1 Inteꞌ winic erer ubꞌijnu tama uyalma lo que cꞌani uche,

pero tama ucꞌapesnibꞌir tunor era jax Cawinquirar Dios xeꞌ ubꞌijnu tucꞌa ucꞌani tuaꞌ achempa.

2 Pues tunor lo que uche inteꞌ winic aquetpa imbꞌutz tut,

pero Cawinquirar Dios war uchꞌujcu uwira lo que ayan tama uyalma.

3 Turbꞌan tunor lo que cꞌani ache tama ucꞌabꞌ Cawinquirar Dios,

y cꞌani alocꞌoy imbꞌutz tunor lo que iꞌxin ache.

4 Pues ayan ucꞌampibꞌir tunor lo que chembꞌir umen Cawinquirar Dios,

motor tin e ajmabꞌambꞌanirobꞌ chembꞌir umener tuaꞌ uchꞌami e jatzꞌuar conda achecta e día.

5 Cawinquirar Dios uxejbꞌe ut tunor tin e uche ubꞌobꞌ que jax taquix,

y tamar era cꞌani ixto uchꞌami e jatzꞌuar.

6 Tin e ma tiaꞌ uyacta tuaꞌ uchecsu e cꞌunersiaj tut e Dios

y tin e ma tiaꞌ uyacta tuaꞌ acꞌapa uche lo que uyare, axin aquetpa macbꞌir umabꞌambꞌanir,

y tin e umanxujres ubꞌa tut Cawinquirar Dios machi tuaꞌ unumse ubꞌobꞌ tamar lo que imbꞌacꞌajr uwirnar.

7 Conda ucuxtar inteꞌ winic aquetpa imbꞌutz tut Cawinquirar Dios,

uche asisa uyalma tin e war ani aqꞌuijna uwira e winic era.

8 Más nojta ucꞌampibꞌir tuaꞌ uchꞌami imbꞌijc taca utuanibꞌir tin e war apatna jay war uche taca inteꞌ erachir,

que tuaꞌ axin uchꞌami meyra tumin tama inteꞌ patnar xeꞌ majax erach.

9 Inteꞌ winic axin ubꞌijnu tama uyalma lo que cꞌani uche,

pero jax Cawinquirar Dios xeꞌ ubꞌijres tucꞌa tuaꞌ uche.

10 Jay inteꞌ rey axin oꞌjron bꞌan taca cocha abꞌijresna umen e Dios,

entonces axin ubꞌijnu uwira jax taca lo que erach.

11 Cawinquirar Dios war ucꞌani tuaꞌ cacꞌampes jax taca e bꞌijsibꞌ xeꞌ erach,

y erach tunor e bꞌijsibꞌ lo que ayan tama ubolsa Cadiosir, cocha chembꞌir umener.

12 Pues e reyobꞌ uxejbꞌiobꞌ ut tin e uchiobꞌ e mabꞌambꞌanir,

porque conda e gente axin uchiobꞌ lo que erach, axin aqꞌuecꞌo ucꞌotorer e reyobꞌ.

13 Inteꞌ rey axin atzay conda uyubꞌi oꞌjron tin e machi amajresian,

y axin uyajta ut tin e oꞌjron jax taca lo que erach.

14 Imbꞌacꞌajr uwirnar inteꞌ rey conda aqꞌuijna, cocha erer uyare tuaꞌ achamesna inteꞌ,

pero tin e ayan e natanyaj tamar, uturbꞌa ubꞌa tuaꞌ usisijres uqꞌuijnar.

15 Conda inteꞌ rey atzay, mamajchi tuaꞌ arobꞌna tuaꞌ achamesna umener,

y e cꞌunersiaj lo que ayan tamar aquetpa galan bꞌan cocha conda acꞌaxi e jajar tama ucajyesnibꞌir e invierno.

16 Más nojta ucꞌampibꞌir tuaꞌ cachꞌami e natanyaj que tuaꞌ cachꞌami meyra oro,

y más nojta ucꞌampibꞌir tuaꞌ cachꞌami e bꞌijnusiaj xeꞌ intam que tuaꞌ cachꞌami meyra plata.

17 Tin e axana tama e bꞌir xeꞌ erach, anajtiri tut e mabꞌambꞌanir,

y tin e ucojco ubꞌa war ucorpes ucuxtar.

18 Pues tin e axin uche ubꞌa que jax taquix war upasi e bꞌir tut tiaꞌ ayan e satpar,

y tin e uche ubꞌa que otronteꞌ cocha jaxir matucꞌa war upasi inteꞌ chꞌen tut tiaꞌ tuaꞌ oꞌjri.

