2
E tattzꞌarsiaj tuaꞌ e Ana
1 Entonces e Ana cay ucꞌajti taca e Dios y che:
“Niwinquiraret Dios, bꞌutꞌur niwalma taca e tzayer,
cocha net ixin awajqꞌuen niqꞌuecꞌosiaj.
Pues era uyubꞌien ixto yaꞌ inchecsu tut tin e aqꞌuijnobꞌ uwiren
que net cay atacren,
y tamar era war intzay meyra cocha net acorpesen tama e sian sactzener lo que chena nipater.
2 Y mamajchi xeꞌ erach cocha net, Niwinquiraret Dios,
y mamajchi xeꞌ acojcsan bꞌan cocha net,
y otronteꞌ cocha net matucꞌa.
3 Y tamar era tunor tin e machi ucꞌani Cadiosir uyactic tuaꞌ utꞌabꞌse ubꞌobꞌ,
y uyactic tuaꞌ utattzꞌi ubꞌobꞌ ubꞌan,
cocha Cawinquirar jax e Dios xeꞌ unata tunor,
y jax jaxir xeꞌ ubꞌijnu uwira tunor lo que uchiobꞌ e winicobꞌ y xeꞌ utoyi tamar.
4 Y jax jaxir xeꞌ ixin ucꞌocchi uchꞌantꞌin e sian ajtzꞌojyirobꞌ xeꞌ ayan meyra ucꞌotorer,
y xeꞌ ixin uyajcꞌu uqꞌuecꞌojsiaj tin e injayjayobꞌ.
5 Pues tin e ayan ani meyra tucꞌa tuaꞌ ucꞌuxiobꞌ, war usicbꞌobꞌ tucꞌa patnar tuaꞌ uchiobꞌ tuaꞌ uyubꞌi awiobꞌ,
y tin e war ani aꞌytzꞌobꞌ machi ixto war aꞌytzꞌobꞌ coner.
Y e ixic xeꞌ machi ani oꞌbꞌna achꞌijrtesian,
ayan siete umaxtac coner,
y tin e ayan ani meyra umaxtac,
coner war oyqꞌui umen que cꞌapa chamay tunor umaxtac.
6 Pues Cawinquirar Dios jax xeꞌ ulocse e cuxtar y jax xeꞌ uyajcꞌu ubꞌan.
Y jax jaxir xeꞌ uche tuaꞌ amujca inteꞌ tama umujr,
y jax ubꞌan xeꞌ uche atzꞌacpa otronteꞌ.
7 Y Cawinquirar Dios uche tuaꞌ aquetpa ticajam tin e matucꞌa ayan tacar, y ayan tin e uche tuaꞌ aquetpa ajtumin,
y ayan tin e uche tuaꞌ aquetpa manxujresbꞌir, y ayan tin e uche tuaꞌ aquetpa tattzbꞌir.
8 Y Cawinquirar Dios utacre tuaꞌ achpa tin e matucꞌa ayan tacar tuaꞌ machi aturuan más tut e rum,
y utacre tuaꞌ achpa ubꞌan tin e tzajtaca ut xeꞌ usajca ani macuir e sojc lo que tuaꞌ ucꞌuxi,
y uyajcꞌu tuaꞌ aturuan tujam e nuquir winicobꞌ xeꞌ ayan meyra ucꞌotorerobꞌ,
y uche tuaꞌ aturuan tujor inteꞌ mesa tiaꞌ erer atajttzꞌa meyra.
Pues Cawinquirar Dios jax xeꞌ uche tunor ucajyesnibꞌir or e rum,
y xeꞌ uturbꞌa or rum tujor tuaꞌ aqꞌuecꞌo.
9 Y jaxir ucojco tiaꞌ axana tin e acꞌubꞌseyanobꞌ tut,
pero tin e machi oꞌbꞌianobꞌ tut, axin achamayobꞌ tama e incsibꞌaner,
porque mamajchi erer aqꞌuecꞌo axana tamar taca uqꞌuecꞌojsiaj xeꞌ tuach.
