9
Tin e ayan unatanyaj y tin e uputputir ut
1 Pues e natanyaj aquetpa bꞌan cocha incojt ixic xeꞌ uche uyotot
xeꞌ uqꞌuecꞌojse taca siete oy.
2 Y de allí cay uchamse cora aracꞌobꞌ tuaꞌ uyustes inteꞌ wiar,
y cay uyapru e vino taca uchabꞌir e xux,
y uwabꞌu tor e mesa tuaꞌ uyuchꞌiobꞌ taca e wiar.
3 Y uyebꞌta ixin uman ixictac tuaꞌ upejcobꞌ tunor e gente tuaꞌ acꞌotoyobꞌ tama e wiar,
y ixiobꞌ esto tor e witzir lo que ayan tama e chinam tuaꞌ upejcobꞌ e gente taca inteꞌ nuxi nuc,
4 y che: “Ochenic tama niotot tunorox xeꞌ machi uyubꞌiox ibꞌijnu tin e imbꞌutz
y xeꞌ ucꞌanto más e canuar.
5 Laric wenic tanimesa
y uchꞌenic e vino xeꞌ ustabꞌir nimener.
6 Actanic tuaꞌ ixquetpa uputputir iut y cꞌani ixtzay ixturuan,
y xanenic tacaren tuaꞌ ixcano tama e bꞌijnusiaj xeꞌ más intam”, che e natanyaj.
7 Tin e axin uyare inteꞌ ajsactzener que mabꞌambꞌan lo que war uche cꞌani asutpa aqꞌuijnesna umener,
y tin e uyare inteꞌ ajmabꞌambꞌanir que majax imbꞌutz lo que war uche cꞌani asutpa acꞌayna umener.
8 Y tamar era ira acꞌaye inteꞌ ajsactzener porque jay bꞌan ache jaxir tuaꞌ taca uxejbꞌe oit.
Pero jay apejca tin e ayan e natanyaj tamar tuaꞌ aware que mabꞌambꞌan lo que war uche, jaxir axin uyajta oit.
9 Cansen tin e ayan e natanyaj tamar y axin uchꞌami más e natanyaj,
y cansen tin e erach y axin acꞌotoy acano más.
10 Pues acay acano inteꞌ tucꞌa e natanyaj conda acay ubꞌijnu tuaꞌ umanxujres ubꞌa tut Cawinquirar Dios,
y conda inteꞌ acano más tama Cawinquirar Dios, axin acano tin e bꞌijnusiaj xeꞌ más intam.
11 Pues tin e axin uchꞌami e natanyaj axin aturuan meyra día tara tor e rum,
y axin atzꞌacsena más ujabꞌ.
12 Pues jay ayan e natanyaj tamaret, jax tuaꞌ uyajqꞌuet atuanibꞌir,
pero jay jaxet inteꞌ ajsactzener, aquetpa tuaꞌ anumse abꞌa.
13 E ixic xeꞌ uputputir ut uche unumse ubꞌobꞌ e inmojr,
pero ma tiaꞌ asubꞌajra tamar lo que uche, cocha machi war ubꞌijnu que mabꞌambꞌan tunor era.
14 Pues jaxir aturuan tuyocher uyotot,
xeꞌ aquetpa tor inteꞌ witzir tiaꞌ chequer tunor e chinam,
15 y war upejca tin tin xeꞌ anumuy tama e bꞌir
xeꞌ war taca ubꞌijnuobꞌ tamar lo que aquetpa tuaꞌ uchiobꞌ y che:
16 “Laric tunorox,” che e ixic tut tin e uyacta ubꞌa amajyut,
y uyare tut tin e machi oꞌbꞌna ubꞌijnu y che:
17 “Ochen taniotot, porque e jaꞌ xeꞌ xujchbꞌir más inchiꞌ,* Che era que más inchiꞌ e jaꞌ xeꞌ xujchbꞌir. Pero war oꞌjron tama inteꞌ ajmabꞌambꞌan ixic xeꞌ upejca tuqꞌuic tuqꞌuic winic tuaꞌ uyose ubꞌa tacar.
y lo que acꞌujxa mucur más intzaj,” che e ixic xeꞌ uputputir ut.
18 Pero tin e uyubꞌi uyojroner e ixic era machi ubꞌijnuobꞌ que achamayobꞌ tin tin xeꞌ ochoyobꞌ tuyotot,
y machi unatobꞌ que tin e yopobꞌ bꞌajxan ixiobꞌix tut uchꞌenar e diablo.
*9:17: Che era que más inchiꞌ e jaꞌ xeꞌ xujchbꞌir. Pero war oꞌjron tama inteꞌ ajmabꞌambꞌan ixic xeꞌ upejca tuqꞌuic tuqꞌuic winic tuaꞌ uyose ubꞌa tacar.