1 Nimaxtacox, ubꞌinic lo que war incansiox xeꞌ tatabꞌiren tibꞌa,

y turbꞌanic ibꞌa tamar, porque jay bꞌan iche cꞌani ichꞌami e canuar xeꞌ más intam.

2 Pues nen war inwajcꞌox e canseyaj xeꞌ más imbꞌutz,

y tamar era ira iwacta lo que war inwareox era.

3 Pues conda nen chuchuento turuanen tuyotot nitata,

y nituꞌ cꞌotoy uchojres niut meyra.

4 Nitata cay ucansen y che:

“Tꞌabꞌsen tunor niwojroner tama awalma,

porque jay bꞌan ache cꞌani eꞌixna ituruan.

5 Sicbꞌan e natanyaj y e bꞌijnusiaj xeꞌ más intam.

Y machi tuaꞌ anajpes niwojroner y nien machi tuaꞌ inajtiri tutobꞌ.

6 Y ma tiaꞌ tuaꞌ achoqui e natanyaj cocha jax xeꞌ tuaꞌ ucojcuet.

Tzayres abꞌa tama e natanyaj y jax tuaꞌ utacret tuaꞌ machi ache e mabꞌambꞌanir.

7 Pues e natanyaj más nojta ucꞌampibꞌir que tunor lo que ayan.

Pero tujor tunor turbꞌan abꞌa tuaꞌ achꞌami e bꞌijnusiaj xeꞌ intam.

8 Chojres ut e natanyaj y jaxir tuaꞌ utꞌabꞌse acꞌabꞌa,

meqꞌue y jaxir tuaꞌ uyajqꞌuet meyra tattzꞌarsiaj.

9 Porque jay icꞌotoy iquetpa inteꞌ ajnatanyaj cꞌani iquetpa más galan bꞌan ani cocha jay ayan inteꞌ eronibꞌ tama ajor xeꞌ bꞌan uwirnar cocha cora nichir,

o bꞌan cocha jay ayan ani inteꞌ corona tama ajor.”

Bꞌan ucansen nitata.

10 Niunenet, ubꞌin tunor lo que war inwaret era,

porque jay bꞌan ache cꞌani itzay ituruan meyra año tara tor e rum.

11 Nen war imbꞌijreset tama e bꞌir tiaꞌ ayan e natanyaj,

y war inwirset tuaꞌ ache lo que erach tut e inmojr.

12 Conda ixana tama e bꞌir era machi tuaꞌ aquetpa intran toit,

y conda iꞌxin iyajni machi tuaꞌ icucrema.

13 Turbꞌan abꞌa tuaꞌ atꞌabꞌse tunor lo que cansenet nimener y ira anajpes.

Ubꞌianen tut e canuar era, y jax tuaꞌ utacret tama acuxtar.

14 Ira ache lo que uchiobꞌ tin e ajmabꞌambꞌanirobꞌ,

y ira ixana tama e bꞌir tiaꞌ axanobꞌ tin e calapir ubꞌijnusiajobꞌ.

15 Actan e mabꞌambꞌan bꞌir yax y ira ixana tamar.

Sutu apat tut y quiqui tama e bꞌir xeꞌ imbꞌutz.

16 Porque tin e ajmabꞌambꞌanirobꞌ cocha era machi uyubꞌi awayanobꞌ este que axin uche lo que mabꞌambꞌan tama inteꞌ inteꞌ día.

Matucꞌa e jiriar tamarobꞌ jay machi uchiobꞌ acucrema tin e matucꞌa war uche.

17 Pues lo que ucꞌuxiobꞌ jax lo que uxujchꞌiobꞌ,

y lo que uyuchꞌiobꞌ jax lo que uchꞌamiobꞌ tama inteꞌ tzꞌojyir.

18 Pues e bꞌir tuaꞌ tin e erach aquetpa bꞌan cocha uwararir e qꞌuin conda war asacojpa

xeꞌ ejpray más y más este que axin ujanchꞌacnes tunor e día.

19 Pero incsibꞌan e bꞌir tuaꞌ e ajmabꞌambꞌanirobꞌ,

y nien machi unatobꞌ tucꞌa tamar atꞌirpa uyocobꞌ.

20 Niunenet, turbꞌan abꞌa tama tunor lo que incanset,

y ubꞌin tunor niwojroner.

21 Ira awacta tuaꞌ abꞌijnu tamar,

y quete tunor nicanseyaj tama awalma.

22 Porque tunor tin e oꞌbꞌianobꞌ tut cꞌani utajwiobꞌ e cuxtar xeꞌ imbꞌutz,

y axin utajwiobꞌ e tzꞌaconer ubꞌan.

23 Pero tama tunor cojcon abꞌijnusiaj,

porque jax xeꞌ tuaꞌ uwirset tin e bꞌir tuaꞌ awajpi.

24 Machi tuaꞌ acꞌampes e mabꞌambꞌan ojroner,

y nien machi tuaꞌ imajresian.

25 Turbꞌan abꞌa tuaꞌ awira e bꞌir xeꞌ aquetpa toit,

y machi tuaꞌ asutpa awira tapat.

26 Sicbꞌan e bꞌir xeꞌ cꞌatar tiaꞌ tuaꞌ awabꞌu oꞌc,

y machi tuaꞌ awacta e bꞌir era.

27 Y ira awacta e bꞌir xeꞌ erach,

sino que cojcon abꞌa tuaꞌ machi iꞌxin ache lo que mabꞌambꞌan.