5
Najtirien tut e ajmabꞌambꞌan ixictac
1 Niunenet, turbꞌan abꞌa tuaꞌ iyubꞌian tut ninatanyaj,
y chiquini nibꞌijnusiaj xeꞌ más intam lo que war inwaret.
2 Y bꞌan cocha era uyubꞌiet acojco abꞌa tuaꞌ machi achoqui e bꞌijnusiaj xeꞌ más imbꞌutz,
y e ojroner lo que alocse tama awej aquetpa bꞌan taca cocha canuet tacaren.
3 Pero e ojroner lo que alocꞌoy tama uyej inteꞌ ajmabꞌambꞌan ixic aquetpa inchiꞌ tut inteꞌ bꞌan ani cocha e chabꞌ,
y galan incꞌun uyubꞌnar uyojroner bꞌan ani cocha e aceite xeꞌ aloqꞌuesna tama e teꞌ olivo.
4 Pero conda inteꞌ winic axin oꞌchoy taca inteꞌ ixic cocha era cꞌani aquetpa inchꞌaj uyalma bꞌan ani cocha uyopor e cꞌopot xeꞌ ucꞌabꞌa tinta,
y cꞌani ayobꞌorna uyalma bꞌan ani cocha jay achꞌajca taca inteꞌ machit xeꞌ ayan chatertiꞌ uyej.
5 Y jay net ixana taca e ixic era cꞌani uqꞌuechiet iꞌxin tut e chamer,
y e bꞌir tiaꞌ axana jaxir san acꞌotoy ixto tut e mujr.
6 Y machi ubꞌijnu jay ayan ucꞌampibꞌir e bꞌir tiaꞌ ayan e cuxtar,
y nien machi uyajchꞌi ubꞌa que war axin tama inteꞌ bꞌir xeꞌ majax ani yaꞌ tuaꞌ axin.
7 Entonces niunenox, ubꞌinic ninuc
y machi tuaꞌ iwacta iche bꞌan cocha war incansiox.
8 Cojcon abꞌa tuaꞌ machi iꞌxin tut tuqꞌuic tuqꞌuic ajmabꞌambꞌan ixic,
y nien machi tuaꞌ icꞌotoy tama upuertir uyotot.
9 Porque jay iꞌxin tuyotot inteꞌ ixic cocha era axin asati atattzꞌarsiaj tut e inmojr,
y cꞌani asati acuxtar conda axin uwajpiet unoxibꞌ tamar lo que war ache tacar uwixcar.
10 Y tamar era tin e ajnajtir gente axin uchꞌamiobꞌ tunor atumin,
y axin aquetpa tuaꞌ otronteꞌ tunor lo que ayan tacaret.
11 Y conda cꞌanix acꞌapa acuxtar tara tor e rum
axin iyajcna umen e cꞌuxner tama e sian muaquir lo que cay achꞌami umen que cay oꞌse abꞌa taca e ajmabꞌambꞌan ixictac.
12 Y iꞌxin aware cocha era y che: “Cocha anon que ixien inxejbꞌe ut e ojroner conda ayan chi xeꞌ cay uyaren que mabꞌambꞌan lo que war inche,
y ma tiaꞌ cay imbꞌijnu jay ayan ani ucꞌampibꞌir tunor e ojroner era.
13 Pues ma tiaꞌ cay ubꞌianen tut niwajcanseyajobꞌ,
y nien ma tiaꞌ cay imbꞌijnu tuaꞌ inche bꞌan cocha arobꞌnen.
14 Y coner war acꞌaxi tanijor uyeror tunor e mabꞌambꞌanir lo que cay inche,
y war anatanwa nisubꞌar umen tunor tin e turobꞌ tama nichinam.
15 Pues net xeꞌ ayan awixcar, cojcon abꞌa tuaꞌ atzayres abꞌa tacar taca jaxir* Che tama e hebreo que: “Uchꞌen e jaꞌ tamar taca ut e jaꞌ tabꞌa”, pero war oꞌjron tamar inteꞌ winic taca uwixcar, y que e winic ucꞌani tuaꞌ ucojco ubꞌa tuaꞌ aquetpa tuaꞌ taca uwixcar.,
bꞌan cocha oychꞌi e jaꞌ lo que ayan tamar taca ut e jaꞌ tabꞌa.
16 Pues majax imbꞌutz tuaꞌ atuqui e charan jaꞌ tic taca tama e calle,
y bꞌan ubꞌan que majax imbꞌutz tuaꞌ itzay awira abꞌa taca tuqꞌuic tuqꞌuic ixictac.
17 Pues awixcar tabꞌa taca,
y ma tiaꞌ tuaꞌ iquetpa taca otronteꞌ.
18 Pues que awixcar aquetpa inteꞌ chojbꞌesiaj toit† Tara caware “awixcar” pero tama e castilla che “manantial” xeꞌ war che que uwixcar inteꞌ aquetpa inteꞌ chojbꞌesiaj tut. ,
y que atzayres abꞌa tacar bꞌan cocha cay ache desde que chꞌom maxtaquetto conda intocto nujbꞌiet tacar.
19 Porque awixcar aquetpa galan uwirnar bꞌan cocha incojt masaꞌ,
y ut uchuꞌ utzayresiquet iraj iraj,
y itzayen tuaꞌ abꞌijnu iquetpa tacar iraj iraj.
20 Niunenet, ira awacta abꞌa tuaꞌ icajcha umen inteꞌ ajmabꞌambꞌan ixic cocha era,
y nien machi tuaꞌ apijchꞌi ut uchuꞌ uwixcar otronteꞌ.
21 Porque chequer tut Cawinquirar Dios tunor lo que cache,
y tic taca tiaꞌ caxin war uwiron.
22 Pues inteꞌ ajmabꞌambꞌan winic axin acajcha umen e mabꞌambꞌanir lo que war uyusre uche,
y axin aquetpa cachbꞌir umener este que machi uyubꞌi alocꞌoy aꞌjni tut.
23 Y inteꞌ winic cocha era axin achamay umen que machi oꞌbꞌna ucojco ubꞌa tuaꞌ machi uche e mabꞌambꞌanir,
y axin asatpa umen taca que uche lo que matucꞌa ucꞌampibꞌir.
*5:15: Che tama e hebreo que: “Uchꞌen e jaꞌ tamar taca ut e jaꞌ tabꞌa”, pero war oꞌjron tamar inteꞌ winic taca uwixcar, y que e winic ucꞌani tuaꞌ ucojco ubꞌa tuaꞌ aquetpa tuaꞌ taca uwixcar.
†5:18: Tara caware “awixcar” pero tama e castilla che “manantial” xeꞌ war che que uwixcar inteꞌ aquetpa inteꞌ chojbꞌesiaj tut.