1 Pues conda incꞌun cawojroner tut tin e war ucꞌayon axin asisa uqꞌuijnar,

pero jay asutpa cacꞌaye tin e war aqꞌuijna, axin aqꞌuijna más.

2 Conda oꞌjron tin e ayan e natanyaj tamar, axin atzay tin e uyubꞌiobꞌ uyojroner y cꞌani uyubꞌiobꞌ más,

pero conda oꞌjron tin e uputputir ut aquetpa chequer que matucꞌa ucꞌampibꞌir uyojroner.

3 Pues Cawinquirar Dios war uwira tunor lo que anumuy tic taca,

y war uchꞌujcu uwira tunor lo que uche tin e imbꞌutz y tunor lo que uche tin e ajmabꞌambꞌan.

4 Conda alocꞌoy inteꞌ ojroner xeꞌ incꞌun tama uyej inteꞌ aquetpa bꞌan cocha uyutir inteꞌ teꞌ xeꞌ uyajcꞌu e cuxtar,

pero inteꞌ ojroner xeꞌ calapir axin uyobꞌi uyalma inteꞌ.

5 Tin e uputputir ut axin uxejbꞌe ut e jatzꞌuar tuaꞌ utata,

pero tin e atzay uchꞌami e bꞌijresiaj tuaꞌ utata war uchectes ubꞌa que ayan e natanyaj tamar.

6 Tama uyotot tin e erach ayan meyra lo que atujri,

pero lo que ayan taca tin e ajmabꞌambꞌan uche unumse ubꞌa taca meyra cꞌuxner.

7 E ojroner lo que alocꞌoy tama uyej tin e ayan e natanyaj tamar axin ucanse e inmojr lo que más imbꞌutz,

pero matucꞌa ucꞌampibꞌir lo que ayan tama uyalma tin e uputputir ut.

8 Cawinquirar Dios machi atzay uwira e arac xeꞌ achamesna tut umen tin e machi cꞌani uyacta umabꞌambꞌanir,

pero atzay uyubꞌi lo que ucꞌajtiobꞌ tacar tin e erachobꞌ.

9 Cawinquirar Dios uxejbꞌe ut e bꞌir tuaꞌ tin e ajmabꞌambꞌanirobꞌ,

pero uyajta ut tin e axana tama e bꞌir xeꞌ erach.

10 Pues axin acꞌaxi e jatzꞌuar tujor tin e axin uyacta e bꞌir xeꞌ erach,

y tin e uxejbꞌe ut e ojroner conda arobꞌna que majax bueno lo que war uche, cꞌani achamay.

11 Pues Cawinquirar Dios unata lo que war anumuy tama e lugar tiaꞌ aquetpobꞌ e chamenobꞌ,

y unata lo que war anumuy tama e lugar tiaꞌ aquetpa uchꞌenir e diablo ubꞌan.

Y ¿machi ca unata ubꞌan tunor lo que war anumuy tama cawalma non?

12 Inteꞌ ajsactzener machi atzay uwira tin e uyare que war uche e mabꞌambꞌanir,

y machi ucꞌani e bꞌijresiaj tuaꞌ tin e ayan e natanyaj tamar.

13 Conda inteꞌ war atzay tama uyalma aquetpa chequer tama uyeroj ubꞌan,

pero tin e war unumse ubꞌa tama uyalma aquetpa chequer tama uyeroj que war amerecna.

14 Tin e oꞌbꞌna ubꞌijnu tin e erach y tin e mabꞌambꞌan usicbꞌa más e canuar,

pero tin e uputputir ut atzay uturbꞌa ubꞌa tamar lo que matucꞌa ucꞌampibꞌir.

15 Tin e war atzꞌintzꞌa tama uyalma, axin unumse ubꞌa tamar lo que intran ajqꞌuin ajqꞌuin,

pero tin e war atzay tama uyalma aquetpa bꞌan cocha inteꞌ nojqꞌuin iraj iraj tut.

16 Pues más nojta ucꞌampibꞌir que inteꞌ umanxujres ubꞌa tut Cawinquirar Dios motor que majax meyra lo que ayan tacar,

que tuaꞌ axin aquetpa inteꞌ ajtumin winic xeꞌ war unumse ubꞌa iraj iraj.

17 Más ani imbꞌutz tuaꞌ cacꞌuxi jax taca e car jay cacꞌuxi tacar tin e uyajta coit,

que tuaꞌ cacꞌuxi e sian wer jay aquetpa tuaꞌ cacꞌuxi tacar tin e uxejbꞌe coit.