19 Más ani nojta ucꞌampibꞌir tuaꞌ camanxujres cabꞌa motor que matucꞌa ayan tacaron,

que tuaꞌ caxere lo que xujchbꞌir taca tin e uche ubꞌobꞌ que jax taquix.

20 Tin e uturbꞌa ubꞌa tuaꞌ uchꞌami e canseyaj xeꞌ erach cꞌani alocꞌoy imbꞌutz lo que uche,

y tin e acꞌubꞌseyan tama Cawinquirar Dios cꞌani uchꞌami meyra tzayer.

21 Tin e ayan e natanyaj tamar cꞌani arobꞌna que oꞌbꞌna ubꞌijnu tin e imbꞌutz y tin e mabꞌambꞌan,

y tin e galan uyojroner axin utacre tin e uyubꞌi unuc tuaꞌ uchiobꞌ lo que imbꞌutz.

22 Tin e oꞌbꞌna ubꞌijnu tin e imbꞌutz y tin e mabꞌambꞌan aquetpa bꞌan cocha inteꞌ ut jaꞌ xeꞌ uyajcꞌu e cuxtar,

pero tin e uputputir ut aquetpa tuaꞌ acꞌaxi e jatzꞌuar tujorobꞌ umen que ma tiaꞌ oꞌbꞌianobꞌ.

23 Uyalma tin e ayan e natanyaj tamar axin ubꞌijres uyej cocha tuaꞌ oꞌjron,

y e ojroner xeꞌ galan lo que alocꞌoy tama uyej axin utacre tin e uyubꞌi.

24 Inteꞌ ojroner xeꞌ incꞌun aquetpa galan tut inteꞌ bꞌan cocha e chabꞌ

y axin uchires cawalma y utzꞌacpeson bꞌan cocha inteꞌ remedio.

25 Ayan inteꞌ bꞌir xeꞌ erer ubꞌijnu inteꞌ que imbꞌutz,

pero tama ucꞌapesnibꞌir cꞌani utajwi e chamer.

26 Inteꞌ ajpatnar axin uturbꞌa ubꞌa tuaꞌ apatna tuaꞌ utajwi e tumin tuaꞌ uyubꞌi aweꞌ,

y conda achecta e winar tamar axin apatna más.

27 Inteꞌ ajmabꞌambꞌan winic usicbꞌa tucꞌa mabꞌambꞌanir erer uche upater otronteꞌ,

y e ojroner xeꞌ alocꞌoy tama uyej aquetpa bꞌan ani cocha inteꞌ cꞌajc xeꞌ usati tunor tin e turobꞌ tuyejtzꞌer.

28 Inteꞌ ajmabꞌambꞌan winic utꞌabꞌse e qꞌuecraner tujam e inmojr,

y inteꞌ ojroner upater otronteꞌ uxere tin e atzay ani uwira ubꞌobꞌ.

29 Inteꞌ winic xeꞌ atzay ayobꞌorsan axin upejca upiarobꞌ tuaꞌ ayobꞌorsanobꞌ ubꞌan,

y ubꞌijresobꞌ tuaꞌ axanobꞌ tama e bꞌir xeꞌ tiaꞌ ayan e satpar.

30 Pues tin e war ubꞌijnu uche e mabꞌambꞌanir upater otronteꞌ uwitzruꞌ unacꞌut tut upiar,

y ucꞌuxru upiquir utiꞌ conda war ubꞌijnu tucꞌa mabꞌambꞌanir tuaꞌ uche.

31 Tin e sacsac utzutzer ujor tawar tuaꞌ uchꞌami e tattzꞌarsiaj,

cocha bꞌan aquetpa ujor tin e axana erach tama ucuxtar tara tor e rum.

32 Más nojta ucꞌampibꞌir que inteꞌ ucojco ubꞌa tuaꞌ machi aqꞌuijna wacchetaca, que tuaꞌ uchꞌami meyra qꞌuecꞌojsiaj.

Y más nojta ucꞌampibꞌir que inteꞌ oꞌbꞌna acꞌotori tama uyalma, que tuaꞌ oꞌbꞌna ucucru inteꞌ chinam.

33 Pues inteꞌ winic erer uꞌri e Urim tuaꞌ unata lo que ucꞌani tuaꞌ uche,

pero jax Cawinquirar Dios xeꞌ uche alocꞌoy bꞌan cocha ucꞌani.