1 Y e ojroner lo que arobꞌna e Samuel umen Cawinquirar Dios cꞌotoy checsuna tut tunor tin e tuobꞌ e Israel.

Pues entonces tama e día era tin e ajtzꞌojyirobꞌ xeꞌ tuobꞌ uchꞌajnarir e Israel locꞌoyobꞌ tuaꞌ uchiobꞌ e tzꞌojyir taca tin e ajtzꞌojyirobꞌ xeꞌ tuobꞌ uchꞌajnarir e Filisti. Y tin e tuobꞌ e Israel cꞌotoy turuanobꞌ tama e lugar Eben-ézer. Y tin e tuobꞌ uchꞌajnarir e Filisti cꞌotoy turuanobꞌ tama e lugar Afec xeꞌ majax innajt tut e lugar Eben-ézer. 2 Pues tin e ajtzꞌojyirobꞌ xeꞌ tuobꞌ uchꞌajnarir e Filisti cay uwechꞌe ubꞌobꞌ tuaꞌ uchiobꞌ e tzꞌojyir taca tin e ajtzꞌojyirobꞌ xeꞌ tuobꞌ e Israel, y uchamsiobꞌ 4,000 ajtzꞌojyirobꞌ xeꞌ tuobꞌ e Israel. 3 Y conda warix amaxian e ajtzꞌojyirobꞌ tuaꞌ e Israel sutpa ixiobꞌ esto tiaꞌ quetpobꞌ e inmojr ajtzꞌojyirobꞌ. Y entonces tin e nuquir winicobꞌ tuaꞌ e Israel ojronobꞌ cocha era y chenobꞌ: “¿Tucꞌa canic tuaꞌ que Cawinquirar Dios uyacta chꞌancabꞌesnon umen tin e ajtzꞌojyirobꞌ xeꞌ tuobꞌ uchꞌajnarir e Filisti? Incuic esto tama e chinam Siló tuaꞌ catares e cofre tiaꞌ aquetpa e pacto tuaꞌ Cawinquirar Dios. Porque jay bꞌan cache y caqꞌueche axin ticajam conda war cache e tzꞌojyir, jax tuaꞌ ucorpeson,” chenobꞌ e nuquir winicobꞌ tuaꞌ e Israel.

4 Entonces uyebꞌta ixiobꞌ cora winicobꞌ esto tama e chinam Siló tuaꞌ uqꞌueche watar e cofre tiaꞌ aquetpa pacto tuaꞌ Cawinquirar Dios xeꞌ ayan meyra ucꞌotorer. Y tujor e cofre era ayan inteꞌ turtar tujam chateꞌ pajrbꞌir teꞌ xeꞌ bꞌan uwirnarobꞌ cocha chacojt winicobꞌ xeꞌ ayan uwichꞌobꞌ xeꞌ arobꞌnobꞌ Querubin. Pues tama e día era quetpobꞌ sacerdote e Hofní y e Finees xeꞌ uyunenobꞌ e Elí, y tariobꞌ tuaꞌ ucojcobꞌ e cofre tiaꞌ aquetpa e pacto. 5 Y conda e cofre tiaꞌ aquetpa e pacto tuaꞌ Cawinquirar Dios cꞌotesna tama e lugar tiaꞌ quetpobꞌ e inmojr ajtzꞌojyirobꞌ xeꞌ tuobꞌ e Israel, tunorobꞌ tzayobꞌ meyra y cay aruobꞌ taca inteꞌ nuxi nuc este que chincha tunor or e rum tiaꞌ turobꞌ.

6 Pero conda tin e ajtzꞌojyirobꞌ xeꞌ tuobꞌ uchꞌajnarir e Filisti uyubꞌiobꞌ e sian aruar era, ojronobꞌ y chenobꞌ: “¿Tucꞌa canic tuaꞌ que war coybꞌi e nuxi aruar era tuobꞌ uchꞌajnarir e Héber* E winic xeꞌ ucꞌabꞌa Héber turuan tama e onian tiempo y jax xeꞌ ucajyes tunor uchꞌajnarir e Israel. Y tamar era tin e tuobꞌ e Israel arobꞌnobꞌ que hebreos esto coner. Iranic e Génesis 11:14 tuaꞌ iwira tiaꞌ cuxpa e Héber.?” chenobꞌ e ajtzꞌojyirobꞌ era. Pero conda cꞌotoy unatobꞌ que cꞌotesna e cofre tiaꞌ aquetpa e pacto tuaꞌ Cawinquirar Dios esto tama e lugar era, 7 bꞌactobꞌ meyra y chenobꞌ: “Cꞌotoy udiosobꞌ tin e tuobꞌ e Israel. ¡Tzajtaca coit non! Pues ma tiaꞌ canumse cabꞌa cocha era tama inteꞌ tzꞌojyir. 8 ¿Chi tuaꞌ ucorpeson tuaꞌ machi cacꞌaxi tama ucꞌabꞌ udiosobꞌ e Israel xeꞌ ayan meyra ucꞌotorer? Pues coybꞌi que jax udiosobꞌ era xeꞌ cꞌapa uchamsiobꞌ meyra gente tama e lugar Egipto taca tuqꞌuic tuqꞌuic jatzꞌuar. 9 Y tamar era costesic cabꞌa tuaꞌ cache e tzꞌojyir y machi tuaꞌ cabꞌacta xeꞌ tuon uchꞌajnarir e Filisti. Cachic e tzꞌojyir taca meyra qꞌuijnar tuaꞌ machi cacucurna umenerobꞌ este que caquetpa ani man tuobꞌ uchꞌajnarir e Héber, bꞌan ani cocha acay aquetpobꞌ ticabꞌa,” chenobꞌ tin e tuobꞌ uchꞌajnarir e Filisti.

