1 Niunenet, ira anajpes lo que cay incanset,

sino que tꞌabꞌsen tunor era tama awalma tuaꞌ iyubꞌian tut tunor lo que cay inwaret.

2 Porque jay bꞌan ache cꞌani ituruan meyra año tara tor e rum,

y cꞌani iyajcꞌuna meyra tzayer.

3 Pues ma tiaꞌ tuaꞌ awacta tuaꞌ achecsu e cꞌunersiaj tut tin e turobꞌ tawejtzꞌer,

y nien ma tiaꞌ tuaꞌ awacta tuaꞌ acꞌapa ache tunor lo que aware.

Tꞌabꞌsen tunor era tama awalma bꞌan ani cocha jay chꞌur inteꞌ tunyujy tama anuc.

4 Porque jay bꞌan ache Cadiosir cꞌani atzay uwiret y cꞌani uyajta oit iraj iraj,

y cꞌani icꞌajna umen tunor tin e turobꞌ tawejtzꞌer ubꞌan.

5 Cꞌubꞌseyanen tama Cawinquirar Dios taca tunor awalma,

y ira icojcsan tamar taca lo que anata tama ajor.

6 Actan tuaꞌ ubꞌijreset e Dios iraj iraj,

y jaxir tuaꞌ uwirset tin e bꞌir xeꞌ erach.

7 Ira ache abꞌa que más anata,

sino que manxujres abꞌa tut Cawinquirar Dios y najtranen tut e mabꞌambꞌanir.

8 Porque jay bꞌan ache Cadiosir tuaꞌ ucojcuet tuaꞌ machi imuacran,

y cꞌani uqꞌuecꞌojse tunor abꞌaquer.

9 Tattzꞌa Cawinquirar Dios tama e tumin lo que ayan tacaret,

y ajcꞌun e Dios lo que uwajpi tama ucajyesnibꞌir uyutir e cosecha,

10 porque jay bꞌan ache jaxir axin ubꞌutꞌi agranero taca meyra cosecha,

y cꞌani uche abꞌoro e vino lo que tꞌabꞌesbꞌir amener este que axin atucpa.

11 Niunenet, ira axejbꞌe ut lo que arobꞌnet umen Cawinquirar Dios conda ayan lo que war ache xeꞌ mabꞌambꞌan,

y ira iqꞌuijna conda uyaret que ucꞌani tuaꞌ oꞌstes abꞌa.

12 Porque Cawinquirar Dios axin ucꞌaye tunor tin e uyajta ut conda war uche lo que mabꞌambꞌan,

bꞌan cocha e tatabꞌirobꞌ ucꞌaye uyunen xeꞌ más uyajtobꞌ ut.

13 Pues chojbꞌesbꞌir ut e winic xeꞌ utajwi e natanyaj,

y xeꞌ uchꞌami meyra canuar xeꞌ intam.

14 Porque e natanyaj más atujri que e plata,

y axin utacre inteꞌ más meyra que e oro xeꞌ meyra atujri.

15 Y e natanyaj más atujri que e tunyujy,

y más nojta ucꞌampibꞌir que tuqꞌuic tuqꞌuic lo que erer uyusre uchꞌami inteꞌ.

16 Pues taca inteꞌ ucꞌabꞌ e natanyaj utacre inteꞌ tuaꞌ aturuan meyra año tara tor e rum,

y taca inteꞌ ucꞌabꞌ utacre inteꞌ tuaꞌ uchꞌami meyra tumin y meyra tattzꞌarsiaj.

17 Y jay ayan e natanyaj tamaret axin utacret tuaꞌ ixana tama e bꞌir xeꞌ más ustabꞌir,

y axin aquetpa imbꞌutz tunor acuxtar.

18 E natanyaj aquetpa bꞌan cocha inteꞌ teꞌ xeꞌ uyajcꞌu e cuxtar xeꞌ eꞌixna tin e uchꞌami,

y tin e axin uchꞌujbꞌa axin atzay meyra.

19 Pues taca e natanyaj Cawinquirar Dios uche tunor ucajyesnibꞌir or e rum,

y taca ubꞌijnusiaj xeꞌ intam uche tunor ut e qꞌuin.

20 Y tacar lo que unata Cawinquirar Dios uche abꞌocbꞌa alocꞌoy e sian jaꞌ lo que ayan macuir e rum,

y tama e acbꞌar uche que e tocar uyacta acꞌaxi e tijuꞌ tor e rum.

21 Niunenet, bꞌijnun tamar lo que cꞌani ache tuaꞌ ache jax taca lo que imbꞌutz,

y machi tuaꞌ awacta najtir e natanyaj.

22 Porque e natanyaj cꞌani uyajqꞌuet e cuxtar xeꞌ eꞌixna,

y cꞌani itajttzꞌa umen e inmojr.

23 Y bꞌan cocha era uyubꞌiet iꞌxin tic taca,

y ma tiaꞌ tuaꞌ icucrema.

24 Y conda ijiri tama e acbꞌar machi tuaꞌ ibꞌacta,

y conda ichꞌan, cꞌani iwayan taca e tzayer.

25 Y machi tuaꞌ abꞌacre que cꞌani anumse abꞌa tamar lo que imbꞌacꞌajr,

y nien machi tuaꞌ abꞌacre e satpar lo que tuaꞌ unumse ubꞌobꞌ tin e ajmabꞌambꞌanirobꞌ.

26 Porque Cawinquirar Dios cꞌani aquetpa tawejtzꞌer tuaꞌ ucojcuet,

y cꞌani ucojco oꞌc tuaꞌ machi iyojri tama inteꞌ chꞌen.

27 Jay uyubꞌiet atacre tin e tawar tuaꞌ atacarna,

ira aquete abꞌa tuaꞌ ache.

28 Y ira aware apiar tuaꞌ ucojco este ejcꞌar tuaꞌ uchꞌami inteꞌ tacarsiaj,

jay ayan tacaret lo que erer awajcꞌu coner.

29 Ira abꞌijnu tuaꞌ ache e mabꞌambꞌanir upater tin e turobꞌ tawejtzꞌer,

cocha jaxirobꞌ ayan uconfianza tamaret.

30 Y jay ayan tin e matucꞌa war uche apater,

ira atuchꞌi que war uchiobꞌ e mabꞌambꞌanir apater.

31 Y machi tuaꞌ icꞌuxnaqꞌui awira lo que uche tin e axujchꞌian taca e día,

y nien machi tuaꞌ oꞌsre ache bꞌan cocha uche jaxir.

32 Pues Cawinquirar Dios uxejbꞌe ut tin e uche lo que calapir,

pero atzay uwira tin e uyusre uche lo que erach.

33 Pues Cawinquirar Dios axin ubꞌaxe ufamilia tin e ajmabꞌambꞌanir,

pero axin uchojbꞌes ufamilia tin e uche lo que erach.

34 Pues Cawinquirar Dios asactzene uwira tin e asactzeniobꞌ,

pero incꞌun uwirnar tut tin e war umanxujres ubꞌa tut.

35 Pues tin e ayan e natanyaj tamar cꞌani atajttzꞌobꞌ umen e inmojr,

pero tin e uputputir utobꞌ cꞌani asubꞌarnobꞌ.