18 Tin e aqꞌuijna wacchetaca axin utꞌabꞌse e qꞌuecraner iraj iraj,

pero tin e ucojco ubꞌa tuaꞌ machi aqꞌuijna wacchetaca axin usisijres.

19 Pues e bꞌir tiaꞌ axana tin e ajcꞌoyir aquetpa bꞌan cocha jay bꞌutꞌur ani taca e sian tꞌix,

pero e bꞌir tiaꞌ axana tin e uturbꞌa ubꞌa tama e patnar, majax intran.

20 Inteꞌ maxtac xeꞌ ayan e natanyaj tamar axin utzayjres utata y utuꞌ,

pero inteꞌ maxtac xeꞌ uputputir ut war uxejbꞌe utobꞌ.

21 Inteꞌ winic xeꞌ machi oꞌbꞌna ubꞌijnu tin e imbꞌutz y tin e mabꞌambꞌan, atzay aquetpa uputputir ut,

pero tin e ayan ubꞌijnusiaj xeꞌ intam axin ubꞌijnu tuaꞌ uche lo que imbꞌutz.

22 Machi alocꞌoy lo que ubꞌijnu uche inteꞌ jay machi ucꞌajti e bꞌijresiaj tuaꞌ tin e más unata,

pero axin alocꞌoy lo que ubꞌijnu uche inteꞌ jay ucꞌajti meyra bꞌijresiaj bꞌajxan.

23 Atzay e winic conda oꞌbꞌna asutpa uyare inteꞌ ojroner xeꞌ bꞌan cocha uwajpi,

y más atzay conda uyare tama e momento conda ucꞌani.

24 Tin e ayan e natanyaj tamar axana tama e bꞌir xeꞌ tiaꞌ eꞌixna e cuxtar,

y machi axana tama e bꞌir xeꞌ acꞌotoy tiaꞌ aquetpobꞌ e chamenobꞌ.

25 Cawinquirar Dios axin ucucru uyotot tin e war uche ubꞌa que jax taquix,

pero war ucojco tunor urumobꞌ e ixictac xeꞌ chamen uviejobꞌ.

26 Cawinquirar Dios uxejbꞌe ut lo que war ubꞌijnu uchiobꞌ tin e ajmabꞌambꞌanirobꞌ,

pero atzay uyubꞌi e ojroner xeꞌ incꞌun tuaꞌ tin e erachobꞌ.

27 Tin e uturbꞌa ubꞌa tuaꞌ uchꞌami meyra tumin taca e mabꞌambꞌanir axin uche unumse ubꞌobꞌ tunor ufamilia,

pero tin e machi atzay uchꞌami e tumin tuaꞌ uche e mabꞌambꞌanir cꞌani aturuan meyra tiempo tara tor e rum.

28 Tin e erach axin ubꞌijnu bꞌajxan tamar lo que cꞌani uyare,

pero tin e ajmabꞌambꞌan intaca uyare tuqꞌuic tuqꞌuic mabꞌambꞌan ojroner lo que ubꞌijnu.

29 Cawinquirar Dios machi uyubꞌi lo que ucꞌajtiobꞌ tacar tin e ajmabꞌambꞌanirobꞌ,

pero uyubꞌi unuc tin e erach conda ucꞌajtiobꞌ tacar.

30 Conda atzay uyeroj tin e turu ticawejtzꞌer, axin utzayjres cawalma,

y conda achecsuna inteꞌ ojroner ticoit xeꞌ galan, axin utꞌabꞌse cawalma ubꞌan.

31 Tin e uchꞌami inteꞌ ojroner conda arobꞌna que mabꞌambꞌan lo que war uche,

acꞌotoy aquetpa intera taca tin e ayan e natanyaj tamar.

32 Tin e aqꞌuijna conda arobꞌna tuaꞌ machi uche e mabꞌambꞌanir jax taca war uxejbꞌe ut ubꞌa,

pero tin e oꞌbꞌian tut inteꞌ ojroner conda arobꞌna tuaꞌ machi uche e mabꞌambꞌanir acꞌotoy uchꞌami más e canuar xeꞌ intam.

33 Conda camanxujres cabꞌa tut Cawinquirar Dios war cacani e natanyaj,

y inteꞌ ma erer uchꞌami e tattzꞌarsiaj este que axin umanxujres ubꞌa.