatalahadi nuꞌuna bena ainiya sa failobahi, sa lau niya. 17 Amainiya Yesu sa ita, yofede, sa fadebasae. Inmoho, haisa mate sa nuwa luwaluwaga.
18 Yesu ya sigilau sadaidi yai, na ya falibadi iyen,
Gigibwali mahudoꞌidi galewa yai yo tanoꞌubu yai Yaubada haꞌa ya felegu. 19 Lisina yai au lau nuꞌu ouꞌouli yai be dodoga au faꞌatadi yo au fababasitodi, Tau Tamatama, Natuna yo Yaluwa Tabuna hesadi yai, be haba sa famala tau famuli watanigu.
20 Na haba ami fatalahadi be ginauli mahudoꞌidi E libaedi sa lau watanidi. Haba fuya ouꞌouli Yau maꞌemiu, ya lau ee–, tanoꞌubu ena fuya ofi yai.