1 Pues entonces conda cꞌotoyon tunoron tama e taquin rum yajaꞌ y conda cꞌotoy canata que imbꞌutz turon tunoron, cay canata que e lugar era ucꞌabꞌa Malta xeꞌ aquetpa tuyuxin e jaꞌ. 2 Y e gente xeꞌ turobꞌ tama e lugar era war atzay uwironobꞌ, y cocha cay cꞌaxi meyra jajar y umen que checta inteꞌ nuxi sisar, cay uxuniobꞌ inteꞌ nuxi cꞌajc y cay upejconobꞌ tuaꞌ waton tutiꞌ e cꞌajc tuaꞌ caqꞌuixi tamar. 3 Y tamar era e Pablo ixin ucꞌopi e siꞌ tuaꞌ uyari tama e cꞌajc, y conda uyari e siꞌ tama e cꞌajc, locꞌoy ajni inteꞌ chan tut e cꞌajc y tobꞌoy ucꞌuxi ucꞌabꞌ e Pablo. 4 Y conda e gente xeꞌ turobꞌ tama e lugar era cay uwirobꞌ que chꞌur e chan tut ucꞌabꞌ e Pablo, cay ubꞌijnuobꞌ que mabꞌambꞌan e winic era y cay ojronobꞌ jaxobꞌ taca y chenobꞌ:

—E winic era jax inteꞌ ajchamseyaj, y motor que ajcꞌuna tuaꞌ ucorpes ubꞌa tama e nuxi jaꞌ tiaꞌ cꞌanix ani achamesna, pero era machi actana tuaꞌ aturuan más umen e Dios porque war uche e mabꞌambꞌanir, che e gente era jaxobꞌ taca.

5 Pero e Pablo intaca utijti ucꞌabꞌ tuaꞌ ojri e nuxi chan macuir e cꞌajc, y tamar era chamay e chan. Y e Pablo matucꞌa unumse ubꞌa. 6 Y e gente war ucojcobꞌ tuaꞌ uwirobꞌ asampa ucꞌabꞌ e Pablo o tuaꞌ taca acucrema tor e rum chamen. Pero conda numuy cora tiempo y war uwirobꞌ que matucꞌa war unumse ubꞌa e Pablo cay tijrpa ubꞌijnusiajobꞌ otronyajr y chenobꞌ:

—Jaxir jax inteꞌ dios, che e gente era.

7 Y tama e lugar era ayan inteꞌ nuxi chor tuaꞌ inteꞌ winic xeꞌ más nojta tujam e winicobꞌ yajaꞌ xeꞌ ucꞌabꞌa Publio. Y jaxir atzay uwiron y tamar era upejcon tuaꞌ cacꞌotoy tama uyotot tiaꞌ cay uwesion y cay uyajcꞌon tiaꞌ tuaꞌ cajiri uxteꞌ día. 8 Pero ayan lo que war unumse ubꞌa e Publio umen que ajmuac utata. Pues utata chꞌar tama uchꞌacteꞌ y war ucojco e purer y e numnac. Entonces ixin e Pablo tuaꞌ uwarajse e ajmuac era y cay ucꞌajti taca e Dios y uturbꞌa ucꞌabꞌ tama ujor y tamar era tzꞌacpa. 9 Entonces conda cꞌotoy unatobꞌ e gente lo que numuy taca utata e Publio, cay utaresobꞌ tunor e sian ajmuacobꞌ lo que ayan tama e lugar era y tunorobꞌ tzꞌacpesnobꞌ ubꞌan. 10 Y tamar era cay sijpobꞌ e gente era tacaron, y conda ixion tuaꞌ cochoy tama inteꞌ nuxi barco tuaꞌ calocꞌoy tama e lugar era, ixiobꞌ tacaron y cay uyajcꞌon tunor lo que ucꞌani tama caxambꞌar.

