1 Pues e ixic xeꞌ ayan e natanyaj tamar oꞌbꞌna ucojco tin e turobꞌ tama uyotot,

pero e ixic xeꞌ uputputir ut jaxach utijres uyotot.

2 Tin e axana imbꞌutz umanxujres ubꞌa tut Cawinquirar Dios,

pero tin e axana tama e mabꞌambꞌanir uxejbꞌe ut e Dios.

3 Lo que oꞌjron tin e uputputir ut asutpa acꞌaxi tujor,

pero lo que oꞌjron tin e ayan e natanyaj tamar war acojcna umener.

4 Conda matucꞌa inteꞌ wacax xeꞌ uche arar e rum, aquetpa limpio e lugar tiaꞌ aturuanobꞌ,

pero conda ayan inteꞌ wacax xeꞌ aqꞌuecꞌo tuaꞌ uche arar e chor axin abꞌoro meyra cosecha.

5 Inteꞌ ajchecsuyaj xeꞌ erach axin uchecsu jax taca lo que uwira numuy,

pero inteꞌ ajchecsuyaj xeꞌ ajmabꞌambꞌan intaca amajresian.

6 Jay inteꞌ ajsactzener acay usicbꞌa e natanyaj, machi tuaꞌ utajwi.

Pero tin e oꞌbꞌna ubꞌijnu tin e imbꞌutz y tin e mabꞌambꞌan ma intran tuaꞌ acano tucꞌa e natanyaj.

7 Ira ixana taca tin e uputputir ut,

cocha jaxir ma tiaꞌ tuaꞌ ucanset lo que ayan ucꞌampibꞌir.

8 Tin e ayan e natanyaj tamar unatobꞌ tin e erer uchiobꞌ y tin e ma erer uchiobꞌ,

pero tin e uputputir ut uchebꞌiobꞌ que imbꞌutz tunor lo que uchiobꞌ, y tamar era axin umajres ubꞌobꞌ.

9 Tin e uputputir ut intaca asactzene conda uche lo que mabꞌambꞌan upater otronteꞌ,

pero tin e erach turix tuaꞌ ucꞌajti e cꞌumpar taca tin e uqꞌuijnes.

10 Pues jay inteꞌ war atzꞌintzꞌa o jay war atzay meyra tama uyalma, jax taca xeꞌ war unata tunor era,

y mamajchi más erer unata lo que ayan tama uyalma.

11 E otot xeꞌ achena umen e ajmabꞌambꞌanirobꞌ axin atijresna,

pero e otot xeꞌ achena umen tin e erach axin eꞌixna.

12 Ayan e bꞌir xeꞌ uchebꞌe inteꞌ que imbꞌutz,

pero tama ucꞌapesnibꞌir ayan e chamer.

13 Ayan tin e atzene motor que war unumse ubꞌa tama uyalma,

pero conda acꞌapa e tzener aquetpato taca e tzꞌintzꞌar.

14 Tin e uputputir ut machi uyacta tuaꞌ uche e mabꞌambꞌanir, y tamar era aquetpa tuaꞌ atojya tamar lo que uche.

Pero tin e acꞌapa uche tunor lo que imbꞌutz, axin atojya tamar lo que uche ubꞌan.

15 Inteꞌ winic xeꞌ machi oꞌbꞌna ubꞌijnu, axin amajyut wacchetaca.

Pero tin e oꞌbꞌna ubꞌijnu tin e más imbꞌutz axin ubꞌijnu uwira tin e bꞌir tiaꞌ tuaꞌ axana.

16 Tin e ayan e natanyaj tamar anajtiri tut e mabꞌambꞌanir,

pero tin e uputputir ut matucꞌa ucꞌampibꞌir tut jay mabꞌambꞌan lo que war ubꞌijnu uche,

y intaca uche lo que más atzay uche.

17 Inteꞌ winic xeꞌ axin aqꞌuijna wacchetaca axin uche lo que matucꞌa ucꞌampibꞌir iraj iraj,

y tin e ubꞌijnu tuaꞌ uche e mabꞌambꞌanir cꞌani axejbꞌna ut umen e inmojr.

18 Tin e uputputir ut acꞌaxi tujorobꞌ lo que tawar tuaꞌ uchꞌamiobꞌ umen que uchiobꞌ lo que matucꞌa ucꞌampibꞌir iraj iraj,

pero tin e oꞌbꞌna ubꞌijnu tamar lo que más imbꞌutz, axin atojya taca e canuar.

