1 Niunenet, jay aquetpa tuaꞌ atoyi lo que abꞌeto inteꞌ apiar jay machi uyubꞌi utoyi,

o jay achuqui ucꞌabꞌ inteꞌ ajnajtir winic tuaꞌ aquetpa chequer que net tuaꞌ itojma,

2 entonces net taca war aturbꞌa inteꞌ wajr toit,

y net aquetpa tuaꞌ itojma lo que abꞌeto otronteꞌ.

3 Y tuaꞌ machi iquetpa cachbꞌir tama tunor era, ubꞌin lo que cꞌani inwaret.

Manxujres abꞌa y quiqui tut jaxir y cꞌajtin tuaꞌ usati acꞌabꞌa tiaꞌ tzꞌijbꞌabꞌir tama e jun.

4 Y machi tuaꞌ acojco este ejcꞌar tuaꞌ iꞌxin tut,

y nien machi tuaꞌ ijiri este que iꞌxin iyojron tacar.

5 Corpes abꞌa bꞌan cocha alocꞌoy aꞌjni incojt masaꞌ tut inteꞌ ajcorom,

y bꞌan cocha alocꞌoy aꞌjni incojt mut tut inteꞌ cororteꞌ tuaꞌ machi acꞌaxi tamar.

6 Pues net xeꞌ ajcꞌoyiret chꞌujcun awira lo que uche e xinich,

y canuen cocha uche tuaꞌ achꞌami e natanyaj.

7 Pues inteꞌ xinich mamajchi umen abꞌijresna,

y nien mamajchi umen arobꞌna tucꞌa tuaꞌ uche,

8 pero jaxir uturbꞌa ubꞌa tuaꞌ umorojse lo que tuaꞌ ucꞌuxi conda matucꞌa e jajar,

y utꞌabꞌse tunor e cosecha lo que umorojse tuaꞌ ucꞌuxi conda ayan e jajar.

9 Y net xeꞌ ajcꞌoyiret ¿cobꞌato tiempo tuaꞌ iquetpa bꞌan taca tuaꞌ taca iwayan?

Y ¿tucꞌa día tuaꞌ iyachpa tuaꞌ ache e patnar?

10 Pero net aware cocha era y che: “Nen cꞌanto inwayan otro imbꞌijc era,

y cꞌani inmeqꞌue nicꞌabꞌ tuaꞌ injiri”, xeꞌ aware.

11 Pero wacchetaca axin watar e tiempo xeꞌ intran conda matucꞌa ayan tuaꞌ acꞌuxi.

Y e tiempo era cꞌani aquetpa bꞌan cocha jay ayopa ani inteꞌ ajxujch tama oꞌtot.

12 Pues cꞌani inchecsu toit tucꞌa uwirnar tin e uputputir ut y tin e ajmabꞌambꞌanir:

amajresian iraj iraj,

13 uwitzru unacꞌut tut inteꞌ uyet ajxujchꞌir conda ayan lo que cꞌani uxujchꞌi tuaꞌ inteꞌ,

y atuchꞌon taca uyoc, y uche e seña taca orucꞌabꞌ.

14 Pues bꞌutꞌur uyalma taca e majresiaj y iraj iraj war ubꞌijnu tucꞌa mabꞌambꞌanir tuaꞌ uche,

y war uche unumse ubꞌobꞌ e inmojr.

15 Y tamar era conda jaxir machi ani war ubꞌijnu jay ayan lo que tuaꞌ acꞌaxi tama ujor,

axin atijresna wacchetaca, y ma cocha erer ucorpes ubꞌa tamar.

16 Pues ayan seis lo que axejbꞌna ut umen Cawinquirar Dios,

y motor esto siete lo que machi atzay uwira:

17 tin e uchecsu taca unacꞌut que otronteꞌ cocha jaxir matucꞌa,

y tin e amajresian taca or uyac,

y tin e axin ucꞌampes ucꞌabꞌ tuaꞌ uchamse tin e matucꞌa war uche,

18 y tin e ubꞌijnu cocha tuaꞌ uche unumse ubꞌa otronteꞌ,

y uyoc tin e aꞌjni wacchetaca tuaꞌ uche e mabꞌambꞌanir.

