1 Cawinquirar Dios uxejbꞌe ut tin e ucꞌampes inteꞌ bꞌijsibꞌ xeꞌ amajresian,

pero atzay uwira tin e ucꞌampes inteꞌ bꞌijsibꞌ xeꞌ erach.

2 Conda inteꞌ axin uche ubꞌa que jax taquix, cꞌani asubꞌarna.

Pero tin e ayan e natanyaj tamar axin umanxujres ubꞌa.

3 Tin e erach axin abꞌijresna tuaꞌ uche lo que imbꞌutz,

pero tin e majax erach axin atijresna umen umabꞌambꞌanir.

4 Tunor e tumin lo que ayan tacar inteꞌ machi tuaꞌ atacarsan conda watar e día conda achecta ujatzꞌuar e Dios,

pero tin e erach axin acojcna tuaꞌ machi achamay conda chꞌom maxtacto.

5 Uyerachir tin e war uche lo que imbꞌutz axin uyustes e bꞌir tiaꞌ tuaꞌ axana,

pero e ajmabꞌambꞌanirobꞌ cꞌani asatpobꞌ umen e mabꞌambꞌanir lo que uchiobꞌ.

6 Uyerachir tin e erach axin ucorpes,

pero tin e ajmabꞌambꞌanirobꞌ cꞌani aquetpa cachbꞌirobꞌ tamar taca umabꞌambꞌanirobꞌ.

7 Pues conda e winic xeꞌ ajmabꞌambꞌan achamay, axin asatpa ubꞌan lo que war ani ucojco tuaꞌ uchꞌami,

y axin acꞌapa lo que cꞌani ani uche taca utumin.

8 Tin e erach cꞌani acorpesna tamar lo que imbꞌacꞌajr uwirnar,

y cꞌani actana acꞌaxi tujor tin e ajmabꞌambꞌanirobꞌ.

9 Tin e ajmabꞌambꞌanirobꞌ axin uyobꞌi uyalma upiarobꞌ taca e ojroner xeꞌ inyaj,

pero e natanyaj ucorpes tin e erach tuaꞌ machi unumse ubꞌa nojta tama tunor era.

10 Conda alocꞌoy imbꞌutz lo que war uche tin e erach, tunor e gente tama e chinam axin atzayobꞌ,

y conda e ajmabꞌambꞌanirobꞌ axin achamayobꞌ tunor e gente tama e chinam cꞌani atzayobꞌ más meyra.

11 Pues conda tin e erachobꞌ ucꞌajtiobꞌ taca e Dios tuaꞌ achojbꞌesna inteꞌ chinam, axin aquetpa inteꞌ nuxi chinam,

pero axin atijresna inteꞌ chinam umen uyojroner tin e ajmabꞌambꞌanirobꞌ.

12 Tin e uputputir ut axin oꞌjron upater upiar,

pero tin e ayan e natanyaj tamar ucojco ubꞌa tuaꞌ machi oꞌjron upater upiar.

13 Tin e axin oꞌjron lo que mabꞌambꞌan upater e inmojr deporsi, axin uchecsu tut e inmojr lo que machi ani tuaꞌ uchecsu,

pero tin e erach unata ucojco ubꞌa machi uchecsu tut e inmojr lo que unata tama upiar.

14 Axin asatpa inteꞌ nuxi chinam jay matucꞌa e bꞌijresiaj xeꞌ imbꞌutz,

pero conda ayan meyra ajbꞌijresiajobꞌ xeꞌ erach tama inteꞌ chinam axin alocꞌoy imbꞌutz lo que uchiobꞌ.

15 Tin e aquetpa fiador tuaꞌ inteꞌ ajnajtir gente aquetpa tuaꞌ unumse ubꞌa,

pero tin e machi aquetpa fiador tuaꞌ otronteꞌ matucꞌa tamar tuaꞌ ubꞌijnu.

16 Inteꞌ ixic xeꞌ incꞌun uwirnar atzay eꞌrna umen e gente,

pero inteꞌ winic xeꞌ imbꞌacꞌajr uwirnar, tumin taca tuaꞌ uchꞌami, pero matucꞌa e tattzꞌarsiaj.