19 Watar e día conda tin e ajmabꞌambꞌanirobꞌ cꞌani acotuanobꞌ tut tin e erachobꞌ,

y taca e manxujresiaj cꞌani awawanobꞌ tuyejtzꞌer uyotot tin e erachobꞌ tuaꞌ ucꞌajtiobꞌ e tacarsiaj tacarobꞌ.

20 Pues tin e matucꞌa utumin axejbꞌna utobꞌ umen upiarobꞌ,

pero tin e ayan meyra utumin axin acꞌajnobꞌ umen meyra gente.

21 Tin e uxejbꞌe ut tin e aturuan tuyejtzꞌer war uche e mabꞌambꞌanir,

pero tin e incꞌun uwirnar tut tin e matucꞌa ayan tacar axin achojbꞌesna ut umen e Dios.

22 Tin e usicbꞌa tucꞌa mabꞌambꞌanir tuaꞌ uche otronyajr war axana tama e bꞌir tiaꞌ ayan e satpar,

pero tin e usicbꞌa lo que imbꞌutz tuaꞌ uche axin acꞌajna y axin atzay eꞌrna umen meyra gente.

23 Tunor tin e apatnobꞌ ayan utuanibꞌirobꞌ,

pero tin e intaca oꞌjronobꞌ axin aquetpobꞌ tzajtaca utobꞌ.

24 Inteꞌ tuanibꞌir lo que axin uchꞌami tin e ayan e natanyaj tamar jax e tumin,

pero e tuanibꞌir tuaꞌ tin e uputputir ut jax taca lo que matucꞌa ucꞌampibꞌir.

25 Inteꞌ ajchecsuyaj xeꞌ erach axin ucorpes ucuxtar tin e matucꞌa war uche,

pero inteꞌ ajchecsuyaj xeꞌ majax erach machi utacre tin e matucꞌa war uche, sino que intaca amajresian.

26 Tin e oꞌbꞌian tut e Dios cꞌani aqꞌuecꞌojsena umener,

y cꞌani acojcna umaxtacobꞌ ubꞌan.

27 Conda camanxujres cabꞌa tut e Dios aquetpa bꞌan cocha inteꞌ ut jaꞌ tiaꞌ erer cachꞌami e cuxtar,

xeꞌ axin ucorpeson tuaꞌ machi cacꞌaxi tama uchꞌenar e chamer.

28 Conda ayan meyra gente tama inteꞌ chinam cꞌani atajttzꞌa meyra e rey,

pero tiaꞌ ayan chacojt taca e gente tama inteꞌ chinam axin asatpa ucꞌotorer tin e war acꞌotori.

29 Tin e machi aqꞌuijna wacchetaca ayan e natanyaj tamar,

pero tin e axin aqꞌuijna wacchetaca war uchectes ubꞌa que uputputir ut.

30 E jiriar lo que ayan tama uyalma inteꞌ utares e tzꞌacpar,

pero e merecnar uche oꞌcꞌoy ubꞌaquer inteꞌ.

31 Tin e uche tzajtzaj tin e matucꞌa ayan tacar war ucꞌoyres e Dios xeꞌ uche e gente era,

pero tin e incꞌun uwirnar tut tin e matucꞌa ayan tacar war utattzꞌi e Dios.

32 Pues tin e ajmabꞌambꞌanirobꞌ cꞌani achamayobꞌ umen umabꞌambꞌanir,

pero tin e erachobꞌ cꞌani acojcnobꞌ motor que axin achamayobꞌ umen que war uchiobꞌ lo que erach iraj iraj.

33 Turu e natanyaj tama uyalma tin e obꞌna ubꞌijnu tin e erach y tin e mabꞌambꞌan,

pero e natanyaj machi aquetpa tama tin e uputputir ut.

34 Jay erach tin e turobꞌ tama inteꞌ chinam axin atajttzꞌobꞌ meyra,

pero inteꞌ chinam tiaꞌ achena e mabꞌambꞌanir umen tunor e gente axin aquetpa inteꞌ subꞌar.

35 Inteꞌ rey axin atzay uwira inteꞌ man xeꞌ uturbꞌa ubꞌa tama e patnar,

pero inteꞌ man xeꞌ usubꞌajres e rey axin ajajtzꞌa.