19 Y axejbꞌna ut umen Cawinquirar Dios inteꞌ ajchecsuyaj xeꞌ amajresian tut inteꞌ juez,

y tin e utꞌabꞌse e qꞌuecraner tujam tin e atzay ani uwira ubꞌobꞌ.

20 Niunenet, ubꞌianen tut tunor niwojroner,

y machi tuaꞌ anajpes lo que ucanset atuꞌ.

21 Tꞌabꞌsen tunor niwojroner tama awalma,

y quete nicanseyaj bꞌan ani cocha jay jax inteꞌ tunyujy xeꞌ chꞌur tama anuc.

22 Pues jay iyubꞌian tut nicanseyaj cꞌani ubꞌijreset conda ayan axambꞌar,

y cꞌani ucojcuet conda iwayan,

y cꞌani upejquet conda ibꞌixcꞌa.

23 Pues lo que inwaret tuaꞌ ache aquetpa bꞌan cocha inteꞌ lámpara xeꞌ tzꞌajbꞌesbꞌir,

y aquetpa bꞌan cocha inteꞌ janchꞌaquenar toit,

y e canseyaj lo que inwajqꞌuet jax xeꞌ tuaꞌ utacret conda ucꞌani tuaꞌ oꞌstes abꞌa tuaꞌ isutpa tama e bꞌir tiaꞌ ayan e cuxtar.

24 Y nicanseyaj cꞌani uqꞌuecꞌojset tuaꞌ machi icꞌaxi tama e mabꞌambꞌanir

conda upejquet inteꞌ ajnajtir ixic xeꞌ galan inchiꞌ uyojroner.

25 Y nien machi tuaꞌ oꞌsre ut umen que galan uwirnar,

y nien machi tuaꞌ awacta abꞌa tuaꞌ icajcha umen que galan asari ut toit.

26 Pues tut inteꞌ ajmabꞌambꞌan ixic tzꞌacar tuaꞌ taca atoyi taca ingojr pan,

pero jay iꞌxin oꞌse abꞌa taca uwixcar otronteꞌ winic erer ichamesna.

27 Y inteꞌ winic, ¿uyubꞌi ca uturbꞌa cora ut cꞌajc tubolsir ucamisa

y machi apuruy ubꞌujc? Pues machi.

28 Y ¿uyubꞌi ca axana inteꞌ winic tujor cora ut cꞌajc y machi apurutna uyoc? Pues machi.

29 Y bꞌan tuaꞌ anumuy taca tin tin xeꞌ axin uyose ubꞌa taca uwixcar otronteꞌ,

aquetpa tuaꞌ unumse ubꞌa tamar.

30 Pues non machi caxejbꞌe ut inteꞌ ajxujch conda ayan lo que uxujchꞌi,

jay war uche umen que war unumse ubꞌa tama e winar.

31 Pero jay ajajpna conda war axujchꞌian

aquetpa tuaꞌ utoyi siete veces lo que atujri lo que uxujchꞌi,

motor que aquetpa tuaꞌ uchoni tunor lo que ayan tama uyotot tuaꞌ utoyi.

32 Pero jax taca tin e uputputir ut xeꞌ axin uyose ubꞌa taca uwixcar otronteꞌ,

cocha war utijres ubꞌa conda uche tunor era.

33 Pero e winic era cꞌani ayobꞌorna umen unoxibꞌ e ixic,

y e subꞌar lo que axin uchꞌami tuaꞌ e inmojr ma tiaꞌ tuaꞌ aquetpa satbꞌir.

34 Y e noxibꞌ cꞌani atzuni tama uwixcar este que aqꞌuijna meyra upater tin e ixin uyose ubꞌa tacar,

y conda acay ubꞌijnu tuaꞌ utoyi tin e uche e mabꞌambꞌanir era, machi tuaꞌ aquetpa incꞌun uwirnar.

35 Y ma cocha erer asisijresna uqꞌuijnar e noxibꞌ era motor que axin ajcꞌuna tuqꞌuic tuqꞌuic tuaꞌ aquetpa toybꞌir tamar lo que chena taca uwixcar,

motor que axin ani ajcꞌuna meyra tumin.