17 Inteꞌ winic xeꞌ incꞌun uwirnar war utacre ubꞌa, cocha axin acꞌajna umen e inmojr ubꞌan,

pero inteꞌ winic xeꞌ imbꞌacꞌajr uwirnar war usati ubꞌa cocha abꞌacꞌajrna umen e inmojr.

18 Conda inteꞌ ajmabꞌambꞌanir apatna, axin uchꞌami meyra tumin, pero machi tuaꞌ eꞌixna,

pero e tuanibꞌir lo que tuaꞌ uchꞌami tin e erach tuaꞌ e Dios ma tiaꞌ tuaꞌ acꞌapa.

19 Tin e uche lo que erach, axin uchꞌami e cuxtar xeꞌ eꞌixna,

pero tin e uche e mabꞌambꞌanir machi eꞌixna aturuan.

20 Cawinquirar Dios uxejbꞌe ut tin e war taca uche e mabꞌambꞌanir,

pero atzay uwira tin e war uchiobꞌ jax taca lo que imbꞌutz.

21 Pues e ajmabꞌambꞌanirobꞌ machi tuaꞌ aquetpobꞌ bꞌan taca, sino que san tuaꞌ uchꞌamiobꞌ e jatzꞌuar,

pero tin e erach cꞌani acorpobꞌ.

22 Inteꞌ ixic xeꞌ galan uwirnar pero matucꞌa ubꞌijnusiaj,

aquetpa bꞌan cocha inteꞌ argolla xeꞌ galan xeꞌ chembꞌir taca e oro xeꞌ chꞌur tama uni inteꞌ chitam.

23 Pues conda alocꞌoy imbꞌutz lo que uyusreobꞌ tin e imbꞌutzꞌobꞌ, axin aquetpa imbꞌutz tut e inmojr.

Pero conda alocꞌoy bꞌan cocha ucꞌaniobꞌ tin e ajmabꞌambꞌanirobꞌ, axin aqꞌuijnobꞌ e inmojr.

24 Pues tin e wechꞌer ucꞌabꞌ tut tin e matucꞌa ayan tacar, axin abꞌoro lo que ayan tacar.

Pero tin e macar ucꞌabꞌ tut e inmojr, axin acꞌapa lo que ayan tacar.

25 Pues tin e wechꞌer ucꞌabꞌ, axin abꞌoro más lo que ayan tacar,

y tin e utacre e inmojr axin atacarna ubꞌan.

26 Pues tin e utꞌabꞌse ucosecha tuaꞌ uchoni conda más war atujri, axin abꞌaxna umen e gente,

pero tin e turix tuaꞌ achonma taca tin e matucꞌa ayan tacar, axin achojbꞌesna.

27 Tin e usicbꞌa tuaꞌ uche lo que imbꞌutz axin atzay eꞌrna umen e inmojr,

pero tin e usicbꞌa cocha tuaꞌ uche unumse ubꞌobꞌ e inmojr, cꞌani achena unumse ubꞌa ubꞌan.

28 Tin e acꞌubꞌseyan tama utumin, axin asatpa bꞌan cocha uyopor e teꞌ xeꞌ taquin.

Pero tin e erach axin aqꞌuecꞌojsena tuaꞌ aturuan meyra año, bꞌan ani cocha inteꞌ teꞌ xeꞌ yaxax uyopor.

29 Tin e uche unumse ubꞌobꞌ tin e turobꞌ tama uyotot utata matucꞌa tuaꞌ uchꞌami conda achamay utata,

y tin e uputputir ut watar e día que axin aquetpa man tuaꞌ tin e ayan e natanyaj tamar.

30 Tin e erach aquetpa bꞌan cocha inteꞌ teꞌ xeꞌ uyajcꞌu e cuxtar tin e ucꞌuxi uyutir,

y tin e ayan e natanyaj tamar axin amorojqꞌui meyra gente tuyejtzꞌer.

31 Jay tin e erach atojyobꞌ tara tor e rum tamar lo que uchiobꞌ xeꞌ imbꞌutz,

entonces tin e ajmabꞌambꞌanirobꞌ, ¿machi ca tuaꞌ unumse ubꞌobꞌ tara tor e rum tamar lo que uchiobꞌ?