10 Y Cawinquirar Dios axin utijres tunor tin e aqꞌuijna uwira,
y tama ut e qꞌuin axin uyebꞌta watar e quiricnar upaterobꞌ.
Y Cawinquirar Dios axin ubꞌijnu uwira lo que uchiobꞌ tunor e gente tara tor e rum jay bueno o majax bueno.
Y axin uqꞌuecꞌojse e rey xeꞌ sicbꞌabꞌir umener,
y uche anojran ucꞌotorer,” che e Ana.
11 Entonces e Elcaná sutpa ixin taca ufamilia esto tuyotot xeꞌ aquetpa tama e chinam Ramá, pero e chuchu sitz quetpa taca e sacerdote Elí tuaꞌ uche upatnar Cawinquirar Dios bꞌan cocha tuaꞌ arobꞌna uche umen e Elí.
E mabꞌambꞌanir lo que cay uchiobꞌ uyunenobꞌ e Elí
12 Pues entonces e sacerdote Elí ayan chateꞌ uyunenobꞌ xeꞌ ajmabꞌambꞌanirobꞌ, y machi oꞌbꞌianobꞌ tut Cawinquirar Dios, 13 y nien machi ubꞌijnuobꞌ tuaꞌ utacriobꞌ e gente bꞌan ani cocha aquetpa tuaꞌ uche inteꞌ sacerdote. Pues lo que cay uchiobꞌ inyajr inyajr conda ayan chi xeꞌ war uchamse incojt arac tut Cawinquirar Dios, jaxirobꞌ uyebꞌtobꞌ axin incojt uman taca inteꞌ nuxi tenedor tama ucꞌabꞌ, y conda warto atacꞌa e wer 14 e man uyose e tenedor tama e bꞌejt tiaꞌ war oꞌjmay e wer, y tunor lo que ulocse taca e tenedor uqꞌueche axin tuaꞌ uyajcꞌu uyunenobꞌ e Elí. Y bꞌan uchiobꞌ taca tunor e gente tuaꞌ e Israel xeꞌ acꞌotoyobꞌ tama e chinam Siló tuaꞌ uyujtzꞌiobꞌ ut Cawinquirar Dios. 15 Y bꞌan cay uchiobꞌ ubꞌan conda ayan tin e cꞌani uputa uchꞌichmar inteꞌ arac tujor e altar, acꞌotoy incojt man tuaꞌ uyunenobꞌ e Elí y uyare tin e war uchamse e arac y che: “Ajcꞌunen cora wer tuaꞌ impojpi inwajcꞌu e sacerdote, cocha jaxir machi ucꞌani e wer xeꞌ chabꞌirix, sino que ucꞌani tzijtzito,” che e man xeꞌ ebꞌtana ixin umen uyunenobꞌ e Elí. 16 Y jay tin e war uchamse y uputa e arac acay oꞌjron y che: “Machi. Bꞌajxan ucꞌani tuaꞌ caputa uchꞌichmar e arac, y nacpat era erer achꞌami lo que acꞌani”, xeꞌ che ani tin e war uputa e arac. Entonces axin oꞌjron e man cocha era y che: “Machi. Ucꞌani tuaꞌ awajqꞌuen eꞌrix. Y jay machi cꞌani awajqꞌuen, axin inquerejbꞌa alocꞌoy lo que incꞌani tama acꞌabꞌ,” xeꞌ che ani e man era. 17 Y bꞌan cocha era uyunenobꞌ e Elí cay uchiobꞌ meyra mabꞌambꞌanir tut Cawinquirar Dios, cocha ubꞌijnuobꞌ que matucꞌa ucꞌampibꞌir que apurutna inteꞌ arac tut Cawinquirar Dios.
