1 Tin e uchꞌami e ojroner conda arobꞌna que majax bueno lo que uche, war uyajta ut e natanyaj.

Pero tin e uputputir ut aqꞌuijna conda arobꞌna que mabꞌambꞌan lo que war uche.

2 Pues tin e imbꞌutz turu cꞌani atzay eꞌrna umen Cawinquirar Dios,

pero aqꞌuijna uwira tin e ubꞌijnu uche unumse ubꞌobꞌ e inmojr.

3 Mamajchi uyubꞌi aqꞌuecꞌojsena umen e mabꞌambꞌanir,

pero aqꞌuecꞌo tin e erachobꞌ bꞌan ani cocha inteꞌ teꞌ xeꞌ ayan uwir xeꞌ intam.

4 Pues inteꞌ ixic xeꞌ uche jax taca lo que imbꞌutz cꞌani atajttzꞌa umen unoxibꞌ,

pero inteꞌ ixcarbꞌir xeꞌ axin usubꞌajres unoxibꞌ aquetpa bꞌan ani cocha inteꞌ cáncer tama ubꞌaquer.

5 Tin e erach intaca ubꞌijnu tuaꞌ uche lo que imbꞌutz,

pero tin e ajmabꞌambꞌanirobꞌ intaca uyareon tuaꞌ cache e majresiaj.

6 E ojroner tuaꞌ tin e ajmabꞌambꞌanirobꞌ aquetpa bꞌan cocha inteꞌ wajr ticoit xeꞌ erer cacꞌaxi tamar,

pero e ojroner tuaꞌ tin e erach axin ucorpeson tama e wajr era.

7 Tin e ajmabꞌambꞌanirobꞌ axin achamayobꞌ conda chꞌom maxtacobꞌto y acꞌapobꞌ inyajrer,

pero ufamilia tin e erach cꞌani eꞌixna aturuanobꞌ.

8 Inteꞌ winic xeꞌ oꞌbꞌna ubꞌijnu tin e erach axin atajttzꞌa umen e inmojr,

pero tin e ubꞌijnu tuaꞌ taca uche lo que más calapir axin axejbꞌna ut umen e inmojr.

9 Más ani bueno tuaꞌ aquetpa inteꞌ cualquier winic xeꞌ ayan incojt uman tuaꞌ atacarna umener,

que tuaꞌ aquetpa bꞌan cocha inteꞌ xeꞌ utattzꞌi ubꞌa y xeꞌ matucꞌa ayan tuyotot tuaꞌ ucꞌuxi.

10 Tin e erachobꞌ uturbꞌa ubꞌobꞌ tuaꞌ ucojcobꞌ uyaracꞌobꞌ,

pero tin e ajmabꞌambꞌanirobꞌ uche unumse ubꞌobꞌ uyaracꞌobꞌ.

11 Tin e uturbꞌa ubꞌa tuaꞌ apatna tama urum axin atzꞌacta lo que ucꞌani tuaꞌ ucꞌuxi,

pero tin e matucꞌa ubꞌijnusiaj, intaca unumse e tiempo tuaꞌ uche lo que matucꞌa ucꞌampibꞌir.

12 E ajmabꞌambꞌanir acꞌuxnaqꞌui uwira lo que ayan tuaꞌ e inmojr ajmabꞌambꞌanirobꞌ,

pero tin e erachobꞌ axin alocꞌoy imbꞌutz tunor lo que uchiobꞌ.

13 Inteꞌ ajmabꞌambꞌan winic axin acajcha umen uyojroner xeꞌ mabꞌambꞌan,

pero tin e erachobꞌ aquetpa bꞌambꞌirobꞌ tama e cꞌuxner umen que imbꞌutz uyojronerobꞌ.

14 Conda inteꞌ winic oꞌjron taca meyra natanyaj cꞌani uchꞌami meyra tuanibꞌir,

y tin e apatna meyra taca ucꞌabꞌ cꞌani uchꞌami meyra tuanibꞌir ubꞌan.

15 Tin e uputputir ut war ubꞌijnu que imbꞌutz tunor lo que uche,

pero tin e ayan e natanyaj tamar axin uchꞌami e ojroner tuaꞌ tin e war abꞌijresian.

16 Tin e uputputir ut axin uchecsu ubꞌa wacchetaca que war aqꞌuijna,

pero tin e oꞌbꞌna ubꞌijnu tin e más imbꞌutz machi uyacta ubꞌa tuaꞌ aqꞌuijnesna conda ayan chi umen acꞌayna.

17 Inteꞌ ajchecsuyaj xeꞌ erach axin uchecsu jax taca lo que uwira numuy,

pero inteꞌ ajchecsuyaj xeꞌ majax erach intaca amajresian.

18 Ayan tin e ayobꞌorsan tacar taca uyojroner,

pero uyojroner tin e ayan e natanyaj tamar axin atacarsan bꞌan cocha inteꞌ remedio.

19 Uyojroner tin e erach acꞌotoy anatanwa wacchetaca umen e inmojr que erach,

pero uyojroner tin e amajresian axin achecta wacchetaca que majax erach.

20 Pues bꞌutꞌur uyalma taca e majresiaj tin e ubꞌijnu tuaꞌ uche e mabꞌambꞌanir,

pero tin e uturbꞌa ubꞌa tuaꞌ uche lo que imbꞌutz tut e inmojr, axin alocꞌoy tunor lo que uche.

21 Pues matucꞌa xeꞌ más calapir tuaꞌ acꞌaxi tujor tin e erachobꞌ,

pero tin e ajmabꞌambꞌanirobꞌ axin unumse ubꞌobꞌ iraj iraj.

22 Cawinquirar Dios uxejbꞌe ut tin e amajresian,

pero atzay uwira tin e acꞌapa uche lo que arobꞌna umener.

23 Inteꞌ winic xeꞌ obꞌna ubꞌijnu tin e más imbꞌutz machi uchecsu tunor lo que unata,

pero tin e uputputir ut axin uchecsu wacchetaca que tunor lo que ayan tama uyalma matucꞌa ucꞌampibꞌir.

24 Tin e atzay apatna axin aturbꞌana ajbꞌijresiaj tujor e inmojr,

pero tin e acꞌoyi apatna axin aquetpa inteꞌ man tuaꞌ e inmojr.

25 Conda inteꞌ war amerecna meyra, axin aquetpa imbꞌar tunor era tama uyalma,

pero conda achecsuna inteꞌ ojroner xeꞌ incꞌun tut axin atzayresna.

26 Tin e erach axin ubꞌijres tin e atzay uwira tuaꞌ uchiobꞌ lo que imbꞌutz,

pero tin e ajmabꞌambꞌan axin ubꞌijres ubꞌa tuaꞌ uche más e mabꞌambꞌanir.

27 Tin e acꞌoyi machi uturbꞌa ubꞌa tuaꞌ uchapi uwerir e animal lo que uchamse,

pero tin e atzay apatna axin uchꞌami tunor lo que ucꞌani.

28 E bꞌir xeꞌ erach axin ubꞌijres inteꞌ tuaꞌ utajwi e cuxtar xeꞌ eꞌixna,

y machi tuaꞌ utajwi e chamer tamar conda chꞌom maxtacto.