11 Pues entonces quetpon uxteꞌ mes tama e lugar Malta bꞌajxan que catajwi e nuxi barco xeꞌ tuaꞌ calocꞌoy tamar. Pues e nuxi barco era quetpa tama e Malta ubꞌan tama tunor e tiempo era conda ayan e jajar taca e sisar. Pues e barco era tari tama e chinam Alejandría, pero intiach uwirnar cocha ayan chateꞌ chamen dios xeꞌ turu tama ujor. Inteꞌ ucꞌabꞌa Cástor y otronteꞌ ucꞌabꞌa Pólux. 12 Conda locꞌoyon tama e lugar era ixion tor e jaꞌ tuaꞌ cacꞌotoy esto tama e chinam Siracusa, y quetpon uxteꞌ día tama e lugar era. 13 Y de allí ixion tor e jaꞌ pero majax innajt tut e rum este que cꞌotoyon tama e chinam Regio xeꞌ turu tama e lugar Italia. Y tama otronteꞌ día cay uyajcꞌon e icꞌar xeꞌ tari tama e sur xeꞌ war utacsuon caxin, y tamar era cꞌotoyon esto tama e chinam Puteoli tama e chateꞌ día. 14 Y tama e chinam Puteoli era catajwi cabꞌa taca cora ajcꞌubꞌesiajobꞌ xeꞌ cay upejcon tuaꞌ caquetpa tacarobꞌ tama inteꞌ semana, y bꞌan cache. Y de allí cajajpi e bꞌir y ixion tuaꞌ cacꞌotoy tama e chinam Roma. 15 Y ayan cora ajcꞌubꞌesiajobꞌ tama e Cristo tama e chinam Roma xeꞌ cay unatobꞌ que cꞌani cacꞌotoy non. Entonces locꞌoyobꞌ tuaꞌ utajwionobꞌ tama e bꞌir, y cꞌotoyobꞌ esto tama e lugar xeꞌ ucꞌabꞌa Foro de Apio y xeꞌ ucꞌabꞌa Tres Tabernas. Y conda e Pablo uwira ut e ajcꞌubꞌesiajobꞌ era cay utattzꞌi ucꞌabꞌa e Dios tamarobꞌ y cay tzayjran tama uyalma. 16 Y conda cꞌotoyon esto tama e chinam Roma, e capitán tuaꞌ e ajtzꞌojyirobꞌ uyajcꞌu tunor tin e turobꞌ preso tama ucꞌabꞌ tin e war acꞌotori tujor e inmojr guardia tama e chinam Roma. Pero e Pablo actana tuaꞌ aturuan ubꞌajner tama inteꞌ otot xeꞌ cay utoyi tuaꞌ aturuan tamar. Y quetpa inteꞌ taca ajtzꞌojyir tacar tuaꞌ ucojco.

17 Pues entonces conda numuy uxteꞌ día, e Pablo uyebꞌta ixin inteꞌ ojroner esto tut tin e más nuquir winicobꞌ tujam tin e tuobꞌ e Israel xeꞌ turobꞌ tama e chinam Roma era tuaꞌ watobꞌ. Y conda yopobꞌ tut e Pablo y umorojse ubꞌobꞌ tacar, jaxir ojron y che:

