8
Conda e Natanyaj upejcon
1 Ubꞌinic conda e Natanyaj upejcox,
y turbꞌanic ibꞌa tamar conda upejcox e bꞌijnusiaj xeꞌ más intam.
2 Pues e Natanyaj war aquetpa tama or e witzir,
y war aquetpa tiaꞌ uxere ubꞌa e bꞌir,
3 y war awawan tama uyocher e chinam
war aꞌru taca inteꞌ nuxi nuc y che:
4 “Winicox, war impejcox taca tunor tin e turobꞌ tama tunor or e rum.
5 Nox xeꞌ machi inata iche bꞌan cocha tin e ayan ubꞌijnusiajobꞌ, canoenic cocha tuaꞌ ibꞌijnu iwira tin e erach y tin e mabꞌambꞌan,
y nox xeꞌ uputputir iut canoenic tuaꞌ inata tucꞌa lo que imbꞌutz tuaꞌ iche.
6 Ubꞌinic ninuc, nen xeꞌ Natanyajen, cocha ayan meyra tuaꞌ inwareox xeꞌ nojta ucꞌampibꞌir,
y erach tunor lo que cꞌani inwareox.
7 Pues erach tunor e ojroner lo que alocꞌoy tama niwej,
cocha axejbꞌna ut nimener tunor e majresiaj.
8 Pues erach tunor e ojroner lo que alocꞌoy tama niwej,
y matucꞌa tuaꞌ inware xeꞌ majresiaj o xeꞌ uche asatpa inteꞌ.
9 Pues tunor niwojroner aquetpa chequer tut tin e oꞌbꞌna ubꞌijnu tin e erach y tin e mabꞌambꞌan,
y aquetpa imbꞌutz tut tin e ayan ucanuar.
10 Turbꞌanic ibꞌa tuaꞌ ichꞌami nicanseyaj cocha más atujri que e plata,
y chꞌamic nicanuar cocha más atujri que e oro.
11 Pues e natanyaj más atujri que cora tunyujy xeꞌ atujri meyra,
y tunor lo que erer cosre cachꞌami tara tor e rum ma cocha erer atujri bꞌan cocha e natanyaj.
12 Pues nen xeꞌ Natanyajen inturuan taca e bꞌijnusiaj xeꞌ más intam,
y innata cocha tuaꞌ intajwi e canuar y cocha tuaꞌ imbꞌijnu tin e más imbꞌutz.
13 Pues tin e umanxujres ubꞌa tut e Dios war uxejbꞌe ut e mabꞌambꞌanir.
Pues nen xeꞌ Natanyajen inxejbꞌe ut tin e uche ubꞌa que jax taca xeꞌ unata,
y tin e uche ubꞌa que más nojta ucꞌampibꞌir que e inmojr, y tin e uche lo que mabꞌambꞌan iraj iraj, y tin e amajresian.
14 Pues tamaren xeꞌ Natanyajen ayan e bꞌijresiaj xeꞌ imbꞌutz,
y ayan e bꞌijnusiaj xeꞌ intam,
y ayan e qꞌuecꞌojsiaj tamaren.
15 Taca nitacarsiaj xeꞌ Natanyajen oꞌbꞌna acꞌotori tin e reyobꞌ,
y tamaren oꞌbꞌna ubꞌijnuobꞌ tin e ajcꞌotorerobꞌ cocha tuaꞌ aquetpa imbꞌutz inteꞌ inteꞌ ley.
16 Pues tacaren xeꞌ Natanyajen oꞌbꞌna acꞌotori e ajcꞌamparobꞌ,
y taca nitacarsiaj e nuquir winicobꞌ ubꞌijnu uwirobꞌ tin e erach.
17 Pues inyajta ut tin e uyajta niut,
y tin tin xeꞌ axin usicbꞌen axin utajwien.
18 Y cꞌani intacre tin e uchꞌamien tuaꞌ aquetpa ajtuminobꞌ y tuaꞌ atajttzꞌobꞌ,
y cꞌani eixna lo que ayan tacarobꞌ y cꞌani alocꞌoy imbꞌutz tunor lo que ubꞌijnu uchiobꞌ.