18 Pero tama e tiempo era yaꞌ turu e Samuel tama uyotot Cawinquirar Dios war apatna, y motor que jaxir jax inteꞌ chuchu sitz, pero ixin ubꞌujcse ubꞌa bꞌan cocha inteꞌ sacerdote taca inteꞌ chaleco xeꞌ chembꞌir taca e bꞌujc xeꞌ meyra atujri. 19 Y tama inteꞌ inteꞌ año, conda acꞌotoy utuꞌ e Samuel taca unoxibꞌ esto tuyotot Cawinquirar Dios tama ucꞌapesnibꞌir e año tuaꞌ uchamse inteꞌ arac, uqꞌueche axin inteꞌ chuchu bata xeꞌ chembꞌir umener. 20 Entonces conda merato alocꞌoyobꞌ tuaꞌ asutpa axiobꞌ esto tuyotot otronyajr, yopa e sacerdote Elí tut e Elcaná tuaꞌ uchojbꞌes ut taca uwixcar Ana y che: “Que Cawinquirar Dios uyajqꞌuiquet más oynenobꞌ taca awixcar era tuaꞌ aquetpobꞌ uyeror ut e Samuel xeꞌ ajcꞌuna umen awixcar tuaꞌ apatna tama uyotot Cawinquirar Dios,” che e Elí. 21 Y entonces Cawinquirar Dios uchojbꞌes ut e Ana tuaꞌ uyubꞌi achꞌijrtesian otronyajr, y bꞌan cocha era ixin ucuxi uxteꞌ tejromtac y chateꞌ ijchꞌoctac. Pero e Samuel warto aꞌchꞌi tiaꞌ war apatna tama uyotot Cawinquirar Dios.
22 Pues e Elí onian winiquix conda cꞌotoy unata tama e mabꞌambꞌanir lo que war uchiobꞌ uyunenobꞌ taca tin e tuobꞌ e Israel. Y cꞌotoy unata ubꞌan que war achꞌanobꞌ taca e ixictac xeꞌ war apatnobꞌ tama uyocher uyotot Cawinquirar Dios. 23 Y tamar era e Elí cay ojron tacarobꞌ y che: “Pues tunor e gente war uyarenobꞌ lo que war iche xeꞌ mabꞌambꞌan. ¿Tucꞌa tuaꞌ que war iche cocha era? 24 Entonces niunenox, machi ixto tuaꞌ iche cocha era. Pues war oꞌjronobꞌ e gente ipater que war iche meyra mabꞌambꞌanir. 25 Pues jay ayan chi axin uche e mabꞌambꞌanir upater otronteꞌ, erer atacarna umen Cawinquirar Dios tama e juicio tuaꞌ machi acꞌaxi tujor tamar lo que uche. Pero jay inteꞌ axin uche e mabꞌambꞌanir upater Cawinquirar Dios, ¿chi umen tuaꞌ atacarna tuaꞌ machi acꞌaxi e jatzꞌuar tujor? Mamajchi,” che e Elí. Pero uyunenobꞌ machi obꞌianobꞌ tut lo que war arobꞌnobꞌ umen utata, cocha Cawinquirar Dios ubꞌijnuix tuaꞌ ulocse ucuxtarobꞌ.
26 Pero e chꞌom sitz Samuel warto aꞌchꞌi axin, y war atzay eꞌrna umen Cawinquirar Dios y umen e gente tamar lo que war uche.