10 Y entonces tin e tuobꞌ uchꞌajnarir e Filisti ixin uchiobꞌ e tzꞌojyir upater tin e tuobꞌ uchꞌajnarir e Israel y ucucruobꞌ, y uchamsiobꞌ meyra sian ajtzꞌojyirobꞌ xeꞌ tuobꞌ e Israel, 30,000 tama tunor. Y tin tin xeꞌ quetpobꞌto bꞌixir locꞌoy ajniobꞌ tuaꞌ axiobꞌ esto tiaꞌ turu e inmojr ajtzꞌojyirobꞌ xeꞌ tuobꞌ e Israel. 11 Y tin e tuobꞌ uchꞌajnarir e Filisti uqꞌuechiobꞌ ixin e cofre tiaꞌ aquetpa e pacto tuaꞌ Cawinquirar Dios, y uchamsiobꞌ e Hofní y e Finees xeꞌ jax uyunenobꞌ e Elí.

12 Pero ayan incojt winic xeꞌ tuaꞌ uchꞌajnarir e Benjamín xeꞌ locꞌoyto tama e tzꞌojyir, y ajni ixin tuaꞌ acꞌotoy esto tama e chinam Siló tama inteꞌ taca día. Y cꞌotoy taca ubꞌujc wejrem y taca e rum yarbꞌir tama ujor tuaꞌ aquetpa chequer que war acꞌuxun uyalma. 13 Y conda cꞌotoy yaꞌ turu e Elí tama ucꞌajn tuyocher e chinam, war achꞌujcsan tuaꞌ unata lo que numuy tama e tzꞌojyir y war abꞌacta meyra tama e cofre tiaꞌ aquetpa e pacto tuaꞌ Cawinquirar Dios este que war apopocna axin uyalma umen e bꞌajcꞌut cocha war ubꞌijnu que bꞌajcꞌat aqꞌuejcha axin umen e ajtzꞌojyirobꞌ xeꞌ tuaꞌ uchꞌajnarir e Filisti. Entonces conda ochoy e winic tama e chinam y uchecsu tunor lo que numuy, cay aruobꞌ meyra tunor tin e turobꞌ tama e chinam. 14 Y conda e Elí uyubꞌi e nuxi aruar era, ojron y che:

—¿Tucꞌa tuaꞌ que ayan meyra aruar cocha era? che e Elí.

Entonces ajni e winic tuaꞌ acꞌotoy tut e Elí y uchecsu tut tunor lo que numuy. 15 Pues e Elí warix ucojco noventa y ocho año, y satpix unacꞌut. 16 Entonces ojron e winic y che:

—Intocto cꞌotoyen tiaꞌ war cache e tzꞌojyir, y jax taca nen xeꞌ ubꞌnen locꞌoyen bꞌixir tama e tzꞌojyir, che e winic. Entonces ojron e Elí y che:

—Y ¿tucꞌa numuy, sitz? che e Elí.

17 Entonces ojron e winic y che:

—Pues tunor e ajtzꞌojyirobꞌ xeꞌ tuobꞌ e Israel cꞌapa cucurnobꞌ umen tin e ajtzꞌojyirobꞌ xeꞌ tuobꞌ uchꞌajnarir e Filisti, pero ayanto tin e locꞌoy ajniobꞌ. Y chamesnobꞌ meyra sian ajtzꞌojyirobꞌ xeꞌ tuobꞌ e Israel y chamesnobꞌ ubꞌan oynenobꞌ xeꞌ jax e Hofní y e Finees, y tin e tuobꞌ uchꞌajnarir e Filisti uqꞌuechiobꞌ ixin e cofre tiaꞌ aquetpa e pacto tuaꞌ Cawinquirar Dios ubꞌan, che e winic.

18 Pues conda e winic uchecsu tunor lo que numuy taca e cofre tiaꞌ aquetpa e pacto tuaꞌ Cawinquirar Dios, e Elí cꞌaxi jawar tut e rum tiaꞌ turu ani tama ucꞌajn tuyejtzꞌer uyocher e chinam. Pues jaxir onian winiquix y abꞌari meyra, y tamar era ucꞌocchi unuc tiaꞌ cucrema y chamay. Pues jaxir quetpa ajbꞌijresiaj tama inteꞌ tiempo de cuarenta año tama e Israel.

19 Pues uyaribꞌ e Elí xeꞌ jax uwixcar e Finees war ucojco uyar y warix acꞌotoy e día tuaꞌ acuxma. Pero conda cꞌotoy unata que xujchna e cofre tiaꞌ aquetpa e pacto tuaꞌ Cawinquirar Dios umen tin e tuobꞌ uchꞌajnarir e Filisti, y que chamayobꞌ uviejo y upixam, cay unumse ubꞌa taca e sian cꞌuxner este que ucuxi uyar. 20 Pero conda eꞌrna umen e partera que cꞌanix achamay, uyare cocha era y che: “Machi ibꞌacta, porque cuxpa inteꞌ yer asitz,” che e partera. Pero jaxir machi ojron y nien machi uturbꞌa ubꞌa tamar lo que arobꞌna. 21 Pues conda merato achamay uturbꞌa ucꞌabꞌa e chuchu sitz que Icabod xeꞌ war che: “Cꞌapa locꞌoy e tawarer,” cocha qꞌuejcha ixin e cofre tiaꞌ aquetpa e pacto tuaꞌ Cawinquirar Dios, y umen que chamay uviejo y upixam. 22 Y de allí ojron otronyajr y che: “Pues matucꞌa e tawarer tama e Israel, cocha qꞌuejcha ixin e cofre tiaꞌ aquetpa e pacto tuaꞌ Cawinquirar Dios,” che e uwixcar e Finees y chamay.