1 Pues entonces e Samuel xeꞌ chꞌom sitzto war apatna tama uyotot Cawinquirar Dios tuaꞌ utacre e sacerdote Elí. Pues tama e tiempo era matucꞌa meyra tin e war uchꞌami inteꞌ ojroner tuaꞌ Cawinquirar Dios, y matucꞌa meyra tin e war uwira inteꞌ mayjut.

2 Y tama e tiempo era warix acay asatpa unacꞌut e Elí y machix uyubꞌi eꞌron. Pues numuy tunor era tama inteꞌ acbꞌar conda e Elí warix awayan tama ucuarto 3 y e Samuel war awayan tama intex cuarto tama uyotot Cawinquirar Dios tiaꞌ war e cofre tiaꞌ aquetpa e pacto tuaꞌ e Dios. Y e nuxi uwabꞌnibꞌ cꞌajc xeꞌ awawan tor e rum quetpato tzꞌajbꞌesbꞌir cocha merato asacojpa. 4 Entonces Cawinquirar Dios upejca e Samuel y che:

—¡Samuel! che Cawinquirar Dios. Y ojron e Samuel y che:

—Tara turen, che Samuel. 5 Y entonces ajni ixin e Samuel esto tiaꞌ chꞌar e Elí, y che cocha era:

—Tara turen. ¿Tucꞌa tuaꞌ war apejquen? che e Samuel. Y che e Elí:

—Nen machi impejquet. Sutpen quiqui chꞌaren, che e Elí.

Y entonces e Samuel sutpa ixin tuaꞌ awayan. 6 Pero sutpa pejcna otronyajr umen Cawinquirar Dios y che:

—Samuel, che Cawinquirar Dios.

Entonces achpa e Samuel otronyajr y ixin esto tiaꞌ chꞌar e Elí y che:

—Tara turen. ¿Tucꞌa tuaꞌ war apejquen? che e Samuel. Y che e Elí:

—Nen machi impejquet, sitz. Sutpen quiqui chꞌaren, che e Elí.

7 Pues tama e tiempo era e Samuel merato acꞌotoy unata jay erer apejcna umen Cawinquirar Dios. 8 Pero Cawinquirar Dios sutpa upejca e Samuel tama uxyajr. Entonces jaxir achpa y ixin uyare e Elí y che:

—Tara turen. ¿Tucꞌa tuaꞌ war apejquen? che e Samuel.

Entonces e Elí cꞌotoy unata que jax Cawinquirar Dios xeꞌ war upejca e chꞌom sitz, 9 y tamar era uyare cocha era y che:

—Quiqui chꞌaren otronyajr. Y jay Cawinquirar Dios asutpa upejquet otronyajr, aren cocha era y che: “Ojronen. Nen war umbꞌi anuc.” Bꞌan tuaꞌ aware, che e Elí.

Entonces e Samuel sutpa ixin tuaꞌ achꞌan awayan. 10 Y entonces Cawinquirar Dios cꞌotoy otronyajr y ojron bꞌan cocha cay uche bꞌajxan y che:

—Samuel, Samuel, che Cawinquirar Dios.

Entonces ojron e Samuel y che:

—Ojronen. Nen war umbꞌi anuc, che e Samuel.

11 Entonces Cawinquirar Dios ojron y che:

—Ayan lo que cꞌani inche anumuy tama e lugar Israel, y tunor tin e axin uyubꞌiobꞌ e ojroner era axin abꞌactobꞌ meyra. 12 Pues tama inteꞌ taca día san tuaꞌ inwebꞌta watar inteꞌ nuxi jatzꞌuar tujor ufamilia e Elí, bꞌan taca cocha war inwaret era. 13 Pues ayan inyajr conda cay inchecsu tut jaxir que cꞌani inwebꞌta watar inteꞌ nuxi jatzꞌuar tujor ufamilia que machi tuaꞌ acꞌapa umen que uyunenobꞌ war uxejbꞌiobꞌ niut, y motor que jaxir warix unata, pero machi cay ucꞌaye uyunenobꞌ tama tunor era. 14 Y tamar era cay inware que ma tiaꞌ tuaꞌ anajpesna nimener e nuxi mabꞌambꞌanir lo que cay uchiobꞌ e Elí taca uyunenobꞌ, y que ma tiaꞌ tuaꞌ uyubꞌi asajta umabꞌambꞌanirobꞌ motor que axin uchamsiobꞌ meyra aracꞌobꞌ taniut y motor que axin utaresobꞌ tuqꞌuic tuqꞌuic ofrenda taniut, che Cawinquirar Dios.

15 Entonces e Samuel sutpa chꞌan otronyajr tuaꞌ awayan este que sacojpa, y de allí ixin upasi e puerta tama uyotot Cawinquirar Dios bꞌan cocha uche deporsi. Pero jaxir war abꞌacta tuaꞌ uchecsu tut e Elí lo que arobꞌna umen e Dios tama umayjut. 16 Pero conda e Samuel eꞌrna umen e Elí, jaxir upejca cocha era y che:

—Samuel xeꞌ bꞌanet cocha niunenet, che e Elí. Y che e Samuel:

—Tara turen, che e Samuel.

17 Entonces e Elí uyubꞌi tuaꞌ e Samuel y che:

—¿Tucꞌa cay uyaret Cawinquirar Dios acbꞌar? Pues machi tuaꞌ amuqui taniut lo que uyaret. Que uwatzꞌiquet Cawinquirar Dios jay ayan lo que iꞌxin amuqui taniut, che e Elí.

18 Entonces e Samuel uchecsu tunor lo que arobꞌna umen Cawinquirar Dios, y matucꞌa umuqui tut e Elí. Y entonces ojron e Elí y che:

—¡Jaxir jax Cawinquirar Dios! Que chempac bꞌan taca cocha ucꞌani jaxir, che e Elí.

19 Pues entonces cayto chꞌi e Samuel, y Cawinquirar Dios turu tacar, y inteꞌ inteꞌ ojroner lo que uchecsu e Samuel cꞌapa chempa. 20 Y tamar era tunor tin e turobꞌ tama e lugar e Israel, desde e lugar Dan tama e norte este tin e turobꞌ tama e lugar Beerseba tama e sur, cꞌotoy unatobꞌ que e Samuel jax inteꞌ profeta tuaꞌ Cawinquirar Dios. 21 Y Cawinquirar Dios cay uchectes ubꞌa tama e lugar Siló, y yaꞌ yajaꞌ chectesna meyra ojroner tut e Samuel.