1 Niunenet, turbꞌan abꞌa tama niwojroner,

y machi tuaꞌ anajpes nicanseyaj.

2 Chen lo que inwaret y cꞌani itzay eꞌixna ituruan.

Cojcon nicanseyaj bꞌan cocha acojco uyarqꞌuir unacꞌoit.

3 Cacha nicanseyaj tama or acꞌabꞌ bꞌan ani cocha jay tzꞌijbꞌabꞌir tama inteꞌ anillo,

y tꞌabꞌsen tama awalma tunor lo que cay inwaret tuaꞌ machi anajpes.

4 Yajtan ut e natanyaj bꞌan cocha inteꞌ awijtan,

y chojres ut e bꞌijnusiaj xeꞌ más intam bꞌan cocha achojres ut inteꞌ apiar.

5 Jay ayan e natanyaj tamaret axin ucojcuet tuaꞌ machi iꞌxin taca inteꞌ ajnajtir ixic,

y tuaꞌ machi awacta abꞌa tuaꞌ imajresna umen inteꞌ ixic xeꞌ inchiꞌ uyojroner.

6 Pues tama inyajr conda turen tama niotot war inchꞌujcu inwira chi xeꞌ war axanobꞌ tama e bꞌir,

7 y wacchetaca inwira que war cora chꞌom maxtacobꞌ xeꞌ matucꞌa e natanyaj tamarobꞌ.

Pero ayan incojt tujam e chꞌom maxtacobꞌ era que matucꞌa ubꞌijnusiaj inyajrer.

8 Y conda cꞌotoy tama inteꞌ cruce tama e bꞌir,

inwira que uwajpi e bꞌir xeꞌ axin esto tuyotot e ajnajtir ixic.

9 Pues bꞌan numuy conda warix atꞌerpa e qꞌuin,

y yajaꞌ taca quetpa e chꞌom sitz tama e bꞌir este que ecsijbꞌa.

10 Y wacchetaca locꞌoy tajwina umen e ixic xeꞌ galan bꞌujcsebꞌir bꞌan cocha ubꞌujcse ubꞌa inteꞌ ajmabꞌambꞌan ixic,

y ojron taca inteꞌ bꞌijnusiaj tuaꞌ uchꞌabꞌu uyalma e chꞌom sitz.

11 Pues oꞌjron taca inteꞌ nuxi nuc y chequer que jax inteꞌ xeꞌ machi oꞌbꞌian.

Y ma tiaꞌ aquetpa tuyotot sino que alocꞌoy iraj iraj tuaꞌ usicbꞌa tucꞌa winic tuaꞌ aquetpa tacar otronyajr.

12 Pues jaxir war axin tic taca tama e calle y tama e plaza,

y war axin ta calle xeꞌ tiaꞌ choquem tuaꞌ uwira chi tacar tuaꞌ utajwi ubꞌa.

13 Y conda utajwi ubꞌa taca e chꞌom sitz umori umeqꞌue y utzꞌujtzꞌi utiꞌ,

y taca meyra tzayer ojron taca inteꞌ nuxi nuc y che:

14 “Pues sajmi inchamse inteꞌ arac tuaꞌ imputa tut Cawinquirar Dios tuaꞌ unstes nibꞌa tacar,

y bꞌan cocha era cꞌapa inche lo que cay inware que bꞌan tuaꞌ inche,

pero quetpato imbꞌijc e wer.

15 Y tamar era locꞌoyen tuaꞌ insicbꞌet,

cocha war unsre tuaꞌ inwiret, y era intajwietix.

16 Y nichacteꞌ ustabꞌir taca e cobija xeꞌ más atujri,

lo que ataresna tama e lugar Egipto.

17 Y cay inyari cora perfume xeꞌ más ojtzꞌun,

y inyarito ubꞌan e áloe y e mirra y e canela.

18 Lar tacaren y catzayresic cabꞌa tamar,

y catzayresic cabꞌa este que asacojpa,

19 cocha ninoxibꞌ machi turu taniotot.

Pues jaxir locꞌoy ixin innajt tama uxambꞌar.

20 Y uqꞌueche ixin meyra tumin tuaꞌ achonma,

y machi tuaꞌ asutpa rajxa, sino que cꞌani asutpa esto tama uyuxin e mes,”

che e ajnajtir ixic uyare e chꞌom sitz.

21 Y bꞌan cocha era uchꞌabꞌu uyalma e chꞌom sitz taca meyra ojroner xeꞌ inchiꞌ,

y war utzꞌubꞌru utiꞌ uwira e sitz este que umanxujres tuaꞌ axin tuyotot.

22 Y tamar era e chꞌom sitz ixin tacar bꞌan ani cocha inteꞌ wacax conda war aqꞌuejcha axin tiaꞌ tuaꞌ achamesna,

y bꞌan ani cocha uche inteꞌ masaꞌ conda aturbꞌana inteꞌ lazo tuaꞌ acachpa uyoc tamar jay acꞌotoy tuyejtzꞌer,

23 y wacchetaca ajujra taca inteꞌ sarac este que axin oꞌchoy tuyalma tuaꞌ uchamse.

Pues bꞌan e chꞌom sitz era ubꞌan xeꞌ cꞌani achamay bꞌan ani cocha incojt mut conda acꞌaxi tama inteꞌ cororteꞌ,

xeꞌ machi ani war ubꞌijnu jay cꞌani achamay.

24 Entonces niunenox, ubꞌinic niwojroner,

y chenic lo que war inwareox.

25 Cojcon awalma tuaꞌ machi awacta abꞌa tuaꞌ ipejcna umen inteꞌ ajnajtir ixic cocha era,

y nien machi tuaꞌ inumuy tuyejtzꞌer uyotot.

26 Porque meyra winicobꞌ ixin satpobꞌ umen inteꞌ ajnajtir ixic cocha era,

y meyra winicobꞌ chamesnobꞌ umener.

27 Tin e oꞌchoy tama uyotot e ajnajtir ixic era war axin tama e bꞌir xeꞌ axin esto tut e mujr,

y xeꞌ uqꞌueche axin inteꞌ esto tut e chamer.