Proverbios
Inteꞌ checsuyaj tama e libro de Proverbios
¿Tucꞌa tuaꞌ tzꞌijbꞌabꞌir e jun era?
Pues tzꞌijbꞌabꞌir e jun era tuaꞌ ucansion tucꞌa e natanyaj y cocha tuaꞌ cacꞌampes tama cacuxtar iraj iraj. Y ucansion lo que erach xeꞌ tuaꞌ ubꞌijreson cocha tuaꞌ cacorpes cabꞌa tamar lo que intran ticoit.
¿Chi umen tzꞌijbꞌabꞌir e jun era?
Pues tzꞌijbꞌabꞌir e jun era umen e rey Salomón xeꞌ turuan tama e onian tiempo. Pero ayanto cora winicobꞌ xeꞌ nojta ujorobꞌ xeꞌ utzꞌijbꞌobꞌ cora proverbio ubꞌan.
¿Tucꞌa año tzꞌijbꞌabꞌir e jun era?
Pues tzꞌijbꞌabꞌir e jun era conda intocto cay cꞌotori e rey Salomón tama e año 970 A.C.
1
Ucꞌampibꞌir e libro era xeꞌ ucꞌabꞌa Proverbios
1 Jax era cora ojroner xeꞌ ayan meyra ucꞌampibꞌir xeꞌ tzꞌijbꞌabꞌir umen e rey Salomón xeꞌ jax uyunen e rey David. 2 Pues ayan ucꞌampibꞌir tunor e ojroner era
tuaꞌ utacre inteꞌ tuaꞌ acꞌotoy ucani e natanyaj y tuaꞌ acano cocha tuaꞌ ucojco ubꞌa,
y tuaꞌ utacre inteꞌ acꞌotoy unata tin e canseyaj xeꞌ nojta ucꞌampibꞌir.
3 Y ayan ucꞌampibꞌir e ojroner era tuaꞌ utacre inteꞌ tuaꞌ ubꞌijnu tin e más imbꞌutz tuaꞌ uche,
y cocha tuaꞌ ubꞌijnu uwira jay erach lo que cꞌani uche.
4 Y ayan ucꞌampibꞌir tunor era tuaꞌ utacre tin e matucꞌa unata tuaꞌ acꞌotoy unata tin e erach y tin e mabꞌambꞌan,
y tuaꞌ utacre e chꞌom maxtac tuaꞌ acano cocha tuaꞌ ubꞌijnu uche lo que más imbꞌutz.
5 Pues nox xeꞌ ayix e natanyaj tamarox canuenic más tamar e sian ojroner era tuaꞌ abꞌoro más inatanyaj,
y nox xeꞌ nojta ijor, bꞌijresnicox umener.
6 Y ayan ucꞌampibꞌir e natanyaj tuaꞌ cacꞌotoy canata lo que war che inteꞌ ojroner xeꞌ más intam y inteꞌ ojroner xeꞌ mucur cora,
y lo que war che inteꞌ ojroner xeꞌ intran tuaꞌ tin e nojta ucanuar.
7 Pues acay acano inteꞌ tucꞌa e natanyaj conda acay ubꞌijnu tuaꞌ umanxujres ubꞌa tut Cawinquirar Dios,
pero tin e uputputir ut uxejbꞌe ut e natanyaj y e canseyaj xeꞌ imbꞌutz.
E canseyaj tuaꞌ e chꞌom maxtacobꞌ
8 Niunenet, turbꞌan abꞌa tama tunor lo que war incanset,
y ira achoqui lo que ucanset atuꞌ.
9 Porque jay iꞌxin aturbꞌa abꞌa tama tunor era,
cꞌani eꞌrna umen e gente que galan awirnar bꞌan ani cocha jay ayan inteꞌ jojbꞌibꞌ tama ajor,
y aquetpa awirnar bꞌan ani cocha jay ayan inteꞌ tunyujy tama anuc.
10 Niunenet, jay watar tin e ajmabꞌambꞌanirobꞌ y upejquet tuaꞌ ilocꞌoy tacarobꞌ tuaꞌ ache e mabꞌambꞌanir,
ira iꞌxin tacarobꞌ.
11 Y jay uyaretobꞌ y chenobꞌ:
“Lar tacaron.
Cacojquic uyopar tin tin xeꞌ anumuy tuyejtzꞌer e bꞌir,
y cachamsic bꞌan taca motor que matucꞌa war uche.
12 Cachamsic tuaꞌ aquetpobꞌ bꞌan ani cocha jay abꞌujcꞌobꞌ umen e mujr,
y catzacricobꞌ tuaꞌ axiobꞌ tama e mujr inyajrer.
13 Pues caxin calocse tuobꞌ tuqꞌuic tuqꞌuic lo que atujri,
y caxin cabꞌutꞌi cotot taca tunor lo que caxujchꞌi.
14 Lar quetpen tacaron,
y caxin caxere tunor lo que caxujchꞌi.”
Bꞌan tuaꞌ uyaret tin e axin upejquet tuaꞌ ache e mabꞌambꞌanir tacarobꞌ.
