10
Ayanto más ojroner xeꞌ nojta ucꞌampibꞌir xeꞌ tzꞌijbꞌabꞌir umen e rey Salomón
1 Pues e rey Salomón utzꞌijbꞌa cora ojroner lo que ayan tara.
Inteꞌ maxtac xeꞌ ayan meyra unatanyaj axin utzayjres utata,
pero inteꞌ maxtac xeꞌ uputputir ut axin uche atzꞌintzꞌa utuꞌ.
2 Jay inteꞌ axin uchꞌami meyra tumin xeꞌ xujchbꞌir, axin acꞌapa wacchetaca,
pero tin e uche lo que erach axin ucorpes ubꞌa tuaꞌ machi achamay wacchetaca.
3 Pues Cawinquirar Dios machi uyacta tuaꞌ achamay umen e winar tin e erach,
pero machi utacre tin e ajmabꞌambꞌanirobꞌ tuaꞌ utajwi tucꞌa tuaꞌ ucꞌuxiobꞌ.
4 Pues tin e ajcꞌoyirobꞌ aquetpa tuaꞌ unumse ubꞌobꞌ umen que matucꞌa utuminobꞌ,
pero tin e uturbꞌa ubꞌobꞌ tuaꞌ apatnobꞌ axin abꞌoro utuminobꞌ.
5 Tin e ayan unatanyaj axin umorojse e cosecha conda turix,
pero tin e intaca awayan conda ucꞌani ani tuaꞌ umorojse e cosecha aquetpa tuaꞌ acꞌaxi e subꞌar tamar.
6 Pues tin e erach cꞌani achojbꞌesna meyra umen e Dios,
pero tunor e ojroner xeꞌ galan xeꞌ alocꞌoy tuyej tin e ajmabꞌambꞌanirobꞌ intaca umuqui e mabꞌambꞌanir lo que war ubꞌijnu uchiobꞌ.
7 Pues tin e erach acꞌajpesna camener taca meyra chojbꞌesiaj,
pero inteꞌ ajmabꞌambꞌan winic axin anajpesna inyajrer.
8 Pues tin e ayan e natanyaj tamar atzay uchꞌami inteꞌ bꞌijresiaj lo que arobꞌna,
pero tin e uputputir ut intaca oꞌjron iraj iraj este que axin asatpa.
9 Tin e uche jax taca lo que imbꞌutz matucꞌa tamar tuaꞌ abꞌacta,
pero tin e amajresian cꞌani atajwina tamar lo que war uche xeꞌ mabꞌambꞌan.
10 Tin e uwitzru unacꞌut tuaꞌ uchecsu que cꞌani uche inteꞌ mabꞌambꞌanir upater otronteꞌ war utares e tzꞌintzꞌar,
pero inteꞌ qꞌuecraner taca e natanyaj utacre inteꞌ tuaꞌ uchꞌami e jiriar.
11 Pues uyojroner tin e erach aquetpa bꞌan cocha inteꞌ ut jaꞌ tiaꞌ erer atajwina e cuxtar xeꞌ eixna,
pero uyojroner inteꞌ ajmabꞌambꞌanir umuqui lo que war ubꞌijnu uche xeꞌ mabꞌambꞌan.
12 Tin e uxejbꞌe ut tin tin xeꞌ turu tuyejtzꞌer axin utꞌabꞌse e qꞌuijnar tacarobꞌ,
pero tin e uyajta ut e inmojr war acꞌumpa taca tin tin xeꞌ war uchiobꞌ e mabꞌambꞌanir upater.
13 Atajwina e natanyaj tama uyojroner tin e obꞌna ubꞌijnu tin e erach y tin e mabꞌambꞌan,
pero uwajpi tuaꞌ ajajtzꞌa tin e machi obꞌna ubꞌijnu jay imbꞌutz o jay majax imbꞌutz lo que uche.
14 Tin e ayan e natanyaj tamar utꞌabꞌse lo que erach tujor,
pero conda oꞌjron tin e uputputir ut axin uche aquetpa intran.
15 Tin e ajtuminobꞌ war acojcnobꞌ umen lo que ayan tacarobꞌ bꞌan cocha jay xojybꞌirobꞌ umen e petzbꞌir tun,
pero tin e matucꞌa ayan tacar war unumse ubꞌobꞌ axin umen que mamajchi umen tuaꞌ atacarnobꞌ.