—Niwermanuox, motor que matucꞌa war inche upater tin e tuobꞌ e Israel y nien upater e onian bꞌijnusiaj tuaꞌ catata viejobꞌirobꞌ, pero cajchento tuaꞌ inyajra inxin tama e cárcel tama e chinam Jerusalem, y de allí ajcꞌunen tuaꞌ inquetpa tama ucꞌabꞌobꞌ e winicobꞌ romano. 18 Y e winicobꞌ romano era, conda cay uyubꞌiobꞌ tanibꞌa tuaꞌ unatobꞌ tucꞌa war inche, matucꞌa utajwiobꞌ tamaren tuaꞌ uchamsenobꞌ, y cꞌani ani uyactenobꞌ inxin bꞌan taca. 19 Pero cocha majax bꞌan ucꞌani tin e tuobꞌ e Israel, quetpa tuaꞌ inware que tut e emperador romano tuaꞌ enrna jay ayan lo que war inche, pero nen machi sutpa intuchꞌi nien inteꞌ tujam e winicobꞌ era xeꞌ cay utuchꞌienobꞌ xeꞌ tuobꞌ e Israel. 20 Y tamar era cay impejcox tuaꞌ ixyopa tara tuaꞌ inwirox y tuaꞌ onjron tacarox, porque cacharen tara taca e cadena tamar taca lo que war cacojco tunoron xeꞌ tuon e Israel. Bꞌan che e Pablo uyare e winicobꞌ xeꞌ tuobꞌ e Israel xeꞌ yopobꞌ tut.

21 Entonces ojronobꞌ tin e tuobꞌ e Israel y uyareobꞌ e Pablo cocha era y chenobꞌ:

—Non era ma inteꞌ ojroner cachꞌami tuaꞌ tin e turobꞌ tama e departamento Judea xeꞌ war oꞌjronobꞌ apater, y tin e war ayopobꞌ tama e departamento Judea machi war uyareonobꞌ nien inteꞌ ojroner tamaret. 22 Pero non era quisinic coybꞌi tunor lo que war anata porque canata que ayan e winicobꞌ xeꞌ war oꞌjronobꞌ upater e secta tabꞌa tic taca, pero non matucꞌa war coybꞌi tamar, che e winicobꞌ era xeꞌ tuobꞌ e Israel xeꞌ turuanobꞌ tama e chinam Roma.

23 Entonces ubꞌijnuobꞌ tucꞌa día tuaꞌ ayopobꞌ e winicobꞌ era tuaꞌ uyubꞌiobꞌ uyojroner e Pablo. Y conda cꞌotoy e día yopobꞌ meyra winicobꞌ tama e otot tiaꞌ turu e Pablo. Pues cay canseyan conda intocto atꞌabꞌay e qꞌuin y bꞌan uche este que namtzꞌa e qꞌuin; war acanseyan tama uyojroner e Dios tama e corpesiaj. Y uturbꞌa ubꞌa tuaꞌ uche acꞌubꞌseyanobꞌ tunorobꞌ tama e Jesús. Y war ucꞌampes meyra uley e Moisés y lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo tuaꞌ uchecsu tutobꞌ que e Jesús jax xeꞌ quetpa tuaꞌ watar. 24 Y ayan tin e cay cꞌubꞌseyanobꞌ tamar lo que war acanseyan e Pablo, pero ayan ubꞌan tin e machi cꞌubꞌseyanobꞌ. 25 Y cocha machi quetpobꞌ intera ubꞌijnusiajobꞌ, ayan tin e cay locꞌoy ixin. Entonces ojron e Pablo otronyajr y che:

—Pues uwajpi lo que arobꞌna catata viejobꞌirobꞌ umen Unawalir e Dios tama e profeta Isaías conda che que:

29 Entonces conda cꞌapa ojron e Pablo cocha era, locꞌoyobꞌ tunor tin e tuobꞌ e Israel war abꞌiritiobꞌ tamar lo que arobꞌnobꞌ umen e Pablo.

30 Pues entonces e Pablo quetpa tama e chinam Roma chateꞌ año. Y utoyi ingojr otot tuaꞌ aturuan tamar y war uchꞌami tunor tin e ajwarobꞌ xeꞌ acꞌotoyobꞌ tut. 31 Y e Pablo actana tuaꞌ uchecsu tunor lo que ucꞌani, y war ucanse e gente tama uchinam e Dios, y war acanseyan tama Cawinquirar Jesucristo. Y cocha turu tama e otot tuaꞌ, mamajchi umener chena unumse ubꞌa.

Tara acꞌapa tunor niwojroner, che e Lucas.