15 Pero niunenet, ira ixana tama e bꞌir tacarobꞌ.
Najtres abꞌa tutobꞌ tuaꞌ machi iꞌxin ache e mabꞌambꞌan tacarobꞌ.
16 Porque jaxirobꞌ ajniobꞌ tuaꞌ uchiobꞌ e mabꞌambꞌanir,
y turix tuaꞌ achamsanobꞌ wacchetaca.
17 Pues motor incojt mut, jay uwira que war aturbꞌana inteꞌ cororteꞌ tut,
alocꞌoy aꞌjni tut tuaꞌ machi ajajbꞌna umener.
18 Pero e mabꞌambꞌan winicobꞌ era majax bꞌanobꞌ cocha incojt mut,
porque ma chequer tutobꞌ motor que ayan inteꞌ cororteꞌ tutobꞌ,
cocha conda war uyustes ubꞌobꞌ tuaꞌ achamsanobꞌ,
jaxobꞌ taca tuaꞌ achamesnobꞌ.
19 Y bꞌan unumse ubꞌobꞌ tunor tin e axujchꞌianobꞌ tuatix uchꞌamiobꞌ meyra tumin:
axin usati ucuxtarobꞌ.
Conda apejcna e gente tuaꞌ uchꞌamiobꞌ e natanyaj
20 Pues e Natanyaj aquetpa bꞌan cocha tin e war upejca tin tin xeꞌ turobꞌ ta calle tama inteꞌ inteꞌ chinam,
y aꞌru taca inteꞌ nuxi nuc tut tin e turobꞌ tama e plaza.
21 Y e Natanyaj war upejca tin e turobꞌ tama uyocher e chinam,
y war oꞌjron taca tin e turobꞌ tama e calle xeꞌ más nojta tama e chinam y che:
22 “Chꞌom maxtacox xeꞌ matucꞌa ibꞌijnusiaj, ¿tucꞌa día tuaꞌ ibꞌijnu iwacta iyajta ut lo que matucꞌa ucꞌampibꞌir?
Y ¿tucꞌa día tuaꞌ iwacta tuaꞌ itzayres ibꞌa tamar lo que ixsactzene iwira?
Y ¿tucꞌa día tuaꞌ ibꞌijnu iwacta tuaꞌ ixejbꞌe ut e canuar tamar lo que erach?
23 Jay iyubꞌi ani ninuc conda inwareox que mabꞌambꞌan lo que war iche,
nen inwechꞌe ani tamarox lo que ayan tama niwalma,
y inchecsu ani tiut nibꞌijnusiaj.
24 Pero machi ubꞌianox conda impejcox,
y conda inqꞌueche nicꞌabꞌ tiut tuaꞌ ixcꞌotoy taniwejtzꞌer, machi icꞌani,
25 y machi ichꞌami niwojroner conda inwareox e bꞌijresiaj xeꞌ imbꞌutz,
y machi cꞌani ichꞌami niwojroner conda inwareox que mabꞌambꞌan lo que war iche.
26 Y tamar era cꞌani intzene tamarox conda acay inumse ibꞌa tamar lo que intran,
y cꞌani insactzene tamarox conda achecta watar tiut lo que uchiox ixchincha,
27 conda axin watar e nuxi satpar tijor xeꞌ imbꞌacꞌajr uwirnar,
y conda achecta watar e sian cꞌuxner,
y conda acay inumse ibꞌa meyra tama e bꞌajcꞌut, cꞌani intzene tamarox, che e Natanyaj.
28 “Y entonces tin e matucꞌa ubꞌijnusiajobꞌ axin upejquenobꞌ tuaꞌ intacriobꞌ, pero machi tuaꞌ umbꞌi unucꞌobꞌ,
y motor que axin usajquenobꞌ taca tunor uyalmobꞌ, pero machi tuaꞌ utajwienobꞌ.
29 Pero uxejbꞌiobꞌ ut e canuar,
y machi ubꞌijnuobꞌ tuaꞌ umanxujres ubꞌobꞌ tut Cawinquirar Dios.
30 Y machi uchꞌamiobꞌ nibꞌijresiaj,
y machi ucꞌaniobꞌ tuaꞌ arobꞌnobꞌ conda ucꞌani tuaꞌ uyustes ubꞌobꞌ.
31 Y tamar era aquetpa tuaꞌ acꞌaxi tujorobꞌ uyeror tamar e mabꞌambꞌanir lo que uchiobꞌ,
y aquetpa tuaꞌ unumse ubꞌobꞌ tamar lo que war ubꞌijnuobꞌ tuaꞌ uchiobꞌ upater e inmojr.
32 Pues tin e matucꞌa ubꞌijnusiajobꞌ machi oꞌchoy tujorobꞌ tuaꞌ oꞌbꞌianobꞌ tut e Natanyaj,
y jay ayan lo que alocꞌoy imbꞌutz tut tin e uputputir utobꞌ intaca axin usati ubꞌobꞌ tamar.
33 Pero tin e axin uyubꞌi ninuc xeꞌ e Natanyajen,
cꞌani aturuan taca e jiriar, y matucꞌa tuaꞌ ubꞌacre,” che e Natanyaj.