2
E tacarsiaj lo que erer cachꞌami tuaꞌ e natanyaj
1 Niunenet, cꞌubꞌseyanen tut niwojroner,
y tꞌabꞌsen tama awalma lo que war inwaret.
2 Chiquini e natanyaj tuaꞌ icꞌotoy icano tamar,
y pasa abꞌijnusiaj tuaꞌ anata lo que che.
3 Sicbꞌan cocha tuaꞌ icꞌotoy anata lo que war che inteꞌ ojroner xeꞌ más imbꞌutz,
y cꞌajtin taca e Dios tuaꞌ utacret aquetpa chequer toit e canuar xeꞌ más intam.
4 Turbꞌan abꞌa inyajrer tuaꞌ asicbꞌa e natanyaj bꞌan ani cocha jay war asicbꞌa e plata,
y bꞌan ani cocha jay war asajca lo que meyra atujri xeꞌ aquetpa macar macuir e rum.
5 Pues bꞌan cocha era erer icꞌotoy icano cocha tuaꞌ amanxujres abꞌa tut Cawinquirar Dios,
y cꞌani icꞌotoy anata chi e Dios.
6 Porque jax Cawinquirar Dios xeꞌ axin uyajcꞌon e natanyaj,
y taca uyej uchecsu ticoit e canuar y e bꞌijnusiaj xeꞌ más intam.
7 Pues tꞌabꞌesbꞌir e natanyaj umen Cawinquirar Dios tuaꞌ uyajcꞌu tin e aturuan erach tut,
y aquetpa ajcojc tuaꞌ tin e war axanobꞌ imbꞌutz tut jaxir.
8 Cawinquirar Dios ucojco e bꞌir tuaꞌ tin e erach,
y ucorpes tin e war axana imbꞌutz tut jaxir.
9 Y jay acꞌajti taca e Dios tuaꞌ achꞌami e natanyaj tuaꞌ, cꞌani icꞌotoy anata lo que erach,
y cꞌani aquetpa chequer toit lo que imbꞌutz,
y cꞌani itzay awira inteꞌ cocha inteꞌ,
y cꞌani anata tin e bꞌir xeꞌ imbꞌutz tuaꞌ ixana tamar.
10 Porque e natanyaj axin oꞌchoy tama awalma,
y e canuar tamar lo que ucꞌani e Dios axin utzayreset.
11 Y jay anata asicbꞌa tuaꞌ ache lo que imbꞌutz, jax tuaꞌ uqꞌuecꞌojset iꞌxin,
y e canuar tamar lo que erach axin ucojcuet.
12 Pues e natanyaj cꞌani ucorpeset tuaꞌ machi ache bꞌan cocha uchiob' tin e axanobꞌ tama e bꞌir xeꞌ mabꞌambꞌan,
y cꞌani ucorpeset tuaꞌ machi acꞌubꞌse uyojronerobꞌ tin e ajmajresiajobꞌ.
13 Pues tin e ojron taca e mabꞌambꞌan ojroner cocha era uyactobꞌix e bꞌir xeꞌ imbꞌutz,
tuaꞌ axanobꞌ tama e incsibꞌaner.
14 Y conda uchiobꞌ lo que majax imbꞌutz axin atzayobꞌ tamar,
y conda uchiobꞌ e mabꞌambꞌanir xeꞌ más calapir axin utzayjres ubꞌobꞌ tamar.
15 Pues war axanobꞌ tama inteꞌ bꞌir xeꞌ tꞌerer ut,
cocha uyactobꞌix ubꞌir e Dios xeꞌ cꞌatar ut.
16 Pues e natanyaj axin ucorpeset tut e ajnajtir ixictac,
y cꞌani utacret tuaꞌ machi imajresna conda inteꞌ ixic cocha era axin upejquet taca inteꞌ ojroner xeꞌ galan inchiꞌ tuaꞌ ani upijchꞌiet.
17 Pues inteꞌ e ixic cocha era uyacta unoxibꞌ xeꞌ nujbꞌi tacar conda chꞌom maxtacto,
y uchoqui e ojroner lo que uche tut e Dios conda nujbꞌi.
18 Pues tunor tin e oꞌchoy tama uyotot e ixic era war aqꞌuejcha axin tut e chamer conda chꞌom maxtacto,
porque jax era e bꞌir xeꞌ acꞌotoy tut e mujr.
19 Pues tunor tin e acꞌotoy tut e ixic era cꞌani asatpa inyajrer,
y ma tiaꞌ tuaꞌ asutpa utajwi e bꞌir tiaꞌ ayan e cuxtar.
20 Pero net ucꞌani tuaꞌ ixana tama e bꞌir tuaꞌ tin e imbꞌutzꞌobꞌ,
y ma tiaꞌ tuaꞌ inajtiri tama e bꞌir tuaꞌ tin e erachobꞌ.
21 Pues jax taca tin e oꞌbꞌianobꞌ tut e Dios aquetpa tuaꞌ uchꞌamiobꞌ e chojbꞌesiaj tuaꞌ aturuanobꞌ tama e lugar xeꞌ imbꞌutz* E lugar xeꞌ imbꞌutz: Tama e onian tiempo conda tzꞌijbꞌabꞌir e jun era e winicobꞌ ubꞌijnuobꞌ que e chojbꞌesiaj era jax tuaꞌ uyubꞌi aturuanobꞌ tama e lugar Israel, o jax e tierra prometida, o e lugar xeꞌ imbꞌutz. ,
y tunor tin e erach tut e Dios cꞌani aturuan tamar.
22 Pero tunor tin e axin uche e mabꞌambꞌanir
y xeꞌ machi uchiobꞌ bꞌan cocha uchecsuobꞌ cꞌani aloqꞌuesna najtir tama e lugar era.
*2:21: E lugar xeꞌ imbꞌutz: Tama e onian tiempo conda tzꞌijbꞌabꞌir e jun era e winicobꞌ ubꞌijnuobꞌ que e chojbꞌesiaj era jax tuaꞌ uyubꞌi aturuanobꞌ tama e lugar Israel, o jax e tierra prometida, o e lugar xeꞌ imbꞌutz.