27 Pues tama e tiempo era cꞌotoy inteꞌ profeta tuaꞌ e Dios xeꞌ oꞌjron taca e Elí y che: “Pues Cawinquirar Dios cay uchecsu inteꞌ ojroner cocha era taniut y che: ‘Conda itata viejobꞌirobꞌ quetpa manobꞌ tuaꞌ e rey tama e lugar Egipto, nen cay inchectes nibꞌa tut e Aarón 28 xeꞌ sicbꞌabꞌir nimener tujam tunor tin e tuobꞌ uchꞌajnarir e Israel tuaꞌ aquetpa inteꞌ sacerdote tanibꞌa. Y quetpa tuaꞌ uputa e aracꞌobꞌ tujor e altar tanibꞌa, y tuaꞌ uputa e ujtzꞌubꞌ. Y quetpa tuaꞌ ulapi e chaleco conda war uche nipatnar. Y aquetpa tuaꞌ uchꞌami imbꞌijc uwerir tunor e aracꞌobꞌ lo que war ucꞌotesobꞌ tin e tuobꞌ e Israel tuaꞌ apurutna taniut. 29 Y tamar era, ¿tucꞌa tuaꞌ que war ixejbꞌe ut e aracꞌobꞌ xeꞌ war achamesnobꞌ taniut? Y ¿tucꞌa tuaꞌ que war ixejbꞌe ut lo que war ajcꞌuna umen e gente? Pues war atattzꞌi más amaxtac que nen. Y inwira que war ixnojran taca oynenobꞌ umen que war icꞌuxi e aracꞌobꞌ xeꞌ más galan xeꞌ war ataresnobꞌ umen tin e tuobꞌ e Israel,’ che e Dios. 30 Pues Cawinquirar Dios xeꞌ jax Udiosir tin e tuobꞌ e Israel cay uyare atata viejobꞌir Aarón que tunor uchꞌajnarir tuaꞌ aquetpobꞌ sacerdote tanibꞌa iraj iraj, y tamar era bꞌanet taca oynenobꞌ esto coner. Pero ayan lo que Cawinquirar Dios cꞌani uyaret era: ‘Pues machi ixto tuaꞌ inwacta atajttzꞌa tin e machi utattzꞌienobꞌ, y tin e axin uxejbꞌiobꞌ niut cꞌani inche tuaꞌ asubꞌajresnobꞌ. 31 Pero watarix e día conda cꞌani insati tunor afamilia tuaꞌ machi ixto ixquetpa sacerdote tanibꞌa. Y cꞌani inwaret que tunor afamilia cꞌani achamayobꞌ conda chꞌom maxtacobꞌto, y que mamajchi tama afamilia tuaꞌ acꞌotoy aquetpa onian gente. 32 Y net tuaꞌ acꞌuxnaqꞌui awira e sian chojbꞌesiaj lo que cꞌani inwebꞌta watar tujor e inmojr tin e tuobꞌ e Israel, pero mamajchi tama tunor afamilia tuaꞌ acꞌotoy aquetpobꞌ onian gente. 33 Pero cꞌani inwacta tuaꞌ aquetpa tuyejtzꞌer e altar incojt sitzbꞌir tabꞌa tuaꞌ uwira lo que war uchiobꞌ e sacerdotiobꞌ, y jaxir tuaꞌ acꞌuxnaqꞌui uwira lo que war uchiobꞌ este que axin atzꞌintzꞌa tama uyalma, pero tunor e inmojr tin e turobꞌ tama achꞌajnarir cꞌani achamesnobꞌ. 34 Y tuaꞌ anata que erach tunor lo que war inwaret era, cꞌani inche tuaꞌ achamayobꞌ e chateꞌ oynenobꞌ xeꞌ jax e Hofní y e Finees tama inteꞌ taca día. 35 Y de allí cꞌani inturbꞌa intex sacerdote xeꞌ erach y xeꞌ axin oꞌbꞌian taniut y xeꞌ axin uche bꞌan taca cocha unsre tama niwalma. Y cꞌani inche apatnobꞌ uchꞌajnarir meyra año, y cꞌani aquetpa sacerdotiobꞌ tuaꞌ utacreobꞌ nirey xeꞌ sicbꞌabꞌir nimener. 36 Y tin tin tama achꞌajnarir tabꞌa xeꞌ aquetpobꞌto axin watobꞌ tut tin e acꞌotoy aquetpa sacerdote tuaꞌ acotuanobꞌ tut tuaꞌ ucꞌajti imbꞌijc e tumin o ingojr pan, y cꞌani ucꞌajtiobꞌ tuaꞌ ajcꞌunobꞌ tuqꞌuic tuqꞌuic patnar tujam e sacerdotiobꞌ tuaꞌ erer utajwiobꞌ tucꞌa tuaꞌ ucꞌuxiobꞌ’. Bꞌan che Cawinquirar Dios”, che e profeta.