1 Más imbꞌutz tuaꞌ cacꞌuxi e taquin paꞌ tama inteꞌ otot tiaꞌ ayan e jiriar,

que tuaꞌ cacꞌuxi inteꞌ nuxi wiar tiaꞌ ayan e qꞌuijnar.

2 Inteꞌ man xeꞌ ayan e natanyaj tamar axin acꞌotori tujor inteꞌ unembꞌir xeꞌ uputputir ut bꞌat e día,

y tamar era axin uchꞌami inteꞌ herencia bꞌan cocha jay jax ani inteꞌ unembꞌir.

3 E plata y e oro axin achajpa tuaꞌ acꞌotoy unata inteꞌ jay imbꞌutz* Iranic e nota lo que ayan tama e Proverbios 8:19 tuaꞌ iwira más tama e plata xeꞌ imbꞌutz. ,

y Cawinquirar Dios uchꞌujcu uwira lo que ayan tama uyalma inteꞌ winic jay imbꞌutz o jay majax imbꞌutz.

4 Tin e ajmabꞌambꞌan axin uchiquini inteꞌ mabꞌambꞌan ojroner,

y tin e ajmajresiaj atzay uyubꞌi inteꞌ ojroner upater otronteꞌ.

5 Tin e asactzene uwira tin e matucꞌa ayan tacar war uqꞌuijnes ut e Dios xeꞌ uche e gente era,

y tin e atzay uwira lo que war unumse ubꞌa otronteꞌ cꞌani uchꞌami e jatzꞌuar.

6 E tata viejobꞌirobꞌ axin atzayresnobꞌ meyra umen usitzꞌobꞌ,

y e unembꞌirobꞌ axin atzayobꞌ meyra tama utatobꞌ.

7 Machi uwajpi tuaꞌ alocꞌoy imbꞌutz uyojroner tin e uputputir ut,

y machi uwajpi tuaꞌ amajresian inteꞌ nuxi ajcꞌampar.

8 Alocꞌoy imbꞌutz tut tin e unata atojma tuaꞌ achena e mabꞌambꞌanir,

y tin e utoyi otronteꞌ tuaꞌ uche lo que ma ani tuaꞌ uche, uchebꞌe que cꞌani alocꞌoy imbꞌutz tunor lo que ubꞌijnu.

9 Tin e axin acꞌumpa taca tin e uche e mabꞌambꞌanir upater war uche aqꞌuecꞌo e cꞌunersiaj tacar,

pero jay asutpa uchecsu e mabꞌambꞌanir otronyajr, war utijres e cꞌunersiaj lo que ayan ani tacar.

10 Tzꞌacar tuaꞌ acano tin e oꞌbꞌna ubꞌijnu tin e imbꞌutz y tin e mabꞌambꞌan conda arobꞌna que majax bueno lo que war uche,

pero tin e uputputir ut machi acano motor que axin ajajtzꞌa 100 veces.

11 Tin e ajmabꞌambꞌanir intaca ubꞌijnu tuaꞌ machi oꞌbꞌian,

y tamar era cꞌani eꞌbꞌtana watar tut inteꞌ ajcꞌampar xeꞌ imbꞌacꞌajr uwirnar tuaꞌ uwatzꞌi.

12 Pues imbꞌacꞌajr jay inteꞌ utajwi ubꞌa taca utuꞌ inteꞌ nuxi oso, jay war aqꞌuijna umen que loqꞌuesna uyarobꞌ.

Pero más imbꞌacꞌajr tut inteꞌ tuaꞌ utajwi ubꞌa taca tin e uputputir ut conda war uche lo que matucꞌa ucꞌampibꞌir.

13 Tin e uche e mabꞌambꞌanir upater tin e war taca uche lo que imbꞌutz,

ma tiaꞌ tuaꞌ utajwi e jiriar tama uyotot tama tunor ucuxtar tara tor e rum.

