18
1 Tin e atzay aquetpa ubꞌajner, war taca ubꞌijnu tamar ubꞌa,
y uqꞌuecꞌojse uyalma tuaꞌ machi uchꞌami e bꞌijresiaj tuaꞌ otronteꞌ.
2 Tin e uputputir ut machi atzay uwira e canuar,
pero atzay oꞌjron iraj iraj tamar lo que war ubꞌijnu.
3 Conda achecta watar e mabꞌambꞌanir yaꞌ watar e subꞌar ubꞌan,
y conda inteꞌ uche ubꞌa que jax taquix axin axejbꞌna ut.
4 E ojroner lo que alocꞌoy tama uyalma inteꞌ winic xeꞌ ayan e natanyaj tamar aquetpa bꞌan cocha e jaꞌ xeꞌ intam,
y e natanyaj lo que ayan tamar, axin alocꞌoy bꞌan ani cocha atobꞌoy e jaꞌ tama inteꞌ cojn.
5 Ma ani jax imbꞌutz que inteꞌ juez uyacta axin bꞌan taca tin e uche e mabꞌambꞌanir,
y ma ani jax imbꞌutz tuaꞌ achena juzgar tin e matucꞌa war uche.
6 Conda tin e uputputir ut acay aqꞌuecran tut e inmojr,
war uche ubꞌa bꞌan ani cocha quisinic que ayan chi umen ajajtzꞌa.
7 Lo que oꞌjron tin e uputputir ut axin asajta umener,
y lo que ulocse tama uyej aquetpa bꞌan ani cocha inteꞌ lazo xeꞌ coyor tut.
8 E ojroner upater otronteꞌ aquetpa bꞌan ani cocha inteꞌ wiar xeꞌ intzaj tut tin e war uyubꞌi,
y oꞌchoy esto macuir uyalma.
9 Tin e acꞌoyi apatna aquetpa
bꞌan cocha tin e utijres lo que ayan tuaꞌ otronteꞌ.
10 E cꞌotorer lo que ayan tama ucꞌabꞌa Cawinquirar Dios aqꞌuecꞌo bꞌan ani cocha inteꞌ nuxi torre xeꞌ nojta uwatar,
y tin e erachobꞌ acꞌotoyobꞌ tut Cawinquirar Dios tuaꞌ ucorpes ubꞌobꞌ conda ayan lo que imbꞌacꞌajr.
11 Tin e ajtuminobꞌ war ubꞌijnuobꞌ que axin acojcnobꞌ umen utuminobꞌ bꞌan ani cocha inteꞌ chinam xeꞌ xojybꞌir taca inteꞌ nuxi petzbꞌir tun,
xeꞌ uchebꞌiobꞌ que mamajchi uyubꞌi oꞌchoy tamar.
12 Tin e uche ubꞌa que jax taquix cꞌani asajta,
pero tin e umanxujres ubꞌa cꞌani atajttzꞌa.
13 Tin e acay oꞌjron conda merato uyubꞌi lo que war oꞌjron upiar
war uchecsu ubꞌa que uputputir ut y que war usubꞌajres ubꞌa.
14 Inteꞌ winic aqꞌuecꞌoto tama uyalma motor que ajmuac,
pero jay oꞌchoy e tzꞌintzꞌar tama uyalma inteꞌ este que acꞌapa uqꞌuecꞌojsiaj ¿cocha nic tuaꞌ atꞌabꞌesna uyalma otronyajr?
15 Tin e ayan ubꞌijnusiaj axin acano iraj iraj,
y pasar uchiquinobꞌ tuaꞌ uchꞌamiobꞌ más e canuar.
16 Jay aqꞌueche axin inteꞌ regalo tut inteꞌ ajcꞌampar,
axin apascꞌa e bꞌir toit tuaꞌ uyubꞌi iyojron tacar.
17 Bꞌajcꞌat acꞌubꞌesna tin e acꞌotoy bꞌajxan tuaꞌ oꞌjron tut inteꞌ juez,
pero conda acꞌotoy tin e war atujchꞌa axin achecsuna que majax bꞌan numuy.
18 Pues conda ayan inteꞌ qꞌuecraner tujam chateꞌ nuquir winicobꞌ
erer asisijresnobꞌ conda uriobꞌ e Tumim y e Urim* E Urim y e Tumim jax chateꞌ chuchu tun xeꞌ cꞌampesna umen e gente tuaꞌ e Israel tama e onian tiempo tuaꞌ unatobꞌ tucꞌa ucꞌani e Dios conda ayan lo que aquetpa tuaꞌ uchiobꞌ. Iranic e Josué 14:2 tuaꞌ iwira lo que uchiobꞌ conda quetpa tuaꞌ uxeriobꞌ e rum taca inteꞌ inteꞌ chꞌajnarir tama e Israel. .
19 Jay atacre apiarobꞌ, axin ucojcuet
bꞌan ani cocha inteꞌ nuxi petzbꞌir tun xeꞌ ucojco inteꞌ chinam.
Pero jay icꞌaye ibꞌa axin ixquetpa xerbꞌir,
bꞌan ani cocha conda aquetpa macar inteꞌ nuxi portón tiaꞌ mamajchi uyubꞌi oꞌchoy.
20 Conda coybꞌi oꞌjron inteꞌ winic xeꞌ bꞌutꞌur taca e natanyaj aquetpa bꞌan cocha inteꞌ wiar xeꞌ intzaj ticoit,
y tin e utꞌabꞌse uyalma otronteꞌ xeꞌ war unumse ubꞌa axin atzay tamar lo que uche.
21 Tama or uyac inteꞌ ayan e cꞌotorer tuaꞌ e cuxtar y tuaꞌ e chamer,
y tamar era lo que oꞌjron inteꞌ erer aquetpa inteꞌ chojbꞌesiaj o inteꞌ bꞌax tut e inmojr.
22 Tin e utajwi uwixcar utajwi lo que imbꞌutz,
y war atzayresna umen Cawinquirar Dios.
23 Tin e matucꞌa ayan tacar axin oꞌjron taca tin e ajtumin y che: “Yajtan niut.”
Pero tin e ajtumin intaca aqꞌuecran.
24 Ayan tin e uche ubꞌa que war atzay uwira ubꞌa tacaron,
pero ayan tin e más atacbꞌajri que inteꞌ capiar.
*18:18: E Urim y e Tumim jax chateꞌ chuchu tun xeꞌ cꞌampesna umen e gente tuaꞌ e Israel tama e onian tiempo tuaꞌ unatobꞌ tucꞌa ucꞌani e Dios conda ayan lo que aquetpa tuaꞌ uchiobꞌ. Iranic e Josué 14:2 tuaꞌ iwira lo que uchiobꞌ conda quetpa tuaꞌ uxeriobꞌ e rum taca inteꞌ inteꞌ chꞌajnarir tama e Israel.