19 Porque lo que war inwajcꞌox más atujri que e oro xeꞌ más imbꞌutz* E oro xeꞌ más imbꞌutz. Conda atajwina e oro macuir e rum aquetpa yabꞌabꞌir taca e rum o taca e jiꞌ. Entonces tuaꞌ acꞌotoy aquetpa imbꞌutz e oro, ucꞌani tuaꞌ achajpa tama ingojr bꞌejt este que axin ajacha, y entonces axin atꞌabꞌay e sojc tujor e oro tiaꞌ erer aloqꞌuesna. Y bꞌan e plata xeꞌ imbꞌutz ubꞌan. Iranic ubꞌan e Proverbios 27:21.,
y más atujri que e plata xeꞌ más imbꞌutz.
20 Pues nen inxana tama e bꞌir xeꞌ imbꞌutz,
y inxin tama e bꞌir xeꞌ erach.
21 Y tin e uyajta niut cꞌani inche tuaꞌ aquetpa ajtuminobꞌ,
y cꞌani imbꞌutꞌi uyototobꞌ tacar lo que atujri.
22 Pues nen xeꞌ Natanyajen chenen bꞌajxan umen Cawinquirar Dios,
conda merato acay uche tunor lo que ayan.
23 Y turbꞌabꞌiren tama ucajyesnibꞌir tunor era,
conda nien mato tucꞌa or e rum era.
24 Y cuxpen conda mato ani tucꞌa e nuxi jaꞌ,
y conda mato tucꞌa inteꞌ ut jaꞌ tara tor e rum tiaꞌ abꞌocbꞌa alocꞌoy e jaꞌ.
25 Y turenix conda merato achena e sian witzirobꞌ,
y cuxpen conda mato tucꞌa inteꞌ or witzir tara tor e rum.
26 Y cuxpenix conda merato achena or e rum umen e Dios,
y conda matucꞌa nien inteꞌ chor,
y conda matucꞌa nien intzujy rum.
27 Y turenix conda turbꞌana ut e qꞌuin,
y conda turbꞌana tunor utiꞌ or e rum tiaꞌ utajwi ubꞌa taca ut e qꞌuin.
28 Y turenix conda e Dios uturbꞌa e tocar tama ulugar,
y conda uturbꞌa tunor e sian jaꞌ macuir e rum xeꞌ turix tuaꞌ alocꞌoy tama inteꞌ inteꞌ ut jaꞌ lo que ayan tama tunor or e rum.
29 Y turenix conda turbꞌana utiꞌ e nuxi jaꞌ tiaꞌ tuaꞌ aquetruma tuaꞌ machi aꞌjni tic taca,
y turenix conda turbꞌana tunor ucajyesnibꞌir or e rum.
30 Pues turen tuyejtzꞌer e Dios war imbꞌijres cocha tuaꞌ uche tunor e patnar,
y war intzayres tama inteꞌ inteꞌ día,
y nen war intzay inquetpa tacar ubꞌan.
31 Y war intzay inwira or e rum lo que chena umen e Dios,
y tzayen meyra ubꞌan inwira e winicobꞌ xeꞌ chena umener.
32 ’Y tamar era, niunenox, ubꞌinic lo que war inwareox era,
porque tunor tin e axin uchꞌamiobꞌ nibꞌijresiaj axin achojbꞌesnobꞌ.
33 Canuenic tamar lo que war incansiox tuaꞌ ixquetpa ajnatanyajox,
y ira ibꞌijnu que matucꞌa ucꞌampibꞌir.
34 Chojbꞌesbꞌir tin e oꞌbꞌian taniut, nen xeꞌ Natanyajen,
y xeꞌ ucojcuen tuyejtzꞌer niotot
tuaꞌ utajwien conda inlocꞌoy.
35 Porque tunor tin e axin utajwien xeꞌ jaxen e Natanyaj axin utajwi e cuxtar xeꞌ axin eꞌixna ubꞌan,
y axin atzay eꞌrna umen Cawinquirar Dios.
36 Pero tin e usuti upat taniut war uche acꞌaxi tujor lo que intran,
y tunor tin e uxejbꞌe niut, aquetpobꞌ bꞌan cocha jay war ani uyusre uchamer”, che e Natanyaj.
*8:19: E oro xeꞌ más imbꞌutz. Conda atajwina e oro macuir e rum aquetpa yabꞌabꞌir taca e rum o taca e jiꞌ. Entonces tuaꞌ acꞌotoy aquetpa imbꞌutz e oro, ucꞌani tuaꞌ achajpa tama ingojr bꞌejt este que axin ajacha, y entonces axin atꞌabꞌay e sojc tujor e oro tiaꞌ erer aloqꞌuesna. Y bꞌan e plata xeꞌ imbꞌutz ubꞌan. Iranic ubꞌan e Proverbios 27:21.