14 Conda acay inteꞌ qꞌuecraner aquetpa bꞌan cocha conda acay aꞌjni e jaꞌ tama unac inteꞌ witzir este que axin aquibꞌtzꞌa.

Y bꞌan ubꞌan que nojta ucꞌampibꞌir tuaꞌ anajtiri inteꞌ tut e qꞌuijnar tuaꞌ machi aꞌchꞌi.

15 Cawinquirar Dios uxejbꞌe ut conda actana axin bꞌan taca tin e uche inteꞌ nuxi mabꞌambꞌanir,

y uxejbꞌe ut ubꞌan conda tin e matucꞌa war uche achena utoyi tama inteꞌ mabꞌambꞌanir lo que machi uche.

16 Pues matucꞌa ucꞌampibꞌir tuaꞌ atojya tuaꞌ acansena e natanyaj tin e uputputir ut,

cocha matucꞌa e utzeriaj tama uyalma tuaꞌ acano.

17 Tin e atzay uwira ubꞌobꞌ war uyajta utobꞌ iraj iraj,

y bꞌan upiar inteꞌ xeꞌ turix tuaꞌ atacarsan conda ayan lo que war unumse ubꞌa inteꞌ.

18 Tin e uputputir ut atzay aquetpa fiador tuaꞌ otronteꞌ,

y jay tin e ulocse e tumin machi oꞌbꞌna tuaꞌ atojma, jax jaxir xeꞌ aquetpa tuaꞌ utoyi.

19 Tin e atzay uche e mabꞌambꞌanir, atzay aqꞌuecran,

y tin e aquetpa que jax taquix conda oꞌjron jax taca war utijres ubꞌa.

20 Matucꞌa tuaꞌ alocꞌoy uche tin e ubꞌijnu calapir tama uyalma,

y tin e amajresian iraj iraj aquetpa tuaꞌ acꞌaxi tujor tuqꞌuic tuqꞌuic problema.

21 Tzajtaca ut tin e ayan inteꞌ umaxtac xeꞌ uputputir ut,

y machi tuaꞌ atzay tin e tatabꞌir tuaꞌ tin e machi oꞌbꞌian.

22 E tzayer lo que ayan tama uyalma inteꞌ aquetpa bꞌan cocha inteꞌ remedio tama ucuerpo,

pero tin e ayan e tzꞌintzꞌar tama uyalma axin acꞌapa uqꞌuecꞌojsiaj.

23 Inteꞌ ajmabꞌambꞌan juez axin uchꞌami e tumin mucur

tuaꞌ uche acꞌaxi tujor tin e matucꞌa war uche.

24 Tin e oꞌbꞌna ubꞌijnu tin e imbꞌutz y tin e mabꞌambꞌan war ubꞌijnu tuaꞌ uchꞌami más e natanyaj,

pero tin e uputputir ut machi war ubꞌijnu tucꞌa ucꞌani, y war taca ubꞌijnu tama tuqꞌuic tuqꞌuic lo que ayan tama tunor or e rum.

25 E maxtac xeꞌ uputputir ut uche atzꞌintzꞌa uyalma utata,

y uche achꞌajran uyalma utuꞌ.

26 Majax imbꞌutz tuaꞌ uche atojma tin e uche jax taca lo que erach,

y majax imbꞌutz tuaꞌ ayobꞌorna inteꞌ ajcꞌampar umen que war uche lo que erach.

27 Tin e ayan e natanyaj tamar axin ucojco ubꞌa tuaꞌ machi oꞌjron meyra,

y inteꞌ winic xeꞌ intam ubꞌijnusiaj ucojco ubꞌa tuaꞌ machi aqꞌuijna wacchetaca.

28 Motor tin e uputputir ut axin arobꞌna que ayan e natanyaj tamar jay machi oꞌjron,

y axin arobꞌna que ayan ubꞌijnusiaj tin e umaqui uyej.