16 E tuanibꞌir tuaꞌ tin e erach jax e cuxtar xeꞌ imbꞌutz,
pero tin e ajmabꞌambꞌanir axin atojya tamar e mabꞌambꞌanir lo que war uche.
17 Tin e oꞌbꞌianobꞌ conda arobꞌnobꞌ tuaꞌ machi uchiobꞌ e mabꞌambꞌanir axin utajwiobꞌ e cuxtar xeꞌ eꞌixna,
pero tin e machi oꞌbꞌianobꞌ conda arobꞌnobꞌ cocha era axin usatiobꞌ e bꞌir tiaꞌ ayan e cuxtar.
18 Tin e umucres ubꞌa conda ayan tin e war uxejbꞌe ut intaca war amajresian,
y tin e oꞌjron upater otronteꞌ uputputir ut.
19 Tin e intaca oꞌjron meyra axin acꞌaxi tama e mabꞌambꞌanir,
pero tin e ayan e natanyaj tamar axin ucojco ubꞌa tuaꞌ machi oꞌjron meyra.
20 E ojroner lo que alocꞌoy tama uyej tin e erach atujri meyra bꞌan ani cocha e plata xeꞌ imbꞌutz,
pero lo que ayan tama uyalma tin e ajmabꞌambꞌan matucꞌa ucꞌampibꞌir.
21 Uyojroner tin e erach axin utacre meyra gente,
pero tin e uputputir ut axin achamay umen que machi oꞌbꞌna ubꞌijnu uwira tin xeꞌ imbꞌutz.
22 E chojbꞌesiaj tuaꞌ Cawinquirar Dios jax xeꞌ utacre inteꞌ tuaꞌ aquetpa ajtumin,
y machi utares e tzꞌintzꞌar tacar.
23 Pues tin e uputputir ut axin atzay conda uche lo que mabꞌambꞌan,
pero tin e ayan e natanyaj tamar atzay ubꞌijnu tuaꞌ uche lo que imbꞌutz.
24 Lo que ubꞌacre tin e ajmabꞌambꞌan axin acꞌaxi tamar,
pero uyutzeriaj tin e erach axin ajcꞌuna.
25 Pues bꞌan cocha atzꞌo watar inteꞌ nuxi icꞌar xeꞌ acꞌapa usati tunor lo que ayan,
y bꞌan tuaꞌ asajtobꞌ ubꞌan e ajmabꞌambꞌanirobꞌ,
pero tin e erach ma tiaꞌ tuaꞌ atijresnobꞌ.
26 Bꞌan cocha e vinagre uche achꞌajran uyej inteꞌ,
y bꞌan cocha e bꞌutz uche acꞌuxun unacꞌut inteꞌ,
y bꞌan aquetpa tuaꞌ unumse ubꞌa tin e uyajcꞌu upatnar inteꞌ ajcꞌoyir.
27 Tin e umanxujres ubꞌa tut Cawinquirar Dios cꞌani aturuan meyra año,
pero ucuxtar tin e ajmabꞌambꞌanirobꞌ cꞌani axujra.
28 Lo que war ucojco tuaꞌ anumuy xeꞌ imbꞌutz tin e erach axin utzayres,
pero lo que war ani ucojcobꞌ tuaꞌ anumuy xeꞌ imbꞌutz tin e ajmabꞌambꞌanirobꞌ axin asatpa.
29 Pues Cawinquirar Dios ucojco tin e axana tama ubꞌir,
pero axin usati tin e ajmabꞌambꞌanirobꞌ.
30 Tin e war axana erach tama ubꞌir e Dios ma tiaꞌ tuaꞌ acucrema,
pero tin e axanobꞌ tama e mabꞌambꞌanir cꞌani aloqꞌuesnobꞌ wacchetaca tor e rum.
31 E ojroner lo que alocꞌoy tama uyej tin e erach axin ucanse tucꞌa e natanyaj,
pero tin e amajresian uwajpi ani tuaꞌ axujra or uyac.
32 Pues tama uyej tin e erach alocꞌoy e ojroner xeꞌ imbꞌutz,
pero tama uyej tin e ajmabꞌambꞌan alocꞌoy jax taca e ojroner xeꞌ calapir.