1 Inteꞌ maxtac xeꞌ ayan e natanyaj tamar axin oꞌbꞌian tut uyojroner utata conda arobꞌna que majax imbꞌutz lo que war uche,

pero inteꞌ ajsactzener machi tuaꞌ oꞌbꞌian conda acꞌayna umen que war uche e mabꞌambꞌanir.

2 Tin e axin oꞌjron lo que imbꞌutz axin ajcꞌuna utuanibꞌir,

pero tin e intran uwirnar intaca uyusre uche e tzꞌojyir upater otronteꞌ.

3 Tin e ucojco uyej tuaꞌ machi oꞌjron lo que mabꞌambꞌan axin ucorpes ucuxtar,

pero tin e axin uyare wacchetaca tuqꞌuic tuqꞌuic ojroner lo que oꞌchoy tama ujor axin asatpa.

4 Tin e ajcꞌoyir uyusre ani tuaꞌ uchꞌami meyra cosa,

pero tin e uturbꞌa ubꞌa tuaꞌ apatna acꞌotoy uchꞌami lo que uyusre.

5 Tin e erach uxejbꞌe ut e majresiaj,

pero tin e ajmabꞌambꞌan mamajchi umen acꞌajna y intaca asubꞌarna.

6 E erachir ucojco tin e war axana imbꞌutz,

pero e mabꞌambꞌanir utijres e ajmabꞌambꞌanirobꞌ.

7 Ayan tin e uche ubꞌa que ayan meyra utumin y matucꞌa ayan tacar,

pero ayan tin e uche ubꞌa que matucꞌa ayan tacar y ayan meyra utumin.

8 Tin e ayan meyra utumin erer utoyi tuaꞌ ucorpes ubꞌa jay ajajbꞌna umen e ajmabꞌambꞌanirobꞌ,

pero tin e matucꞌa utumin ma tiaꞌ tuaꞌ ajajbꞌnobꞌ cocha matucꞌa ayan tacarobꞌ.

9 E janchꞌaquenar lo que ayan tama tin e erach axin ejpray innajt innajt,

pero e janchꞌaquenar lo que ayan cora tuaꞌ tin e ajmabꞌambꞌanirobꞌ axin atajpa.

10 Tin e uche ubꞌa que jax taquix intaca aqꞌuecran iraj iraj,

pero tin e ayan e natanyaj tamar atzay uchꞌami inteꞌ ojroner tuaꞌ tin e abꞌijresian.

11 E tumin lo que amorojsena wacchetaca taca e mabꞌambꞌanir axin asatpa wacchetaca ubꞌan,

pero tin e umorojse e tumin cora cora tama upatnar axin abꞌoro bꞌat e día.

12 Tin e machi uchꞌami lo que cay ucojco ixnix, axin atzꞌintzꞌa tama uyalma,

pero tin e uchꞌami lo que cay ucojco ixnix, aquetpa bꞌan cocha inteꞌ teꞌ xeꞌ uyajcꞌu e cuxtar tin e ucꞌuxi.

13 Tin e uxejbꞌe ut lo que arobꞌna xeꞌ imbꞌutz tuaꞌ uche war utares e cꞌuxner tujor,

pero tin e oꞌbꞌian tut lo que arobꞌna xeꞌ imbꞌutz tuaꞌ uche, axin alocꞌoy imbꞌutz tunor lo que uche.

14 E canseyaj tuaꞌ tin e ayan e natanyaj tamar aquetpa bꞌan cocha inteꞌ ut jaꞌ xeꞌ uyajcꞌu e cuxtar,

y tin e uchꞌami e canseyaj era axin atacarna tuaꞌ anajtran tut tin e imbꞌacꞌajr uwirnar tuaꞌ machi achamesna.

15 Tin e ayan e bꞌijnusiaj xeꞌ más intam tamar axin acꞌajna umen meyra gente,

pero tin e war taca uche e mabꞌambꞌanir war axin tama e bꞌir xeꞌ tiaꞌ ayan e satpar.

16 Tin e oꞌbꞌna ubꞌijnu tin e más imbꞌutz axin uche bꞌan taca cocha ubꞌijnu,

pero tin e uputputir ut machi uche lo que imbꞌutz sino que axin utattzꞌi ubꞌa tamar lo que uche xeꞌ matucꞌa ucꞌampibꞌir.

17 Tin e majax erach xeꞌ uqꞌueche axin inteꞌ ojroner, uche unumse ubꞌa e inmojr.

Pero tin uqꞌueche axin inteꞌ ojroner bꞌan cocha ucꞌani utares e jiriar tut tin e uyubꞌi e ojroner era.

18 Tin e machi oꞌbꞌian conda arobꞌna tuaꞌ machi uche lo que mabꞌambꞌan, acꞌotoy aquetpa que matucꞌa ayan tacar y axin asubꞌajresna,

pero tin e axin oꞌbꞌian conda arobꞌna que mabꞌambꞌan lo que war uche, axin atajttzꞌa.

19 Tin e axin uchꞌami lo que cay uyusre uchꞌami ixnix, axin atzay meyra tama uyalma,

pero tin e uputputir ut machi acꞌotoy uchꞌami lo que uyusre umen que machi cꞌani uyacta e mabꞌambꞌanir.

20 Tin e axana taca tin e ayan e natanyaj tamar axin uchꞌami e natanyaj ubꞌan,

pero tin e axana taca tin e uputputir ut aquetpa tuaꞌ unumse ubꞌa meyra.

21 Tin e ajmabꞌambꞌanirobꞌ aquetpa tuaꞌ unumse ubꞌobꞌ iraj iraj,

pero tin e erach axin atacarnobꞌ tuaꞌ alocꞌoy imbꞌutz lo que axin uchiobꞌ.

22 Inteꞌ winic xeꞌ imbꞌutz axin uyacta inteꞌ herencia taca usitzꞌobꞌ,

pero tunor lo que ayan tuaꞌ tin e ajmabꞌambꞌanirobꞌ cꞌani ajcꞌunobꞌ tin e erachobꞌ conda achamayobꞌ.

23 Ayan conda alocꞌoy meyra cosecha tama uyoc uchor tin e matucꞌa ayan tacar,

pero tin e ajmabꞌambꞌanirobꞌ axin uxujchꞌi tunor e cosecha era.

24 Tin e machi uwatzꞌi umaxtac conda uchiobꞌ lo que mabꞌambꞌan war uchectes ubꞌa que machi uyajta ut umaxtac,

pero tin e uyajta ut umaxtac uwatzꞌi conda bꞌiqꞌuitto tuaꞌ acano tuaꞌ machi uche e mabꞌambꞌanir.

25 Tin e erach axin awiobꞌ este que abꞌutcꞌa unacꞌobꞌ,

pero e ajmabꞌambꞌanirobꞌ axin aquetpobꞌ taca e winar.